Ɔwɔ-mɛ̀n-yrikàn 5 - Ɛmɛẅi ankà ankrànkràn 2003

Owrú mán Ɔwɔ kɔ̀kɔ̀sɛ̀-ẅì

¹ Mɛ̀n kán owrú tɔ̀n ye serɛ dú ɔwrɔn léyi yɛ́ ɛgbù-tòbù wú nɔn n'ezì-kɔrɛ̀ màn lɔ mɛ̀n; owrú zì anhyrɛ̀ lɔ wú ye merɛ́n eci kɩ yɛ sɛn owrú lɔ ɛyri dɛ̀n ɔbɔ̀ɛn.

² Kɩ mɛ̀n kán ɛkɔrɛ̀srɔn Wɔ-kùyüre-wrɔn tɔ̀n kɛ dɔ́ esùva cüìcüìemɛ̀n le: “Antɔn de krɔn kpehɛ́n kɛ lɛ bɔyɛ ɛci-tɔn-ci hɔ̀n léyi ye bɩ yɛ tɔ́n owrú lɔ, ô kè vuru owrú lɔ nɛ́n?”

³ Tɛ́n ɔwrɔn zriɛmɛ́n bàdà, anhobɩ́ mán, ɛnhi mán, ɛnhibɩ́ anhɛ̀ mán, hɩ ká vuru owrú lɔ tɛ̀, ô kɛ̀ nyan nɛ̀n ɛmɛ̀n nɔn.

⁴ Mɛ̀n wú eyú bobrebe, ɔmuhi ye sɩ̀ cɔ̀ ɔwrɔn zriɛmɛ́n léyi krɔn kpehɛ́n kè vuru owrú lɔ, ô kɛ̀ nyan nɛ̀n ɛmɛ̀n nɔn.

⁵ Zɛtɛn ɛcüìcüì-bɔ̀ lɔ, ɔtɔ̀n kɛ dɔ́ mɛ̀n le: “E bɩ́ wú eyú. Ɛ̀ nyan: Zhüda mɛ̀n mɛ̀n gɔ̀ngɔsɔvɛ̀ lɔ, ɛnnɛncüi Davidɛ̀n mɛẅi wrɔn, nɛ́n kɔ́nkà; nɛ lɛ bɔyɛ ɛci-tɔn-ci ɔbɔɛ̀n hɔ̀n lɔ tɛ̀, kɩ ne le vuru owrú lɔ.”

⁶ Kɩ mɛ̀n kán Ɔwɔ kɔ̀kɔ̀sɛ̀ ẅì nyɔn ɛgbú-tòbù wanzi, ɛci kɔrɛkɔrɛ anzɔ̀ hɔ̀n lɔ mán ɛcüìcüì-bɔ̀ gbrɛnkɛ́n nɛ̀n ɔmùan. Nɛ̀n cá eci léyi ye wi esùva nɔn. Nɛ̀n ẅɛn ɛtrù ɔbɔ̀ɛn mán anvɛ̀ ɔbɔ̀ɛn léyi dú Ɔwɔ hɛ́n ɔbɔ̀ɛn léyi yɛ hán dú ɛnhibù mumù lɔ fɛn wú và nɔn.

⁷ Ɔwɔ kɔ̀kɔ̀sɛ̀ ẅì lɔ sɔnba ezì kɩ bɩ́ owru léyi dú ɔwrɔn léyi yɛ́ ɛgbú-tòbù wú nɔn, n'ezì-kɔrɛ̀-màn mɛ̀n.

⁸ Ɛnvra zri lɔ ɛci kɔrɛkɔrɛ anzɔ̀ lɔ mán ɛcüìcüì-bɔ̀ ɛẅia anzɔ lɔ shran annankruemɛ̀n Ɔwɔ kɔ̀kɔ̀sɛ̀-ẅì zìwú. Y'ɛmɛ̀n lɔ, ɔwrɔnwrɔn ẅɛn anhɛ́ mràn tɔ̀n mán ansikɛ grashɛ̀n, anjɔsàn ɛnhyì, hɩ lɔ de dú Ɔwɔ fɛcüè wɔ-sɛ̀n nɔn.

⁹ Yɔ krɛ́ ɛcɔ̀ wrù tɔ̀n: “Ɛ̀krɔn kpehɛ́n e le bɩ́ owrú lɔ, kɩ ɛ lɛ bɔyɛ n'ɛci-tɔn-ci hɔ̀n lɔ. Ɔmuhi ye dí mɛ́n owuemɛ̀n, kɩ v'ɛgbànkàn cice lɔ mɛ̀n, è bɩ́ ɛmɛ̀n mɛ̀ntɛ mɛ̀ntɛ bɔ̀, fɛcüè mɛ̀ntɛ mɛ̀ntɛ bɔ̀ mán ɛnhi wú anmàn mɛ̀ntɛ mɛntɛ bɔ̀, ɛ và sɩ́ Ɔwɔ.

¹⁰ Ɛ̀ srɔ yɔ ɛnnɛ̀ncüi dúyri Wɔ-cice-bɔ̀, ô yɔ dú b'Ɔwɔ lɔ n'ɛcice kɔ̀hɔ́n mɛ̀n, kɩ yɔ lɛ ẅɛn ɛyri ɛnhi wú.”

¹¹ Mɛ̀n vru mɛ̀n nyan kɩ mɛ̀n yá Ɔwɔ-kùyüre-bɔ̀ fɛcüè tɔ̀n sùva: yɔ dú fɛcüè bobrebe. Yɔ nyɔn, yɔ gbrɛnkɛ́n ɛgbú-tòbù lɔ ɔmùan ɛyri léyi ɛci kɔrɛkɔrɛ hɔ̀n mán ɛcüìcüì-bɔ̀ ndù nɔn,

¹² kɩ yɔ krɛ́ ɛcɔ̀ esùva cüìcüìemɛ̀n: “Ɔwɔ kɔ̀kɔ̀sɛ̀ ẅì léyi ye di owúemɛ̀n nɔn, krɔn kpehɛ́n kɛ̀ cɔ́ ɛkɔrɛ̀srɔn, ɛnnɛ̀ncüì-dì, ankà-nyrì mán ecüì, evrisì, eci-zrɔ mán ɛmrɛ́n!”

¹³ Mɛ̀n vru mɛ̀n yá Ɔwɔ-kɔrɛ̀-ci hɔ̀n lɔ fɛn léyi dú anhobɩ́, ɛnhi wú, ɛnhibɩ́ mán ecüemɛ̀n (Ɔwɔ-kɔrɛ̀-ci hɔ̀n lɔ fɛn léyi dú ɛnhibù mumù lɔ fɛn wú nɔn) kɛ krɛ́ ɛcɔ̀: “Nɛ́n léyi nɛ̀n yɛ́ ɛgbú-tòbù wú nɔn mán Ɔwɔ kɔ̀kɔ̀sɛ̀-ẅi lɔ, ɛmrɛ́n, ɛvrisì, eci-zrɔ mán ɛkɔrɛ̀srɔn kè dú nɛ tɛn ɛnvra lɔ fɛn!”

¹⁴ Ɛci kɔkɔrɛ anzɔ̀ hɔ̀n lɔ mrɛ́n ɔmùan le: “Kè dú ɔmu lɔ!” Kɩ ɛcüìcüì-bɔ̀ kɛ shran annankruemɛ̀n kɩ ke cüe nɛ̀n ankɔrɛ̀ ezìwúɛ.