Ɔwɔ-mɛ̀n-yrikàn 4 - Ɛmɛẅi ankà ankrànkràn 2003

Ankɔrɛ̀ ezìwú cüe anhobɩ́ anmàn

¹ Ndɔ lɔ mɛẅi, mɛ̀n cɔ́ ɛyrikàn nyantɛn tɔ̀n: mɛ̀n kán esù tɔ̀n srú anhobɩ́. Esùva léyi mɛ́n gɔ̀ yá, hɩ ke dí nkù kɛ hán ɛbrɛ̀n-gbá hɔ́ nɔn, kɛ dɔ́ mɛ̀n le: “Ɛ̀ kà ɛ̀ vá ɛnu lɔ, kɩ me le yé mɛ́n eci léyi kɛ lɛ wɔɛn zɛtɛn nɔn.”

² Ɛnvra zri lɔ, Ɛnhɛ́n bru mɛ̀n edù. Kɩ anhobɩ́, nanvrɛn lɔ, ɛgbú-tòbù tɔ̀n ndù. Ɛgbú-tòbù ndɔ lɔ wú ɔwrɔn tɔ̀n yɛ́;

³ nɛ gbrɛ́n kɛ hán anhàn shishi bùẅì hɔ̀n hɔ́. Nyangɔ̀dɛ̀n tɔ̀n gbrɛnkɛ́n ɛgbú-tòbù lɔ ɔmùan kɩ kɛ gbrɛ́n kɛ hán anhàn shishi bùẅì tɔ̀n hɔ́.

⁴ Ɛgbú-tòbù lɔ dòmɛ̀n, ɛgbú-tòbù ɛẅia anzɔ̀ nyantɛn hɔ̀n ndù, y'ɛwú lɔ ɛcüìcüì-bɔ̀ ɛẅia anzɔ̀ cɔ́ ɛceci wosú yɛ́, kɩ ansikɛ krusɔn-ci dú yɔ ɛnkru.

⁵ Ɛgbú-tòbù wú lɔ, anhobɩ́ hyà, esùva bobo mán ɛwú kù-dì ke dù kɛ và. Ɛnhyà lakà ɔbɔ̀ɛn ke wrú ɛgbú-tòbù zìwú; ndɔ lɔ de dú Ɔwɔ hɛ́n ɔbɔ̀ɛn hɔ̀n lɔ nɔn.

⁶ Ɛgbú-tòbù zìwú lɔ eci tɔ̀n ndù cá ecüe léyi hán zɛnci hɔ́ kɩ vru bi cehɛ́n hán obùẅì ankrànkràn hɔ́. Awanzi, ɛgbú-tòbù dòmɛ̀n lɔ, ɛci kɔrɛkɔrɛ anzɔ̀ nyɔn, anvɛ̀ dú yɔ ezì mán ɛmɛẅi.

⁷ Ɛnvrakpà ci kɔrɛkɔrɛ lɔ, kɛ cá gɔ̀ngɔ̀nsɔvɛ̀ tɔ̀n, kɩ anhyrɛmɛ̀n tɛn lɔ kɛ cá ɛnnànmán-cüì cɛ; anhɔnmɛ̀n ci lɔ ezì cá nɛ̀n ɔwrɔnẅì tɔ̀n; kɩ anzɔmɛ̀n ci lɔ kɛ cá gbohò tɔ̀n léyi dú etuemɛ̀n nɔn.

⁸ Ɛci kɔrɛkɔrɛ anzɔ̀ lɔ, ɔwrɔnwrɔn ẅɛn ɛtùvàkɔrɛ̀ ɔwole, anvɛ̀ dú ɛwú mán anhɛ̀. Yɔ dú ɛcɔ̀-krɛmɛ̀n ɛnvra lɔ fɛn, ɛnnyran mán ɛcɛ̀n: “Prɔnprɔn, prɔnprɔn, prɔnprɔn dú Ɛẅɛnwrɔn, ɛkɔrɛ̀srɔn Wɔ, nɛ́n léyi nɛ́n go dù, nɛ́n dù kɩ nɛ và nɔn.”

⁹ Ɛnvra totɔtɔ̀n léyi ɛci kɔrɛkɔrɛ hɔ̀n anzɔ̀ lɔ kɛ krɛ́ ɛcɔ̀, kɛ zrɔ eci, kɛ mrɛ́n, ô kɛ̀ tán ɔwrɔn léyi yɛ́ Ɛgbú-tòbù wú ɔkùɛn nɔn, Ɔwrɔn léyi dú ɛwúvà mɛ̀n ɛnvra lɔ fɛn nɔn,

¹⁰ ɛcüicüì-bɔ̀ ɛẅia anzɔ̀ lɔ, kɛ shran annankruemɛ̀n, ɔwrɔn léyi yɛ́ ɛgbù-tòbù wú nɔn zìwú, yɔ cüe ɔwrɔn léyi dú ɛwúvà mɛ̀n ɛnvra lɔ fɛn nɔn ankɔrɛ̀ ezìwúɛ. Yɔ kɔ́n y'ɛnkrusɔ́n-ci hɔ̀n lɔ cüe ɛgbú-tòbù zìwú kɩ yɔ dɔ̀ le:

¹¹ “Ɛẅɛnwrɔn, b'Ɔwɔ, eci-zrɔ, ɛmrɛ́n mán ɛkɔrɛ̀srɔn dú vɛ tɛn. Ɔmuhi vɛ́n de ɛ̀ hán ɛci hɔ̀n lɔ fɛn, yɔ dú ɛwúvà mɛ̀n ɔmuhi è ji ɔmu lɔ nɔn.”