Ɔwɔ-mɛ̀n-yrikàn 3 - Ɛmɛẅi ankà ankrànkràn 2003

Ɛmɛẅi ankà léyi ye yüre Sardɛ̀n anmàn-bɔ̀ nɔn

¹ “È merɛ́n owrú è yüre Ɔwɔ kùyüre-wrɔn léyi dú Sardɛ̀n anmàn Wɔ fɛcüe-bɔ̀ mɛ̀n nɔn: Nyàn ankà léyi ɔwrɔn léyi ẅɛn Ɔwɔ Hɛ́n ɔbɔ̀ɛn hɔ̀n mán okùcankro hɔ̀n ɔbɔ̀ɛn kɛ dɔ̀ nɔn: Mɛ̀n nyri v'ɔkɔ̀hɔ̀n-hán-kɔ̀hɔ̀n; mɛ̀n nyri ɔmu le ɛ̀ ẅɛn ɛmrɛ́n ɔmuhi è dú ankɔrɛkɔrɛ mɛ̀n, zɛtɛn e wù.

² Gbɛ̀ anvɛ̀, eci léyi ɛ ẅɛ̀n nɔn, è vru ɛ̀ hán nɛ̀n, nɛ̀n cɔ́ ecüì, yakɛ kɛ̀ cɔ́ ɛnvra léyi ne le wú mrìmrì nɔn. Ɔmuhi mɛ́n cɔ̀ mɛ́n nyrì le, v'eci-hán-ci hɔ̀n lɔ fɛn kè sɩ̀ krɔn kpehɛ́n m'Ɔwɔ zìwú nɔn.

³ Ankà-yé léyi ɛ cɔ̀ mán ɔmu le ɛ̀ hán ɛ̀ yá nɛ̀n nɔn, è krosi v'edomɛ̀n; è di ɔmùan zri n'ɛtɛ̀sɛ̀n, ô ɛ̀ crɔn v'eci-hán-ci. Ke dú kɛ è sɩ̀ gbɛ́ anvɛ̀, mɛ lɛ và ẅɛn mɛ́n kɛ lɛ hán ɛci-yerɛ-wrɔn hɔ́, kɩ e sɩ̀ nyri ɛnvra léyi mɛ lɛ và nɔn.

⁴ Tɛ́n, v'anwrɔn jan-bɔ̀, Sardɛ̀n anmàn dùku lɔ, kè sɩ̀ wá y'ɛceci hɔ̀n ɛnbrá edomɛ̀n. Yɔ lɛ hɔ̀n sɩ́ mɛ̀n, ɛceci wosuemɛ̀n, ɔmuhi yɔ ẅɛn yi kɔrɛ̀levri lɔ nɔn.

⁵ Anwrɔn hɔ̀n léyi kɛ lɛ kɔ̀nkà nɔn, ɔmu lɔ yɔ lɛ cɔ́ ɛceci wɔsù; mɛ́n sɩ̀ gbú y'ebi mɛ̀n sɔhɔ́ ɛwúvà kɔrɛ̀ wrú lɔ mɛ̀n. Dade zìwú mán n'ɛkùyüre-bɔ̀ zìwú, me le nyri ɔmu le yɔ dú mɛ tɛn.

⁶ Ke ji le ɔwrɔnwrɔn ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ fɛcüè-bɔ̀ nɔn!”

Ɛmɛẅi ankà léyi ye yüre Filadɛlfi anmàn Wɔ fɛcüè-bɔ̀ nɔn

⁷ “È merɛ́n owrú è yüre Ɔwɔ-kuyüre-wrɔn léyi dú Filadɛlfi anmàn Ɔwɔ-fɛcüè-bɔ̀ mɛ̀n nɔn: Nyàn ankà léyi, ɔwrɔn léyi dú prɔnprɔn mán annanwɔrɛ, nɛ́n léyi nɛ̀n ẅɛn ɛnnɛncüì Davidɛ̀n safɛ̀ lɔ, nɛ́n léyi ne srú kɩ ɔwrɔn zriɛmɛ́n ke sɩ́ sɛn rɔ́a nɔn, nɛ́n léyi nɛ sɛ̀n kɩ ɔwrɔn zriɛmɛ́n ke sɩ́ srú rɔ́a nɔn, nyan ankà léyi nɛ dɔ̀ nɔn:

⁸ Mɛ̀n nyri v'ɔkɔ̀hɔ̀n-hán-kɔhɔ̀n; mɛ̀n nyri ɔmu le ecüì ẅiɛ kɩ dú mɛ́n edomɛ̀n, kɩ ɔmu tɛ̀kɩ m'ɔmùan ankà-dɔ̀ wú, è dí ɔmùan zri kɩ è sɩ̀ krɔ mɛ̀n. Zɛtɛn, mɛ̀n srú esù tɔ̀n v'ezìwú, kɩ esù ndɔ lɔ ɔwrɔn zriɛmɛ́n ke sɩ̀ sɛ́n nɛ̀n rɔ́.

⁹ Nyàn eci léyi mɛ lɛ hán Anwa-wrɔn fɛcüè-bɔ̀ cüìcüì, anhyɔ̀n-bɔ̀ ndɔ hɔ̀n léyi ke bú y'edomɛ̀n kɛ hán Zhüifɛ̀n-bɔ̀, tɛ́n yɔ sɩ̀ dù Zhüifɛ̀n-bɔ̀: mɛ lɛ ẅɛn yɔ kèkrèmɛ̀n yɔ lɛ và shɛ́n mɛ́n annankru zìwú, ô yɔ mrɛ́n mɛ́n. Yɔ le nyri ɔmu le mɛ cüɛn mɛ́n.

¹⁰ Ɔmuhi ɛ̀ ẅɛn m'ɔmùan ankà-dɔ̀ ɛ̀ hɛ́n esɛ́ mɛ̀n, mɛ̀n mán mɛ lɛ wá mɛ́n esùva ɛnvra léyi ɛgbànkàn kɛ lɛ vá ɛnhibù mumù lɔ wú, ô ɛnhi wú anmàn-bɔ̀ hɔ̀n kè dú ɔwɔ̀ɛn-nyan mɛ̀n.

¹¹ Mɛ vá ɛnvra buriemɛ̀n. Ɛ̀ ẅɛn ɛshishiemɛ̀n eci léyi dú mɛ́n antamɛ̀n nɔn, ô ɔwrɔn zriɛmɛ́n ke bɩ́ bɩ́ v'ɔkɔ̀nká krusɔn-ci lɔ.

¹² Ɔkɔ̀nká-wrɔn lɔ, mɛ lɛ srɔ nɛ̀n m'Ɔwɔ lɔ n'ecice wɔn hinan-bù, kɩ nɛ́n sɩ̀ vru dú nanvrɛn lɔ nɛ̀n srɔ mrìmrì. N'ɛwú lɔ, me le merɛ́n m'Ɔwɔ bi mán m'Ɔwɔ anmàn bi, Zherüzalɛmɛ̀n wrù léyi dú anhobɩ́ kakɛ hɩ m'Ɔwɔ hán và. N'ɛwú lɔ me le vru mɛ̀n merɛ́n m'ebi wrù lɔ.

¹³ Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ-fɛcüè-bɔ̀ nɔn!”

Ɛmɛẅi ankà léyi ye yüre Laodise anmàn Ɔwɔ-fɛcüe-bɔ̀ nɔn

¹⁴ “È merɛ́n owrú è yüre Ɔwɔ-kùyüre-wrɔn léyi dú Laodise anmàn Ɔwɔ-fɛcüè-bɔ̀ mɛ̀n nɔn: Nyàn ankà léyi Krisì kɛ dɔ̀, nɛ́n léyi nɛ̀n dú ɔmùan-zri dalɛfuɛ-di-wrɔn mán annanwɔrɛ, nɛ̀n dú eci lɔ fɛn léyi Ɔwɔ hán nɔn, n'ɛnkrubɔmɛ̀n, nɛ dɔ̀ le:

¹⁵ Mɛ̀n nyri v'ɔkɔ̀hɔ̀n-hán-kɔ̀hɔ̀n; mɛ̀n nyri ɔmu le è sɩ̀ wroà kɩ e sɩ́ friɛ mán. Ke dú kɛ eci d'anhyrɛ̀ lɔ è dú ɔtɔ̀n!

¹⁶ Tɛ́n e sɩ́ friɛ kɩ è sɩ̀ wroà mán, ɛ̀ hán dòhò, kɩ mɛ lɛ vɛ́ mɛ́n m'anmùan mɛ̀n mɛ̀n ze!

¹⁷ Ɛ dɔ̀ le: ‘Mɛ̀n di ɛnnɛ̀ncüì kɩ mɛ̀n ẅɛn ɛci anvrɛnvrɛn, eci zriɛmɛ́n kè sɩ̀ ẅɛn mɛ̀n ɛmiàn.’ Annanwɔrɛ mɛ̀n lɔ, è sɩ̀ nyrì ɔmu le è dú ɛmian-wrɔn mán ejüedi-wrɔn! È dú ɛmian-wrɔn, ɛ̀ nyɔn ɛsɛ̀nkora, kɩ e sɩ́ kán ɛyri.

¹⁸ Hɩ le kruhú de me wore-ankà mɛ̀n yé mɛ́n, ô ɛ̀ wɔ́ ansikɛ léyi ɛnhyá nfi nɔn, m'antamɛ̀n, ô ɛ̀ srɔ ɛnnɛ̀ncüì annanwɔrɛ mɛ̀n. È vru ɛ̀ wɔ́ ɛceci wosú, ɛ̀ ẅɛn edomɛ̀n, ô ɛsɛ̀n-kora-nyɔn anvɛvrà ke bɩ́ ẅɛn mɛ́n, ɔmu zri lɔ ɛ̀ wɔ́ anvɛ̀ háwi, ɛ̀ hán v'anvɛ̀ ɛci ô yɔ kán ɛyri.

¹⁹ Anwrɔn hɔ̀n lɔ fɛn léyi mɛ cüɛ̀n nɔn, me di yɔ ebrè kɩ mɛ ẅɛn yɔ nukù. Zɛtɛn, ɛ̀ hán edùyi-ci, ô ɛ̀ crɔn v'eci-hán-ci.

²⁰ È die nukùɛ, mɛ̀n nyɔn angbàtà mùan kɩ mɛ gɔ́n esù ɛkɔrɛ̀; ke dú kɛ ɔwrɔn tɔ̀n kɛ yá m'esùva kɩ ke srú esù, me le bru nɛ̀n ɛbemɛ̀n kɩ nɛ́n mán mɛ̀n mɛhi bo le zî ɛci zri.

²¹ Anwrɔn hɔ̀n léyi kɛ kɔ́nkà nɔn, mɛ lɛ tán yɔ ɛkɔrɛ̀levri yɔ le bɩ́ ɛyri m'ɛgbú-tòbù lɔ wú, hán ɔmu le ɛnvra léyi mɛ́n kɔ́nkà nɔn, mɛ́n hɔ̀n mɛ̀n yɛ́, mɛ̀n mán Dade mɛhi n'ɛgbú-tòbù lɔ wú.

²² Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ fɛcüè-bɔ̀ nɔn!”