Ɔwɔ-mɛ̀n-yrikàn 20 - Ɛmɛẅi ankà ankrànkràn 2003

Annànwàn tɛ̀buri

¹ Zɛtɛn mɛ̀n kán Ɔwɔ-kùyüre-wrɔn tɔ̀n dú anhobɩ́ kakɛ; owú-bɔ̀ dúyri safɛ̀ mán gbràka vri tɔ̀n dú nɛ̀n antamɛ̀n.

² Nɛ̀n ẅɛn anwàn lɛbrì lɔ, ɛnbiɛhɛ́n lɛbrì, hɩ mɛ̀n kɛ dɔ̀ le anwawrɔn léyi ye bi Satan nɔn, kɩ nɛ̀n tɔ́n yi gbràka mɛ̀n kɛ̀ dì ɛnnanwàn tɛ̀buri.

³ Ɔwɔ-kùyüre-wrɔn lɔ kɔ́n nɛ̀n di owú-bɔ̀ dúyri, nɛ̀n sɛ́n esù safɛ̀ mɛ̀n kɩ nɛ̀n wá eci-tɔn-ci nɛ̀n brɛ́ angbàtà wú lɔ, ô anwàn lɛbrì lɔ ke bɩ́ vru zrɛ́n ɛnhi-wú-anmàn-bɔ̀ hàn kɩ annanwàn tɛ̀buri kɛ̀ vàcì. Ndɔ lɔ mɛẅi, ye le teze nɛ̀n ɛnvra buri.

⁴ Zɛtɛn mɛ̀n kán ɛgbú-tòbù hɔ̀n: anwrɔn hɔ̀n léyi yɛ́ yɔ ɛwúɛ nɔn, cɔ́ ɛkɔrɛ̀srɔn yɔ ci ɛmrɛ̀n. Mɛ̀n vru mɛ̀n kán anhɛ́n hɔ̀n léyi ye wri y'ɔmùan-zri-dì annanwɔrɛ ankà léyi Zhezü yé mán Ɔwɔ mùan-ankà-dɔ̀ wú nɔn. Yɔ sɩ̀ cüè ɔnɔ̀n lɔ mán nɛ́n picɛ̀ lɔ ankɔrɛ̀ ezìwúɛ, kɩ yɔ sɩ̀ cɔ̀ ɔnɔ̀n nrɛ̀n lɔ, ezìwú mán ɛmànmɛ̀n. Yɔ vru yɔ vá ɔkɔrɛ-bɔ̀ mɛ̀n kɩ yɔ ẅɛn ɛyri yɔ mán Krisì mɛhi ɛnnanwàn tɛ̀buri.

⁵ Owú-bɔ̀ nyàntɛn hɔ̀n lɔ ke sɩ̀ vru wɔrɛ̀ vá ɔkɔrɛ̀-bɔ̀ mɛ̀n, ke dú kɛ ɛnnànwàn tɛ̀buri kɛ vá cɔ̀. Ndɔ lɔ dú ɛnvrakpà wuemɛ̀n-dúfrɔ́.

⁶ Ɛnbɔrɛbru dú anwrɔn hɔ̀n léyi dú ɛnvrapkà wúemɛ̀n-dùfrɔ́ ndɔ lɔ mɛ̀n nɔn! Yɔ dú Ɔwɔ tɛn, kɩ anhyrɛmɛ̀n wú lɔ kè sɩ̀ ẅɛ̀n ɛkɔrɛ̀srɔn y'ɛwú; Yɔ le dú Ɔwɔ mán Krisì cice-bɔ̀, kɩ yɔ mán Krisì mɛhi yɔ lɛ ẅɛn ɛyri ɛnnànwàn tɛ̀buri.

Anwawrɔn léyi yɛ kɔ́nkà nɔn

⁷ Ɛnvra léyi ɛnnanwàn tɛ̀buri lɔ kɛ lɛ vàcì nɔn, yɛ lɛ mrɛ́n anwa-wrɔn anwɔn-mɛ̀n-wá-wɔn-mɛ̀n yɛ sɔhɔ́,

⁸ kɩ nɛ lɛ hɔ̀n nɛ̀n frɛ́n ɛnhi-wú-anmàn hɔ̀n léyi bonyi ɛnhibù mumù lɔ fɛn wú, hɩ mɛ̀n kɛ dɔ̀ le, ɛnhi-wú-anmàn hɔ̀n léyi ke gbri Ɔwɔ-fɛcüè-bɔ̀ nɔn. Nɛ lɛ borɛ yɔ ɛkru, ô yɛ kɔ́n anhà, kɩ yɔ lɛ cüɛn bobrebe kɛ lɛ hán ecüe gbàta-mùan hiẅia hɔ́.

⁹ Nyàn yɔ de yɔ nán esù hɔ́n ɛnhibù mumù lɔ fɛn wú, kɩ yɔ gbrɛnkɛ́n Ɔwɔ-fɛcüè bɩ́ lɔ ɔmùan, anmàn léyi Ɔwɔ kɛ cüɛn nɔn. Tɛ́n ɛnhyà dú anhobɩ́ kakɛ kɩ jrɛ́ yɔ.

¹⁰ Zɛtɛn anwa-wrɔn léyi kɛ frɛ́n yɔ nɔn, yɛ kɔ́n nɛ̀n di ɛnhyà-ẅì nɛ́nbà lɔ mɛ̀n, ɛyri léyi ɔnɔ̀n lɔ mán ɛyɔ̀n-wɔ-mùan-wú-ankà-dɔ́-wrɔn lɔ gɔ́ dù nɔn. Yɔ le dú nanvrɛn ejüediemɛ̀n ɛnnyran mán ɛcɛ̀n ɛnvra lɔ fɛn.

Ɛmɛẅitrɔ mrɛ̀ncì

¹¹ Zɛtɛn mɛ̀n kán ɛgbú-tòbù wosu vri tɔ̀n mán ɔwrɔn léyi yɛ́ nɛ̀n ɛwú nɔn. Ɛnhi mán anhobɩ́ srɛ́ esù she n'ɛtɛ̀sɛ̀n, kɩ ye sɩ̀ vru kàn yɔa.

¹² Zɛtɛn, mɛ̀n kán owú-bɔ̀, ɛcüìcüì hɔ̀n mán ɛẅi hɔ̀n, tɔhú nyɔn ɛgbú-tòbù zìwúɛ. Ye vuru ɛwrú hɔ̀n ɔmùan. Owrú nyantɛn tɔ̀n mán ye vuru ɔmùan, ɔkɔrɛ wrú lɔ. Ye ci owú-bɔ̀ ɛmrɛ̀n eci léyi yɔ hán nɔn wú, hán ɔmu le ye merɛ́n ɛwrú hɔ̀n lɔ mɛ̀n nɔn.

¹³ Ecüe tán owú-bɔ̀ hɔ̀n léyi nɛ́n bɩ nɔn. Owù mán owú-bɔ̀-hibù, yɔ mán yɔ tán y'owú-bɔ̀. Kɩ yɔ lɛ fɛn ye ci yɔ ɛmrɛ̀n eci léyi yɔ hán nɔn hɩ wú.

¹⁴ Owù mán owú-bɔ̀-hibù, yɔ lɔ fɛn yɛ kɔ́n yɔ ku ɛnhyà-ẅì nɛnbà lɔ mɛ̀n. Nɛ́nbà ndɔ lɔ dú anhyrɛmɛ̀n wù.

¹⁵ Ɔwrɔn totɔtɔ̀n léyi ye sɩ̀ merɛ̀n n'ebi ɔkɔrɛ-wrú lɔ mɛ̀n nɔn, yɛ́ kɔ́n nɛ̀n dí ɛnhyà-ẅì nɛ́nbà lɔ mɛ̀n.