Ɔwɔ-mɛ̀n-yrikàn 2 - Ɛmɛẅi ankà ankrànkràn 2003

Ɛmɛẅi ankà léyi ye yüre Efɛzɛ̀n anmàn Wɔ-fɛcüè-bɔ̀ nɔn

¹ “È merɛ́n owrú è yüre Ɔwɔ kùyüre-wrɔn léyi dú Efɛzɛ̀n anmàn Wɔ-fɛcüè-bɔ̀ mɛ̀n nɔn: Nyàn ankà léyi, ɔwrɔn léyi ẅɛn okùcankro hɔ̀n ɔbɔ̀ɛn lɔ n'ezi-kɔrɛ̀ màn mɛ̀n, kɩ kɛ nán esù ansikɛ kɛniɛn hɔ̀n ɔbɔ̀ɛn lɔ y'anwanzi kɛ dɔ̀ nɔn:

² Mɛ̀n nyri v'ɔkɔ̀hɔ̀n-hán-kɔ̀hɔ̀n, ɛgbànkàn léyi ɛ̀ tán v'edomɛ̀n mán v'ɛnbɔrɛ-ẅɛ̀n-hɛ́n-sɛ́. Mɛ̀n nyri ɔmu le e sɩ́ cüɛn anbɔrɛ-bɔ̀, anwrɔn hɔ̀n léyi kɛ krɛ́ y'edomɛ̀n ɔkɔ̀hɔ̀n-wá-bɔ̀ nɔn, ɛ̀ wɔɛn yɔ ɛ̀ nyan, tɛ́n yɔ sɩ̀ dù ɔkɔ̀hɔ̀n-wá-bɔ̀ kɩ ɛ cɔ̀ e nyrì le, yɔ dú anhyɔ̀n-bɔ̀.

³ Ɛ̀ ẅɛn ɛnbɔrɛ-ẅɛ̀n-hɛ́n-sɛ́, ɛ̀ kán ɛgbàn m'ɛkruhú, kɩ è sɩ̀ wù v'edomɛ̀n edù.

⁴ Tɛ́n mɛ̀n ẅɛn ebrè tɔ̀n me le di mɛ́n: e sɩ́ vru cüɛn mɛ̀n kɛ hán ɛnkrubɔmɛ̀n lɔ hɔ́.

⁵ E nyri ɛyri léyi e dù è bore nɔn, n'ɛwú ciemɛ̀n! Yi ankà kè bru mɛ̀n, ɛ̀ crɔn v'eci-hán-ci, ô ɛ̀ hán eci kɛ̀ hán ɛnkrubɔmɛ̀n hɔ́. Ke dú kɛ e sɩ́ ji ɛ̀ crɔn, mɛ lɛ và cɔ́ mɛ́n, kɩ me le bɩ́ vɛ́n kɛ̀niɛn lɔ mɛ̀n sɔhɔ́ n'ɛhɛ́n-yriɛ.

⁶ Tɛ́n, nyàn eci léyi ke le bɩ́ mɛ́n kè díe nɔn: e dù ɛ̀ hán mɛ̀n hɔ́, e sɩ́ cüɛn antɛ̀buri-sɛ́n-bɔ̀ ankà.

⁷ Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá ankà léyi Ɛnhɛ́n kɛ dɔ́ Ɔwɔ-fɛcüè-bɔ̀ nɔn! Anwrɔn hɔ̀n léyi kɛ kɔ́n kà nɔn, mɛ lɛ tán yɔ ɛcizî ɛwùvà-kɔrɛ̀ tɛ̀-ẅì hɔ̀n léyi dú Ɔwɔ kɛ̀tɛ̀ lɔ mɛ̀n nɔn.”

Ɛmɛẅi ankà léyi ye yüre Smirnɛ̀n anmàn Wɔ-fɛcüè-bɔ̀ nɔn

⁸ “È merɛ́n owrú è yüre Ɔwɔ-kùyüre-wrɔn léyi dú Smirnɛ̀n anmàn nɔn: Nyàn ankà léyi kpàkpà-wrɔn mán ɛmɛẅi-trɔ-wrɔn kɛ dɔ̀ nɔn, ɔwrɔn léyi nwù kɩ vru vá ɔkɔrɛ-bɔ̀ mɛ̀n nɔn:

⁹ Mɛ̀n nyri v'ejüedì mán v'ɛmiàn; tɛ́n annanwɔrɛ mɛ̀n lɔ, è di ɛnnɛ̀ncüì! Mɛ̀n nyri ankà gbàn léyi anwrɔn hɔ̀n léyi ke bú y'edomɛ̀n kɛ hán Zhüifɛ̀n-bɔ̀ hɔ́ hɩ kɛ dɔ́ tán mɛ́n nɔn, tɛ́n yɔ sɩ̀ dù Zhüifɛ̀n-bɔ̀: yɔ dú Anwa-wrɔn-fɛcüè tɔ̀n!

¹⁰ E bɩ́ sú ɛgbànkàn léyi ɛ lɛ cɔ̀ nɔn. Die nukùɛ: anwawrɔn kɛ lɛ wɔɛn nyɛ̀n nyan, kɩ ny'ɛmɛ̀n lɔ, ne le ku bobrebe anwɔn-mɛ̀n-wá-wɔn mɛ̀n; yɛ lɛ hán nyɛ̀n ɛgbàn ɛbi ɛvà. È di ɔmùan zri hàn kɩ kɛ cɔ́ v'owú vra, kɩ mɛ lɛ tán mɛ́n ɛkɔ̀nkà krusɔn-ci, ɛwúvà léyi ke sɩ́ trɔa nɔn.

¹¹ Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ-fɛcüè-bɔ̀ nɔn! Anwrɔn hɔ̀n léyi kɛ lɛ kɔ̀nkà nɔn, yɔ sɩ̀ vru wú anhyrɛmɛ̀n wù lɔ.”

Ɛmɛẅi ankà léyi ye yüre Pergamɛ̀n anmàn Wɔ-fɛcüè-bɔ̀ nɔn

¹² “È merɛ́n owrú è yüre Ɔwɔ-kùyüre-wrɔn léyi dú Pergamɛ̀n anmàn nɔn: Nyàn ankà léyi ɔwrɔn léyi ẅɛn ezì-anhyrɛ̀-nyan-she piɛnpiɛn kɛ dɔ̀ nɔn:

¹³ Mɛ̀n nyri ɛyri léyi ɛ̀ sɔ́n ebɩ́ nɔn: ɛyri léyi anwa-bɔ̀ wrɔn cüìcüì gbú-tòbù ndù nɔn. Ɛ̀ brɛ́ mɛ̀n kɩkɩ ɛ̀ hɛ́n kɩ è sɩ̀ crɔ̀n ankàẅìbùtan léyi ɛ̀ ẅɛn mɛ̀n ɛmɛ̀n nɔn, annannan le ɛnvra léyi ye wri Antipasɛ̀n, mɛ́n dalɛfuɛ mùan-zri-di-wrɔn, ny'anmàn, ɛyri leyi anwa-bɔ̀ wrɔn cüìcüì sɔ́n ebɩ́ nɔn.

¹⁴ Tɛ́n, mɛ̀n ẅɛn ebrè jan me le di mɛ́n: ɛ̀ ẅɛn anwrɔn dú mɛ́n ɛbemɛ̀n kɛ hán Balaamɛ̀n wɔ kɔ̀hɔ̀n. Ɔwrɔn ndɔ lɔ kɛ wá balakɛ̀n ankà kɛ̀ krɔn Izraɛlɛ̀n ẅì hɔ̀n antawrɔn, ô yɔ rá ecice nɔ̀n léyi yɛ tán antɛ̀buri-wɔ, kɩ kɛ wá tán yɔ yɔ hán eci-gbàngbàn kɔ̀hɔ̀n.

¹⁵ Ɔmu zri lɔ, è vru ɛ̀ ẅɛn anwrɔn dú mɛ́n ɛbemɛ̀n kɛ sɛ́n antɛ̀buri.

¹⁶ Ɛ̀ crɔn v'eci-hán-ci. Kè sɩ̀ dù ɔmu lɔ hô, mɛ lɛ và cɔ́ mɛ́n ɛnvra bruemɛ̀n, kɩ anwrɔn ndɔ hɔ̀n lɔ, mɛ lɛ kɔ́n yɔ anhà, ɛnyan-shé léyí dú mɛ̀n anmùan mɛ̀n kɛ srɔ nɔn, mɛ̀n.

¹⁷ Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ-fɛcüè-bɔ̀ nɔn! Anwrɔn hɔ̀n léyi kɛ lɛ kɔ̀nkà nɔn, mɛ lɛ tán yɔ anhobɩ́ ci-zî léyi dú ɛbánmɛ̀n nɔn. Me le vru mɛ̀n tán ɔwrɔn zrizri y'ɛmɛ̀n lɔ, obùẅì wosù tɔ̀n léyi n'ɛwú lɔ ye merɛ́n ebi wrù tɔ̀n léyi ɔwrɔn zriɛmɛ́n kè sɩ̀ nyrìɛn, ke dú kɛ kè sɩ̀ dù ɔwrɔn léyi yɛ tán ebi lɔ nɔn.”

Ɛmɛẅi ankà léyí ye yüre Tiatirɛ̀n anmàn Wɔ-fɛcüè-bɔ̀ nɔn

¹⁸ “È merɛ́n owrú è yüre Ɔwɔ-kùyüre-wrɔn léyí dú Tiatirɛ̀n anmàn, Ɔwɔ-fɛcüè-bɔ̀ lɔ mɛ̀n nɔn: Nyàn ankà léyi Ɔwɔ Ẅì kɛ dɔ̀ nɔn, nɛ́n léyi anvɛ̀ kɛ gbrɛ́n nɛ̀n kɛ hán ɛnhyá hɔ́, kɩ annan kɛ kɛ̀n kɛ hán pritù ẅì léyi ye fi edomɛ̀n nɔn hɔ́.

¹⁹ Mɛ̀n nyri v'ɔkɔ̀hɔ̀n-hán-kɔ̀hɔ̀n, v'ɛcüɛ̀n, v'ɔmùan-zri-dì, v'edùyì-ci-hán mán v'ɛnbɔrɛ-ẅɛ̀n-hɛ́n-sɛ́. Mɛ̀n vru mɛ̀n nyri ɔmu le zɛtɛ̀ lɔ, è dú edùyiemɛ̀n vrán ɛnkrubɔmɛ̀n lɔ.

²⁰ Tɛ́n mɛ̀n ẅɛn ebrè tɔ̀n me le di mɛ́n: ɛ̀ tán Zhezabɛlɛ̀n ɛkɔrɛ̀levri, ɛnnyɔnwrɔn ndɔ léyi ke bú n'edomɛ̀n kɛ hán Ɔwɔ-mùan-wú-ankà-dɔ́-hi nɔn. Nɛ zrɛ́n m'ɛci-bɩ̀tan-bɔ̀, nɛ wá tán yɔ, yɔ hán ɛci gbàngbàn kɩ nɛ hán yɔ, yɔ rá ɛcice nɔ̀n hɔ̀n léyi yɛ tán antɛ̀buri nɔn.

²¹ Mɛ̀n tán nɛ̀n ɛnvra, ô nɛ̀n crɔn n'eci-hán-ci, tɛ́n nɛ́n sɩ́ ji nɛ̀n crɛ́ ejüi nɛ̀n sɔ́n n'eci-gbàngbàn hán lɔ.

²² Hɩ le kruhú de mɛ lɛ kɔ́n nɛ̀n ze ɛgbànkàn sofà tɔ̀n wú; me le vru mɛ̀n wá ɛgbànkàn vri mɛ̀n tán anwrɔn léyi yɔ mɛhi yɔ dɛ́ nɔn, ke dú kɛ yɔ sɩ̀ tezè eci gbàngbàn leyí nɛ wá tán yɔ yɔ hán nɔn.

²³ Kɩ me le vru mɛ̀n hán n'ɛẅì hɔ̀n kè wù. Ɔmu lɔ de Ɔwɔ-fɛcüè-bɔ̀ lɔ fɛn ke le nyri ɔmu le me nyri anwrɔnẅì ankatro hɔ̀n mán y'ɛnbɔrɛmɛ̀n ci hɔ̀n lɔ nɔn. Me le di ɔwrɔnwrɔn eci léyi nɛ̀n hán nɔn yi wɔ̀ɛn.

²⁴ Tɛ́n nyɛ́n léyi, Tiatirɛ̀n anmàn lɔ, nyɛ́n sɩ̀ bɩ ɛyɔ̀n wɔ ankà ndɔ lɔ, kɩ nyɛ́n sɩ̀ shrì nyɛ́n bɩ eci léyi anwrɔn ke bi ‘Anwawrɔn ankà-bán-ankà vrɛn hɔ̀n’, nyàn ankà léyi mɛ dɔ̀ nɔn: mɛ́n sɩ̀ tán nyɛ̀n ɛnlowrú nyàntɛn.

²⁵ Tɛ́n nyɛ́n ẅɛn ɛshishiemɛ̀n eci léyi nyɛ́n ẅɛ̀n nɔn, hàn kɩ mɛ̀n và.

^26-28 Anwrɔn hɔ̀n léyi kɛ lɛ kɔ̀nkà, kɩ kɛ lɛ hán m'ɛkɔrɛ̀-zì-ci hàn kɩ ɛtrɔmɛ̀n nɔn, mɛ lɛ tán yɔ ɛkɔrɛ̀srɔn léyi mɛ́n mumù mɛ̀n cɔ́ Dade yri nɔn: mɛ lɛ tán yɔ ɛkɔrɛ̀srɔn ɛnhi-wú-anmàn hɔ̀n wú, yɔ lɛ nyrɔn ɛnhi-wú anmàn hɔ̀n lɔ ɛngbɛn-ẅì kɔrɛ̀levri shishiemɛ̀n, kɩ yɔ lɛ boyɛ yɔ kɛ lɛ hán antà sî hɔ́. Me le vru mɛ̀n tán yɔ ɛcɛ̀n dɔ̀gbɔ̀.

²⁹ Ke ji le ɔwrɔnwrɔn, ke dú kɛ nɛ̀n ẅɛn nukù hô, nɛ̀n yá anvrɛnvrɛn ankà léyi Ɛnhɛ́n kɛ dɔ́ Ɔwɔ fɛcüè-bɔ̀ nɔn!”