Ɔwɔ-mɛ̀n-yrikàn 19 - Ɛmɛẅi ankà ankrànkràn 2003

¹ Ndɔ lɔ n'ɛmɛẅi, mɛ̀n yá esùva cüìcüì tɔ̀n dú anhobɩ́ cá fɛcüè bobrebe hɔ̀n sùva; nɛ dɔ̀ le: “Aleluyà! Nyɛ́n mrɛ́n Ɛẅɛnwrɔn! Ɛnkrukɔrɛ̀, eci-zrɔ mán ɛkɔrɛ̀srɔn dú b'Ɔwɔ tɛ́n!

² N'ɛmrɛ̀ncì hɔ̀n dú annanwɔrɛ mán ɛnyrɔnnan mɛ̀n! Ɔmuhi nɛ̀n bó wowie-nyɔnwrɔn vri lɔ nwù, nɛ́n léyi nɛ jrɛ́ ɛnhi, n'eci-gbàngbàn-kɔ̀hɔ̀n-hán mɛ̀n. Ɛẅɛnwrɔn hán nɛ̀n nɛ̀n krɛ́ ɛci, n'eci-bɩ̀tan-bɔ̀ hɔ̀n wù lɔ wú.”

³ Kɩ yɔ vru yɔ dɔ̀ le: “Aleluyà! Nyɛ́n mrɛ́n Ɛẅɛnwrɔn! Anmàn cüìcüì léyi yɛ wá ɛnhyà nɔn, n'ɛnhyàbri kɛ hɔ́n ɛwú ɛnvra lɔ fɛn!”

⁴ Ɛcüìcüì-bɔ̀ ɛẅia anzɔ̀ lɔ mán ɛci kɔrɛkɔrɛ hɔ̀n anzɔ̀ lɔ shran annankruemɛ̀n kɩ ke cüe Ɔwɔ ankɔrɛ̀ ezìwúɛ, nɛ́n léyi nɛ̀n yɛ́ ɛgbú-tòbù wú, kɩ yɔ dɔ̀ le: “Kè dú ɔmu lɔ! Aleluyà! Nyɛ́n mrɛ́n Ɛẅɛnwrɔn!”

Ɔwɔ-Kɔ̀kɔ̀sɛ̀-ẅì yiri-koran ci-zî

⁵ Yɛ yá esùva tɔ̀n dú ɛgbú-tòbù wú nvà; nɛ dɔ̀ le: “Nyɛ́n mrɛ́n b'Ɔwɔ lɔ, nyɛ lɛ fɛn n'eci-bɩtan-bɔ̀, nyɛ́n léyi nyɛ́n ẅɛn n'ɛwa, ɛcüìcüì hɔ̀n mán ɛẅì hɔ̀n!”

⁶ Zɛtɛn mɛ̀n yá esùva tɔ̀n cá fɛcüè bobrebe hɔ̀n sùva; esùva lɔ ke shrì kɛ hán ɛnshi vri léyi kɛ nàn kɛ hán ɛwú-kù-dì hɔ́. Nyàn ankà léyi yɛ dɔ̀ nɔn: “Aleluyà! Nyɛ́n mrɛ́n Ɛẅɛnwrɔn! Ɔmuhi Ɛẅɛnwrɔn, bɔ́ ɛkɔrɛ̀srɔn-Wɔ lɔ, yrɛ́ n'ɛyri-ẅɛ̀n lɔ!

⁷ Pɔpüɛ̀ kɛ̀ brá bɔ̀, ô bɔ̀ dú ɛnbɔrɛbruemɛ̀n, bɔ̀ tán nɛ̀n eci-zrɔ! Ɔmuhi Ɔwɔ Kɔ̀kɔ̀sɛ̀-ẅì yiri-koran-ci-zî vrá cɔ̀a, kɩ nɛ́n hi krɔn kpehɛ́n.

⁸ Yɛ tán nɛ̀n ɛceci tɔ̀n léyi ye bɩ́ jese-ẅì càsa léyi kɛ gbrɛ́n ki fì nɔn, ye dù.” (Jese-ẅì càsa lɔ de dú ɛnyrɔnnan ci-hán hɔ̀n lɔ fɛn léyi Ɔwɔ-fɛcüè-bɔ̀ kɛ hán nɔn.)

⁹ Ɔwɔ-kùyüre-wrɔn lɔ kɛ dɔ́ mɛ̀n le: “È merɛ́n: Ɛnbɔrɛbru dú anwrɔn hɔ̀n léyi ye bi Ɔwɔ-Kɔ̀kɔ̀sɛ̀-ẅì yiri ci-zî koran lɔ mɛ̀n nɔn.” Kɩ nɛ́n dɔ̀ le: “Ndɔ lɔ dú Ɔwɔ mùan-ankà-dɔ̀ annanwɔrɛ.”

¹⁰ Mɛ̀n bore nɛ̀n annan zìwú, ô mɛ̀n cüe nɛ̀n ankɔrɛ̀ ezìwúɛ, tɛ́n nɛ dɔ́ mɛ̀n le: “E bɩ́ hán ndɔ lɔ! Mɛ̀n dú eci-bɩtan-wrɔn hán vɛ́n hɔ́, kɩ mɛ́n dù hán ɔmuan-ẅì hɔ̀n léyi di ɔmùan-zri annànwɔrɛ ankà léyi Zhezü yé nɔn wú. Ɔwɔ de ke ji le è cüe ankɔrɛ̀ ezìwúɛ nɔn!” Annanwɔrɛ ankà léyi Zhezü yé nɔn, nyàn eci léyi kɛ nyrɔn Ɔwɔ-mùanwú-ankà-dɔ́-bɔ̀ nɔn.

Kpàngɔ-wú-yɛ́-wrɔn léyi bru kpàngɔ wosú wú nɔn

¹¹ Zɛtɛn mɛ̀n kán anhobɩ́ gbɛ́ ɔmùan, kɩ kpàngɔ wosu tɔ̀n srɔ. Ɔwrɔn léyi yɛ́ nɛ̀n ɛwú nɔn, ye bi nɛ̀n Ɔmùanzri-dì mán Annanwɔrɛ; ne ci ɛmrɛ̀n kɩ nɛ kɔ́n anhà ɛnyrɔnnan mɛ̀n.

¹² N'anvɛ̀ hɔ̀n lɔ kɛ gbrɛ́n kɛ hán ɛnhyà hɔ́ kɩ ɛnkrusɔn-ci hɔ̀n bobrebe dú nɛ̀n ɛnkru. Nɛ̀n di ebi tɔ̀n ye merɛ́n, kɩ nɛ́n zri kɩ nɛ̀n nyri ebi lɔ.

¹³ Nɛ̀n cɔ́ ɛceci she tɔ̀n ɛnkrɛ̀ dú edomɛ̀n. Ye bi nɛ̀n “Ɔwɔ mùan-ankà-dɔ̀”.

¹⁴ Anhobɩ́ anhà-kɔ́n fɛcüè hɔ̀n dú nɛ̀n ɛmɛẅi, yɔ yɛ́ kpàngɔ wosu wú, kɩ yɔ cɔ́ ɛcàsa ẅì ceci wosu fifi.

¹⁵ Anhà-kɔ́n-nyan piɛnpiɛn tɔ́n dú nɛ̀n anmùan mɛ̀n srɔ, hɩ de ne bɩ ne gorɛ ɛnhi wú anmàn hɔ̀n nɔn. Nɛ lɛ nyrɔn yɔ ɛngbɛn ẅì kɔrɛ̀levriemɛ̀n, kɩ nɛ lɛ boyɛ ɛntàn wɔnsɛn tɛ̀-ẅì lɔ, ɛkɔrɛ̀srɔn Wɔ mɛ̀nhyì shishi tàn-borɛ-ci lɔ mɛ̀n.

¹⁶ N'ɛceci she lɔ wú mán n'annan-bɔ̀n-mɛ̀n ye merɛ́n ebi ndɔ lɔ: “Ɛnnɛncüì hɔ̀n Nɛ̀ncüì mán ɛẅɛn-bɔ̀ Ẅɛnwrɔn”.

¹⁷ Zɛtɛn mɛ̀n kán Ɔwɔ-kùyüre-wrɔn tɔ̀n nyɔn ɛnbriemɛ̀n. Ne di bobo ecüìemɛ̀n tán annrɛn hɔ̀n lɔ fɛn léyi ke tú ɔwràn mɛ̀n ɛwúɛ hɛ́n le: “Nyɛ́n và, nyɛ́n bɔrɛ ɛkru Ɔwɔ ci-zî vri lɔ mɛ̀n!

¹⁸ Nyɛ́n và nyɛ́n rá ɛnnɛncüì hɔ̀n ẅia, anhà-kɔ́n-bɔ̀ cüìcüì mán gɔliɛ-bɔ̀ ẅia, kpàngɔ hɔ̀n mán yɔ kpàngɔ-wú-yɛ́-bɔ̀ ẅia, anwrɔnẅì lɔ fɛn, yɔ hɔ̀n léyi ẅɛn y'edomɛ̀n mán anwɔ̀n-bɔ̀, ɛẅì hɔ̀n mán ɛcüìcüì hɔ̀n ẅia.”

¹⁹ Zɛtɛn mɛ̀n kán ɔnɔ̀n lɔ, ɛnhi wú nɛncüì hɔ̀n mán y'anhà-kɔ́n-fɛcüè-bɔ̀, bɔrɛkru, ô kɛ̀ kɔ́n nɛ́n léyi nɛ̀n yɛ́ kpàngɔ wú, nɛ́n mán n'anhà-kɔ́n-fɛcüè-bɔ̀ anhà.

²⁰ Yɛ ẅɛn ɔnɔ̀n lɔ, ɔmu zri lɔ yɛ ẅɛn ɛyɔ̀n-wɔ-mùan-wú-ankà-dɔ́-wrɔn léyi hán anvɛmɛ̀n-frɛ́n-ci hɔ̀n lɔ n'ezìwú, ô kɛ̀ zrɛ́n anwrɔn hɔ̀n léyi cɔ́ ɔnɔ̀n lɔ n'ɛnrɛ̀n, kɩ ke cüe nɛ́n picɛ̀ lɔ ankorɛ̀ ezìwúɛ nɔn. Yɛ kɔ́n ɔnɔ̀n lɔ mán ɛyɔ̀n-wɔ-mùan-wú-ankà-dɔ́-wrɔn lɔ ankɔrɛkɔrɛ mɛ̀n ku ɛnhyà-ẅì nɛnbà lɔ mɛ̀n.

²¹ Yɔ gɔliɛ-bɔ̀ lɔ fɛn wú anhà-kɔ́n-nyan léyi dú kpàngɔ-wú-yɛ́-wrɔn mùan mɛ̀n srɔ nɔn, kɩ annrɛn hɔ̀n lɔ fɛn cɔ́ ɛci-zî y'anẅia lɔ mɛ̀n.