Ɔwɔ-mɛ̀n-yrikàn 18 - Ɛmɛẅi ankà ankrànkràn 2003

Babilɔnɛ̀n bore vra

¹ Ndɔ lɔ n'ɛmɛẅi, mɛ̀n kán Ɔwɔ-kùyüre-wrɔn nyantɛn tɔ̀n dú anhobɩ́ kakɛ. Nɛ̀n ẅɛn ɛkɔrɛ̀srɔn vri tɔ̀n, kɩ n'evrisì lɔ kɛ gbrɛ́n ɛnhi mumù lɔ wú.

² Ne di bobo ecüiemɛ̀n: “Nɛ̀n bore, nɛ̀n bore Babilɔnɛ̀n cüìcüì lɔ! Zɛtɛ̀ lɔ nɛ̀n srɔ anwa-bɔ̀ dúyri, ɛbán-yri léyi dú anhɛ́n gbàngbàn hɔ̀n mɛ̀ntɛ mɛ̀ntɛ lɔ fɛn tɛn nɔn; nanvrɛn de annrɛn hɔ̀n mán nbrá mɛ̀n nɔ̀n hɔ̀n mɛ̀ntɛ mɛ̀ntɛ léyi kɛ cà nɔn, sɔ́n ebɩ́.

³ Ɛnhi-wú-anmàn hɔ̀n lɔ fɛn mi n'ɛnbramɛ̀n-ci-hán mɛ̀nhyì-tàn wɔnsɛn lɔ. Ɛnhi wú nɛncüì hɔ̀n lɔ dú eci-gbàngbàn-hán mɛ̀n nɛ́n mán yɔ mɛhi kɩ ɛnhi wú anhàn-zhrɛ-bɔ̀ di ɛnnɛ̀ncüì n'eci-ankrànkràn-cüɛ̀n léyi ke sɩ̀ ẅɛ̀n ɔtrɔ nɔn wú.”

⁴ Zɛtɛn mɛ̀n yá esùva nyàntɛn tɔ̀n dú anhobɩ́ và, kɩ kɛ dɔ̀ le: “Nyɛ́n cɔhɔ́ n'anwanzi, mɛ́n fɛcüè, ô nyɛ́n bɩ́ srɔ n'ɛkɔrɛ̀wa-wrɔn n'ɛgbàn hɔ̀n lɔ hán mɛ̀n, ô nyɛ́n bɩ́ cɔ́ ɛgbàn-hán-ci léyi kɛ lɛ và ke gorɛ nɛ̀n nɔn.

⁵ Ɔmuhi n'ɛgbàn hɔ̀n lɔ wá nkpò hàn kɩ cɔ́ anhobɩ́, kɩ n'eci-fɔn ci-hán kè sɩ̀ yrù Ɔwɔ esùva.

⁶ Nyɛ́n hán nɛ̀n eci kɛ̀ hán hɩ le nɛ̀n hán anwrɔn nyantɛn hɔ̀n nɔn hɔ́, eci léyi nɛ̀n hán nɔn, nyɛ́n dí nɛ̀n yi wɔ̀ɛn d'anhyrɛ̀. Nyɛ́n ku ɛntàn kɛ̀ sɔ́ and'anhyrɛ̀ ke yɩ́ nɛ́n grashɛ̀n kɛ̀ vrán hɩ léyi nɛ tán anwrɔn nyantɛn hɔ̀n ke mì nɔn.

⁷ Nyɛ́n tán nɛ̀n ɛgbànkàn mán ejüedì zri hɔ̀n léyi nɛ̀n hán anwrɔn n'ecizrɔ mɛ̀n mán n'evridì lɔ mɛ̀n. Nɛ dɔ́ n'edòmɛ̀n le: ‘Mɛ̀n yɛ́ ɛnu lɔ hán ɛnnɛ̀ncüì-hi hɔ́, mɛ̀n sɩ̀ dù ɛngrɔn-hi, kɩ mɛ́n sɩ̀ nyri ɛngrɔn-dì ankà zriɛmɛ́n mrìmrì.’

⁸ Nyàn eci le kruhú léyi ɛgbàn-hán-ci hɔ̀n léyi yɛ wá yɛ hɛ́n nɛ̀n nɔn, fɛn lɔ ke le ku nɛ̀n ɛwú ɛnbì zri: owú loẅiɛ, ɛngrɔndì mán ebrè; ɛnhyà kɛ lɛ jrɛ́ nɛ̀n. Ɔmuhi ɛkɔrɛ̀ srɔ́n nɛ̀n, Ɛẅɛnwrɔn Ɔwɔ léyi ci nɛ̀n ɛmrɛ̀n nɔn.”

⁹ Ɛnhi wú nɛ̀ncüì hɔ̀n léyi cɔ́ nɛ̀n mɛhi yɔ hán ɛci-gbàngbàn mán evridì kɔ̀hɔ̀n nɔn, ke le wú eyú kɩ ke le bòto n'ɛwú, ɛnvra léyi yɔ lɛ kán anmàn vri lɔ n'ɛbiɛ hyà-bri.

¹⁰ Yɔ lɛ nyɔn, esù-she ɛnjansuemɛ̀n, n'ɛgbàn hɔ̀n wɔɛ̀ndi tɛ̀sɛ̀n, kɩ yɔ lɛ dɔ̀ le: “Muzhie! Muzhie tán! Ô babilɔnɛ̀n, anmàn vri mán ɛkɔrɛ̀srɔn anmàn! Wacɛ̀n zri kɩ ke ji, ô vɛ́n nwù-bɔ̀ lɔ ke gorɛ mɛ̀n!”

¹¹ Ɛnhi wú anhàn-zhrɛ-bɔ̀ mán ke wú eyú kɩ kɛ ẅɛn obòtò n'ɛwú, ɔmuhi ɔwrɔn zriɛmɛ́n ke sɩ́ vru wɔ́ y'anhàn-zhrɛ-ci lɔ nɔn:

¹² ansikɛ, ɔkùa, anhàn shishi bù-ẅì mán ɛbreci; ɛceci càsa-ẅì, anhàn shishi càsa wɔnsɛn, dandanhɛ̀n càsa, antɛ̀ mɛ̀ntɛ mɛ̀ntɛ hɔ̀n léyi ye sɩ́ cɔ́ frɛfrɛ nɔn, ɛci mɛ̀ntɛ mɛ̀ntɛ léyi ye bɩ́ ɛnshrì-nyî yɛ hán, anhàn shishi tɛ̀ hɔ̀n, pritù, ɛngbɛn-ẅì, obù trɔtrɔ;

¹³ ɛci bánbán, ɛnshi-bánbán, ɛnzhì bánbán mán anjɔsàn; ɛntàn wɔsɛn, ɛnzhì, dùdu-sɔ́n; ɛnnànmán mán kɔ̀kɔ̀sɛ̀ hɔ̀n, kpàngɔ, mán kpàngɔ-hɛ̀ hɔ̀n, anwɔ̀n-bɔ̀ mán anwrɔnẅì wúvà.

¹⁴ “Yɛ dɔ̀ le hôwù! Ɛci-wɔ́-ci hɔ̀n léyi e ji nɔn, zrɛ́n v'eduyri, v'ɛnnɛ̀ncüì-di-ci hɔ̀n mán v'evridí-ci hɔ̀n zrɛ́n, kɩ ye sɩ̀ vrú cɔ́ yɔ mrìmrì!”

¹⁵ Anhàn-zhrɛ-bɔ̀ léyi di ɛnnɛ̀ncüì ɛci-hɛ́ mɛ̀n anmàn ndɔ lɔ mɛ̀n nɔn, kɛ lɛ nyɔn esù-she ɛnjansuemɛ̀n ɛgbàn-wɔ̀ɛn-dì léyi dú yɔ tɛn nɔn n'ɛtɛ̀sɛ̀n. Yɔ lɛ wú eyú kɩ yɔ le bòtò;

¹⁶ kɩ yɔ lɛ dɔ̀ le: “Muzhie! Muzhie tán de dú tán anmàn vri lɔ! Nɛ̀n ku ɛcàsa-ẅì ceci edù, anhàn shishi ceci wɔnsɛn hɔ̀n léyi kɛ kɛ̀n, nɛ̀n ẅɛn ansikɛ-ci hɔ̀n, anhàn shishi bù-ẅì mán ɛbrɛci hɔ̀n edòmɛ̀n.

¹⁷ Kɩ wacɛ̀n zri kɩ ndɔ lɔ fɛn lɔ mutù!” Ɛnhyábri-hɛ̀-ẅɛn-bɔ̀ lɔ fɛn mán y'anwrɔn hɔ̀n mɛhi, mán yɔ hɔ̀n léyi kɛ cɔ́ y'ɛcizì ecüe-wú-kɔ̀hɔ̀n-hán mɛ̀n nɔn, kɛ nyɔn esù-she

¹⁸ kɩ ke di bobo ɛnvra léyi yɔ kán anmàn léyi yɛ wá ɛnhyà nɔn n'ɛnhyàbri, kɩ yɔ dɔ̀ le: “Yɛ vá kán anmàn vri ɔmu lɔ mrìmrì!”

¹⁹ Yɔ kɔ́n ɔnwɔ̀n ku ɛnkruemɛ̀n, yɔ wú eyú, yɔ botò kɩ yɔ di bobo yɔ dɔ̀ le: “Muzhie! Muzhie tán de dú tán anmàn vri lɔ! N'ɛnnɛ̀ncüì-di-ci hɔ̀n lɔ wú de anwrɔn hɔ̀n lɔ fɛn léyi kɛ hán ɔkɔ̀hɔ̀n ecüe-wú-ɛnhyàbri-hɛ̀ wú nɔn, ke di ɛnnɛ̀ncüì nɔn. Kɩ wacɛ̀n zri kɩ fɛn lɔ mutù!”

²⁰ Anhobɩ́, pɔpüɛ̀ kɛ̀ brá mɛ́n n'ɔgbɔ̀ngbɔ̀ lɔ wú! Ɔwɔ-fɛcüè-bɔ̀ pɔpüɛ̀ kɛ̀ brá nyɛ̀n, ɔkɔ̀hɔ̀n-wá-bɔ̀ mán Ɔwɔ-mùan-wú-ankà-dɔ́-bɔ̀! Ɔmuhi ɛgbàn léyi nɛ̀n hán nyɛ̀n nɔn, Ɔwɔ ci nɛ̀n ɛmrɛ̀n hɩ wú!

²¹ Zɛtɛn ɛkɔrɛ̀srɔn Wɔ-kùyüre-wrɔn tɔ̀n bɩ́ obù tɔ̀n cá ɛci-zhɛ́-bù vri tɔ̀n kɩ kɔ́n nɛ̀n di ecüe wú kɩ kɛ dɔ̀ le: “Ɔmu lɔ de yɛ lɛ kɔ́n Babilɔnɛ̀n anmàn vri lɔ ye ze ecüemɛ̀n, kɩ ye sɩ̀ vru kán nɛ̀n mrìmrì.

²² Ye sɩ̀ vru yá mrìmrì, v'eyri ɛbemɛ̀n anhɛ́-mràn mán ɛcɔ̀-krɛ́-bɔ̀, kètè-mú-bɔ̀ mán anbrɛ̀n-mú-bɔ̀ ɔmùan. Ye sɩ̀ vru cɔ́ ɔkɔ̀hɔ̀n-hán-wrɔn totɔtɔ̀n zriɛmɛ́n; ye sɩ̀ vru yá ɛci-zhɛ́-bù ɔmùan.

²³ Kèniɛn hyà ke sɩ̀ vru kán ɛyri mrìmrì v'ebɩ́ lɔ mɛ̀n. Ye sɩ̀ vru yá eyiri-bɔ̀ ɔmùan. V'anhàn-zhrɛ-bɔ̀ ẅɛn vɔ̀nshɛ́ ɛnhibù mumù lɔ fɛn wú, kɩ vɛ́n seke-kɔ̀hɔ̀n-hán mɛ̀n lɔ, ɛ̀ zrɛ́n fɛcüè hɔ̀n lɔ fɛn.”

²⁴ Babilɔnɛ̀n anmàn de Ɔwɔ-mùan-wú-ankà-dɔ́-bɔ̀ mán Ɔwɔ-fɛcüè-bɔ̀ krɛ̀ cüe, anwrɔn lɔ fɛn léyi ye wri ɛnhi wú nɔn, y'ɛnkrɛ̀.