Ɔwɔ-mɛ̀n-yrikàn 17 - Ɛmɛẅi ankà ankrànkràn 2003

Wowie-nyrɔnwrɔn vri lɔ

¹ Zɛtɛn Ɔwɔ-kuyüre-bɔ̀ ɔbɔ̀ɛn léyi ẅɛn grashɛ̀n ɔbɔ̀ɛn hɔ̀n lɔ anta nɔn, ɔtɔ̀n nvà dɔ́ mɛ̀n le: “Và kɩ me le yé mɛ́n nwùbɔ̀ léyi ke le dú wowie nyɔnwrɔn vri lɔ tɛn nɔn, anmàn cüìcüì léyi ye ku ɛnshi-gbɛ-shi hɔ̀n bobrebe tɛ̀sɛ̀n nɔn.

² Ɛnhi wú nɛ̀ncüì hɔ̀n dú ɛwúvà gbàngbàn ẅɛn mɛ̀n, nɛ́n mán yɔ mɛhi kɩ ɛnhi-wú-anmàn-bɔ̀ dú n'ɛwúvà gbàngbàn ẅɛ̀n tàn kɔ́n mɛ̀n.”

³ Ɛnhɛ́n bru mɛ̀n edù kɩ Ɔwɔ-kùyüre-wrɔn lɔ bɩ́ mɛ̀n sɩ́ ɛnnùwì tɔ̀n wú. Nanvrɛn lɔ, mɛ̀n kán ɛnnyɔnwrɔn tɔ̀n yɛ́ ɔnɔ̀n wɔnsɛn vàà tɔ̀n wú, n'edomɛ̀n lɔ ye merɛ́n Ɔwɔ bɩ́ wora bobrebe; ɔnɔ̀n ndɔ lɔ di ɛnkru ɔbɔ̀ɛn mán ɛtrù ɛvà.

⁴ Ɛnnyɔnwrɔn lɔ ku ɛci wɔnsɛn vàà ankrankran edù, kɩ ansíkɛ-ci, anhàn shishi bùẅì mán abreci hɔ̀n dú nɛ̀n edomɛ̀n. N'ɛnbrá-mɛ̀n-ci-gbàngbàn-hán yí ansíkɛ grashɛ̀n tɔ̀n dú nɛ̀n antamɛ̀n.

⁵ N'ezìwú lɔ ye merɛ́n ebi tɔ̀n léyi n'ɛmɛ̀n dú ɛbánmɛ̀n: “Babilɔnɛ̀n cüìcüì, wowie mán ɛnhibù-wú ci-gbangbàn-hán nɛ́n muan.”

⁶ Mɛ̀n nyri ɔmu le ɛnnyɔnwrɔn ndɔ lɔ Ɔwɔ-fɛcüè mán anwrɔn hɔ̀n léyi ye wri y'ɔmùan-zri-dì Zhezü kruhú nɔn, yɔ krɛ̀ tàn kɛ kɔ́n nɛ̀n. Ɛnvra léyi mɛ̀n kán nɛ̀n nɔn, mɛ̀n dú anvɛmɛ̀n-frɛ́n vriemɛ̀n.

⁷ Zɛtɛn Ɔwɔ-kùyüre-wrɔn lɔ kɛ dɔ́ mɛ̀n le: “Ecitan kruhú kɛ frɛ́n mɛ́n anvɛmɛ̀n hàn? Me le yé mɛ́n ankà-bán-ankà léyi dú ɛnnyɔnwrɔn lɔ angranmɛ̀n nɛ́n mán ɔnɔ̀n léyi di ɛnkru ɔbɔ̀ɛn mán ɛtrù ɛvà, hɩ kɛ wɔrɔ nɛ̀n nɔn.

⁸ Ɔnɔ̀n léyi ɛ kàn nɔn, ɛnbiɛhɛ́n lɔ nɛ̀n dú ankɔrɛkɔrɛ mɛ̀n, tɛ́n nɛ̀n sɩ̀ vrù dù ankɔrɛkɔrɛ mɛ̀n hàn; ke ji le nɛ̀n dú gbàzrɔ mɛ̀n nɛ̀n srɔ ɛntrɛ, ô nɛ̀n hɔ́n n'ɛzrɛ́n mɛ̀n. Ɛnhi-wú-anmàn-bɔ̀ léyi ɛnhibù krubɔmɛ̀n hàn-hɛ́n ye sɩ̀ mrɛ̀n yɔ bi, kè dù ɔkɔrɛ wrú lɔ mɛ̀n nɔn, ke le dú anvɛmɛ̀n-frɛ́n mɛ̀n ɛnvra léyi yɔ lɛ kán ɔnɔ̀n lɔ nɔn: annanwɔrɛ mɛ̀n lɔ, ɛnbiɛhɛ́n vra lɔ, nɛ̀n dú ankɔrɛkɔrɛ mɛ̀n, tɛ́n nɛ̀n sɩ̀ vrù dù ɔmu lɔa, kɩ ne le vru nɛ̀n srɔ.

⁹ Ɛnu lɔ, ke ji ɛnkruemɛ̀n-ẅɛ̀n mán ankà-nyrì. Ɛnkru ɔbɔ̀ɛn hɔ̀n lɔ dú nkpò ɔbɔ̀ɛn hɔ̀n léyi ɛnnyɔnwrɔn lɔ yɛ́ ɛwú nɔn. Nkpò ɔbɔ̀ɛn hɔ̀n lɔ mán dú ɛnnɛ̀ncüì hɔ̀n ɔbɔ̀ɛn:

¹⁰ y'ɛmɛ̀n lɔ ɛnrì bore, ɔtɔ̀n ẅɛn ɛyri zɛtɛ̀ lɔ kɩ ɔbɔɛn mɛ̀n tɛn lɔ, kɛ vá và; ɛnvra léyi nɛ lɛ và nɔn, ɛnvra ẅiɛ kɩ kɛ lɛ wɔrɔ.

¹¹ Ɔnɔ̀n léyi ɛnbiɛhɛ́n dú ankɔrɛkɔrɛ mɛ̀n nɔn, tɛ́n nɛ̀n sɩ̀ vrù dù ɔmu lɔ, nɛ́n dùku mán nɛ̀n dú eẅiriemɛ̀n nɛ̀ncüì tɔ̀n; nɛ́n vru nɛ̀n dú ɛnvra zri lɔ ɛnnɛ̀ncüì ɔbɔ̀ɛn hɔ̀n lɔ ɔtɔ̀n, kɩ nɛ hɔ́n n'ɛzrɛ́n mɛ̀n.

¹² Ɛtrù ɛvà hɔ̀n léyi ɛ kàn nɔn, dú ɛnnɛ̀ncüì hɔ̀n ɛvà léyi kɛ vá ẅɛn ɛyri nɔn; tɛ́n yɔ lɛ cɔ́ ɛkɔrɛ̀srɔn yɔ ẅɛn ɛyri wacɛ̀n zri granmɛ̀n yɔ mán ɔnɔ̀n lɔ mɛhi.

¹³ Yɔ, anwrɔn ɛvà hɔ̀n lɔ fɛn, yɔ ẅɛn ankàtro zri: yɔ bɩ́ y'ɛkɔrɛ̀srɔn mán y'ɛkɔrɛlevri yɔ wá ɔnɔ̀n lɔ, n'eci-bɩtan kɔ̀hɔ́n mɛ̀n.

¹⁴ Yɔ lɛ kɔ́n Ɔwɔ-Kɔ̀kɔ̀sɛ̀-ẅì lɔ anhà, tɛ́n Ɔwɔ-Kɔ̀kɔ̀sɛ̀-ẅì kɛ lɛ kɔ̀nká yɔ, ɔmuhi nɛ̀n dú ɛẅɛn-bɔ̀ Ẅɛnwrɔn mán ɛnnɛncüi hɔ̀n Nɛncüì nɔn; nɛ lɛ kɔ̀nká yɔ, nɛ́n mán anwrɔn hɔ̀n léyi nɛ̀n bí, kɩ nɛ̀n mrɛ́n nɛ́n bɩ dú, n'ɔmùan-zri-dí-bɔ̀ nɔn.”

¹⁵ Ɔwɔ-kùyüre-wrɔn lɔ vru kɛ dɔ́ mɛ̀n le: “Ɛnshi hɔ̀n léyi ɛ̀ kán nanvrɛn ɛyri léyi wowie-nyɔnwrɔn lɔ nyɔn nɔn, yɔ dú fɛcüè hɔ̀n, ɛnhi-wú-anmàn-hɔ̀n mán ɛnbrɛ̀ hɔ̀n.

¹⁶ Ɛtrù ɛvà hɔ̀n léyi ɛ kàn mán ɔnɔ̀n lɔ ke le gbri wowie-hi lɔ: yɔ lɛ kua nɛ̀n ɛci lɔ fɛn léyi nɛ́n ẅɛ̀n nɔn, edomɛ̀n yɔ sɔhɔ́, nɛ lɛ nyɔn ɛsɛ̀n kora, yɔ lɛ rá n'anẅia kɩ yɔ lɛ jrɛ́ nɛ́n lokro hɔ̀n lɔ fɛn ɛnhyà mɛ̀n.

¹⁷ Ɔmuhi Ɔwɔ wá y'ɛnbɔrɛ lɔ mɛ̀n, n'ɛkɔrɛ̀-zì-ci-hán; yɔ lɛ hán eci ɔmùan krɔn mɛ̀n, ô ɛnnɛ̀ncüì kɔrɛ̀srɔn léyi yɔ ẅɛ̀n nɔn, yɔ bɩ yɔ wá ɔnɔ̀n lɔ ci-bɩtan-kɔ̀hɔ́n mɛ̀n, hàn kɩ kɛ̀ cɔ́ ɛnvra léyi Ɔwɔ-mùan-ankà-dɔ̀ lɔ kɛ lɛ sá nmù nɔn.

¹⁸ Ɔtrɔ mɛ̀n lɔ, ɛnnyɔnwrɔn léyi ɛ kàn nɔn, nɛ̀n dú anmàn vri léyi dú ɛnhi wú nɛ̀ncüì hɔ̀n ɛwú nɔn.”