Ɔwɔ-mɛ̀n-yrikàn 15 - Ɛmɛẅi ankà ankrànkràn 2003

Ɔwɔ kùyüre-bɔ̀ mán ɛmɛẅi-trɔ gbàn-hán-ci hɔ̀n

¹ Zɛtɛn mɛ̀n kán eci woroanci nyantɛn tɔ̀n anhobɩ́, sevri kɩ nfì: Ɔwɔ-kùyüre-bɔ̀ ɔbɔ̀ɛn léyi ẅɛn ɛgbàn-hán-ci ɔbɔ̀ɛn anta nɔn. Yɔ dú ɛmɛẅì-trɔ gbàn-hán-ci, ɔmuhi yɔ dú Ɔwɔ mɛẅì-trɔ mɛ̀nhyì-bɩ́-ci hɔ̀n nɔn.

² Zɛtɛn mɛ̀n kán eci cá ecüe léyi ɛmɛ̀n bí hán zɛnci hɔ́, ɛnhyà dú nɛ̀n ɛmɛ̀n. Anwrɔn hɔ̀n lɔ fɛn léyi kɔ́nká ɔnɔ̀n lɔ, nɛ́n picɛ̀ mán eci-krɛ̀ léyi dú n'ebi lɔ wú nɔn, nyɔn ɛwú, ecüe zɛnci ndɔ lɔ wú. Anhɛ́ mràn léyi Ɔwɔ tán yɔ nɔn, dú yɔ antamɛ̀n.

³ Yɔ krɛ́ Mohizì cɔ̀, nɛ́n léyi nɛ̀n dú Ɔwɔ-ci-bɩtan-wrɔn nɔn, kɩ yɔ krɛ́ Ɔwɔ-Kɔ̀kɔ̀sɛ̀-ẅì cɔ̀: “Ɛẅɛnwrɔn, ɛkɔrɛsrɔn Wɔ, V'ɛkɔrɛ̀-ci hɔ̀n sevri kɩ zrɔ! Ɛnhi wú anmàn hɔ̀n nɛ̀ncüì, V'ankɔ́nda-ci-hán hɔ̀n nyrɔn kɩ dú annanwɔrɛ!

⁴ Ɛẅɛnwrɔn, antɔn de ke sɩ̀ ẅɛn v'ɛwá nɛ́n? Antɔn de kɛ lɛ krɔ, ke sɩ̀ zrɔ mɛ́n eci nɛ́n? Ɔmuhi vɛ́n zri kɩ è dú prɔnprɔn, ɛnhi anmàn hɔ̀n lɔ fɛn kɛ lɛ và cüe mɛ́n ankɔrɛ̀ ezìwúɛ, ɔmuhi v'ɛnyrɔn ci-hán hɔ̀n ke yé tán yɔ, kpetemɛ̀n yɔ nyrì nɔn.”

⁵ Ndɔ lɔ mɛẅi, mɛ̀n kán anhobɩ́-cice-wɔn nɛ́n mán Ɔwɔ mìrɛ̀n càsa mɛhi.

⁶ Ɔwɔ-kùyüre-bɔ̀ ɔbɔ̀ɛn léyi ẅɛn ɛgbàn-hán-ci hɔ̀n ɔbɔ̀ɛn lɔ anta nɔn dú Ɔwɔ-cice wɔn mɛ̀n srɔ ɛntrɛ; y'ɛceci hɔ̀n léyi yɔ ẅɛn edomɛ̀n nɔn, kɛ gbrɛ́n kɩ dú ɛwosu, kɩ yɔ mú ansikɛ pɛtɛ̀n angbà.

⁷ Ɛci kɔrɛkɔrɛ hɔ̀n anzɔ̀ lɔ, ɔtɔ̀n tán Ɔwɔ-kùyüre-bɔ̀ ɔbɔ̀ɛn lɔ, ansikɛ grashɛ̀n ɔbɔ̀ɛn, Ɔwɔ mɛ̀nhyì yɩ́ ɛmɛ̀n, nɛ́n léyi nɛ̀n dú ɛnvra lɔ fɛn nɔn.

⁸ Ɛnhyàbri yɩ́ Ɔwɔ-cice-wɔn lɔ, dú eci woroanci léyi ke yé Ɔwɔ ci-zrɔ mán n'ɛkɔrɛ̀srɔn. Ɔwrɔn zriɛmɛ́n ke sɩ̀ bru Ɔwɔ-cice-wɔn lɔ mɛ̀n rɔ́, ke dú kɛ ɛgbán-hàn-ci hɔ̀n ɔbɔ̀ɛn léyi Ɔwɔ-kùyüre-bɔ̀ sɩ́ nɔn, ke sɩ̀ trɔ.