Ɔwɔ-mɛ̀n-yrikàn 14 - Ɛmɛẅi ankà ankrànkràn 2003

Ebɩdie-bɔ̀ cüɛ-krɛ̀

¹ Mɛ̀n vru mɛ̀n nyan: mɛ̀n kán Ɔwɔ kɔ̀kɔ̀sɛ̀-ẅì nyɔn Siɔn kpò wúɛ, nɛ́n mán anwrɔn tɛ̀buri kru ɛkoẅi ɔbɔɛ̀n mán ɛẅì anzɔ̀ léyi dí n'ebɩ́ mán nɛ́n Zi bɩ́ ye merɛ́n ezìwú.

² Mɛ̀n yá esùva tɔ̀n dú anhobɩ́ kɛ và kɩ ke shrì kɛ hán ɛnshi vri léyi kɛ nàn, kɛ hán ɛwú-kù-dì hɔ́. Esùva léyi mɛ̀n yá nɔn, cá anhɛ́ mràn sùva ɛnvra léyi yɔ emú-bɔ̀ ke mú yɔ nɔn.

³ Anwrɔn tɛ̀buri kru bobrebe ndɔ hɔ̀n lɔ kɛ krɛ́ ɛcɔ̀ wrù tɔ̀n ɛgbú-tòbù zìwú, ɛci kɔrɛkɔrɛ hɔ̀n anzɔ̀ lɔ mán ɛcüìcüì-bɔ̀ zìwú. Ɔwrɔn zriɛmɛ́n ke sɩ̀ ván ɛcɔ̀ ndɔ lɔ rɔ́, ke dú kɛ kè sɩ̀ dù anwrɔn tɛ̀buri kru ɛkoẅi ɔbɔ̀ɛn mán ɛẅì anzɔ̀ hɔ̀n léyi yɛ mrɛ́n anwɔ̀nẅiemɛ̀n yɛ sɔhɔ́ ɛnhi wú nɔn.

⁴ Anwrɔn ndɔ hɔ̀n lɔ, kè sɩ̀ wá nbrá edomɛ̀n yɔ mán wúyɔ̀ mɛhi, yɔ dú ɛfifiemɛ̀n. Yɔ dú Ɔwɔ Kɔ̀kɔ̀sɛ̀-ẅì ɛmɛẅi ɛyri lɔ fɛn léyi nɛ hɔ̀n nɔn; yɛ mrɛ́n yɔ anwɔ̀nẅìemɛ̀n yɛ sɔhɔ́ anwrɔnẅiemɛ̀n, ô yɔ dú Ɔwɔ mán Ɔwɔ Kɔ̀kɔ̀sɛ̀-ẅì kpàkpà cice.

⁵ Y'ɔmùan lɔ mɛ̀n, ɛyɔ̀n ankà zriɛmɛ́n, kè sɩ̀ cɔ̀ ɛyri mrìmrì; eci gbàngbàn zriɛmɛ́n bàdà yɔ edomɛ̀n.

Ɔwɔ-kùyüre-bɔ̀ anhɔ̀n

⁶ Zɛtɛn mɛ̀n kán Ɔwɔ-kùyüre-wrɔn tɔ̀n nyantɛn ke tú ɔwràn mɛ̀n ɛwú-hɛ́n; nɛ̀n ẅɛn Ɛmɛẅi ankà Ankrankran tɔ̀n léyi ke sɩ́ trɔa nɔn, ne ji nɛ̀n dɔ́ tán ɛnhi-wú-anmàn-bɔ̀ lɔ fɛn, ɛmɛ̀n lɔ fɛn, ɛnbrɛ̀ lɔ fɛn mán fɛcüè lɔ fɛn.

⁷ Nɛ dɔ́ esùva cüìcüìemɛ̀n le: “Nyɛ́n sɩ́ ny'edomɛ̀n ɛnhi nyɛ́n tán Ɔwɔ, ô nyɛ́n zrɔ nɛ̀n eci! Ɔmuhi, ɛnvra léyi ne le ci anwrɔnẅì ɛmrɛ̀n nɔn ncɔ̀a. Nyɛ́n cüe ɔwrɔn léyi hán anhobɩ́, ɛnhi, ecüe mán ɛnshi-bɛ́ hɔ̀n nɔn, ankɔrɛ̀ ezìwúɛ!”

⁸ Anhyrɛmɛ̀n Wɔ-kùyüre-wrɔn tɔ̀n kɛ́n kpàkpà tɛn lɔ, kɩ kɛ dɔ̀ le: “Nɛ̀n bore, nɛ̀n bore Babilɔnɛ̀n cüìcüì lɔ! Nɛ̀n hán ɛnhi-wú-anmàn hɔ̀n lɔ fɛn mi n'ɛmɛ̀nhyì wúvà-gbàngbàn-ci-hán tàn wɔnsɛn!”

⁹ Anhɔnmɛ̀n Wɔ-kùyüre-wrɔn tɔ̀n kɛ́n anhyrɛ̀ hɔ̀n lɔ, kɩ kɛ dɔ́ esùva cüìcüìemɛ̀n le: “Ɔwrɔn totɔtɔ̀n léyi ke cüe ɔnɔ̀n lɔ mán nɛ́n pícɛ̀ ankɔrɛ̀ ezìwú, kɩ ɛnrɛ̀n kɛ dɛ́ ezìwú, ɛnvra tɔ̀n hô ɛmànmɛ̀n nɔn,

¹⁰ nɛ́n dùku ne le mí ɛntàn léyi ye ku n'ɛẅì, Ɔwɔ mɛ̀nhyì grashɛ̀n lɔ mɛ̀n nɔn! Anwrɔn ɔmu hɔ̀n lɔ, yɔ le dú ɛgbànkán mɛ̀n ɛnhyà-ẅì-wosu mɛ̀n, Ɔwɔ kùyüre-bɔ̀ prɔnprɔn hɔ̀n mán Ɔwɔ Kɔ̀kɔ̀sɛ̀-ẅì zìwú.

¹¹ Ɛnhyà-bri léyi kɛ hán yɔ, yɔ kán ɛgbàn nɔn, kɛ hɔ́n ɛwú ɛnvra lɔ fɛn. Yɔ sɩ̀ ẅɛ̀n ɛwrɔncüe ɛnnyran mán ɛcɛ̀n, anwrɔn hɔ̀n léyi ke cüe ɔnɔ̀n lɔ mán nɛ́n picɛ̀ ankorɛ̀ ezìwú mán ɔwrɔn totɔtɔ̀n léyi kɛ cɔ́ n'ebi lɔ n'ɛnrɛ̀n edòmɛ̀n nɔn.”

¹² Nyàn hɩ le kruhú de, anwrɔn hɔ̀n léyi dú Ɔwɔ tɛn, kɛ wá n'ɛnyanmàn hɔ̀n lɔ, kɩ ke di ɔmuan zri Zhezü tɛ̀sɛ̀n nɔn, ke ji le yɔ hán ɛnbɔrɛ-ẅɛ̀n-hɛ́n-ci.

¹³ Zɛtɛn mɛ̀n yá anhobɩ́ sùva tɔ̀n kɛ dɔ́ mɛ̀n le: “È merɛ́n ankà ndɔ lɔ: ‘Ɛnbɔrɛbru dú anwrɔn hɔ̀n léyi zɛtɛ̀ lɔ ke wú Ɛẅɛnwrɔn ci-bɩ̀tan kɔ̀hɔ́n mɛ̀n nɔn!’ – ‘Hɛ̀ɛ̀, yɔ dú ɛnbɔrɛbruemɛ̀n, ɔmu lɔ de Ɛnhɛ́n kɛ dɔ̀ nɔn. Yɔ lɛ cɔ́ y'ɔkɔ̀hɔ̀n-shishi-hán wrɔncüe, ɔmuhi anvrɛn léyi yɔ hán nɔn, kɛ kɛ́n yɔ ɛsɛ̀n!’ ”

Ɛci-kuɛ mán ɛnhi-kɔhɔ̀n-hán

¹⁴ Mɛ̀n vru mɛ̀n nyan, kɩ mɛ̀n kán ɛnwì-gbú wosu tɔ̀n, kɩ ɛnwì-gbú lɔ wú eci tɔ̀n yɛ́, cá ɔwrɔnẅì. Ansíkɛ krusɔn-cí tɔ̀n dú nɛ̀n ɛnkru kɩ kpàndì cici tɔ̀n dú nɛ̀n ɛmàn mɛ̀n.

¹⁵ Ɔwɔ-kùyüre-wrɔn nyantɛn tɔ̀n dú Ɔwɔ cice wɔn mɛ̀n srɔ ɛntrɛ kɩ kɛ dɔ́ nɛ́n léyi nɛ̀n yɛ́ ɛnwì-gbú lɔ wú nɔn le: “È bɩ́ vɛ́n kpàndì lɔ, ô ɛ̀ kùɛ ɛci, ɔmuhi ɛci-kuɛ vra ncɔ̀ nɔn: ɛci-wɔn krɔn ɛkuɛ!”

¹⁶ Zɛtɛn ɔwrɔn léyi yɛ́ ɛnwì-gbú wú nɔn, bɩ́ nɛ́n kpàndì lɔ tán yɔ ɛnhi wú, kɩ yɛ hán ɛci-kuɛ kɔ̀hɔ̀n ɛnhi wú.

¹⁷ Ɔwɔ-kùyüre-wrɔn nyantɛn tɔ̀n dú anhobɩ́ Wɔ-cice-wɔn mɛ̀n srɔ ɛntrɛ; nɛ́n mán nɛ̀n ẅɛn kpàndì cici tɔ̀n.

¹⁸ Ɔwɔ-kùyüre-wrɔn nyantɛn tɔ̀n léyi ẅɛn ɛnhyà wú kɔrɛ̀levri nɔn, dú ɛcice tɛbrɛ̀ wú nvà. Ne di bobo ecüiemɛ̀n tán nɛ́n léyi kpàndì cici dú nɛ̀n antamɛ̀n nɔn le: “È bɩ́ vɛ́n kpandì lɔ, ô ɛ̀ kuɛ ɛnhi tàn-wɔnsɛn-tɛ̀-ẅì lɔ: y'antɛ̀-ẅì lɔ wɔ́n.”

¹⁹ Ɔwɔ-kùyüre-wrɔn lɔ bɩ́ nɛ́n kpandì lɔ tán yɔ ɛnhi, kɩ yɛ kuɛ ɛntàn-wɔnsɛn-tɛ̀-ẅì ɛnhi wú, kɩ yɛ kɔ́n antɛ̀-ẅì lɔ ku Ɔwɔ mɛ̀nhyì tàn-borɛ-ci vri lɔ mɛ̀n.

²⁰ Yɛ boyɛ antɛ̀ẅì lɔ ɛntàn-borɛ-ci lɔ mɛ̀n anmàn mɛẅi; ɛntàn-borɛ-ci lɔ mɛ̀n, ɛnkrɛ̀ shi dú srɔ, hɔ́n cɔ́ kpàngɔ hɔ̀n mùan mɛ̀n, kɩ bonyi esù-she cɔ́ anhɛ́-kɔrɛ̀ tɛ̀buri-kru zri mán ɛẅì ɛkoẅi ɛnrì dɛ̀n ɔwole.