Ɔwɔ-mɛ̀n-yrikàn 13 - Ɛmɛẅi ankà ankrànkràn 2003

Annɔ̀n anhyrɛ̀

¹ Zɛtɛn mɛ̀n kán ɔnɔ̀n tɔ̀n dú ecüe mɛ̀n srɔ ɛntrɛ. Nɛ̀n ẅɛn ɛtrù ɛvà mán ɛnkru ɔbɔ̀ɛn; kɩ ye merɛ́n n'ɛnkru hɔ̀n lɔ wú Ɔwɔ bɩ́ wora.

² Ɔnɔn léyi mɛ́n kàn nɔn cá ɛkuan-lɛ̀tù, n'annan ndù hán anwɔ-lɛ̀tù, kɩ n'ɔmùan kɛ cá gɔ̀ngɔ̀nsɔvɛ̀ hɔ́. Anwàn-lɛ̀brì lɔ wá nɛ̀n n'ɛkɔrɛ̀srɔn, n'ɛgbú-tòbù mán ɛkɔrɛ̀srɔn vri tɔ̀n antamɛ̀n.

³ Ɔnɔ̀n lɔ n'ɛnkru tɔ̀n hán le, eci wri edù ke ji kè wù, tɛ́n owù-ci-fɔn lɔ wrú. Ɛnhi mumù lɔ fɛn dú eci-zrɔ mɛ̀n kɩ dú ɔnɔn lɔ ɛmɛẅi.

⁴ Anwrɔn lɔ fɛn bukru ke cüe anwàn-lɛ̀bri lɔ ankɔrɛ̀ ezìwú, ɔmuhi nɛ̀n tán ɔnɔ̀n lɔ ɛkɔrɛ̀srɔn nɔn. Yɔ lɛ fɛn, ɔmu zri lɔ mán de yɔ cüe ɔnɔ̀n lɔ ankɔrɛ̀ ezìwú kɩ yɔ dɔ̀ le: “Antɔ̀n de dù cá ɔnɔ̀n lɔ nɛ́n? Antɔ̀n de kɛ lɛ kɔ́n nɛ̀n anhà tɛ̀ nɛ́n?”

⁵ Yɛ tán ɔnɔn lɔ ɛkɔrɛ̀levri kɛ dɔ́ ɔwora ankà gbàngbàn kɛ̀ tán Ɔwɔ; nɛ̀n cɔ́ ɛkɔrɛ̀srɔn, ô nɛ̀n hán eci okù ɛkoẅi anhyrɛ̀ mán ɛẅì anhyrɛ̀.

⁶ Nɛ̀n bukru nɛ dɔ́ Ɔwɔ ankà-gbàn, nɛ wora Ɔwɔ bi mán n'edúyri, mán anwrɔn hɔ̀n léyi, yɔ mɛhi yɛ sɔ́n ebɩ́ anhobɩ́ nɔn.

⁷ Yɛ tán ɛkɔrɛ̀levri nɛ̀n kɔ́n Ɔwɔ-fɛcüè anhà, ô nɛ̀n kɔ̀nkà; nɛ̀n cɔ́ ɛkɔrɛ̀srɔn ɛmɛ̀n lɔ fɛn wú, fɛcüè lɔ fɛn wú, ɛnbrɛ̀ lɔ fɛn wú mán ɛnhi wú anmàn lɔ fɛn wú.

⁸ Ɛnhi-wú-bɔ̀ lɔ fɛn ke le cüe nɛ̀n ankɔrɛ̀ ezìwúɛ, anwrɔn hɔ̀n léyi ye sɩ̀ merɛ́n yɔ bi ɔkɔrɛ wrú lɔ mɛ̀n ɛnhibù krubɔmɛ̀n hàn hɛ́n, ɔkɔrɛ wrú léyi dú Ɔwɔ kɔ̀kɔ̀sɛ̀-ẅì léyi ye wrì nɔn tɛn.

⁹ “Nyɛ́n die nukù anvrɛnvrɛn ke dú kɛ nyɛ́n ẅɛn nukù nyɛ yá ankà!

¹⁰ Ɔwrɔn léyi yɛ wá le ne le dú anwɔn-mɛ̀n-wá-wɔn mɛ̀n nɔn, kɛ zrɔ, nɛ lɛ hɔ́n anwɔn-mɛ̀n-wá-wɔn mɛ̀n; ɔwrɔn léyi yɛ wá le ne le wú anhà-kɔ́n-nyan she mɛ̀n nɔn, kɛ zrɔ, ne le wú anhà-kɔ́n-nyan she mɛ̀n. Nyàn hɩ le kruhú de ke ji le Ɔwɔ fɛcüè kɛ̀ ẅɛn ɛnbɔrɛ kɛ̀ hɛ́n, ô kè dú ankàẅìbùtan-ẅɛn mɛ̀n.”

¹¹ Zɛtɛn mɛ̀n kán ɔnɔ̀n nyàntɛn tɔ̀n; nɛ̀n dú ɛnhibɩ́ nɛ̀n srɔ. Nɛ̀n di ɛtrù anhyrɛ̀, cá kɔ̀kɔ̀sɛ̀ ẅì tɛn lɔ hɔ́ kɩ nɛ dɔ́ ankà kɛ hán anwàn-lɛ̀brì hɔ́.

¹² Nɛ hán kpàkpà nɔ̀n kɔrɛ̀srɔn-ci lɔ fɛn n'ezìwú. Nɛ wá tán ɛnhi mán n'anwrɔn hɔ̀n mɛhi kè cüe kpàkpà nɔ̀n lɔ ankɔrɛ̀ ezìwúɛ, nɛ́n léyi n'owù-ci-fɔn lɔ wrú nɔn.

¹³ Anhyrɛmɛ̀n nɔ̀n ndɔ lɔ kɛ hán anvɛmɛ̀n-frɛ́n-ci ɛvrivri, nɛ hán ɛnhyà ke dú anhobɩ́ kɛ kakɛ ɛnhi wú anwrɔnẅì lɔ fɛn zìwú.

¹⁴ Nɛ wá ɛnhi-wú-bɔ̀ ɛzrɛ́n mɛ̀n, n'anvɛmɛ̀n-frɛ́n-ci léyi nɛ hán kpàkpà nɔ̀n lɔ zìwú nɔn. Nɛ dɔ́ yɔ, yɔ hán picɛ̀ tɔ̀n kè dú ɔnɔ̀n lɔ n'ɛmrɛ́n, nɛ́n léyi, eci wri nɛ̀n edù anhà-kɔ́n-nyan she mɛ̀n, kɩ vru kɔrɛ̀ nɔn.

¹⁵ Anhyrɛmɛ̀n nɔ̀n lɔ cɔ́ ɛkɔrɛ̀srɔn kɛ̀ hán kpàkpà nɔ̀n picɛ̀ lɔ kɛ̀ dɔ́ ankà, ô kɛ̀ hán ye wri anwrɔn hɔ̀n lɔ fɛn léyi ke sɩ̀ cüe nɛ̀n ankɔrɛ̀ ezìwúɛ nɔn.

¹⁶ Ɔnɔ̀n lɔ, kɛ wá tán ɛci hɔ̀n lɔ fɛn, ɛcɛ́ mán ɛcüicüì, ɛnnɛ̀ncüì hɔ̀n mán ɛmian-bɔ̀, anwɔ̀n-bɔ̀ mán anwrɔn kora hɔ̀n, kɛ̀ cɔ́ ɛnrɛ̀n kɛ dɛ́ yɔ ezì-kɔrɛ̀ mànmɛ̀n mán ezìwú.

¹⁷ Ɔwrɔn zriɛmɛ́n kè sɩ̀ ẅɛ̀n ɛci-wɔ̀ mán ɛci-hɛ̀ kɔrɛ̀levri ke dú kɛ ɛnrɛ̀n ndɔ lɔ badá nɛ̀n edomɛ̀n, hɩ mɛ̀n kɛ dɔ̀ le, ɔnɔ̀n lɔ n'ebi, mán n'owrúẅì-ci-krɛ̀ léyi ke yé ebi ndɔ lɔ nɔn.

¹⁸ Ɛnu lɔ, ke ji ankanyrì. Ɔwrɔn léyi ẅɛn ɛnkruemɛ̀n nɔn kɛ lɛ cɔ́ ɔnɔ̀n lɔ n'owrúẅì-ci-krɛ̀ lɔ n'ɛmɛ̀n kè nyrì, ɔmuhi owrúẅì-ci-krɛ̀ ndɔ lɔ dú ɔwrɔn tɔ̀n bi. Owrúẅì-ci-krɛ̀ ndɔ lɔ nɛ̀n dú eci ɛkɔẅi ɛẅia ɛvà anhɔ̀n mán ɛẅì ɔwole.