Ɔwɔ-mɛ̀n-yrikàn 12 - Ɛmɛẅi ankà ankrànkràn 2003

Ɛnnyɔnwrɔn mán anwàn-lɛ̀brì

¹ Eci-woroanci cüìcüì tɔ̀n srɔ anhobɩ́: ɛnnyɔnwrɔn tɔ̀n léyi ẅɛn ɛnbri-ci edòmɛ̀n, okù dú nɛ̀n annantrɛ krùgbɛ̀n kɩ okùcànkrò ɛvà-anhyrɛ̀ krusɔn-ci dú nɛ̀n ɛnkru.

² Nɛ vá ɛnẅì tɔ̀n bî yri, kɩ ɛnẅì-bî-gbànkàn kɛ hán nɛ̀n ne di bobo.

³ Eci-woroanci nyàntɛn tɔ̀n srɔ anhobɩ́: anwàn-lɛ̀brì wɔnsɛn vri tɔ̀n di ɛnkru ɔbɔ̀ɛn kɩ ɛtrù ɛvà mán ɛnkrusɔn-ci dú n'ɛnkru hɔ̀n ɔbɔ̀ɛn lɔ wú.

⁴ Nɛ̀n bɩ́ n'ɛẅiè lɔ nɛ́n tàka anhobɩ́ kùcànkrò hɔ̀n lɔ y'anhɔ́nmɛ̀n cá nɛ̀n cüe ɛnhi wú. Nɛ̀n nyɔn ɛnnyɔnwrɔn léyi kɛ vá ɛnẅì-bî-yri nɔn ezìwúɛ, ô ɛnvra léyi ne bî ɛnẅì lɔ nɔn, nɛ̀n ẅɛn ɛnẅì lɔ nɛ̀n rá.

⁵ Ɛnnyɔnwrɔn lɔ bî ɛncɔnwrɔn-ẅì, nɛ́n de nɛ lɛ nyrɔn ɛnhibù wú anmàn hɔ̀n lɔ fɛn ɛgbɛnẅì kɔrɛ̀srɔn mɛ̀n. Kpatakpata lɔ, ye bɩ́ ɛnẅì lɔ ye sɩ́ Ɔwɔ mán n'ɛgbú-tòbù tɛ̀sɛ̀n.

⁶ Ɛnnyɔnwrɔn lɔ tɛn, srɛ́ hɔ́n ɛnnùwì, ɛyri léyi Ɔwɔ hán ɛyri hɛ́n nɛ̀n, ô nɛ̀n zî ɛci ɛbi tɛ̀buri kru zri mán ɛẅì ɛkoẅi ɛvà anhɔ̀n nɔn.

⁷ Zɛtɛn, anhà-kɔ̀n tɔ̀n bukru anhobɩ́. Mishɛlɛ̀n mán n'ɛkùyüre-bɔ̀ mɛhi kɔ́n anwàn-lɛ̀brì lɔ anhà, kɩ anwàn-lɛ̀brì mán n'ɛkùyüre-bɔ̀ mɛhi bɩ́ ejì cɔ́ yɔ.

⁸ Tɛ́n anwàn-lɛ̀bri anhà nkà, kɩ nɛ́n mán n'ɛkuyüre-bɔ̀ mɛhi yɔ sɩ̀ vrù cɔ̀ ɛyri anhobɩ́ yɔ yɛ̀a.

⁹ Yɛ kɔ́n anwàn-lɛ̀brì vri lɔ ye ze ɛntrɛa. Nɛ́n de nɛ̀n dú ɛnlɛ̀brì gbànvri, léyi ye bi anwawrɔn cüìcüì, hɩ kɛ frɛ́n ɛnhibù mumù lɔ fɛn nɔn. Nɛ́n mán n'ɛkùyüre-bɔ̀ mɛhi yɛ kɔ́n yɔ cüe ɛnhi wú.

¹⁰ Zɛtɛn mɛ̀n yá esùva cüìcüì tɔ̀n dú anhobɩ́ kɛ dɔ̀ le: “Zɛtɛ̀ lɔ ɛnkrukɔrɛ̀ vra ncɔ̀a! Zɛtɛ̀ lɔ b'Ɔwɔ lɔ yé n'ɛkɔrɛ̀srɔn mán n'ɛyri-ẅɛ̀n! Zɛtɛ̀ lɔ ɛkɔrɛlevri dú n'Ebɩdie-wrɔn antamɛ̀n. Ɔmuhi ye dú anhobɩ́ yɛ kɔ́n nɛ̀n ze, nɛ́n léyi nɛ ẅɛn ɛyɔ̀n tán bɔ́ muan-ẅì hɔ̀n, ɛnnyran mán ɛcɛ̀n b'Ɔwɔ zìwú nɔn.

¹¹ Bo muanẅì hɔ̀n kɔ́nká nɛ̀n Ɔwɔ Kɔ̀kɔ̀sɛ̀-ẅì krɛ̀ kɔrɛ̀levriemɛ̀n, mán ankà léyi yɔ di dalɛfuɛ n'ɛwú nɔn n'ɛmɛ̀n; yɔ sɩ̀ bàn y'ɛwúvà lɔ, yɔ krɔn kpehɛ́n, ô yɔ wù.

¹² Hɩ le kruhú de nyɛ́n, anhobɩ́-anmàn-bɔ̀ pɔpüɛ̀ kɛ̀ brá nyɛ̀n! Tɛ́n, ɛnhi mán ecüe, muzhie dú nyɛ tɛn! Anwawrɔn dú ɛwú kakɛ nyɛ̀n ɛmɛ̀n, ɛgbàn-dì yɩ́ ɛnbɔrɛmɛ̀n, ɔmuhi nɛ̀n nyri ɔmu le ɛnvra kè sɩ̀ vrù gbɔ́ nɛ̀n hàn nɔn.”

¹³ Ɛnvra léyi anwàn-lɛ̀brì lɔ ncɔ̀ nnyrì le yɛ kɔ́n nɛ̀n ze ɛnhi wú nɔn, nɛ̀n bukru nɛ kɛ́n ɛnnyɔnwrɔn léyi bî ɛnẅì nɔn ɛsɛ̀n.

¹⁴ Tɛ́n gbohò vri tɔ̀n tán nɛ̀n n'ɛtùvàkɔrɛ̀ anhyrɛ̀ lɔ, ô nɛ̀n hɔ́n ɛyri léyi yɛ hán yɛ hɛ́n nɛ̀n ɛnnùwì, ô nɛ̀n zî ɛci ɛnnanwàn kru anhɔ̀n mán ɛcá, nɛ̀n dú ɛbanmɛ̀n, ô ɛnlɛ̀brì lɔ ke bɩ́ cɔ̀ nɛ̀n eci zriɛmɛ́n hán yri.

¹⁵ Zɛtɛn ɛnlɛ̀brì lɔ bɩ́ n'ɔmùan mɛ̀n shi wá ɛnnyɔnwrɔn lɔ hán mancüè shi hɔ́, dú ɛnnyɔnwrɔn lɔ ɛmɛẅi, ô ɛnshi lɔ kɛ̀ wán nɛ̀n kè bɩ.

¹⁶ Tɛ́n ɛnhi nvà wá ɛnnyɔnwrɔn lɔ ɛkɔrɛ̀: ɛnhi vuru ɔmùan kɩ bɩ́ ɛnshi léyi anwàn-lɛ̀bri wá ɛnnyɔnwrɔn lɔ nɔn sɔ́n nmù.

¹⁷ Ɛmɛ̀nhyì léyi nɛ̀n ẅɛn ɛnnyɔnwrɔn lɔ wú nɔn, wá tán nɛ̀n nɛ̀n hɔ̀n kɔ́n ɛnnyɔnwrɔn lɔ n'ɛmɛẅi-bɔ̀ anhà, yɔ léyi yɔ wá Ɔwɔ nyanmàn kɩ yɔ di ɔmùan zri Zhezü annanwɔrɛ ankà léyi yé nɔn hɩ wú.

¹⁸ Anwàn-lɛ̀bri lɔ nyɔn ecüe gbàtà-mùan.