Ɔwɔ-mɛ̀n-yrikàn 11 - Ɛmɛẅi ankà ankrànkràn 2003

Dalɛfuɛ-dí-bɔ̀ anhyrɛ̀

¹ Zɛtɛn yɛ tán mɛ̀n ɛfisɛ̀ tɔ̀n, ɛtɛ̀pkò-ci tɔ̀n léyi ye bɩ yɛ wɔɛn eci nɔn, kɩ yɛ dɔ́ mɛ̀n le: “Ɛ̀ hɔ̀n ɛ̀ wɔɛn Ɔwɔ cice-wɔn lɔ mán ɛcice tɛbrɛ̀ lɔ, ô ɛ̀ krɛ́ anwrɔn mùan léyi ke cüe Ɔwɔ ankɔrɛ̀ ezìwú ecice-wɔn lɔ mɛ̀n nɔn.

² Tɛ́n è teze ɔhɔnan, ecice-wɔn bɩ́ lɔ; e bɩ́ wɔɛn nɛ̀n, ɔmuhi ye bɩ́ nɛ̀n yɛ tán anwrɔn hɔ̀n léyi ke sɩ̀ nyrì Ɔwɔ nɔn, kɩ kɛ lɛ nán esù anmàn prɔnprɔn lɔ ɛwú okù ɛkoẅi anhyrɛ̀ mán ɛẅì anhyrɛ̀.

³ Mɛ lɛ wá mɛ́n dalɛfuɛ-di-bɔ̀ anhyrɛ̀ ɔkɔ̀hɔ̀n, yɔ le ku ɛbrá ceci edù, kɩ yɔ lɛ dɔ́ ɛmɛẅi ankà léyi yɔ cɔ́ Ɔwɔ yri ɛbi tɛ̀buri kru zri mán ɛkɔẅi ɛvà anhɔ̀n ndɔ hɔ̀n granmɛ̀n nɔn.”

⁴ Dalɛfuɛ-di-bɔ̀ anhyrɛ̀ lɔ dú ɛẅì-shi-tɛ̀ hɔ̀n anhyrɛ̀ mán kɛ̀niɛn hɔ̀n anhyrɛ̀ léyi nyɔn ɛnhi Ẅɛnwrɔn ezìwu nɔn.

⁵ Ke dú kɛ ɔwrɔn tɔ̀n ke ji kɛ hán yɔ anbɔrɛci, ɛnhyà ke dú y'ɔmùan lɔ mɛ̀n kɛ̀ srɔ kɩ kɛ lɛ jrɛ́ y'egbri-bɔ̀ lɔ; ɔmu lɔ de, ɔwrɔn totɔtɔ̀n léyi ke le ji yɔ anbɔrɛci hán yri nɔn, ke le wù nɔn.

⁶ Yɔ ẅɛn ɛkɔrɛ̀srɔn yɔ lɛ sɛ́n anhobɩ́ sù, ô yɔ kɛ́n ɛnshi-nàn yɔ hɛ́n, ɛnvra mùan léyi yɔ ji nɔn, ô yɔ dɔ́ ɛmɛẅi ankà léyi yɔ cɔ́ Ɔwɔ yri nɔn. Yɔ vru yɔ ẅɛn ɛkɔrɛ̀srɔn yɔ le bɩ́ ɛnshi yɔ srɔ ɛnkrɛ̀, ô yɔ hán ɛnhi kɛ̀ kán ejüedì mɛ̀ntɛ mɛ̀ntɛ, ɛnvra mùan léyi yɔ ji nɔn.

⁷ Ɛnvra léyi yɔ lɛ trɔ y'ɛmɛẅi ankà lɔ dɔ̀ nɔn, ɔnɔ̀n léyi dú ɛnnànmàn vrɛ́n lɔ mɛ̀n nɔn, kɛ lɛ kɔ́n yɔ anhà. Nɛ lɛ ká yɔ, kɩ ne le wri yɔ.

⁸ Yɔ ezhe dùwru hɔ̀n lɔ kɛ lɛ dɛ́ anmàn drɛ́nmɔɛn mɛ̀n, ɛyri léyi yɛ gɔ́n y'Ɛẅɛnwrɔn brɛ́ ɛgbàn-hán-tɛ̀ tɔ̀n domɛ̀n nɔn. Anmàn ndɔ lɔ nyàndrɛn ankà-dɔ́ mɛ̀n lɔ ye bi nɛ̀n Sodɔmɛ̀n, ɛnvra tɔ̀n hô Ezhiptɛ̀n.

⁹ Fɛcüè lɔ fɛn mɛ̀n-bɔ̀, ɛmɛ̀n hɔ̀n lɔ fɛn bɔ̀, ɛnbrɛ̀ hɔ̀n lɔ fɛn bɔ̀, mán ɛnhi wú anmàn hɔ̀n lɔ fɛn bɔ̀, kɛ lɛ nyan y'ezhe dùwru lɔ ɛbi anhɔ̀n mán ɛcá, kɩ yɔ sɩ̀ tán ɛkɔrɛ̀levri yɛ wá edùwru hɔ̀n lɔ annanmàn mɛ̀n.

¹⁰ Ɛnhi wú anmàn-bɔ̀ ke le dú ɛnbɔrɛbruemɛ̀n y'owù lɔ kruhú, yɔ lɛ koran pɔpüɛ̀-brá mɛ̀n kɩ, yɔ lɛ ce y'edomɛ̀n eci, ɔmuhi Ɔwɔ-mùanwú-ankà-dɔ́-bɔ̀ anhyrɛ̀ ndɔ hɔ̀n lɔ hán anwrɔnẅì kán ɛgbàn nɔn.

¹¹ Tɛ́n ɛnvra léyi ɛbi anhɔ̀n mán ɛcá lɔ vacì nɔn, ɛwúvàkɔrɛ̀ dɔnwrɔ̀n tɔ̀n dú Ɔwɔ yri và bru yɔ edù; yɔ tɔ́hú kɩ anwrɔn lɔ fɛn léyi kán yɔ nɔn gbɔ̀gbɔ̀ bru edù.

¹² Zɛtɛn Ɔwɔ-mùan-wú-ankà-dɔ́-bɔ̀ anhyrɛ̀ lɔ yá esùva cüìcüì tɔ̀n dú anhobɩ́ nvà, wá tán yɔ le: “Nyɛ́n kà nyɛ́n vá ɛnu lɔ!” Yɔ tɔhú, yɔ hɔ́n anhobɩ́ ɛnwì-gbuemɛ̀n, y'egbri-bɔ̀ zìwú.

¹³ Ɛnvra zri lɔ, ɛnhi jɔkɔ ecüiemɛ̀n; anmàn lɔ, n'ɛvamɛ̀n cá gbɔngbɔ̀ kɩ anwrɔn tɛ̀buri kru ɔbɔ̀ɛn wú ɛnhi jɔ̀kɔ̀ ndɔ lɔ mɛ̀n. Anwrɔn nyàntɛn hɔ̀n lɔ gbɔ̀gbɔ̀ bru edù kɩ yɔ zrɔ anhobɩ́ Wɔ lɔ eci.

¹⁴ Anhyrɛ̀ mɛ̀n muzhie lɔ vaciɛ. Tɛ́n nyɛ́n wá esùva! Anhɔ̀n mɛ̀n tɛn lɔ kɛ lɛ vá ɛnvra bruemɛ̀n.

Ɔbɔ̀ɛn mɛ̀n brɛ̀n lɔ

¹⁵ Zɛtɛn ɔbɔɛn mɛ̀n Wɔ kùyüre-wrɔn lɔ mú ɛbrɛ̀n. Esùva cüìcüì hɔ̀n dú anhobɩ́ ke di nkù; yɔ dɔ̀ le: “Ɛnhibù yri ẅɛ̀n zɛtɛ̀ lɔ dú Ɛẅɛnwrɔn mán n'Ebɩdie-wrɔn tɛn, kɩ ɛyri ẅɛ̀n ndɔ lɔ ke le dú ɛnvra lɔ fɛn!”

¹⁶ Ɛcüìcüì bɔ̀ ɛẅia anzɔ̀ léyi yɛ́ y'ɛgbú-tòbù wú Ɔwɔ zìwú nɔn, bore, crɛ́ ezì kɛ́n ɛnhi, kɩ ke cüe Ɔwɔ ankɔrɛ̀ ezìwú

¹⁷ kɩ kɛ dɔ̀ le: “Ɛẅɛnwrɔn ɛkɔrɛ̀srɔn Wɔ, vɛ́n léyi e dù, kɩ ɛ gɔ́ dù nɔn, bɔ mrɛ́n mɛ́n, Ɔmuhi è bɩ́ v'ɛkɔrɛ̀srɔn vri lɔ ɛ̀ yrɛ́ v'ɛyri-ẅɛ̀n lɔ nɔn.

¹⁸ Ɛnhi wú anmàn hɔ̀n sɩ́ y'edomɛ̀n ɛwú ɛmɛ̀nhyiemɛ̀n, tɛ́n zɛtɛ̀ lɔ, v'ɛmɛ̀nhyì bɩ de ke yé n'edomɛ̀n nɔn, owú-bɔ̀ mrɛ̀nci vra lɔ ncɔa, ɛnvra léyi ɛ lɛ bó, v'eci-bɩ̀tan-bɔ̀, Ɔwɔ-mùan-wú-ankà-dɔ́-bɔ̀ mán yɔ hɔ̀n léyi dú vɛ tɛn, kɩ kɛ wá mɛ́n, ɛcüìcüì mán ɛyriyri, anjakpà nɔn, ncɔa; ɛnvra léyi ke ji le yɛ jrɛ́ anwrɔn hɔ̀n léyi kɛ jrɛ́ ɛnhi nɔn, ncɔa!”

¹⁹ Zɛtɛn, anhobɩ́-cice-wɔn lɔ gbɛ́ ɔmùan, kɩ mìrɛ̀n lakà lɔ srɔ́. Ɛyri kpɛ́n ɛnhyà, yɛ yá esùva hɔ̀n, kù-dì, ɛwú di nkù, ɛnhi jɔkɔ̀ kɩ ɛnshi vri tɔ̀n nnàn.