Ɔwɔ-mɛ̀n-yrikàn 1 - Ɛmɛẅi ankà ankrànkràn 2003

Ankà krubɔmɛ̀n

¹ Owrú ndɔ lɔ kɛ dɔ́ ɛyrikàn léyi Zhezü Krisì ncɔ̀ nɔn n'ankà. Ɔwɔ tán nɛ̀n ɛyrikàn ndɔ lɔ, ô nɛ̀n yé n'eci-bɩ̀tan bɔ̀ eci léyi kɛ lɛ wɔɛn ɛnvra bruemɛ̀n nɔn. Krisì wá n'ɛkùyüre-wrɔn ɔkɔ̀hɔ̀n Zhan yri, ô kɛ̀ tán nɛ̀n nɛ̀n nyri eci léyi kɛ lɛ wɔɛ̀n nɔn.

² Zhan di dalɛfuɛ le, eci léyi nɛ́n kàn nɔn dú Ɔwɔ mùan-ankà mán annanwɔrɛ ankà léyi Krisì yé nɔn.

³ Ɛnbɔrɛbru dú ɔwrɔn léyi kɛ krɛ́ owrú ndɔ lɔ nɔn tɛn, ɛnbɔrɛbru dú anwrɔn hɔ̀n léyi ke díe Ɔwɔ-mùanwú-ankà-dɔ̀ ndɔ lɔ nukùɛ, kɩ kɛ ẅɛn eci léyi ye merɛ́n nɔn n'ankà ɛshishiemɛ̀n kɛ hɛ́n nɔn tɛn! Ɔmuhi ɛnvra léyi yɛ wá ô ɛci hɔ̀n lɔ kɛ̀ hán nɔn, kɛ́n eburiɛ.

Ɔwɔ-fɛcüè hɔ̀n ɔbɔ̀ɛn binyan

⁴ Ebinyan ndɔ lɔ dú Zhan yri kɛ và, kè dú Ɔwɔ-fɛcüè ɔbɔ̀ɛn hɔ̀n léyi dú Azi kpɔsɔ wú nɔn tɛn: Nboafɔ̀n mán anwɔwɔ kè dú Ɔwɔ léyi ndù, ngo dù kɩ kɛ và nɔn, ne yri kɛ̀ và cɔ́ nyɛ̀n, kè dú anhɛ́n hɔ̀n ɔbɔ̀ɛn léyi nyɔn n'ɛgbú-tòbù zìwú, y'eyri kɛ̀ và cɔ́ nyɛ̀n,

⁵ kè dú Zhezü Krisì léyi dú ɔmùan-zri dì dalɛfuɛ-wrɔn, ezì-hɛ́ ẅì, kpàpkà-wrɔn léyi ye bɩ́ owú-bɔ̀ mɛ̀n ye sɩ́ ɔkɔrɛ-bɔ̀ mɛ̀n nɔn, mán ɛnhibù wú nɛ̀ncüì hɔ̀n nɛ̀ncüì, yri kɛ̀ và cɔ́ nyɛ̀n. Krisì kɛ cüɛn bɔ̀, kɩ n'eci ce mɛ̀n lɔ, nɛ̀n mrɛ́n bɔ̀ ɛgbàn mɛ̀n nɛ̀n sɔhɔ́,

⁶ nɛ̀n srɔ bɔ̀ Ɔwɔ-cice-bɔ̀, ô bo dú nɛ́n Zi Ɔwɔ ci-bɩ̀tan kɔ̀hɔ́n mɛ̀n. Eci-zrɔ mán ɛkɔrɛ̀srɔn kè dú nɛ tɛn ɛnvra lɔ fɛn! Kè dú ɔmu lɔ.

⁷ Nyɛ́n nyan, nɛ̀n dú ɛwì-gbuemɛ̀n nɛ và! Yɔ lɛ fɛn yɔ lɛ kán nɛ̀n, yɔ hɔ̀n léyi sɔ́n nɛ̀n ebisɛn nɔn mán. Ɛnhibù wú fɛcüè hɔ̀n ke le dú obòtomɛ̀n n'ɛkruhú. Hɛ̀ɛ̀, ɔmu lɔ de ke le dù nɔn! Kè dú ɔmu lɔ.

⁸ “Mɛ̀n dú kpàkpà-wrɔn mán ɛmɛẅitrɔ-wrɔn”, ɔmu lɔ de Ɛẅɛnwrɔn, ɛkɔrɛ̀srɔn Wɔ kɛ dɔ̀ nɔn, nɛ́n léyi nɛ́n dù, nɛ́n go dù, kɩ nɛ và nɔn.

Zhan cɔ́ Krisì mɛ̀n yrikàn

⁹ Mɛ̀n dú Zhan, nyɛ́n muan-ẅì; mɛ̀n mán mɛ̀n dú Zhezü bɔ̀sɔ̀ lɔ mɛ̀n hán nyɛ́n hɔ́, mɛ̀n dú ny'ɛkɔrɛ̀-wá-wrɔn ejüediemɛ̀n, mɛ̀n dú ɛnnɛ̀ncüì-dúyri mán ɛnbɔrɛ-ẅɛ̀n-hɛ́n-sɛ́ mɛ̀n. Yɛ sɩ́ mɛ̀n anwɔ̀nẅìemɛ̀n Patmɔsɛ̀n shi-vú-ta wú, m'ɔmùan zri-dì Ɔwɔ mùan-ankà wú mán annanwɔrɛ yrikàn léyi mɛ̀n cɔ́ Zhezü mɛ̀n nɔn, hɩ kruhú.

¹⁰ Ɛẅɛnwrɔn bì lɔ, Ɛnhɛ́n Prɔnprɔn yɛ́ mɛ̀n ɛwú, kɩ m'ɛmɛẅi lɔ mɛ̀n yá esùva cüicüi tɔ̀n ɔmùan, ke di nkù kɛ hán ɛbrɛ̀n-gbá tɔ̀n hɔ́;

¹¹ esùva lɔ kɛ dɔ̀ le: “È merɛ́n owrú tɔ̀n mɛ̀n eci léyi ɛ kàn nɔn, ô, è bɩ́ owrú lɔ è yüre Ɔwɔ fɛcüè hɔ̀n ɔbɔ̀ɛn lɔ: Efɛzɛ̀n anmàn, Smirnɛ̀n anmàn, Pergamɛ̀n anmàn, Tiatirɛ̀n anmàn, Sardɛ̀n anmàn, Filadɛlfi mán Laodise anmàn.”

¹² Mɛ̀n crɛ ɛmɛẅi, ô mɛ̀n kán ɔwrɔn léyi kɛ dɔ́ mɛ̀n ankà nɔn. Zɛtɛn mɛ̀n kán ansikɛ kɛ̀niɛn hɔ̀n ɔbɔ̀ɛn.

¹³ Kɛniɛn hɔ̀n ɔbɔ̀ɛn lɔ y'anwanzi lɔ, eci tɔ̀n nyɔn cá ɔwrɔnẅì tɔ̀n; nɛ̀n cɔ́ ɛceci she tɔ̀n kakɛ nɛ̀n annan mɛ̀n kɩ nɛ̀n mú ansikɛ pɛtɛ̀n tɔ̀n angbà.

¹⁴ N'ɛnkruẅie lɔ wo pupu hán kɔ̀kɔ̀sɛ̀ tù wosu hɔ́, kɩ vru cá ɔwɔ̀rɔ̀ dàfù hɔ́, kɩ n'anvɛ̀ hɔ̀n kɛ gbrɛ́n kɛ hán ɛnhyà hɔ́;

¹⁵ n'annan hɔ̀n kɛ gbrɛ́n kɛ hán pritù ẅì léyi ye fi ɛnhyà mɛ̀n, kɩ n'esùva lɔ ke shrì kɛ hán ɛnshi léyi ke dú eci wú ke cüe nɔn.

¹⁶ Okùcankrò hɔ̀n ɔbɔ̀ɛn dú nɛ̀n ezì-kɔrɛ̀ màn mɛ̀n, kɩ ezì-anhyrɛ̀-nyan-she piɛnpiɛn tɔ̀n dú nɛ̀n anmùan mɛ̀n kɛ srɔ ɛntrɛ. N'ezì lɔ kɛ gbrɛ́n kɛ hán ɛnbri-shɛ́n bri hɔ́.

¹⁷ Ɛnvra léyi mɛ̀n kán nɛ̀n nɔn, mɛ̀n bore nɛ̀n annan zìwú hán owú-wrɔn hɔ́. Nɛ̀n bɩ́ n'ezì-kɔrɛ̀ kɔrɛ̀ lɔ nɛ̀n di mɛ̀n ɛwú kɩ nɛ dɔ̀ le: “Ɛnjansù ke bɩ́ ẅɛn mɛ́n! Mɛ̀n dú kpàkpà-wrɔn mán ɛmɛẅitrɔ-wrɔn.

¹⁸ Mɛ̀n dú ɔkɔrɛ-wrɔn. Mɛ́n wù, tɛ́n zɛtɛ̀ lɔ mɛ̀n dú ɔkɔrɛ-wrɔn ɛnvra lɔ fɛn. Mɛ̀n ẅɛn ɛkɔrɛ̀srɔn owù mán owú-bɔ̀ hi wú.

¹⁹ Zɛtɛn è merɛ́n eci leyi ɛ̀ kàn: mán eci léyi ke ci mɛ́n ezìwú, mán hɩ léyi kɛ lɛ wɔ̀ɛn nɔn.

²⁰ Nyàn ankà bán ankà léyi dú okùcankrò ɔbɔ̀ɛn hɔ̀n léyi ɛ kán m'ezì-kɔrɛ̀ kɔrɛ̀ màn lɔ mɛ̀n mán ansikɛ kɛniɛn hɔ̀n ɔbɔ̀ɛn lɔ mɛ̀n nɔn: okùcankrò ɔbɔ̀ɛn hɔ̀n lɔ dú Ɔwɔ fɛcüè hɔ̀n ɔbɔ̀ɛn lɔ y'Ɔwɔ kùyüre-bɔ̀, kɩ kɛniɛn hɔ̀n ɔbɔ̀ɛn lɔ, dú Ɔwɔ fɛcüè hɔ̀n ɔbɔ̀ɛn lɔ.”