Matie 9 - Ɛmɛẅi ankà ankrànkràn 2003

Zhezü kɔrɛ ɔpkɔ̀cɔ-wrɔn tɔ̀n

¹ Zhezü bru anhàka mɛ̀n, vru vɔ́n ɛnshi nɛnbà-cɛ wú vá n'anmàn.

² Yɛ vá sɩ́ nɛ̀n ɔkpɔ̀cɔ-wrɔn tɔ̀n dɛ́ sofà tɔ̀n wúɛ. Ɛnvra léyi Zhezü kán ankàẅì-bùtan léyi anwrɔn hɔ̀n lɔ ẅɛ̀n nɔn, nɛ dɔ́ ɔkpɔ̀cɔ-wrɔn lɔ le: “È bɩ́ edùyì, m'ɛnẅì! V'ɛgbàn hɔ̀n lɔ bɩ́ ce mɛ́n!”

³ Zɛtɛn ɛnyànmàn-gbànvri-ankà-yé-bɔ̀ zri zri kɛ dɔ́ y'edomɛ̀n le: “Ɔwrɔn ndɔ lɔ kɛ kɛ́n Ɔwɔ ezì!”

⁴ Zhezü nyri y'ankà-tro lɔ kɩ kɛ dɔ̀ le: “Cɛci kruhú kɛ nyɛ ẅɛn ankà-tro gbàngbàn hɔ̀n ndɔ lɔa?

⁵ Hɩ le mɛ lɛ dɔ̀ le: ‘V'ɛgbàn hɔ̀n lɔ bɩ́ ce mɛ́n’ mán hɩ le me le vru mɛ̀n dɔ̀ le: ‘Tɔhú, ô nán esù’? Ankà anhyrɛ̀ lɔ tɛ́ tán de jrɔ nɛ́n?

⁶ Tɛ́n, me ji le nyɛ́n nyrì le, ɔwrɔnẅì Ẅì ẅɛn ɛkɔrɛ̀levri ɛnhibù wú ke le bɩ́ ɛgbàn kè ce.” Zɛtɛn Zhezü kɛ dɔ́ ɔkpɔ̀cɔ-wrɔn lɔ le: “Tɔhú, bɩ́ vɛ́n sofà lɔ, hɔ̀n ɛbemɛ̀n.”

⁷ Ɔwrɔn lɔ tɔhú kɩ hɔ́n ɛbemɛ̀n.

⁸ Ɛnvra léyi fɛcüè kán eci ndɔ lɔ nɔn, ɛnjansù bru yɔ kɩ yɔ mrɛ́n Ɔwɔ léyi tán anwrɔnẅì ɛkɔrɛ̀srɔn ndɔ lɔ nɔn.

Zhezü ke bi Matie

⁹ Zhezü cɔhɔ́ ɛyri léyi nɛ́n dù nɔn kɩ n'eciemɛ̀n lɔ nɛ̀n kán Matie yɛ́ anmàn-wɔɛ̀n-yrɛ-wɔn mɛ̀n. Zhezü kɛ dɔ́ nɛ̀n le: “Kɛ́n mɛ̀n ɛsɛ̀n!” Matie tɔhú kɩ kɛ́n nɛ̀n ɛsɛ̀n.

¹⁰ Zhezü dú ɛci-zîemɛ̀n Matie nanvrɛn ɛbemɛ̀n; anmàn-wɔɛ̀n-yrɛ-bɔ̀ bobrebe mán anwrɔn léyi yɛ krɛ́ eci-gbàngbàn-hán-bɔ̀ nɔn vá bɩ́ ɛyri yɛ́ tɛbrɛ̀ wú yɔ mán Zhezü mán n'ɛsɛ̀nkɛn-bɔ̀ mɛhi.

¹¹ Ɔwɔ-nyànmàn-sùva-wá-bɔ̀ kán eci-hán ndɔ lɔ kɩ yɔ dɔ́ n'ɛsɛ̀nkɛn-bɔ̀ le: “Cɛci kruhú kɛ ny'ankà-yé-wrɔn mán anmàn-wɔɛ̀n-yrɛ-bɔ̀, mán anwrɔn hɔ̀n léyi yɛ krɛ́ eci-gbàngbàn-hán-bɔ̀ nɔn mɛhi ke zî ɛci ɛyri zriɛ?”

¹² Zhezü yá yɔ ɔmùan kɩ kɛ dɔ̀ le: “Anwrɔn hɔ̀n léyi ɛnlɔẅiɛ bàdà edomɛ̀n nɔn, ke sɩ́ ji anháẅi-hán-wrɔn, tɛ́n ɛnlɔẅiɛ-bɔ̀ de ke ji anháẅi-hán-wrɔn nɔn.

¹³ Nyɛ́n hɔ̀n nyɛ́n ji Owrú Prɔnprɔn mɛ̀n ankà-dɔ̀ ndɔ lɔ n'ɛmɛ̀n: ‘Ɛcüɛ̀n de me ji nɔn, tɛ́n kè sɩ̀ dù annɔ̀n cice.’ Ɔmuhi, mɛ̀n sɩ̀ và ɛci-ankrànkràn-hán-bɔ̀ kruhú, tɛ́n anwrɔn hɔ̀n léyi nyɛ krɛ́ eci-gbàngbàn-hán-bɔ̀ nɔn yɔ kruhú de mɛ́n và nɔn.”

Zhezü mán kìshe-bɩ

¹⁴ Zhan Batisì sɛ̀nkɛn-bɔ̀ sɔnba Zhezü ɛtɛ̀sɛ̀n, zɛtɛn ke yrɛ nɛ̀n le: “Cɛci kruhú kɛ bɔ́ mán Ɔwɔ-nyànmàn-sùva-wá-bɔ̀ mɛhi bɔ̀ bɩ́ kìshe frɛfrɛ, kɩ v'ɛsɛ̀nkɛn-bɔ̀ tɛn ke sɩ́ bɩ́ kìshe hɛ̀?”

¹⁵ Kɩ Zhezü mrɛ́n yɔ ɔmùan le: “Nye tro le, anwrɔn hɔ̀n léyi ye bi ɛci-zîemɛ̀n eyrí-koran mɛ̀n nɔn, ke le dú obòto mɛ̀n, ɛnvra léyi yɔ mán ɛnnyɔnwrɔn-nɛ́n-cüì mɛhi yɔ yɛ́ nɛ́n? Annànwɔrɛ mɛ̀n lɔ hɔ́! Tɛ́n ɛnvra kɛ lɛ và, kɩ ye le bɩ́ ɛnnyɔnwrɔn-nɛ́n-cüì yɛ sɔhɔ́; zɛtɛn yɔ le bɩ́ kìshe.

¹⁶ Ɔwrɔn zriɛmɛ́n ke sɩ̀ bɩ́ ɛcàsa ẅie wrù kɛ brɛ́ ɛcàsa gbànvri; ɔmuhi ɛcàsa ẅie wrù lɔ kɛ lɛ sàn shá ɛcàsa gbànvri lɔ ke le sevri.

¹⁷ Ɔmu zri lɔ, ɛnnyɔnwrɔn zriɛmɛ́n ke sɩ̀ bɩ́ ankùa wrù kè gbro ankùa cüɛ̀ mɛ̀n kɛ̀ gbrɛ̀; ke dú kɛ nɛ hán ɔmu lɔ hô, ankùa lɔ ke sɩ̀ zrɔ. Yɛ gbrɛ́ ankùa wrù mán ɔhɔnán, ô ankùa cüɛ̀ mán yɛ gbrɛ́ ɔhɔnán, ɔmu lɔ de zrɔ nɔn.”

Zhüifɛ̀n-wrɔn cüìcüì tɔ̀n nyɔnwrɔn-ẅì mán ɛnnyɔnwrɔn léyi tɛ́ Zhezü ɛceci ɛkɔrɛ̀ nɔn

¹⁸ Ɛnvra léyi Zhezü dù kɛ dɔ́ yɔ ankà nɔn, Zhüifɛ̀n-wrɔn cüìcüì tɔ̀n nvà, nɛ̀n shɛ́n annankruemɛ̀n Zhezü zìwú kɩ nɛ dɔ́ yi le: “M'ɛnnyɔnwrɔn-ẅì nwú zɛtɛ̀ lɔ; tɛ́n, ɛ̀ và di nɛ̀n ɛkɔrɛ̀ ɛwú kɩ nɛ lɛ cɔ́ ɔkɔrɛ̀.”

¹⁹ Zhezü tɔhú kɩ kɛ́n nɛ̀n ɛsɛ̀n yɔ hɔ̀n, nɛ́n mán n'ɛsɛ̀nkɛn-bɔ̀ mɛhi.

²⁰ Ɛnnyɔnwrɔn tɔ̀n léyi ẅɛn ɛnkrɛ̀ lɔẅiɛ, ɛnnànwàn kru ɛvà-anhyrɛ̀ nɔn, sɔnba Zhezü ɛtɛ̀sɛ̀n, ci nɛ̀n ɛmɛẅi kɩ tɛ́ n'ɛceci mùan lɔ ɛkɔrɛ̀.

²¹ Ɔmuhi nɛ dɔ́ n'edomɛ̀n le: “Ke dú kɛ mɛ cɔ́ ɛyri mɛ tɛ́ n'ɛceci lɔ ɛkɔrɛ̀ hô, edomɛ̀n ke le wule mɛ̀n.”

²² Zhezü crɛ̀, kán nɛ̀n, kɩ dɔ̀ le: “Bɩ́ edùyì, m'ɛnẅì ɛnnyɔnwrɔn-ẅì! V'ankàẅì-bùtan lɔ kɔrɛ mɛ́n.” Kɩ ɛnvra lɔ mɛ̀n, ɛnnyɔnwrɔn lɔ cɔ́ ɔkɔrɛ̀.

²³ Zhezü bru Zhüifɛ̀n-wrɔn cüìcüì lɔ ɛbemɛ̀n. Ɛnvra léyi nɛ̀n kán ɛmràn-mú-bɔ̀ krɔn kpehɛ́n nyɔn, kɛ vá sànkowú hɔ́n yri, mán fɛcüè léyi ke ku n'edomɛ̀n ɛwú nɔn,

²⁴ nɛ dɔ̀ le: “Nyɛ́n dú ɛnu lɔ nyɛ́n srɔ ɛntrɛ, ɔmuhi ɛnnyɔnwrɔn-ẅì lɔ kè sɩ̀ wùɛ nɔn, nɛ di ndà.” Yɔ hán nɛ̀n ɛnhyürɛ̀.

²⁵ Ɛnvra léyi yɛ hán fɛcüè srɔ ɛntrɛ nɔn, Zhezü bru anwɔn mɛ̀n, nɛ̀n ẅɛn ɛnnyɔnwrɔn-ẅì lɔ ɛkɔrɛ̀ kɩ ɛnẅì lɔ tɔhú.

²⁶ Ɛmɛẅi ankà lɔ bonyí ɔkpɔsɔ ndɔ lɔ fɛn lɔ wú.

Zhezü kɔrɛ anvɛ̀-bɔyɛ-bɔ̀ anhyrɛ̀

²⁷ Ɛnvra léyi Zhezü cɔhɔ́ ɛyri léyi nɛ́n dù nɔn, anvɛ̀-bɔyɛ-bɔ̀ anhyrɛ̀ dú nɛ̀n ɛmɛẅi kɛ kɛ́n nɛ̀n ɛsɛ̀n kɩ ke di bobo kɛ dɔ̀ le: “È nyri bɔ̀ ɛnhyɔ̀bɔ̀, Davidɛ̀n ẅì!”

²⁸ Ɛnvra léyi Zhezü bru ɛbemɛ̀n nɔn, anvɛ̀-bɔyɛ-bɔ̀ lɔ sɔnba nɛ̀n ɛtɛ̀sɛ̀n kɩ ne yrɛ yɔ le: “Nye bú tán le mɛ lɛ hán ndɔ lɔ tɛ̀a?” Yɔ mrɛ́n n'ɔmùan le: “Hɛ̀ɛ̀, Ankà-yé-wrɔn.”

²⁹ Zɛtɛn Zhezü tɛ́ y'anvɛ̀ lɔ ɛkɔrɛ̀ kɩ kɛ dɔ̀ le: “Ɔwɔ kɛ tán nyɛ̀n eci léyi nyɛ vrá ankàẅì-bùtan mɛ̀n nɔn!”

³⁰ Kɩ y'anvɛ̀ hɔ̀n lɔ kán ɛyri. Zhezü dɔ́ yɔ ankà ɛshishiemɛ̀n. Nɛ dɔ́ yɔ le: “Nyɛ́n die nukù anvrɛnvrɛn, ɔwrɔnẅì zriɛmɛ́n ke bɩ́ nyri ankà lɔ.”

³¹ Tɛ́n yɔ hɔ̀n kɩ yɔ dɔ́ Zhezü ankà ɔkpɔsɔ ndɔ lɔ fɛn wú.

Zhezü kɔrɛ ɔmurɛ́n-wrɔn tɔ̀n

³² Zɛtɛn ɛnvra léyi Zhezü mán n'ɛsɛ̀nkɛn-bɔ̀ ndù kɛ hɔ̀n nɔn, ye bɩ́ *ɔmurɛ́n-wrɔn tɔ̀n yɔ vá sɩ́ nɛ̀n, ɔwrɔn ndɔ lɔ ke sɩ́ dɔ́ ankà rɔ́a, ɔmuhi ɛnhɛ́n gbàngbàn tɔ̀n dú nɛ̀n edomɛ̀n nɔn.

³³ Ɛnvra lɔ tɛ̀ léyi Zhezü wrɔ ɛnhɛ́n ndɔ lɔ nɔn, ɔmurɛ́n-wrɔn lɔ bukru kɛ dɔ́ ankà. Fɛcüè hɔ̀n dú anvɛmɛ̀n-frɛ́n-mɛ̀n kɩ kɛ dɔ̀ le: “Bɔ́ vá kán mrìmrì Izraɛlɛ̀n ɛnhi wú lɔ, eci zriɛmɛ́n kɛ̀ krɔn ndɔ lɔ!”

³⁴ Tɛ́n Ɔwɔ-nyànmàn-sùva-wá-bɔ̀ kɛ dɔ̀ le: “Anhɛ́n-gbàngbàn-wrɔn cüìcüì de kɛ tán nɛ̀n ɛkɔrɛ̀srɔn, ô nɛ̀n wrɔ́ anhɛ́n ndɔ hɔ̀n lɔ nɔn!”

Zhezü ke nyri fɛcüè hɔ̀n ɛnhyɔ̀bɔ̀

³⁵ Zhezü ke ci anmàn cüìcüì mán anmàn cɛ hɔ̀n lɔ fɛn mɛ̀n; ne yé ankà y'Ɔwɔ-sɛ́n-wɔn lɔ mɛ̀n, nɛ dɔ́ Anhobɩ́-Nɛ̀ncüì-dúyri mɛẅi ankà Ankrànkràn lɔ, kɩ nɛ kɔrɛ ɛnlɔẅiɛ mɛ̀ntɛ mɛ̀ntɛ mán ɔkpɔ̀cɔ lɔẅiɛ hɔ̀n lɔ fɛn.

³⁶ Ɛnhyɔbɔ̀-nyrì yɩ́ n'ɛnbɔrɛ lɔ mɛ̀n tán fɛcüè hɔ̀n léyi nɛ kàn, ɔmuhi anwrɔn ndɔ hɔ̀n lɔ dú edùkamɛ̀n kɩ edù wú yɔ, hán le annɔ̀n kà léyi kè sɩ̀ ẅɛ̀n ɔkùa-wrɔn nɔn.

³⁷ Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Ɛci küɛ sevri ndù, tɛ́n ɔkɔ̀hɔ̀n-hán-bɔ̀ ẅiɛ kɩ dù.

³⁸ Nyɛ́n sɛ́n ɛkɛ̀tɛ̀-nɛ́n-zi kɛ̀ hán ɔkɔ̀hɔ̀n-hán-bɔ̀ bobrebe kɛ̀ hɔ̀n küɛ ɛci kè sɩ́ ɛbemɛ̀n.”