Matie 28 - Ɛmɛẅi ankà ankrànkràn 2003

Zhezü wúemɛ̀n-dú-frɔ́

¹ Ɛnyanmán-bì vacì, ɛnbì-zri-bì lɔ ɛnbri kɛ́n mùan, Mari, Magdala nyɔnwrɔn mán nɛ́n cà Mari, hɔ́n nyan Zhezü nànmàn lɔ.

² Kpatakpata lɔ, ɛnhi jɔ́kɔ́ ecüìemɛ̀n; Ɛẅɛnwrɔn-kùyüre-wrɔn tɔ̀n dú anhobɩ́ kakɛ, vá vlá obù vri léyi sɛ́n ɛnnànmàn mùan nɔn kɩ ci ɛwú yɛ́.

³ Nɛ́n dù nɛ̀n hán ɛwú-yà hɔ́ kɩ n'ɛceci hɔ̀n lɔ dú ɛwosu hán ecüe dà-fù hɔ́.

⁴ Gɔliɛ-bɔ̀ lɔ ɛnjansù bru, kɩ ke cüì, yɔ hán le anwrɔn wù hɔ́.

⁵ Ɔwɔ-kùyüre-wrɔn lɔ mrɛ́n ɔmùan kɩ kɛ dɔ́ wúyɔ̀ hɔ̀n lɔ le: “Ɛnjansù ke bɩ́ ẅɛn nyɛ̀n. Mɛ́n nyrì le nye ji Zhezü, nɛ́n léyi yɛ gɔ́n nɛ̀n brɛ́ ɛgbàn-hán-tɛ̀ domɛ̀n nɔn;

⁶ nɛ̀n sɩ̀ dù ɛnu, nɛ̀n dú owú-bɔ̀ mɛ̀n nɛ̀n vá ɔkɔrɛ-bɔ̀ mɛ̀n hán ɔmu le nɛ́n dɔ̀ nɔn hɔ́. Nyɛ́n và, nyɛ́n nyan ɛyri léyi nɛ̀n dɛ́ nɔn.

⁷ Nyɛ́n kprànmàn nyɛ́n hɔ̀n dɔ́ n'ɛsɛ̀nkɛn-bɔ̀ le: ‘Nɛ̀n dú owú-bɔ̀ mɛ̀n nɛ̀n vá ɔkɔrɛ-bɔ̀ mɛ̀n kɩ nɛ lɛ hɔ́n zɛtɛ̀ lɔ nɛ̀n vrá nyɛ̀n Galile kpɔsɔ wú; nanvrɛn lɔ, de nyɛ lɛ kán nɛ̀n nɔn.’ Nyàn ankà léyi mɛ́n ẅɛ̀n mɛ lɛ dɔ́ nyɛ̀n nɔn.”

⁸ Yɔ cɔhɔ́ ɛnnànmàn tɛ̀sɛ̀n kpràkprà, ɛnjansù mán pɔ̀püɛ̀ dú yɔ ɛnbɔrɛ mɛ̀n, kɩ yɔ srɛ́ yɔ bɩ́ ɛmɛẅi ankà yɔ hɔ́n sɩ́ Zhezü sɛ̀nkɛn-bɔ̀ lɔ.

⁹ Ɛnvra zri lɔ mɛ̀n, Zhezü và srɔ́n yɔ ɛsù kɩ kɛ dɔ̀ le: “Me bi nyɛ̀n nyan!” Wúyɔ̀ hɔ̀n lɔ sɔnba nɛ̀n ɛtɛ̀sɛ̀n, ẅɛn nɛ̀n annan kɩ ke cüe nɛ̀n ankɔ̀rɛ̀ ezìwú.

¹⁰ Zɛtɛn Zhezü kɛ dɔ́ yɔ le: “Ɛnjansù ke bɩ́ ẅɛn nyɛ̀n. Nyɛ́n hɔ̀n nyɛ́n dɔ́ nmàn ẅì hɔ̀n kɛ hɔ́n Galile kpɔsɔ wú: nanvrɛn de yɔ lɛ kán mɛ̀n nɔn.”

Gɔliɛ-bɔ̀ ankà léyi dɔ̀ nɔn

¹¹ Ɛnvra léyi wúyɔ̀ hɔ̀n lɔ dú ɛnlevri kɛ hɔ̀n nɔn, gɔliɛ-bɔ̀ janbɔ̀ léyi yɛ hán kɛ̀ nán Zhezü zhe-nànmàn lɔ nɔn, vru hɔ́n anmàn kɩ kɛ dɔ́ Ɔwɔ-cice-bɔ̀ cüìcüì hɔ̀n lɔ, eci léyi wɔɛ̀n nɔn.

¹² Ɔwɔ-cice-bɔ̀ cüìcüì hɔ̀n mán ɛcüìcüì-bɔ̀ borɛkru: yɔ ẅɛn ɔmùan-krɔn, yɔ tán gɔliɛ-bɔ̀ lɔ ɔkùa bobrebe,

¹³ kɩ yɔ dɔ́ yɔ le: “Nyɛ́n dɔ̀ le n'ɛsɛ̀nkɛn-bɔ̀ vá bɩ́ n'edùwrú lɔ ɛnnyran mɛ̀n, ɛnvra léyi ndà wri nyɛ̀n nɔn.

¹⁴ Kɩ ke dú kɛ govràn kɛ cɔ̀ kɛ yá hô, bɔ́ lɛ wɔ́ nɛ̀n ɛnbɔrɛ kɩ nyɛ́n sɩ̀ cɔ́ ankà n'antamɛ̀n.”

¹⁵ Gɔliɛ-bɔ̀ bɩ́ ɔkùa lɔ kɩ hán eci léyi yɛ wá tán yɔ yɛ hán nɔn. Ɔmu lɔ de ankà ndɔ lɔ bonyí Zhüifɛ̀n hɔ̀n anmàn-hi wú lɔ fɛn hàn kɩ cɔ́ zɛtɛ̀ lɔ nɔn.

Zhezü bɩ́ n'edomɛ̀n yé n'ɛsɛ̀nkɛn-bɔ̀

¹⁶ Ɛsɛ̀nkɛn-bɔ̀ ɛvà-ɔtɔ̀n lɔ, hɔ́n Galile kpɔsɔ wú, ɛnkpò léyi Zhezü yé yɔ nɔn yi wú.

¹⁷ Ɛnvra léyi yɔ kán nɛ̀n nɔn, yɔ cüe nɛ̀n ankɔ̀rɛ̀ ezìwúɛ; y'ɛmɛ̀n lɔ ndɔ hɔ̀n kɛ ẅɛn ɛnbɔrɛ anhyrɛ̀.

¹⁸ Zhezü sɔnba yɔ ɛtɛ̀sɛ̀n kɩ kɛ dɔ́ yɔ le: “Yɛ tán mɛ̀n ɛkɔrɛ̀srɔn lɔ fɛn anhobɩ́ mán ɛnhi wú.

¹⁹ Nyɛ́n hɔ́n ɛnhibù mumù lɔ fɛn wú, nyɛ́n hɔ́n anwrɔn ɛtɛ̀sɛ̀n, ô nyɛ́n srɔ yɔ m'ɛsɛ̀nkɛn-bɔ̀; nyɛ́n wá yɔ ɛnshi ɛnkru: Ezi, Ɛnẅì mán Ɛnhɛ́n Prɔnprɔn bɩ́mɛ̀n,

²⁰ ô nyɛ́n hán yɔ, yɛ ẅɛn ankà hɔ̀n lɔ fɛn léyi mɛ̀n yé nyɛ̀n nɔn, n'ɛkɔrɛ̀zì yɔ hɛ́n. Kɩ ke ji le nyɛ́n nyrì le: me le dú nyɛ̀n ɛmɛ̀n ɛnvra lɔ fɛn, hàn kɩ kɛ lɛ cɔ́ ɛnhibù trɔ vra.”