Matie 25 - Ɛmɛẅi ankà ankrànkràn 2003

Wúyɔ̀-ẅì hɔ̀n ɛvà nyandrɛn mɛ̀n ankà-dɔ̀

¹ “Zɛtɛn Anhobɩ́ nɛ̀ncüì-dúyri kɛ lɛ cá wúyɔ̀-ẅì hɔ̀n ɛvà léyi bɩ́ yɔ kɛniɛn srɔ ɛntrɛ hɔ́n ɛnnyɔnwrɔn-nɛ́n-cüì ɛsù nɔn.

² Ɛnrì dú yɔ ɛmɛ̀n kè sɩ̀ ẅɛ̀n ɛnkruemɛ̀n, tɛ́n ɛnrì ndɔ lɔ dú ɛnkruemɛ̀n-ẅɛn-wúyɔ̀.

³ Wúyɔ̀ ɛnrì hɔ̀n léyi kè sɩ̀ ẅɛ̀n ɛnkruemɛ̀n nɔn, bɩ́ yɔ kɛniɛn, tɛ́n ke sɩ̀ bɩ ɛnzhì.

⁴ Tɛ́n yɔ hɔ̀n léyi ẅɛn ɛnkruemɛ̀n nɔn, yɔ bɩ́ ɛnhzì bɔdɛ̀ dú yɔ edomɛ̀n hɩ mán yɔ kɛniɛn mɛhi.

⁵ Zɛtɛn ɛnnyɔnwrɔn-nɛ́n-cüì vá vra kɛ mɔɛ̀n; wúyɔ̀-ẅì hɔ̀n ɛvà lɔ fɛn ɛndà ke wrì, kɩ dɛ́ kɛ di ɛndà.

⁶ Ɛnnyran wanzi cɔ̀, yɛ yá bobo tɔ̀n ke shrì kɛ dɔ̀ le: ‘Nyàn ɛnnyɔnwrɔn-nɛ́n-cüì! Nyɛ́n srɔ ɛntrɛ nyɛ́n hɔ́n nɛ̀n ɛsù!’

⁷ Zɛtɛn wúyɔ̀-ẅì hɔ̀n ɛvà lɔ gbɛ́ anvɛ̀, kɩ bukru kɛ wá yɔ kɛniɛn esùva.

⁸ Wúyɔ̀ hɔ̀n léyi ke sɩ̀ ẅɛ̀n ɛnkruemɛ̀n nɔn kɛ sán yɔ nyran hɔ̀n ɛnzhì kɩ kɛ dɔ̀ le: ‘Nyɛ́n tán bɔ̀ ɛnzhì jan, ɔmuhi kɛniɛn kɛ zɛ́n bɔ̀ nɔn.’

⁹ Ɛnkruemɛ̀n-ẅɛn-wúyɔ̀ hɔ̀n lɔ mrɛ́n y'ɔmùan le: ‘Hɔ̂, ɔmuhi ɛnzhì ke sɩ̀ cɔ́ nyɛ́n mán bɔ́ mɛhi. Nyɛ́n hɔ́n anmàn *anhàn-kùa-wɔn mɛ̀n nyɛ́n wɔ́ nyɛ tɛn.’

¹⁰ Ɔbrɔ̀sà wúyɔ̀-ẅì hɔ̀n lɔ hɔ́n ɛnzhì wɔ́ yri kɩ ɛnnyɔnwrɔn-nɛ́n-cüì nvà. Wúyɔ̀ ɛnrì ndɔ hɔ̀n léyi ɛnzhì dú kɛniɛn mɛ̀n nɔn, yɔ mán ɛnnyɔnwrɔn-nɛ́n-cüì mɛhi, yɔ bru eyri-wɔn lɔ mɛ̀n kɩ yɛ sɛ́n esù safɛ̀ mɛ̀n.

¹¹ Ɛnvra bru mɛ̀n, kɩ wúyɔ̀ ndɔ hɔ̀n léyi hɔ́n ɛnzhì wɔ́ yri nɔn nvà ke di bobo kɛ dɔ̀ le: ‘Ankà-yé-wrɔn, Ankà-yé-wrɔn, srú bɔ̀ esù!’

¹² Tɛ́n ɛnnyɔnwrɔn-nɛ́n-cüì mrɛ́n ɔmùan le: ‘Mɛ dɔ́ nyɛ̀n annànwɔrɛ mɛ̀n le: mɛ̀n sɩ̀ nyri nyɛ̀n.’

¹³ Zɛtɛn Zhezü kɛ dɔ́ n'ɛsɛ̀nkɛn-bɔ̀ le: Nyɛ́n kpri ɛvɛ̀, ɔmuhi nyɛ́n sɩ̀ nyrì ɛnbì mán wacɛ̀n nɔn.”

Ɛci-bɩtan-bɔ̀ anhɔ̀n nyandrɛn mɛ̀n ankà-dɔ̀

¹⁴ “Ke le dù kɛ lɛ hán ɔwrɔn tɔ̀n léyi kɛ vá nɛ̀nnyànmàn hɔ́n yri nɔn: Ne bi n'ɛci-bɩtan-bɔ̀ kɩ ne bɩ́ n'ɛci nɛ wá yɔ antamɛ̀n.

¹⁵ Nɛ̀n tán kpàkpà-wrɔn lɔ ansɩ̀kɛ-kùa-ẅì ɛkoẅi-ɛẅia-ɛnrì, anhyrɛmɛ̀n-wrɔn lɔ ɛkoẅi-ɛvà, anhɔnmɛ̀n-wrɔn lɔ ɛkoẅi-ɛnrì: ɔwrɔn wrɔn mán n'ɔkɔ̀hɔ̀n hán dùyì mɛhi. Zɛtɛn nɛ́n hɔ̀n.

¹⁶ Eci-bɩtan-wrɔn léyi cɔ́ ansɩ̀kɛ kùa-ẅì ɛkoẅi-ɛẅia-ɛnrì nɔn, bɩ́ ɔkùa lɔ zhrɛ́ anhàn kɩ vru cɔ́ ɔkùa ɛkoẅi-ɛẅia-ɛnrì kɛ́n ɛwú.

¹⁷ Anhyrɛmɛ̀n-wrɔn léyi cɔ́ ɛkoẅi-ɛvà nɔn, mán zhrɛ́ anhàn kɩ cɔ́ ɛkoẅi-ɛvà kɛ́n ɛwú.

¹⁸ Tɛ́n, ɔwrɔn léyi cɔ́ ɔkùa ɛkoẅi-ɛnrì nɔn, hɔ́n bɔ́ ɛnnànmàn bán n'ankà-yé-wrɔn kùa lɔ.

¹⁹ Ɛnvra sheshe vacì, kɩ ɛci-bɩtan-bɔ̀ ankà-yé-wrɔn lɔ dú nɛ̀nnyànmàn vru và kɩ nɛ́n mán yɔ mɛhi yɔ krɛ́ ɛci.

²⁰ Ɔwrɔn léyi cɔ́ ɔkùa ɛkoẅi-ɛẅia-ɛnrì nɔn nvà kɩ ke yé ɔkùa ɛkoẅi-ɛẅia-ɛnrì léyi nɛ́n cɔ̀ nɛ̀n kɛ́n ɛwú nɔn kɩ nɛ dɔ̀ le: ‘Ankà-yé-wrɔn, ɛ̀ tán mɛ̀n ansɩ̀kɛ-kùa-ẅì ɛkoẅi-ɛẅia-ɛnrì. Nyàn ɛkoẅi-ɛẅia-ɛnrì ndɔ léyi mɛ́n cɔ̀ mɛ̀n kɛ́n ɛwú nɔn.’

²¹ N'ankà-yé-wrɔn kɛ dɔ́ nɛ̀n le: ‘Kɛ zrɔ, ɔmùan-zri-dì mán eci-bɩtan-wrɔn anvrɛnvrɛn. È di ɔmùan-zri ɛci hɔ̀n léyi kè sɩ̀ ẅɛ̀n vɔ̀nshɛ́ nɔn wú, mɛ lɛ wá mɛ́n yɔ hɔ̀n léyi ẅɛn vɔ̀nshɛ́ nɔn antamɛ̀n, và cɔ́ mɛ̀n bɔ̀ brá pɔ̀püɛ̀.’

²² Eci-bɩtan-wrɔn léyi cɔ́ ɔkùa-ẅì ɛkoẅi-ɛvà nɔn, vá nɛ̀n ɛtɛ̀sɛ̀n kɩ zɛtɛn kɛ dɔ̀ le: ‘Ankà-yé-wrɔn ɛ̀ tán mɛ̀n ansɩ̀kɛ-kùa-ẅì ɛkoẅi-ɛvà. Nyàn ɛkoẅi-ɛvà léyi mɛ́n cɔ̀ mɛ̀n kɛ́n ɛwú nɔn.’

²³ N'ankà-yé-wrɔn kɛ dɔ́ nɛ̀n le: ‘Kɛ zrɔ, ɔmùan-zri-dì mán eci-bɩtan-wrɔn anvrɛnvrɛn. È di ɔmùan-zri ɛci hɔ̀n léyi kè sɩ̀ ẅɛ̀n vɔ̀nshɛ́ nɔn wú, mɛ lɛ wá mɛ́n yɔ hɔ̀n léyi ẅɛn vɔ̀nshɛ́ nɔn antamɛ̀n. Và cɔ́ mɛ̀n bɔ̀ brá pɔ̀püɛ̀.’

²⁴ Ɔtrɔmɛ̀n lɔ, eci-bɩtan-wrɔn léyi cɔ́ ɔkùa-ẅì ɛkoẅi-ɛnrì nɔn, nvà kɩ kɛ dɔ̀ le: ‘Ankà-yé-wrɔn, mɛ́n nyrì le, è dú ɛnkru-shishi-wrɔn: ɛ küɛ ɛci ɛyri léyi è sɩ̀ tɛ̀a nɔn, e ji ɛci ɛyri léyi è sɩ̀ hɛ́n hàn nɔn.

²⁵ Ɛnjansù ẅɛn mɛ̀n kɩ mɛ̀n bɩ́ v'ɔkùa lɔ mɛ́n hɔ̀n bán ɛnhibɩ́. Zɛtɛn nyàn eci léyi dú vɛ tɛn nɔn.’

²⁶ N'ankà-yé-wrɔn mrɛ́n nɛ̀n ɔmùan le: ‘Eci-bɩtan-wrɔn gbàngbàn, ɛjɛ́-wrɔn! E nyri ɔmu le mɛ küɛ ɛci ɛyri léyi mɛ́n sɩ̀ tɛ̀a, kɩ me bɩ́ ɛci ɛyri léyi mɛ̀n sɩ̀ hɛ̀n hàn nɛ́n?

²⁷ Zɛtɛn, ɛyri léyi yɛ hɛ́n ɔkùa hɩ ke bî ɛẅì nɔn, nanvrɛn de ke ji le è bɩ́ m'ɔkùa lɔ ɛ̀ hɛ́n, ô ɛnvra léyi mɛ và nɔn, ɔkùa lɔ ke bî ɛẅì kɛ kɛ́n ɛwú.

²⁸ Nyɛ́n bɩ́ n'ansɩ̀kɛ-kùa-ẅì ɛkoẅi-ɛnrì lɔ nyɛ́n sɔhɔ́ nɛ̀n antamɛ̀n, ô nyɛ́n tán ɔwrɔn léyi ẅɛn tɛ̀bru nɔn.

²⁹ Ɔmuhi ɔwrɔn totɔtɔ̀n léyi ẅɛn eci nɔn, yɛ lɛ sàn kɛ́n nɛ̀n ɛwú kɩ ne le dú ɛci bobrebe ẅɛn-wrɔn; tɛ́n ɔwrɔn léyi kè sɩ̀ ẅɛ̀n hàn nɔn, ye le bɩ́ ɛẅiɛ léyi nɛ́n ẅɛ̀n nɔn mán yɛ sɔhɔ́.

³⁰ Eci-bɩtan-wrɔn ndɔ léyi kè sɩ̀ ẅɛ̀n vɔ̀nshɛ́ nɔn, nɛ tɛn, nyɛ́n kɔ́n nɛ̀n ze ɛyri yɔwɔ mɛ̀n, ɛyri léyi eyú-wù mán ɛhnyî-rá ndù nɔn.’ ”

Emɛẅi-trɔ mrɛ̀ncì

³¹ “Ɛnvra léyi ɔwrɔnẅì Ẅì kɛ lɛ vá n'eci-zrɔ lɔ mɛ̀n, nɛ́n mán Ɔwɔ-kùyüre-bɔ̀ lɔ fɛn mɛhi nɔn, nɛ lɛ yɛ́ n'eci-zrɔ-gbú-tobù lɔ wú.

³² Ɛnhibù fɛcüè hɔ̀n lɔ fɛn kɛ lɛ borɛkru n'ezìwú kɩ nɛ lɛ kua anwrɔn, hán ɔmu le annɔ̀n-kua-bɔ̀ kɛ kua kɔ̀kɔ̀sɛ̀ mán ɛbùrì;

³³ nɛ lɛ hɛ́n kɔ̀kɔ̀sɛ̀ hɔ̀n n'ezì-kɔrɛ̀a kɩ ɛbùrì hɔ̀n ke le dú nɛ̀n ebrìemɛ̀n.

³⁴ Zɛtɛn ɛnnɛ̀ncüì lɔ kɛ lɛ dɔ́ anwrɔn hɔ̀n léyi dú nɛ̀n ezì-kɔrɛ̀ nɔn le: ‘Nyɛ́n và, nyɛ́n léyi Dade fú nyɛ̀n ɛnshi nɔn, nyɛ́n bru Anhobɩ́ nɛ̀ncüì-dúyri léyi yɛ hán yɛ hɛ́n nyɛ̀n ɛnhibù krubɔmɛ̀n hán hɛ́n nɔn.

³⁵ Ɔmuhi ɔmùanwù ẅɛn mɛ̀n, kɩ nyɛ́n tán mɛ̀n ɛci-zî; ɛnshi mùanwù ẅɛn mɛ̀n, kɩ nyɛ́n tán mɛ̀n ɛnshi mɛ́n mì; mɛ́n dú nɛ̀nnyàn-wrɔn kɩ nyɛ́n bɩ́ mɛ̀n nyɛ́n sɩ́ ɛbemɛ̀n;

³⁶ Mɛ̀n sɩ̀ ẅɛ̀n ɛci edomɛ̀n, kɩ nyɛ́n ku mɛ̀n ɛci edù; ɛnlɔẅiɛ dá mɛ̀n, kɩ nyɛ́n hán mɛ̀n ɛci; mɛ́n dú anwɔn-mɛ̀n-wá-wɔn mɛ̀n, kɩ nyɛ́n và nyan mɛ̀n.’

³⁷ Ɛnnyrɔnnan-bɔ̀, zɛtɛn kɛ lɛ mrɛ́n nɛ̀n ɔmùan le: ‘Ɛẅɛnwrɔn, ɛnvra tán de bɔ̀ kán mɛ́n ɔmùanwúemɛ̀n, hɩ bɔ̀ tán mɛ́n ɛci, ɛnshi mùanwù ẅɛn mɛ́n, bɔ̀ tán mɛ́n ɛnshi e mì nɛ́n?

³⁸ Ɛnvra tán de bɔ̀ kán mɛ́n, è dú nɛ̀nnyàn-wrɔn, kɩ bɔ̀ bɩ́ mɛ́n bɔ̀ sɩ́ ɛbemɛ̀n, è sɩ̀ ẅɛ̀n ɛci edomɛ̀n, kɩ bɔ̀ ku mɛ́n ɛci edù nɛ́n?

³⁹ Ɛnvra tán de bɔ̀ kán mɛ́n, è dú ɛnlɔẅiɛ mɛ̀n, è dú anwɔn-mɛ̀n-wá-wɔn mɛ̀n, kɩ bɔ́ hɔ̀n bɔ̀ nyan mɛ́n nɛ́n?’

⁴⁰ Ɛnnɛ̀ncüì lɔ kɛ lɛ mrɛ́n yɔ ɔmùan le: ‘Mɛ dɔ́ nyɛ̀n annànwɔrɛ mɛ̀n le: ɛnvra totɔtɔ̀n léyi nyɛ́n hán eci ndɔ lɔ nyɛ́n tán ɛẅì hɔ̀n léyi dú nmàn ẅì hɔ̀n, ke dú ɛnzri mán, mɛ̀n de nyɛ́n hán nyɛ́n tán mɛ̀n nɔn.’

⁴¹ Zɛtɛn, ɛnnɛ̀ncüì lɔ kɛ lɛ dɔ́ yɔ hɔ̀n léyi nyɔn nɛ̀n ebrì-kɔrɛ̀a nɔn le: ‘Nyɛ́n sɔ̀n hɔ́n ɛmɛẅi esù-she m'ɛtɛ̀sɛ̀n, Ɔwɔ-ẅiɛ̀-dá-bɔ̀! Nyɛ́n hɔ́n ɛnhyà léyi ke sɩ́ zɛ́n hán, hɩ yɛ hán dú anwa-wrɔn mán n'ɛsɛ̀nkɛn-bɔ̀ tɛn nɔn mɛ̀n!

⁴² Ɔmuhi, ɔmùanwù ẅɛn mɛ̀n kɩ nyɛ́n sɩ̀ tán mɛ̀n ɛci-zî; ɛnshi mùanwù ẅɛn mɛ̀n, kɩ nyɛ́n sɩ̀ tán mɛ̀n ɛnshi mɛ̀n mì hɛ̀n;

⁴³ mɛ́n dú nɛ̀nnyàn-wrɔn, kɩ nyɛ́n sɩ̀ bɩ́ mɛ̀n nyɛ́n sɩ̀ ɛbemɛ̀n; mɛ́n sɩ̀ ẅɛ̀n ɛci edomɛ̀n kɩ nyɛ́n sɩ̀ ku mɛ̀n ɛci edù; mɛ́n dú ɛnlɔẅiɛ mɛ̀n mán anwɔn-mɛ̀n-wá-wɔn-mɛ̀n, kɩ nyɛ́n sɩ̀ wà mɛ̀n esùva.’

⁴⁴ Zɛtɛn yɔ lɛ mrɛ́n nɛ̀n ɔmùan le: ‘Ɛẅɛnwrɔn, ɛnvra tán de bɔ̀ kán mɛ́n, ɔmùanwúemɛ̀n, ɛnshi mùanwúemɛ̀n, nɛ̀nnyàn-wrɔn, ɛci bàdà mɛ̀n edomɛ̀n, è dú ɛnlɔẅiɛ mɛ̀n, anwɔn-mɛ̀n-wá-wɔn-mɛ̀n, kɩ bɔ̀ sɩ̀ wá mɛ̀n ɛkɔrɛ̀ nɛ́n?’

⁴⁵ Ɛnnɛ̀ncüì lɔ kɛ lɛ mrɛ́n yɔ ɔmùan le: ‘Mɛ dɔ́ nyɛ̀n annànwɔrɛ mɛ̀n le: ɛnvra totɔtɔ̀n léyi nyɛ́n sɩ̀ hàn eci ndɔ lɔ nyɛ́n tán ɛẅì hɔ̀n kpòkpò lɔ, ke dú ɛnzri mán, mɛ̀n de nyɛ́n sɩ̀ hàn nyɛ́n tán mɛ̀n nɔn.’

⁴⁶ Kɩ yɔ lɛ hɔ̀n di ɛgbàn-wɔɛ̀n léyi ke sɩ́ trɔa nɔn, tɛ́n yɔ hɔ̀n léyi hán Ɔwɔ kɔrɛ̀zì-ci nɔn, kɛ lɛ hɔ́n ɛwúvà léyi ke sɩ̀ ẅɛ̀n ɛnkru-trɔ nɔn mɛ̀n.”