Matie 16 - Ɛmɛẅi ankà ankrànkràn 2003

Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, ke ji anvɛmɛ̀n-frɛ́n-ci tɔ̀n kɛ̀ kàn

¹ Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn sɔnba Zhezü ɛtɛ̀sɛ̀n ô kɛ̀ krɔn nɛ̀n antanwrɔn. Yɔ dɔ́ nɛ̀n, nɛ̀n hán anvɛmɛ̀n-frɛ́n-ci tɔ̀n nɛ̀n tán yɔ, yɔ kàn, ô kè yé tán le n'ɛkɔrɛsrɔn dú Ɔwɔ yri và.

² Tɛ́n Zhezü mrɛ́n yɔ ɔmùan le: “Ɛnbri bore mùan mɛ̀n, nyɛ dɔ̀ le: ‘Ɛyri ke le bi, ɔmuhi anhobɩ́ srɔ anwɔnsɛ́n nɔn.’

³ Kɩ ɔsɔ̀wrɔ̀ fùtàn, nyɛ dɔ̀ le: ‘Ɛnyɔncì lɔ ɛnshi kɛ lɛ nàn, ɔmuhi anhobɩ́ murɛn nɔn.’ Nye nyri ɛci woroan-ci hɔ̀n léyi dú anhobɩ́ nɔn, tɛ́n nyɛ́n sɩ̀ ẅɛ̀n ɛnkruemɛ̀n, nyɛ́n nyrì ɛci hɔ̀n léyi kɛ wɔɛ́n anhobɩ́, hɩ dú ɛnvra ndɔ hɔ̀n lɔ mɛ̀n ci nɔn!

⁴ Ɛnyɔncì-bɔ̀ léyi dú anwrɔn gbàngbàn kɩ ke sɩ́ di ɔmùan-zri Ɔwɔ tɛ̀sɛ̀n nɔn, ke ji anvɛmɛ̀n-frɛ́n-ci tɔ̀n, tɛ́n anvɛmɛ̀n-frɛ́n-ci zriɛmɛ́n ke sɩ̀ hán kɛ̀ tán yɔ, ke dú kɛ kè sɩ̀ dù Zhonasɛ̀n tɛn lɔ.” Zɛtɛn nɛ́n teze yɔ kɩ nɛ́n nán-hɔ̀n.

Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, y'eci-fɔ́-ci

⁵ Ɛnvra léyi ɛsɛ̀nkɛn-bɔ̀ lɔ vɔ́n-shi nɛnbà cɛ mɛẅi nɔn, esùva yuru yɔ, ye sɩ̀ bɩ abùtùkumɛ́n.

⁶ Zɛtɛn Zhezü kɛ dɔ́ yɔ le: “Nyɛ́n wá esùva, Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì nɔn, y'eci-fɔ́-ci tɛ̀sɛ̀n.”

⁷ Ɛsɛ̀nkɛn-bɔ̀ lɔ kɛ dɔ́ y'edomɛ̀n le: “Nɛ dɔ́ ɔmu lɔ, ɔmuhi bɔ̀ sɩ̀ bɩ abùtùkumɛ́n nɔn.”

⁸ Zhezü yá y'ankà-dɔ̀ lɔ kɩ ke yrɛ yɔ le: “Cɛci kruhú kɛ nyɛ dɔ́ ny'edomɛ̀n le: abùtùkumɛ́n léyi bɔ̀ sɩ̀ bɩɛ nɔn hɩ kruhú? Nyàn ɔmuhi ny'ankàẅì-bùtan cɛcɛ nɔn!

⁹ Ɔmu tɛ̀kɩ nyɛ́n sɩ́ cɔ́ nyri hɛ́n? Ke sɩ́ bru nyɛ̀n, abùtùkumɛ́n ɛnrì léyi yɛ dɛ́ anwrɔn tɛ̀bru-kru-ɛnrì mán ɛci léyi wɔrɔ nɔn, ankɛ́ mùan léyi nyɛ́n bɩ nɛ́n?

¹⁰ Kɩ ke sɩ́ bru nyɛ̀n, abùtùkumɛ́n ɔbɔɛ̀n léyi yɛ dɛ́ anwrɔn tɛ̀bru-kru-anzɔ̀ mán ɛci léyi wɔrɔ nɔn, ankɛ́ mùan léyi ye bɩ nɛ́n?

¹¹ Anhɔntan kɛ nyɛ́n sɩ́ nyriɛn le, kè sɩ̀ dù abùtùkumɛ́n ankà de mɛ́n dɔ́a ɛnvra léyi mɛ dɔ́ nyɛ̀n le: nyɛ́n wá esùva, Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ ankà kɛ tán ankàẅì, y'eci-fɔ́-ci tɛ̀sɛ̀n nɛ́n?”

¹² Zɛtɛn ɛsɛ̀nkɛn-bɔ̀ lɔ nyri ɔmu le, kè sɩ̀ dù abùtùkumɛ́n ci-fɔ́-ci ankà de Zhezü kɛ dɔ̀a nɔn, tɛ́n ankà-yé léyi Ɔwɔ-nyànmàn-sùva-wá-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankàẅì kɛ tán nɔn, hɩ ankà de nɛ dɔ̀ nɔn.

Piɛrɛ̀n kɛ dɔ̀ le Zhezü dú Ebɩdie-wrɔn

¹³ Zhezü hɔ́n ɛnhi wú léyi dú Sezare Filipɛ̀n anmàn tɛ̀sɛ̀n nɔn. Ne yrɛ n'ɛsɛ̀nkɛn-bɔ̀ le: “Ankà tán de anwrɔn kɛ dɔ́ ɔwrɔnẅì Ẅì wú nɛ́n?”

¹⁴ Yɔ mrɛ́n ɔmùan le: “Anwrɔn ndɔ hɔ̀n kɛ dɔ̀ le è dú Zhan Batisì, ɛnjanbɔ̀ kɛ dɔ̀ le, è dú Eli, kɩ ndɔ hɔ̀n vru kɛ dɔ̀ le, è dú Zheremi, Ɔwɔ-mùanwú-ankà-dɔ́-wrɔn tɔ̀n nyàntɛn.”

¹⁵ Kɩ Zhezü ke yrɛ yɔ le: “Kɛ̂ nyɛ tɛn, antɔn de nye bú mɛ̀n nyɛ hán nɛ́n?”

¹⁶ Simɔn Piɛrɛ̀n mrɛ́n ɔmùan le: “È dú Ebɩdie-wrɔn, ƆWɔ kɔrɛkɔrɛ lɔ n'Ɛnẅì.”

¹⁷ Zɛtɛn Zhezü kɛ dɔ́ nɛ̀n le: “È dú ɛnbɔrɛbruemɛ̀n, Simɔn, Zhan ẅì, ɔmuhi kè sɩ̀ dù ɔwrɔnẅì de kɛ̀ wà mɛ́n ankà annànwɔrɛ ndɔ lɔ anmùan mɛ̀n nɔn, tɛ́n Dade léyi dú ɛwú nɔn.

¹⁸ Kɩ mɛ̀n, mɛ dɔ́ mɛ́n annànwɔrɛ mɛ̀n le, è dú obù kɩ obù, ndɔ lɔ wú, me le ku mɛ́n fɛcüè wɔn lɔ. Owù dùku mán kè sɩ̀ ẅɛ̀n ɛkɔrɛ̀srɔn n'ɛwú.

¹⁹ Mɛ lɛ tán mɛ́n Anhobɩ́ Nɛ̀ncüì-dúyri safɛ̀ hɔ̀n lɔ: eci léyi ɛ lɛ mrɛ́n sɔhɔ́ ɛnhi wú nɔn, anhobɩ́ mán yɛ lɛ mrɛ́n sɔhɔ́; eci léyi e le bɩ́ ɛnhi wú nɔn anhobɩ́ mán ye le bɩ.”

²⁰ Zɛtɛn Zhezü wá kpankpan tán n'ɛsɛ̀nkɛn-bɔ̀ lɔ, ke bɩ́ dɔ́ ɔwrɔnẅì zriɛmɛ́n le nɛ̀n dú Ebɩdie-wrɔn lɔ.

Zhezü kɛ dɔ́ n'owù mán n'owúemɛ̀n-dù-frɔ́ ankà

²¹ Bukru hi vra lɔ, Zhezü kɛ dɔ́ n'ɛsɛ̀nkɛn-bɔ̀ ankà kpetemɛ̀n kɩ nɛ dɔ̀ le: “Ke ji le mɛ̀n hɔ́n Zherüzalɛmɛ̀n kɩ mɛ lɛ kán ɛgbàn bobrebe, ɛcüìcüì-bɔ̀, Ɔwɔ-cice-bɔ̀ mán Ɔwɔ-nyànmàn-sùva-wá-bɔ̀ tamɛ̀n. Ye le di mɛ̀n owúemɛ̀n kɩ ɛbi-anhɔ̀n granmɛ̀n, me le dú owúemɛ̀n mɛ̀n frɔ́.”

²² Zɛtɛn Piɛrɛ̀n bi nɛ̀n ɔhɔnán kɩ ke di nɛ̀n ebrè: “Ɔwɔ kɛ ẅɛ̀n sɔhɔ́, kɩ nɛ dɔ́ yi le: Ɛẅɛnwrɔn! Hɔ̂, eci ndɔ lɔ ke sɩ̀ hán mɛ́n!”

²³ Tɛ́n Zhezü crɛ̀ kɩ kɛ dɔ́ Piɛrɛ̀n le: “Sɔ́n hɔ̀n ɛmɛẅi esù she m'ɛtɛ̀sɛ̀n, Anwa-wrɔn! È dú eci léyi dabra dɛ́ mɛ̀n ɛnlevri wanziɛ nɔn, ɔmuhi è sɩ̀ ẅɛ̀n Ɔwɔ ankà-tro nɔn, tɛ́n anwrɔnẅì ankà-tro de ɛ ẅɛ̀n nɔn.”

²⁴ Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Ke dú kɛ ɔwrɔn ke ji kɛ và cɔ́ mɛ̀n hô, nɛ́n bɩ́ vru tro n'edomɛ̀n ankà, nɛ̀n shri n'ɛgbànkàn nɛ̀n bɩ, ô nɛ̀n kɛ́n mɛ̀n ɛsɛ̀n.

²⁵ Ɔmuhi ɔwrɔn léyi ke ji ke bɩ́ n'ɛwúvà lɔ kè die nɔn, kɛ lɛ zrɛ́n nɛ̀n; tɛ́n ɔwrɔn léyi kɛ lɛ zrɛ́n n'ɛwúvà lɔ m'ɛkruhú nɔn, ke le bɩ́ nɛ̀n kè die.

²⁶ Vɔ̀nshɛ́ tán de ke le dú tán ɔwrɔn léyi ke ji kɛ̀ ẅɛn ɛnhibù mumù lɔ fɛn, ke dú kɛ nɛ zrɛ́n n'ɛwúvà lɔ nɛ́n? Ecitan de nɛ lɛ tán, ô nɛ̀n wɔ́ n'ɛwúvà lɔ nɛ́n?

²⁷ Annànwɔrɛ mɛ̀n, ɔwrɔnẅì Ẅì kɛ lɛ vá nɛ́n Zi ci-zrɔ lɔ mɛ̀n, nɛ́n mán Ɔwɔ-kùyüre-bɔ̀ mɛhi, kɩ zɛtɛn, ne le ci ɔwrɔn wrɔn ɛmrɛ̀n, n'eci léyi nɛ̀n hán nɔn yi wú.

²⁸ Mɛ dɔ́ nyɛ̀n annànwɔrɛ mɛ̀n le: anwrɔn hɔ̀n léyi dú ɛnu lɔ nɔn, ɛnjanbɔ̀ ke sɩ̀ wù, ke dú kɛ yɔ sɩ̀ kàn ɔwrɔnẅì Ẅì kɛ̀ và kɛ̀ hán ɛnnɛ̀ncüì hɔ́.”