Markɛ̀n 8 - Ɛmɛẅi ankà ankrànkràn 2003

Zhezü tán anwrɔn tɛ̀bru-kru-anzɔ̀ ɛci-zî

¹ Hɩ vra lɔ, fɛcüè vri tɔ̀n vru bɔrɛkru. Ɔmuhi Ɛci-zî trɔ yɔ nɔn, Zhezü bi n'ɛsɛ̀nkɛn-bɔ̀ kɛ dɔ́ yɔ le:

² “Fɛcüè ndɔ lɔ ankà kɛ hán mɛ̀n ɛnhyɔ̀bɔ̀, ɔmuhi ɛbi anhɔ̀n de yɔ dú mɛ̀n ɛtɛ̀sɛ̀n kɩ ɛci-zî mán trɔ yɔ nɔn.

³ Ke dú kɛ mɛ hán yɔ yɔ vru ɛmɛẅi ɔmùanwúemɛ̀n, yɔ lɛ cɔ́ ɛjɛ̀ ɛnlevri wanzi, ɔmuhi anwrɔn ndɔ hɔ̀n dú esù she và nɔn.”

⁴ N'ɛsɛ̀nkɛn-bɔ̀ mrɛ́n nɛ̀n ɔmùan le: “Tɛyri de yɛ lɛ cɔ́ ɛci yɛ tán yɔ yɔ zî, ɛnu ɛyri tramɛ̀n lɔ nɛ́n?”

⁵ Zhezü ke yrɛ yɔ le: “Abùtùkumɛ́n ɛbɛ dú nyɛ̀n hán?” Yɔ mrɛ́n nɛ̀n ɔmùan le: “Abùtùkumɛ́n ɔbɔɛ̀n.”

⁶ Zɛtɛn, Zhezü wá tán fɛcüè lɔ kɛ̀ yɛ́ ɛnhibɩ́. Kɩ nɛ̀n bɩ́ abùtùkumɛ́n ɔbɔɛ̀n lɔ, nɛ̀n tán Ɔwɔ ɔkùɛn, nɛ̀n voyan abùtùkumɛn lɔ nɛ̀n tán n'ɛsɛ̀nkɛn-bɔ̀, kɛ̀ dɛ́ fɛcüè; kɩ n'ɛsɛ̀nkɛn-bɔ̀ lɔ dɛ́ ɛci lɔ.

⁷ Yɔ vru yɔ ẅɛn ɛcàn ẅì hɔ̀n jan mán. Zhezü tán Ɔwɔ ɔkùɛn ancàn lɔ kruhú kɩ dɔ́ n'ɛsɛ̀nkɛn-bɔ̀ kè bɩ́ ɛcàn lɔ kɛ̀ dɛ́ fɛcüè.

⁸ Ɔwrɔn wrɔn zî ɛci kɩ ɛmɛ̀ntɛ̀ yi yɔ. Zhezü sɛ̀nkɛn-bɔ̀, bí ɛci léyi wɔrɔ nɔn ankɛ ɔbɔɛ̀n.

⁹ Tɛ́n nanvrɛn lɔ anwrɔn tɛ̀bru-kru-anzɔ̀ de dù nɔn. Zɛtɛn Zhezü hán yɔ yɔ vru ɛmɛẅi,

¹⁰ kɩ nɛ́n mán n'ɛsɛ̀nkɛn-bɔ̀ mɛhi yɔ bru anhàka mɛ̀n yɔ hɔ́n Dalmanuta kpɔsɔ wú.

Ɔwɔ-nyànmàn-sùva-wá-bɔ̀ ke ji anvɛmɛ̀n-frɛ́n-ci tɔ̀n kɛ̀ kàn

¹¹ Ɔwɔ-nyànmàn-sùva-wá-bɔ̀, vá cɔ́ Zhezü mɛhi yɔ dɔ́ ecüìwrɔn-ankà. Yɔ ji yɔ krɔn nɛ̀n antanwrɔn, kɩ yɔ dɔ́ nɛ̀n nɛ hán anvɛmɛ̀n-frɛ́n-ci tɔ̀n nɛ̀n yé yɔ ô yɔ nyrì le n'ɛkɔrɛ̀srɔn lɔ dú Ɔwɔ yri nvà.

¹² Zhezü wrɔn esheshemɛ̀n kɩ kɛ dɔ̀ le: “Cɛci kruhú kɛ ɛnvra ndɔ lɔ mɛ̀n bɔ̀ ke ji anvɛmɛ̀n-frɛ́n-ci tɔ̀n kɛ̀ kàn hàn? Mɛ dɔ́ nyɛ̀n annànwɔrɛ mɛ̀n le, anvɛmɛ̀n-frɛ́n-ci zriɛmɛ́n ke sɩ̀ hán kɛ̀ tán yɔ!”

¹³ Zɛtɛn Zhezü teze yɔ kɩ bru anhàka mɛ̀n hɔ́n nɛnbà cɛ mɛẅi.

Ɔwɔ-nyànmàn-sùva-wá-bɔ̀ mán Herɔdɛ̀n “ci-fɔ́-ci”

¹⁴ Zhezü sɛ̀nkɛn-bɔ̀ esùva yürì kɩ ke sɩ̀ bɩ ɛci-zî, abùtùkumɛ́n zri kɩ dú yɔ anhɛmɛ̀n.

¹⁵ Zɛtɛn Zhezü kɛ dɔ́ yɔ esùva wá ankà ndɔ lɔ: “Nyɛ́n wá ny'edomɛ̀n esùva, Ɔwɔ-nyànmàn-sùva-wá-bɔ̀ mán Herɔdɛ̀n ‘ci-fɔ́-ci’ tɛ̀sɛ̀n.”

¹⁶ Zhezü sɛ̀nkɛn-bɔ̀ lɔ kɛ dɔ́ y'edomɛ̀n le: “Ɔmuhi bɔ̀ sɩ̀ ẅɛ̀n abùtùkumɛ́n nɔn, hɩ le kruhú de nɛ dɔ́ ɔmu lɔ nɔn.”

¹⁷ Zhezü yá y'ankà-dɔ̀ lɔ kɩ ke yrɛ yɔ le: “Ecitan kruhú kɛ nyɛ dɔ̀ le: Ɔmuhi bɔ̀ sɩ̀ ẅɛ̀n abùtùkumɛ́n nɛ́n? Ɔmu tɛ̀kɩ nyɛ vá cɔ̀ nyɛ́n yá hà? Ke sɩ́ bru nyɛ̀n hàn? Ɛnkruemɛ̀n trɔ nyɛ̀n hàn?

¹⁸ Nyɛ́n ẅɛn anvɛ̀, nyɛ́n sɩ́ kán ɛyriɛ? Nyɛ́n ẅɛn nukù, nyɛ́n sɩ́ yá ankà? Ke sɩ́ bru nyɛ̀n hàn:

¹⁹ ɛnvra léyi mɛ̀n voyan abùtùkumɛ́n ɛnrì lɔ, mɛ̀n tán anwrɔn tɛ̀bru-kru-ɛnrì lɔ nɔn, ɛci léyi wɔrɔ nɔn ankɛ ɛbɛ nyɛ́n biɛ?” Yɔ mrɛ́n nɛ̀n ɔmùan le: “Ankɛ ɛvà-anhyrɛ̀.”

²⁰ Zɛtɛn Zhezü kɛ dɔ́ yɔ le “Kɩ ɛnvra léyi mɛ̀n voyan abùtùkumɛ́n ɛbɔɛ̀n lɔ nɔn, hɩ mɛ̀n tán anwrɔn tɛ̀bru-kru-anzɔ̀ nɔn, hɩ lɔ mán ankɛ ɛbɛ nyɛ́n biɛ?” Yɔ mrɛ́n nɛ̀n ɔmùan le: “Ankɛ ɔbɔɛ̀n.”

²¹ Zɛtɛn Zhezü kɛ dɔ́ yɔ le: “Kɩ hɩ mán, nyɛ́n sɩ́ yá n'ɛmɛ̀n hàn?”

Zhezü kɔrɛ anvɛ̀-bɔyɛ-wrɔn tɔ̀n Bɛtsahida anmàn

²² Zhezü mán n'ɛsɛ̀nkɛn-bɔ̀, cɔ́ Bɛtsahida; nanvrɛn lɔ, ye bɩ́ anvɛ̀-bɔyɛ-wrɔn tɔ̀n yɛ vá sɩ́ Zhezü kɩ yɛ sɛ́n nɛ̀n ô nɛ̀n tɛ́ yi ɛkɔrɛ̀.

²³ Zɛtɛn Zhezü ẅɛn anvɛ̀-bɔyɛ-wrɔn lɔ ɛkɔrɛ̀ kɩ yɔ cɔhɔ́ anmàn. Zhezü bɩ́ andà wá anvɛ̀-bɔyɛ-wrɔn lɔ anvɛ̀ kɩ nɛ̀n bɩ́ ankɔrɛ̀ nɛ̀n di yi ɛwú kɩ ne yrɛ yi: “Ɛ kán ecitɔ̀n hàn?”

²⁴ Anvɛ̀-bɔyɛ-wrɔn lɔ sɩ́ anvɛ̀ ɛwú kɩ kɛ dɔ̀ le: “Mɛ kán anwrɔn, mɛ kán yɔ kɛ hán antɛ̀ hɔ́, tɛ́n yɔ nán esù.”

²⁵ Zhezü vru bɩ́ ankɔrɛ̀ di ɔwrɔn lɔ anvɛ̀ wú; ɛnlɔẅiɛ-wrɔn lɔ kɛ nyan n'ezìwú: nɛ́n kɔrɛ̀, nɛ kán ɛyri anvrɛnvrɛn.

²⁶ Zɛtɛn, Zhezü hán nɛ̀n nɛ̀n hɔ́n ɛbemɛ̀n kɩ kɛ dɔ̀ le: “E bɩ́ hɔ́n anmàn lɔ.”

Piɛrɛ̀n kɛ dɔ̀ le, Zhezü dú Ebɩdie-wrɔn

²⁷ Zhezü mán n'ɛsɛ̀nkɛn-bɔ̀ hɔ́n anmàn hɔ̀n léyi dú Sezare Filipɛ̀n anmàn tɛ̀sɛ̀n nɔn. Y'ɛhɔ́n mɛ̀n lɔ ne yrɛ yɔ le: “Ankà tán de anwrɔn kɛ dɔ́ m'ɛwú nɛ́n?”

²⁸ Yɔ mrɛ́n nɛ̀n ɔmùan le: “Anwrɔn kɛ dɔ̀ le è dú Zhan Batisì, ndɔ hɔ̀n kɛ dɔ̀ le è dú Eli, kɩ anwrɔn janbɔ̀ le è dú Ɔwɔ-mùanwú-ankà-dɔ́-bɔ̀ lɔ ɔtɔ̀n.”

²⁹ Zhezü ke yrɛ yɔ le: “Nyɛ tɛ́n nyɛ dɔ̀ le mɛ̀n dú antɔnwrɔn hàn?” Piɛrɛ̀n mrɛ́n ɔmùan le: “È dú Ebɩdie-wrɔn.”

³⁰ Zɛtɛn Zhezü sɩ́ tán yɔ, yɔ bɩ́ dɔ́ ɔwrɔn zriɛmɛ́n ankà ndɔ lɔ.

Zhezü kɛ dɔ́ n'owù mán n'owúemɛ̀n-dù-frɔ́ ankà

³¹ Zhezü vru ke yé n'ɛsɛ̀nkɛn-bɔ̀ ankà, kɩ kɛ dɔ̀ le: “Ke ji le Ɔwrɔnẅì ẅì kɛ kán ɛgbàn bobrebe; ɛcüìcüì-bɔ̀, ecice-bɔ̀-wrɔn-cüìcüì mán ɛnyànmàn-gbànvri-ankà-yé-bɔ̀ tamɛ̀n; yɔ lɛ wrɔ́ nɛ̀n ze; yɔ le wri nɛ̀n, kɩ ɛbi anhɔ̀n mɛ̀n bì lɔ ne le dú owúemɛ̀n nɛ̀n frɔ́.”

³² Nɛ dɔ́ yɔ ankà ndɔ lɔ kpetemɛ̀n. Zɛtɛn Piɛrɛ̀n bi nɛ̀n ɔhɔnán kɩ ke di nɛ̀n ebrè.

³³ Tɛ́n Zhezü crɛ̀, kɛ nyan n'ɛsɛ̀nkɛn-bɔ̀ kɩ kɛ dɔ́ Piɛrɛ̀n ankà ɛshishiemɛ̀n: “Cɔhɔ́ mɛ̀n ɛtɛ̀sɛ̀n esùshe, anwa-wrɔn, ɔmuhi v'ankà-tro ke sɩ̀ dù kɛ̀ hán Ɔwɔ ankà-tro, tɛ́n anwrɔnẅì ankà-tro de ɛ ẅɛ̀n nɔn.”

³⁴ Zɛtɛn Zhezü bi fɛcüè mán n'ɛsɛ̀nkɛn-bɔ̀ kɛ dɔ́ yɔ le: “Ke dú kɛ ɔwrɔn ke ji kɛ kɛ́n mɛ̀n ɛsɛ̀n, nɛ̀n teze n'ɔwrɔnẅì ankà-tro, nɛ̀n shri n'ɛgbànkàn nɛ̀n bɩ ô nɛ̀n kɛ́n mɛ̀n ɛsɛ̀n.

³⁵ Ɔmuhi ɔwrɔn léyi ke ji kè bɩ́ n'ɛwúvà kè die nɔn kɛ lɛ zrɛ́n nɛ̀n; tɛ́n ɔwrɔn léyi kɛ lɛ zrɛ́n n'ɛwúvà lɔ mɛ kruhú mán Ɔwɔ mɛẅi ankà ankrànkràn kruhú nɔn, ke le bɩ́ n'ɛwúvà lɔ kè die.

³⁶ Vɔ̀nshɛ́ tán de ke le dú tán ɔwrɔn léyi kɛ lɛ zrɛ́n n'ɛwúvà, ɛnhibù wú ci lɔ fɛn ẅɛn mɛ̀n nɛ́n?

³⁷ Ecitan de dú ɛnhibù wú hɩ ɔwrɔnẅì kɛ le bɩ kɛ̀ wɔ́ n'ɛnhɛ́n wúvà lɔ nɛ́n?

³⁸ Ke dú kɛ mɛ kruhú mán m'ankà-dɔ̀ kruhú ɔwrɔn anvɛvrà kɛ ẅɛ̀n, ɛgbàn-hán-bɔ̀ wanzi, ke ji le nɛ̀n nyrì le Ɔwrɔnẅì ẅì mán anvɛvrà kɛ lɛ ẅɛn n'ɛkruhú, ɛnvra léyi nɛ lɛ vá nɛ́n Zi ci-zrɔ lɔ mɛ̀n nɛ́n mán Ɔwɔ-kùyüre-bɔ̀ prɔnprɔn hɔ̀n mɛhi.”