Markɛ̀n 4 - Ɛmɛẅi ankà ankrànkràn 2003

Ɛci-tɛ́-wrɔn nyandrɛn mɛ̀n ankà-dɔ̀

¹ Zhezü vru bukru ke yé yɔ Ɔwɔ ankà Galile nɛnbà cɛ gbàtà mùan. Fɛcüè vri tɔ̀n borɛkru gbrɛ́nkɛn nɛ̀n ɔmùan; hán tán kɩ nɛ̀n hɔ́n anhàka tɔ̀n mɛ̀n nɛ̀n yɛ́. Anhàka lɔ dú nɛnbà cɛ wú, fɛcüè tɛ́n yɛ́ ɛnshi tɛ̀sɛ̀n.

² Ne ci nyandrɛn mɛ̀n ne yé yɔ ankà bobrebe; kɩ n'ankà-yé mɛ̀n lɔ, nɛ dɔ̀ le:

³ “Nyɛ́n die nukùɛ! Ɔwrɔn tɔ̀n srɔ ɛntrɛ hɔ́n ɛci tɛ́ yri.

⁴ Tɛ́n ɛnvra léyi nɛ́n dù nɛ tɛ́ ɛci ankɛ̀tɛmɛ̀n nɔn ɛci-ẅì janbɔ̀ cüe ɛnlevri mùan; annrɛ́n hɔ̀n nvà kɩ srɔan ɛci lɔ.

⁵ Ɛci-ẅì janbɔ̀ cüe ɛbùẅì granmɛ̀n ɛyri léyi ɛnhiẅia bobrebe bàdà nɔn. Ɛci-ẅì hɔ̀n lɔ di kpràkprà ɔmuhi ɛnhiẅia jan tɛ̀kɩ ndù nɔn.

⁶ Ɛnvra léyi ɛnbri vá ɛwú nɔn, ɛnbri wrú ɛci hɔ̀n léyi dì nɔn, ɔmuhi annyràn ke sɩ̀ ẅɛ̀n yɔ ecüì nɔn.

⁷ Ɛci-ẅì janbɔ̀ cüe antɛ̀-wí granmɛ̀n; antɛ̀-wí lɔ hɔ́n ɛwú kɩ dikora ɛci ankrànkràn lɔ, hán tán kɩ ɛci lɔ kè sɩ̀ shì ɛẅì zriɛmɛ́n.

⁸ Ɔtrɔmɛ̀n lɔ ɛci ndɔ hɔ̀n cüe ɛnhi ankrànkràn mɛ̀n; kɩ ɛci hɔ̀n lɔ dì, sɔ́, kɩ shi ɛẅì: ndɔ hɔ̀n ke shi ɛẅì ɛẅia-ɛvà, ɛnjanbɔ̀ ɛkoẅi-anhɔ̀n, kɩ ndɔ hɔ̀n ɛkoẅi-ɛnrì.”

⁹ Kɩ Zhezü kɛ dɔ̀ le: “Nyɛ́n die nukùɛ anvrɛnvrɛn, ke dú kɛ nyɛ́n ẅɛn nukù nyɛ yá ankà!”

Eci le kruhú léyi Zhezü kɛ dɔ́ ankà nyandrɛn mɛ̀n nɔn

¹⁰ Ɛnvra léyi Zhezü dú esùshe fɛcüè zìwú nɔn, anwrɔn léyi nyɔn nɛ̀n ɛtɛ̀sɛ̀n mán n'ɛsɛ̀nkɛn-bɔ̀ ɛvà-anhyrɛ̀ lɔ kɛ dɔ́ nɛ̀n nɛ̀n dɔ́ yɔ nyandrɛn hɔ̀n lɔ hɩ mɛ̀n ankà.

¹¹ Zhezü kɛ dɔ́ yɔ le: “Nyɛ tɛ́n, nyɛ́n cɔ́ anhobɩ́ ankà-bán-ankà nyɛ́n nyrì; tɛ́n anwrɔn ndɔ hɔ̀n kɛ yá ankà lɔ fɛn nyandrɛn mɛ̀n,

¹² ô ‘ɛci hɔ̀n léyi yɔ kán nɔn, yɔ bɩ́ kán anvrɛnvrɛn, ô ankà hɔ̀n léyi yɔ yá nɔn, yɔ bɩ́ yá anvrɛnvrɛn, kè sɩ̀ dù ɔmu lɔ hô, yɔ lɛ crɔn ɛnkru kɩ Ɔwɔ ke le bɩ́ ɛgbàn kè ce yɔ!’ ”

Zhezü kɛ dɔ́ ɛci-tɛ́-wrɔn nyandrɛn mɛ̀n ankà

¹³ Zɛtɛn Zhezü kɛ dɔ́ yɔ le: “Nyɛ́n sɩ́ yá nyandrɛn ndɔ lɔ n'ɛmɛ̀n ankàà? Tɛ́n anhɔntan de nyɛ lɛ hán ô nyɛ́n yá nyandrɛn hɔ̀n lɔ fɛn mɛ̀n ankà nɛ́n?

¹⁴ Ɛci-tɛ́-wrɔn kɛ tɛ́ Ɔwɔ-mùan-ankà-dɔ̀.

¹⁵ Anwrɔn ndɔ hɔ̀n ndù cá ɛnlevri léyi ankà-dɔ̀ ke bru ɛwú nɔn: ɛnvra zri léyi yɔ yá ankà lɔ nɔn, anwa-wrɔn kɛ và ke bɩ́ ankà-dɔ̀ y'ɛnbɔrɛmɛ̀n kɛ sɔhɔ́.

¹⁶ Ɔmu zri lɔ ndɔ hɔ̀n kɛ cɔ́ ɛci-ẅì lɔ ɛbùẅì-hi mɛ̀n: ɛnvra léyi yɔ cɔ́ ankà-dɔ̀ lɔ nɔn, yɔ bɩ́ nɛ̀n pɔ̀püɛ̀ mɛ̀n.

¹⁷ Tɛ́n yɔ sɩ́ teze ankà-dɔ̀ lɔ ke di annyràn; yɔ ẅɛn nɛ̀n yɔ hɛ́n ɛnvra cá. Kɩ zɛtɛn ɛnvra léyi ɛgbànkàn mán ejüezì kɛ srɔ́n yɔ ɛsù Ɔwɔ-ankà-dɔ̀ kruhú nɔn, yɔ teze y'ankàẅì-bùtan lɔ.

¹⁸ Anwrɔn ndɔ hɔ̀n ke vru kɛ cɔ́ ɛci-ẅì lɔ antɛ̀-wí granmɛ̀n: yɔ yá ankà-dɔ̀ lɔ,

¹⁹ Tɛ́n ɛnhibù wú ankà-tro mán n'ɛfrɛ́n nɛ̀ncüì-dì mán n'ɛci gbàngbàn lɔ fɛn ke bru y'ɛnbɔrɛmɛ̀n kɩ ke wri ankà-dɔ̀ lɔ, kɩ nɛ́n sɩ́ shi ɛẅì zriɛmɛ́n.

²⁰ Ɔtrɔmɛ̀n lɔ anwrɔn ndɔ hɔ̀n kɛ cɔ́ ɛci-ẅì lɔ ɛnhi ankrànkràn mɛ̀n: yɔ yá ankà-dɔ̀ lɔ, kɩ yɔ bɩ́ nɛ̀n kɩ ne shi ɛẅì, ndɔ hɔ̀n ɛẅia-ɛvà, ɛnjanbɔ̀ ɛkoẅi-anhɔ̀n, kɩ ɛnyàntɛn hɔ̀n ɛkoẅi-ɛnrì.”

Kɛniɛ̀n nyandrɛn mɛ̀n ankà-dɔ̀

²¹ Zɛtɛn Zhezü kɛ dɔ́ yɔ le: “Ke dú kɛ Ɔwrɔn tɔ̀n kɛ dɔ́n kɛniɛ̀n, sonu mán sofa krùgbɛ̀n de nɛ hɛ́n yi nɛ́n? Kè sɩ̀ dù kɛniɛ̀n tɛ̀ wú de nɛ́n sɩ́ hɛ́n yi nɛ́n?

²² Ɛci hɔ̀n lɔ fɛn léyi yɛ bán nɔn ke le dú ɛyrikan mɛ̀n. Kɩ ɛ̀shremɛ̀n-ankà lɔ mán kɛ lɛ srɔ ɛwú.

²³ Nyɛ́n die nukùɛ anvrɛnvrɛn ke dú kɛ nyɛ́n ẅɛn nukù nyɛ yá ankà!”

²⁴ Zhezü vru kɛ dɔ́ yɔ le: “Nyɛ́n wá esùva, ny'ankà-yá mɛ̀n! Eci zri léyi e bɩ ɛ wɔɛ́n ɛci ɛ tán ɛnyran nɔn, eci zri lɔ de Ɔwɔ mán ke le bɩ kɛ̀ wɔɛ́n ɛci kɛ̀ tán mɛ́n nɔn, kɩ ne le vru nɛ̀n kɛ́n mɛ́n ɛwú.

²⁵ Ɔmuhi, ɔwrɔn léyi ẅɛn ɛci nɔn yɛ lɛ sàn kɛ́n nɛ̀n ɛwú; tɛ́n ɔwrɔn léyi ke sɩ̀ ẅɛ̀n eci zriɛmɛ́n nɔn, ye le bɩ́ ɛẅiɛ lɔ mán yɛ sɔhɔ́.”

Ɛtɛ̀-ẅì léyi ke di nɛ́n zri nɔn nɛ́n nyandrɛn mɛ̀n ankà-dɔ̀

²⁶ Zhezü vru kɛ dɔ̀ le: “Nyàn eci léyi Anhobɩ́ Nɛ̀ncüì-dúyri kɛ cá nɔn: Ɔwrɔn tɔ̀n kɛ tɛ́ ɛci-ẅì n'ankɛ̀tɛmɛ̀n.

²⁷ Zɛtɛn ne bukru nɛ di ndà ɛnnyran, kɩ ne tɔhú ɛnbì lɔ fɛn, kɩ hɩ vra lɔ mɛ̀n ɛci-ẅì ke dì, kɛ sɔ́ kɩ nɛ̀n sɩ̀ nyrì ɔmu le hán ci nɔn.

²⁸ Ɛnhi hán ɛtɛ̀-ẅì lɔ ndì, nsɔ́: bukru ɛtɛ̀-dá hɔ̀n, zɛtɛn ɛtɛ̀-ẅì kɔ́, kɩ ɔtrɔmɛ̀n lɔ ɛtɛ̀-ẅì léyi sɔ́ anvrɛnvrɛn nɔn.

²⁹ Hɩ vra léyi ɛtɛ̀ẅì kɛ wɔ́n nɔn, ɛkɛ̀tɛ̀-nɛ́n-zí ke bɩ́ n'ebre kɛ hán ɔkɔ̀hɔ̀n, ɔmuhi ɛci-küɛ vra cɔ̀ nɔn.”

Ɛtɛ̀-ẅì léyi ye bi mùtardɛ̀n nɔn nɛ́n nyandrɛn mɛ̀n ankà-dɔ̀

³⁰ Zhezü vru kɛ dɔ̀ le: “Ecitan de bɔ́ le bɩ bɔ̀ krɔn Anhobɩ́ Nɛ̀ncüì-dúyri nɛ́n? Nyandrɛn tán de bɔ́ le bɩ bɔ̀ dɔ́ n'ankà nɛ́n?

³¹ Nɛ́n dù nɛ̀n cá, mutardɛ̀n-ẅì hɔ́; ɛnvra léyi yɛ wá nɛ̀n ɛnhibɩ́ nɔn, nɛ̀n dú ɛtɛ̀-ẅì léyi cɛcɛ vrán antɛ̀-ẅì lɔ fɛn dú ɛnhibù wú nɔn.

³² Tɛ́n ɛnvra léyi yɛ tɛ́ nɛ̀n nɔn, ne dì, ne sevri vrán antɛ̀ hɔ̀n lɔ fɛn. Ne dì, nɛ grɔ andá kɛ hán tán kɩ annrɛ́n hɔ̀n kɛ vá ku anwɔn n'ɔwɔ̀n krugbɛ̀n.”

³³ Nyandrɛn bobrebe ndɔ hɔ̀n lɔ mɛ̀n de Zhezü cì yé yɔ lɔ fɛn Ɔwɔ ankà hán ndɔ hɔ̀n lɔ hɔ́; ne yé ankà ô yɔ cɔ̀ yɔ yá anvrɛnvrɛn.

³⁴ Nɛ́n sɩ́ dɔ́ yɔ ankà ke dú kɛ kè sɩ̀ dù nyandrɛn mɛ̀n; tɛ́n ɛnvra léyi nɛ́n mán n'ɛsɛ̀nkɛn-bɔ̀ mɛhi yɔ yɛ́ nɔn, nɛ dɔ́ yɔ hɩ mɛ̀n ankà lɔ fɛn.

Zhezü kɛ́n ɔwràn tɔ̀n hɛ́n

³⁵ Ɛnbì zri lɔ n'ɔwɔɛmɛ̀n, Zhezü kɛ dɔ́ n'ɛsɛ̀nkɛn-bɔ̀ le: “Bɔ̀ hɔ́n nɛnbà cɛ mɛẅi.”

³⁶ Zɛtɛn yɔ teze fɛcüè kɩ yɔ bɩ́ Zhezü yɔ vɔ́n ɛnshi nɛ́n anhàka léyi nɛ̀n dú ɛmɛ̀n nɔn. Anhàka ndɔ hɔ̀n vru dú nɛ̀n ɛtɛ̀sɛ̀n.

³⁷ Kɩ ɔwràn shishi tɔ̀n bukru ke bɩ, nɛnbà fù ke ku anhɛmɛ̀n, hán tán kɩ ɛnshi ke yɩ́ anhàka lɔ.

³⁸ Zhezü yɛ́ ɛhɛ̀ sɛ̀n bɩ́ ɛnkru di ɛnkru-hán-ci wú, kɛ di ndà. N'ɛsɛ̀nkɛn-bɔ̀ fri nɛ̀n kɩ zɛtɛn kɛ dɔ́ nɛ̀n le: “Ɛẅɛnwrɔn bɔ́ le wù: ndɔ lɔ ke sɩ́ hán mɛ́n eci zriɛmɛ́n?”

³⁹ Zhezü gbɛ́ ɛvɛ̀, kɩ fé ɔwràn, kɩ kɛ dɔ́ nɛnbà cɛ shi lɔ le: “Kɛ̀n ɔmùan hɛ́n! Sɩ̀ ankɔrɛ̀ ɛnhi!” Zɛtɛn, ɛndɔ̀nwrɔ̀n sɩ́ ankɔrɛ̀ ɛnhi, ɛyri lɔ fɛn sannyɔn.

⁴⁰ Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Ecitan kruhú kɛ ɛnjansù kɛ ẅɛn nyɛ̀n hàn? Nyɛ́n sɩ̀ vrù ẅɛ̀n ankàẅì-bùtan nɛ̀n?”

⁴¹ Tɛ́n yɔ dú ɛnjansuemɛ̀n kɩ yɔ yrɛ y'edomɛ̀n le: “Antɔn dú ɔwrɔn ndɔ lɔ, hɩ ɛndɔ̀nwrɔ̀n dùku mán nɛnbà cɛ ke die nukùɛ nɛ́n?”