Markɛ̀n 16 - Ɛmɛẅi ankà ankrànkràn 2003

Zhezü wúemɛ̀n-dù-frɔ́

¹ Ɛnvra léyi ɛnyànmán-bì vácì nɔn Mari Magdala anmàn nyɔnwrɔn, Mari Zhakɛ̀n nɛ́n muan salome wɔ́ ɛnzhi-bánbán ô kɛ̀ hɔ̀n kè ku Zhezü edomɛ̀n.

² Ɛnbì zri bì lɔ, ɔsɔ̀wrɔ̀ fùtàn, ɛnbri kɛ́n mùan mɛ̀n, wúyɔ̀ hɔ̀n lɔ hɔ́n Zhezü nànmàn-kru wú.

³ Yɔ dɔ́ y'edomɛ̀n le: “Antɔn de kɛ lɛ kɛ́n obù lɔ kɛ sɔhɔ́ ɛnnànmàn mùan nɛ́n?”

⁴ Tɛ́n ɛnvra léyi yɔ cɔ́ ɛnnànmàn tɛ̀sɛ̀n nɔn, ebù vri léyi sɛ́n ɛnnànmàn lɔ nɔn ke sɩ̀ vrù dù ɛnnànmàn wúɛ.

⁵ Zɛtɛn yɔ bru ɛnnànmàn mɛ̀n; nanvrɛn lɔ yɔ kán sùgbán-wrɔn tɔ̀n, yɛ́ ezì-kɔrɛ̀, cɔ́ ɛceci she wosu kɩ ɛnjansù bru yɔ.

⁶ Tɛ́n sùgbán-wrɔn lɔ kɛ dɔ́ yɔ le: “Ɛnjansù ke bɩ́ ẅɛn nyɛ̀n; nye ji Nazarɛtɛ̀n ẅì Zhezü, nɛ́n léyi yɛ gɔ́n nɛ̀n brɛ́ ɛgbàn-hán-tɛ̀ domɛ̀n nɔn; nɛ̀n dú owúemɛ̀n nɛ̀n frɔ́, nɛ̀n sɩ̀ vrù dù ɛnu lɔa. Nyɛ́n nyan, nyàn ɛyri léyi yɛ hɛ́n nɛ̀n hán nɔn.

⁷ Zɛtɛ̀n lɔ nyɛ́n hɔ̀n ô nyɛ́n dɔ́ n'ɛsɛ̀nkɛn-bɔ̀ mán Piɛrɛ̀n le: ‘Nɛ lɛ hɔ̀n nɛ̀n vrá nyɛ̀n Galile kpɔsɔ wú; nanvrɛn de nyɛ lɛ kán nɛ̀n, hán ɔmu le nɛ̀n dɔ́ nyɛ̀n nɔn.’ ”

⁸ Zɛtɛn yɔ srɛ́ srɔ ɛntrɛ yɔ hɔ́n nyɔn esù she ɛnnànmàn tɛ̀sɛ̀n, ɔmuhi yɔ cüì kɩ ɛnjansù mán kɛ ẅɛn yɔ nɔn. Kɩ yɔ sɩ̀ dɔ̀ ɔwrɔn zriɛmɛ́n, ɔmuhi ɛnjansù kɛ ẅɛn yɔ nɔn. [

Zhezü bɩ́ n'edomɛ̀n yé Magdala nyɔnwrɔn léyi ye bi Mari nɔn

⁹ Ɛnbì zri bì lɔ, ɔsɔ̀wrɔ̀ fùtàn ɛnvra léyi Zhezü dú owúemɛ̀n frɔ́ nɔn, nɛ̀n bɩ́ n'edomɛ̀n nɛ̀n yé Mari, Magdala nyɔnwrɔn léyi nɛ̀n wrɔ́ anhɛ́n gbàngbàn ɛbɔɛ̀n edomɛ̀n nɔn.

¹⁰ Mari hɔ́n dɔ́ Zhezü sɛ̀nkɛn-bɔ̀ lɔ. Tɛ́n yɔ dú ɛnhyɔ̀bɔmɛ̀n mán eyú wúemɛ̀n.

¹¹ Kɩ ɛnvra léyi, yɔ yá Mari kɛ dɔ̀ le: Zhezü dú ɛkɔrɛ-bɔ̀ mɛ̀n kɩ nɛ́n mán nɛ̀n kán yi nɔn, ye sɩ̀ bù n'ankà lɔ yɔ tàn ankàẅì.

Zhezü bɩ́ n'edomɛ̀n yé n'ɛsɛ̀nkɛn-bɔ̀ anhyrɛ̀

¹² Zɛtɛn Zhezü srɔ n'edomɛ̀n ɔwrɔn nyàntɛn yé n'ɛsɛ̀nkɛn-bɔ̀, anwrɔn anhyrɛ̀ léyi bɩ́ ɛnlevri kɛ hɔ́n nanbuenu nɔn.

¹³ Ɛnvra léyi yɔ vru ɛmɛẅi yɔ vá dɔ́ yɔ nyran hɔ̀n ɛmɛẅi ankà nɔn, yɔ mán yɔ sɩ̀ bù ankà lɔ yɔ tàn ankàẅì.

Zhezü bɩ́ n'edomɛ̀n yé n'ɛsɛ̀nkɛn-bɔ̀ ɛvà-ɔtɔ̀n lɔ

¹⁴ Ɔtrɔmɛ̀n lɔ Zhezü vru bɩ́ n'edomɛ̀n yé n'ɛsɛ̀nkɛn-bɔ̀ ɛvà-ɔtɔ̀n lɔ ɛnvra léyi yɔ dú ɛci-zîemɛ̀n nɔn. Zhezü ke fé yɔ ɔmuhi yɔ sɩ̀ ẅɛ̀n ankàẅì-bùtan, hɩ yɔ ẅɛn ɛnbɔrɛ shishi kɩ yɔ sɩ̀ bù n'owúemɛ̀n-dù-frɔ́ ankà lɔ yɔ tàn ankàẅì nɔn.

¹⁵ Zɛtɛn nɛ dɔ́ yɔ le: “Nyɛ́n hɔ́n ɛnhibù lɔ fɛn wú nyɛ́n dɔ́ anwrɔn Ɛmɛẅi ankà Ankrànkràn lɔ.

¹⁶ Ɔwrɔn léyi ke bùtan ankàẅì, hɩ yɛ wá ɛnshi ɛnkru nɔn nɛ lɛ cɔ́ ebɩdie. Tɛ́n, ɔwrɔn léyi ke sɩ̀ ẅɛ̀n ankàẅì-bùtan nɔn nɛ́n sɩ̀ cɔ́ ebɩdie.

¹⁷ Kɩ nyàn anvɛmɛ̀n-frɛ́n-ci hɔ̀n léyi anwrɔn hɔ̀n léyi ẅɛn ankàẅì-bùtan kɛ lɛ hán nɔn. Yɔ lɛ wrɔ́ anhɛ́n gbàngbàn m'ebɩ́ mɛ̀n; yɔ lɛ vra ɛnbrɛ̀ wrù;

¹⁸ Ke dú kɛ yɔ ẅɛn ɛnlɛ̀brì antamɛ̀n kɩ yɔ mi owù-shi, eci zriɛmɛ́n kè sɩ̀ hán yɔ; yɔ le di ɛnlɔẅiɛ-bɔ̀ ɛkɔrɛ̀ ɛwú kɩ ɛnlɔẅiɛ-bɔ̀ kɛ lɛ kɔrɛ̀.”

Zhezü vru ɛmɛẅi kɛ hɔ́n Ɔwɔ yri

¹⁹ Ɛnvra léyi nɛ̀n dɔ́ n'ɛsɛ̀nkɛn-bɔ̀ ankà trɔ nɔn, Ɛẅɛnwrɔn Ɔwɔ hán Zhezü tú hɔ́n anhobɩ́, kɩ Zhezü yɛ́ nɛ̀n ezì-kɔrɛ̀a.

²⁰ N'ɛsɛ̀nkɛn-bɔ̀ hɔ́n ɛyri lɔ fɛn kɛ dɔ́ yɔ Ɛmɛẅi ankà Ankrànkràn lɔ. Ɛẅɛnwrɔn kɛ wá yɔ ɛkɔrɛ̀ y'ɔkɔ̀hɔ̀n-hán-mɛ̀n kɩ ke yé yɔ le y'Ɔwɔ ankà-dɔ̀ lɔ dú annànwɔrɛ, ɔmuhi yɔ hán anvɛmɛ̀n-frɛ́n-ci nɔn.]