Lükɛ̀n 4 - Ɛmɛẅi ankà ankrànkràn 2003

Zhezü wɔɛ̀n-nyan

¹ Zhezü Ɛnhɛ̀n Prɔnprɔn yɩ́ edomɛ̀n, ɛnvra léyi nɛ̀n dú Zhurdɛn shi lo mɛ̀n nɛ̀n srɔ nɔn, kɩ Ɛnhɛ́n Prɔnprɔn kɛ́n nɛ̀n sɩ́ ɛnnùnwì.

² Nanvrɛn lɔ, anwa-wrɔn wɔɛ̀n nɛ̀n nyan, ɛbi ɛkoẅi-anhyrɛ̀. Ɛnvra lɔ mɛ̀n, nɛ̀n sɩ̀ zî ɛci zriɛmɛ́n hàn kɩ ɛnvra lɔ trɔ, kɩ ɔmùanwù kɛ ẅɛn nɛ̀n.

³ Anwa-wrɔn kɛ dɔ́ nɛ̀n le: “Ke dú kɛ è dú Ɔwɔ Ẅì, ɛ̀ hán obù-ẅì ndɔ lɔ kɛ̀ srɔ ɛci-zî.”

⁴ Zhezü kɛ dɔ́ nɛ̀n le: “Owrú Prɔnprɔn kɛ dɔ̀ le: ‘Kè sì dù ɛci-zî zri kɩ kè dù ɔwrɔnẅì wúvà lɔ mɛ̀n.’ ”

⁵ Anwa-wrɔn bɩ́ nɛ̀n sɩ́ ɛwúɛ hɛ́n ke yé nɛ̀n ɛnhibù wú nɛ̀ncüì-dì lɔ fɛn,

⁶ kɩ kɛ dɔ́ nɛ̀n le: “Mɛ lɛ tán mɛ́n ɛkɔrɛ̀-srɔn ndɔ lɔ mán ɛnhibù wú nɛncüì-dì lɔ fɛn: ndɔ lɔ fɛn, yɛ wá mɛ̀n antamɛ̀n kɩ mɛ̀n ẅɛn ɛkɔrɛ̀-levri mɛ lɛ tán ɔwrɔn léyi me ji mɛ̀n tán nɔn.

⁷ Ke dú kɛ ɛ shɛ́n mɛ̀n ɛnankru ezìwúɛ, fɛn lɔ dú vɛ tɛn.”

⁸ Zhezü kɛ dɔ́ nɛ̀n: “Owrú Prɔnprɔn kɛ dɔ̀ le: ‘È cüe Ɛẅɛnwrɔn v'Ɔwɔ zri kɩ ankɔrɛ̀ ezìwúɛ, ô ɛ̀ hán nɛ́n zri kɩ n'ɔkɔrɛ̀-zì-ci.’ ”

⁹ Anwa-wrɔn bɩ́ nɛ̀n hɔ́n Zherüzalɛmɛ̀n anmàn kɩ ẅɛn nɛ̀n hɛ́n Ɔwɔ-cice-wɔn lɔ wú, kɩ kɛ dɔ́ nɛ̀n le: “Ke dú kɛ è dú Ɔwɔ Ẅì hô, ɛ̀ trɛnshɛ́n anhɛ̀;

¹⁰ ɔmuhi, Owrú Prɔnprɔn kɛ dɔ̀ le: ‘Ɔwɔ kɛ lɛ wá tán, n'ɛkùyüre-bɔ̀ kɛ̀ ẅɛn mɛ́n.’

¹¹ Kɩ: ‘Yɛ lɛ vɛ́ mɛ́n antamɛ̀n ô ɛnan ke bɩ́ sɔ́n mɛ́n obù zriɛmɛ́n.’ ”

¹² Zhezü kɛ dɔ́ nɛ̀n le: “Owrú Prɔnprɔn kɛ dɔ̀ le: ‘E bɩ́ wɔɛn Ɛẅɛnwrɔn v'Ɔwɔ ɛ nyan.’ ”

¹³ Ɛnvra léyi, anwa-wrɔn wɔɛ́n Zhezü nyan ankɔnda bobrebe mɛ̀n trɔ nɔn, nɛ̀n cɔhɔ́ yi ɛtɛsɛ̀n kɩ nɛ́n hɔ̀n nɛ vrá ɛnbì nyantɛn.

Zhezü bɔ́ n'ɔkɔhɔ̀n nkru Galile kpɔsɔ wú

¹⁴ Zhezü vru ɛmɛẅi hɔ́n Galile kpɔsɔ wú, Ɛnhɛ́n Prɔnprɔn kɔrɛ̀srɔn yɩ nɛ̀n edomɛ̀n. Yɔ dɔ́ n'ankà ɔkpɔsɔ ndɔ lɔ wú.

¹⁵ Ne yé yɔ ankà Ɔwɔ-sɛ́n-wɔn hɔ̀n lɔ mɛ̀n, kɩ anwrɔn lɔ fɛn kɛ mrɛ́n nɛ̀n.

Yɛ krɔ́ Zhezü Nazarɛtɛ̀n anmàn

¹⁶ Zhezü hɔ́n Nazarɛtɛ̀n anmàn ɛyri léyi yɛ wá nɛ̀n ɛcɛ mɛ̀n nɔn. Ɛnyanmán-bì lɔ, nɛ̀n bru Ɔwɔ-sɛ́n-wɔn lɔ mɛ̀n, hán ɔmu le ɛnbì lɔ fɛn nɛ hán nɔn. Nɛ̀n tɔhú, ô nɛ̀n krɛ́ Owrú Prɔnprɔn,

¹⁷ kɩ ye bɩ́ ɔwɔ-mùanwú-ankà-dɔ́-wrɔn Ezahi wrú lɔ yɛ tán nɛ̀n. Nɛ̀n gbrɔ́ owrú lɔ, kɩ nɛ̀n cɔ́ ankà-dɔ̀ léyi ye merɛ́n le:

¹⁸ “Ɛẅɛnwrɔn Hɛ́n dú mɛ̀n edomɛ̀n, nɛ̀n mrɛ́n mɛ̀n nɛ́n bɩ, ô mɛ̀n bɩ́ Ɛmɛẅí ankà Ankrànkràn lɔ mɛ̀n và sɩ́ ɛmian-bɔ̀. Nɛ̀n wá mɛ̀n ɛnzhì ɛnkru ô mɛ̀n dɔ́ anwɔn-mɛ̀n-wá-bɔ̀ ebɩ̀die ankà, mɛ̀n dɔ́ anvɛ̀-bɔyɛ-bɔ̀ ɛyri-kán ankà, ô ejuezì-bɔ̀ kɛ̀ cɔ́ ɔwrɔncüe,

¹⁹ ô mɛ̀n dɔ́ yɔ ɛnnanwàn léyi Ɛẅɛnwrɔn kɛ lɛ hán n'anvrɛn ci lɔ nɔn.”

²⁰ Zɛtɛn Zhezü serɛ owrú lɔ, bɩ́ tán eci-bɩ-tan-wrɔn lɔ, kɩ vriyɛ́. Anwrɔn hɔ̀n léyi dú Ɔwɔ-sɛ́n-wɔn lɔ mɛ̀n nɔn, crɛ anvɛ̀ kɛ́n nɛ̀n.

²¹ Zɛtɛn nɛ̀n bukru nɛ dɔ́ yɔ ankà: “Owrú Prɔnprɔn ankà ndɔ lɔ hɩ nyɛ́n yá nɔn, sá nmù ɛnyɔ́n-cì lɔ.”

²² Yɔ lɔ fɛn lɔ yɔ dɔ́ ecizrɔ ankà yɔ tán Zhezü, kɩ ye dú anvɛmɛ̀n-frɛ́n mɛ̀n, n'ankà anvrɛnvrɛn léyi nɛ dɔ̀ nɔn, hɩ kruhú yɔ dɔ̀ le: “Kɛ̂ kè sɩ̀ dù Zhozɛfɛ̀n ẅì lɔa?”

²³ Zhezü kɛ dɔ́ yɔ le: “Mɛ̀n nyri ɔmu le nyɛ lɛ dɔ́ mɛ̀n nyandrɛn ndɔ lɔ ankà: ‘Anhaẅi-hán-wrɔn, ɛ̀ kɔrɛ vɛ́n dùku v'ɛdomɛ̀n.’ Nyɛ́n le vru nyɛ́n dɔ́ mɛ̀n le: ‘Bɔ́ nyri eci lɔ fɛn léyi ɛ hán Kapɛrnahümɛ̀n anmàn nɔn, eci zri lɔ de ke ji le ɛ hán ɛnu vɛ́n dùkú v'anmàn mán nɔn.’ ”

²⁴ Zɛtɛn Zhezü kɛ dɔ́ yɔ le: “Mɛ dɔ́ nyɛ̀n annànwɔrɛ mɛ̀n le: Ye sɩ̀ nyrì ẅɛn Ɔwɔ-mùanwú-ankà-dɔ́-wrɔn zriɛmɛ́n nɛ́n dùku n'anmàn.

²⁵ Me kro nyɛ̀n le, Eli vra lɔ, ɛngrɔn-wúyɔ̀ bobrebe dú Izraɛlɛ̀n, ɛnvra léyi ɛnshi kè sɩ̀ nàn ɛnnanwàn krú anhɔ̀n mán ɛcá, kɩ ebrɛ̀ vri tɔ̀n kɛ́ anmàn lɔ fɛn wú.

²⁶ Hɩ lɔ mán kɩ, Ɔwɔ kè sɩ̀ wá Eli ɔkɔ̀hɔ̀n Izraɛlɛ̀n anmàn ɛngrɔn-hi zriɛmɛ́n yri, tɛ́n nɛ̀n hán Eli hɔ́n kán ɛngrɔn-hi léyi dú Sarɛpta, Sidɔn kpɔsɔ wú nɔn.

²⁷ Kokove-bɔ̀ bobrebe vru dú Izraɛlɛ̀n, ɔwɔ-mùanwú-ankà-dɔ́-wrɔn Elize vra lɔ; hɩ lɔ mán kɩ kokove-wrɔn zriɛmɛ́n ke sɩ̀ cɔ̀ ɔkɔrɛ̀, ke dú kɛ kè sɩ̀ dù Naaman zri kɩ, Siri anmàn wrɔn lɔ.”

²⁸ Yɔ lɔ fɛn léyi yɔ dú Ɔwɔ-sɛ́n-wɔn lɔ mɛ̀n, ye bɩ́ ɛmɛ̀nhyì, ɛnvra léyi yɛ yá ankà ndɔ hɔ̀n léyi Zhezü dɔ̀ nɔn.

²⁹ Kɩ ye tɔhú, yɔ wán nɛ̀n sɩ́ anmàn kru, kɩ ye sɩ́ nɛ̀n anmàn kpo lɔ wú, ô yɛ kɛ́n nɛ̀n ze anhɛ̀.

³⁰ Tɛ́n Zhezü ci yɔ anwanzi kɩ nan hɔ̀n.

Ɔwrɔn léyi ɛnhɛ́n gbangbàn ke di ejüe nɔn

³¹ Zhezü hɔ́n Kapɛrnahümɛ̀n Galile Kpɔsɔ wú anmàn, kɩ ɛnyanmán-bɩ̀ lɔ, ne yé anwrɔn ankà.

³² Anwrɔn dú anvɛmɛ̀n-frɛ́n mɛ̀n, n'ankà-yé-mɛ̀n, ɔmuhi nɛ dɔ́ ankà ɛkɔrɛ̀-levri mɛ̀n nɔn.

³³ Ɔwɔ-sɛ́n-wɔn lɔ mɛ̀n, ɔwrɔn tɔ̀n ɛnhɛ́n gbangbàn dú edomɛ̀n kɛ di ejüe. Kɩ nɛ̀n bukru ne di bobo ecüemɛ̀n:

³⁴ “Ecitan de e ji bɔ̀ edomɛ̀n, Nazarɛtɛ̀n anmàn wrɔn Zhezü? Ɛ̀ vá ɛ và hô ɛ̀ jrɛ́ bɔ̀a? Mɛ̀n nyri anvrɛnvrɛn ɔwrɔn léyi dú mɛ́n nɔn: Ɔwɔ-kɔhɔ́n-wá-wrɔn Prɔnprɔn!”

³⁵ Zhezü dɔ́ ɛnhɛ́n gbangbàn lɔ ankà ɛshishiemɛ̀n kɩ wá tán nɛ̀n le: “Kɛ́n ɔmùan hɛ́n, cɔhɔ́ ɔwrɔn ndɔ lɔ edomɛ̀n.” Ɛnhɛ́n gbangbàn lɔ kɔ́n ɔwrɔn lɔ die ɛnhibi anwrɔn lɔ feɛn zìwú kɩ srɔ ɛntrɛ, nɛ̀n sɩ̀ hán yi eci zriɛmɛ́n.

³⁶ Yɔ lɔ fɛn lɔ, ye dú anvɛmɛ̀n-frɛ́n mɛ̀n kɩ yɔ dɔ́ y'edomɛ̀n le: “Ankà-dɔ̀ tán de dú ndɔ lɔ nɛ́n? Ɔwrɔn ndɔ kɛ tán anhɛ́n gbangbàn hɔ̀n ɛnyanmàn ɛkɔrɛ̀levri mɛ̀n mán ɔkɔrɛ̀-srɔn mɛ̀n kɩ yɔ srɔ ɛntrɛ.”

³⁷ Kɩ Zhezü bidì bonyi ɔkpɔsɔ ndɔ lɔ wú.

Zhezü kɔrɛ ɛnlɔẅiɛ-bɔ̀ bobrebe

³⁸ Zhezü dú Ɔwɔ-sɛ́n-wɔn lɔ mɛ̀n srɔ ɛntrɛ kɩ hɔ́n Simɔn nanvrɛn ɛbemɛ̀n. Simɔn nɛ́n nɛ́nhi ɔwrɔ̀ dú edomɛ̀n, kɩ yɔ dɔ́ Zhezü kɛ kɔrɛ nɛ̀n.

³⁹ Nɛ̀n hɔ́n yi ɛtɛsɛ̀n, kɩ nɛ́n wá tán ɔwrɔ̀ lɔ kɛ̀ cɔhɔ́ ɛnnyɔnwrɔn lɔ edomɛ̀n. Ɔwrɔ̀ cɔhɔ́ ɛnnyɔnwrɔn lɔ edomɛ̀n, ɛnnyɔnwrɔn lɔ tɔhú ɛnvra zri lɔ kɩ hán ɛci tán yɔ yɔ zî.

⁴⁰ Ɛnbrí bore mùanmɛ̀n lɔ, anwrɔn hɔ̀n léyi ẅɛn ɛnlɔwiɛ-bɔ̀ mɛ̀ntɛ mɛ̀ntɛ nɔn, bɩ́ yɔ vá sɩ́ Zhezü. Nɛ̀n di yɔ ankɔrɛ̀ ɛwú, kɩ yɔ kɔrɛ̀.

⁴¹ Anhɛ́n gbangbàn dú ɛnlɔwiɛ-bɔ̀ bobrebe edomɛ̀n srɔ ɛntrɛ ke di bobo kɛ dɔ̀ le: “È dú Ɔwɔ Ẅì!” Tɛ́n, Zhezü kɛ dɔ́ yɔ ankà ɛshishiemɛ̀n, kɩ nɛ́n sɩ́ tán yɔ ɛkɔrɛ̀-levri ankà dɔ́ mɛ̀n, ɔmuhi yɔ nyri ɔmu le, nɛ̀n dú Ebɩ̀die-wrɔn nɔn.

Zhezü kɛ dɔ́ Ɔwɔ ankà Zhüde Kpɔsɔ wú Ɔwɔ-sɛ́n-wɔn hɔ̀n lɔ mɛ̀n

⁴² Ɛnvra léyi ɛcɛ̀n cüe nɔn, Zhezü dú anmàn srɔ ɛntrɛ hɔ́n ɛyri tramɛ̀n. Anwrɔn fɛcüè bukru ke ji nɛ̀n; ɛnvra léyi yɔ cɔ́ nɛ̀n nɔn, yɔ ji yɛ ẅɛn nɛ̀n yɛ hɛ́n, ô nɛ́n bɩ́ teze yɔ nɛ́n nan hɔ́n hán.

⁴³ Kɩ Zhezü kɛ dɔ́ yɔ le: “Ke ji le mɛ̀n bɩ́ Anhobɩ́ Nɛ̀ncüì-dúyri Ankà Ankrànkràn lɔ, mɛ̀n hɔ̀n mɛ́n sɩ́ yɔ anmàn ndɔ hɔ̀n lɔ mán, ɔmuhi hɩ le kruhú de, Ɔwɔ hán mɛ̀n mɛ́n và nɔn.”

⁴⁴ Kɩ nɛ dɔ́ Ɔwɔ ankà, Ɔwɔ-sɛ́n-wɔn lɔ fɛn mɛ̀n, Zhüde Kpɔsɔ wú lɔ fɛn.