Lükɛ̀n 3 - Ɛmɛẅi ankà ankrànkràn 2003

Zhan Batisì Wɔ ankà-dɔ̀

¹ Rɔmɛ̀n ɛnhiwú nɛ̀ncüì vri léyi ye bi Tibɛrɛ̀n nɔn, n'ɛyri-ẅɛ̀n ɛnnànwàn kru ɛvà-ɛnriemɛ̀n; hɩ vra lɔ, Pɔnsì Pilatɛ̀n dú Zhüde kpɔsɔ wú govran, Herɔdɛ̀n ẅɛn Galile, kɩ nɛ́n muanẅì Filipɛ̀n ẅɛn ɛyri Itüre mán Trakonitɛ̀n kpɔsɔ wú, Lizania ẅɛn Abilɛnɛ̀n,

² Hanɛ̀n mán Kahifɛ̀n dú Ɔwɔ-cice-bɔ̀ cüìcüì hɔ̀n. Zhan, Zakari ẅì léyi dú ɛnnuwì nɔn, yá Ɔwɔ mùan ankà-dɔ̀.

³ Zhan bukru ke ci ɔkpɔsɔ lɔ fɛn léyi dú Zhurdɛn shi lɔ tɛsɛ̀n nɔn wú. Ne di bobo nɛ dɔ̀ le: “Nyɛ́n crɔn ny'eci-hán-ci, nyɛ́n hán yɛ wá nyɛ̀n ɛnshi ɛnkru, ô Ɔwɔ ke bɩ́ ny'ɛgbàn hɔ̀n lɔ ke ce nyɛ̀n.”

⁴ Ɔmu lɔ de ankà-dɔ̀ ndɔ léyi Ɔwɔ-mùanwú-ankà-dɔ́-wrɔn Ezahi merɛ́n n'owrú lɔ mɛ̀n nɔn, sá nmù: “Ɔwrɔn tɔ̀n ke di nkù ɛnnɛ̀nwì: Nyɛ́n hán Ɛnnɛncüì levri, nyɛ́n hán nɛ́n levri hɔ̀n lɔ kɛ̀ nyrɔn!

⁵ Ɛnnànmàn totɔtɔ̀n lɔ fɛn kɛ̀ sɛ́n, ɛnkpò-vri mán ɛnkpò-cɛ hɔ̀n lɔ ye sɩ́ yɔ ɛnhi; ɛnlevri hɔ̀n lɔ fɛn léyi wɔɛ nɔn, yɛ hán kɛ̀ nyrɔn, ɛnlevri gbangbàn hɔ̀n lɔ fɛn yɛ hán kè dú sɛsɛ.

⁶ Kɩ anwrɔn lɔ fɛn kɛ lɛ kán ɛnkrukɔrɛ̀ léyi Ɔwɔ tán bɔ̀ nɔn.”

⁷ Fɛcüè kɛ vá cɔ́ Zhan, ô nɛ̀n wá yɔ ɛnshi ɛnkru. Nɛ dɔ́ yɔ le: “Ɛnlɛbri kà léyi dú nyɛ̀n nɔn! Antɔn de dɔ́ nyɛ̀n le, Ɔwɔ mrɛ̀n-cì léyi kɛ́n eburi kɛ và nɔn, kɛ lɛ vɔ́n nyɛ̀n ɛwú nɛ́n?

⁸ Nyɛ́n hán eci ke yé tán le, nyɛ́n crɔn ny'edomɛ̀n, ô nyɛ́n bɩ́ dɔ́ ny'edomɛ̀n le: ‘Abrahamɛ̀n dú bɔ́ nancüì.’ Ɔmuhi mɛ dɔ́ nyɛ̀n le Ɔwɔ ke le bɩ́ ɛbù ndɔ hɔ̀n lɔ kɛ̀ srɔ Abrahamɛ̀n nɛ́n-nán-ẅì hɔ̀n tɛ̀!

⁹ Etù-ẅì dú antɛ̀-nyràn krugbɛ̀n, ô kɛ̀ voyan antɛ̀ hɔ̀n léyi ke sɩ́ shi ɛẅì ankrànkràn nɔn, ô kè ku yɔ ɛnhyà mɛ̀n.”

¹⁰ Fɛcüè ke yrɛ nɛ̀n le: “Ecitan de ke ji le bɔ̀ hán nɛ́n”

¹¹ Nɛ dɔ́ yɔ le: “Ɔwrɔn kɛ ẅɛn ɛceci anhyrɛ̀ hô, ke ji le, nɛ̀n bɩ́ ɔtɔ̀n nɛ̀n tán ɔwrɔn léyi ke sɩ̀ ẅɛ̀n hàn nɔn, ô ɔwrɔn léyi ẅɛn ɛcizî nɔn, nɛ́n nyran mɛhi yɛ dɛ̀.”

¹² Anmàn-wɔɛ̀n-yrɛ-bɔ̀ mán nvà, ô yɛ wá yɔ ɛnshi ɛnkru kɩ, yɔ yrɛ Zhan le: “Ankà-yé-wrɔn, ecitan de ke ji le bɔ̀ hán nɛ́n?”

¹³ Zhan kɛ dɔ́ yɔ le: “Nyɛ́n bɩ́ bɩ́ ɔkuà kɛ vrán hɩ le Ɛnyanmàn wá nɔn.”

¹⁴ Gɔliɛ-bɔ̀ ke yrɛ nɛ̀n le: “Bɔ́ tɛn, ecitan de ke ji le bɔ̀ hán nɛ́n?” Zhan kɛ dɔ́ yɔ le: “Nyɛ́n bɩ́ bɩ́ anwrɔn ɔkuà ecüiemɛ̀n mán ɛfrɛ́n mɛ̀n, tɛ́n ke ji le, ny'okù wɔɛ̀n-dì lɔ kɩ kè dú ny'ɔkùa.”

¹⁵ Fɛcüè ẅɛn esɛ́, kɩ dú ɛvrámɛ̀n: ɔwrɔn wrɔn ke tro le, Zhan de dú Ebɩdie-wrɔn lɔ nɔn.

¹⁶ Kɩ Zhan kɛ dɔ́ anwrɔn lɔ fɛn le: “Mɛ tɛn ɛnshi de me bɩ mɛ wá nyɛ̀n ɛnkru nɔn, tɛ́n ɔwrɔn tɔ̀n ɛkɔrɛ̀ srɔn vrán mɛ̀n, nɛ lɛ và: mɛ̀n sɩ̀ zeze mɛ̀n zrɔa hɩ m'a gbrɔ n'annanru hɛ́ lɔ nɔn. Nɛ lɛ wá nyɛ̀n ɛnshi ɛnkru Ɛnhɛ́n Prɔnprɔn mɛ̀n, mán ɛnhyà mɛ̀n mɛhi.

¹⁷ Ɛfá dú nɛ̀n antamɛ̀n, ô nɛ̀n kua antɛ̀-ẅì mán n'anwrɔ̀n mɛhi. Ne le ku antɛ̀-ẅì lɔ bagɛ̀n mɛ̀n, kɩ antɛ̀-wrɔ̀n lɔ kɛ lɛ hɔ́n ɛnhyà léyi ke sɩ́ zɛ́n hán mrìmrì nɔn mɛ̀n.”

¹⁸ N'ankà bobrebe dɔ́ mɛ̀n de Zhan ke yé fɛcüè Ɛmɛẅi ankà Ankrànkràn lɔ nɔn.

¹⁹ Tɛ́n, Zhan gbá anvɛ̀ wá Herɔdɛ̀n léyi dú Govran nɔn, ɔmuhi nɛ̀n bɩ́ Hérodiadɛ̀n, nɛ́n muan-ẅì hi, nɛ́n yrì kɩ nɛ hán ɛci gbangbàn bobrebe ndɔ hɔ̀n mán.

²⁰ Zɛtɛn, Herɔdɛ̀n vru hán eci gbangbàn fɔn tɔ̀n kɛ́n ɛwú: nɛ̀n hán yɛ wá Zhan anwɔn mɛ̀n.

Zhezü ɛnshi-kru-wá

²¹ Ɛnvra léyi yɔ wá fɛcüè lɔ fɛn ɛnshi ɛnkru trɔ nɔn, Zhezü mán yɛ wá ɛnshi ɛnkru. Ɛnvra léyi Zhezü dú Ɔwɔ-sɛ́n mɛ̀n nɔn, anhobɩ́ gbɛ́ ɔmùan,

²² kɩ Ɛnhɛ́n Prɔnprɔn bɩ́ brɛndre dùwru kakɛ nɛ̀n ɛwúɛ. Esùva tɔ̀n dú anhobɩ́ kɛ dɔ̀ le: “È dú m'ɛcüɛ́n ẅì, me bɩ́ mɛ́n pɔ̀püɛ̀ lɔ fɛn mɛ wá mɛ́n ɛmɛ̀n.”

Zhezü mɛ̀n mɛ̀n-bɔ̀

²³ Zhezü ẅɛn ɛnnanwàn kru ɛẅìa-ɛvà, ɛnvra léyi nɛ̀n bɔ́ n'ɔkɔhɔ̀n nkru nɔn. Nɛ́n dù hán ɔmu le ye tro nɔn, Zhozɛfɛ̀n ẅì, kɩ Zhozɛfɛ̀n nɛ́n zi dú Heli,

²⁴ Heli nɛ́n zi dú Matatɛ̀n, Matatɛ̀n nɛ́n zi dú Levi, Levi nɛ́n zi dú Mɛlki, Mɛlki nɛ́n zi dú Zhannahi, Zhannahi nɛ́n zi dú Zhozɛfɛ̀n,

²⁵ Zhozɛfɛ̀n nɛ́n zi dú Matatiasɛ̀n, Matatiasɛ̀n nɛ́n zi dú Amosɛ̀n, Amosɛ̀n nɛ́n zi dú Nahumɛ̀n, Nahumɛ̀n nɛ́n zi dú Ɛsli, Ɛsli nɛ́n zi dú Nagahi,

²⁶ Nagahi nɛ́n zi dú Maatɛ̀n, Maatɛ̀n nɛ́n zi dú Matatiasɛ̀n, Matatiasɛ̀n nɛ́n zi dú Semehin, Semehin nɛ́n zi dú Zhozɛkɛ̀n, Zhozɛkɛ̀n nɛ́n zi dú Zhoda,

²⁷ Zhoda nɛ́n zi dú Zhoanan, Zhoanan nɛ́n zi dú Reza, Reza nɛ́n zi dú Zorobabɛlɛ̀n, Zorobabɛlɛ̀n nɛ́n zi dú Salatiɛlɛ̀n, Salatiɛlɛ̀n nɛ́n zi dú Neri,

²⁸ Neri nɛ́n zi dú Mɛlki, Mɛlki nɛ́n zi dú Adi, Adi nɛ́n zi dú Kosamɛ̀n, Kosamɛ̀n nɛ́n zi dú Ɛlmadamɛ̀n, Ɛlmadamɛ̀n nɛ̀n zi dú Ɛrɛ̀n,

²⁹ Ɛrɛ̀n nɛ́n zi dú Zhezü, Zhezü nɛ́n zi dú Eliezɛrɛ̀n, Eliezɛrɛ̀n nɛ́n zi dú Zhorimɛ̀n, Zhorimɛ̀n nɛ́n zi dú Matatɛ̀n, Matatɛ̀n nɛ́n zi dú Levi,

³⁰ Levi nɛ́n zi dú Simeɔn, Simeɔn nɛ́n zi dú Zhüda, Zhüda nɛ́n dú Zhozɛfɛn, Zhozɛfɛn nɛ́n zi dú Zhonan, Zhonan nɛ́n zi dú Eliakimɛ̀n,

³¹ Eliakimɛ̀n nɛ́n zi dú Melea, Melea nɛ́n zi dú Menan, Menan nɛ́n zi dú Matata, Matata nɛ́n zi dú Natan, Natan nɛ́n zi dú Davidɛ̀n,

³² Davidɛ̀n nɛ́n zi dú Zhese, Zhese nɛ́n zi dú Zhobɛdɛ̀n, Zhobɛdɛ̀n nɛ́n zi dú Boozɛ̀n, Boozɛ̀n nɛ́n zi dú Sala, Sala nɛ́n zi dú Naasɔn,

³³ Naasɔn nɛ́n zi dú Aminadabɛ̀n, Aminadabɛ̀n nɛ́n zi dú Admɛ̀n, Admɛ̀n nɛ́n zi du Arni, Arni nɛ́n zi dú Esrɔm, Esrɔm nɛ́n zi dú Farɛsɛ̀n, Farɛsɛ̀n nɛ́n zi du Zhüda,

³⁴ Zhüda nɛ́n zi dú Zhakɔbɛ̀n, Zhakɔbɛ̀n nɛ́n zi dú Izaakɛ̀n, Izaakɛ̀n nɛ́n zi dú Abrahamɛ̀n, Abrahamɛ̀n nɛ́n zi dú Tara, Tara nɛ́n zi dú Nashɔrɛ̀n,

³⁵ Nashɔrɛ̀n nɛ́n zi dú Serüshɛ̀n, Serüshɛ̀n nɛ́n zi dú Rago, Rago nɛ́n zi dú Falɛkɛ̀n, Falɛkɛ̀n nɛ́n zi dú Ebɛrɛ̀n, Ebɛrɛ̀n nɛ́n zi dú Sala,

³⁶ Sala nɛ́n zi dú Kahinamɛ̀n, Kahinamɛ̀n nɛ́n zi dú Arfazadɛ̀n, Arfazadɛ̀n nɛ́n zi dú Sɛmɛ̀n, Sɛmɛ̀n nɛ́n zi dú Noe, Noe nɛ́n zi dú Lamɛkɛ̀n,

³⁷ Lamɛkɛ̀n nɛ́n zi dú Matüzala, Matüzala nɛ́n zi dú Henɔkɛ̀n, Henɔkɛ̀n nɛ́n zi dú Zharɛdɛ̀n, Zharɛdɛ̀n nɛ́n zi dú Maleleɛlɛ̀n, Maleleɛlɛ̀n nɛ́n zi dú Kahinan,

³⁸ Kahinan nɛ́n zi dú Enɔsɛ̀n, Enɔsɛ̀n nɛ́n zi dú Sɛtɛ̀n, Sɛtɛ̀n nɛ́n zi dú Adamɛ̀n, Adamɛ̀n nɛ́n zi dú Ɔwɔ.