Lükɛ̀n 22 - Ɛmɛẅi ankà ankrànkràn 2003

Ɛcüìcüì-bɔ̀ ke ji Zhezü ɛyri

¹ Abùtùkumɛ́n-kɔ́ koran bì léyi ye bi Ɛẅɛnwrɔn-bemɛ̀n-cì nɔn nkɛ́n eburi.

² Ɔwɔ-cice-bɔ̀ cüìcüì mán ɛnyanmàn-gbànvri-anka-yé-bɔ̀ ke ji ɛyri ô kè di Zhezü owúemɛ̀n, tɛ́n ye sú fɛcüè.

Zhüda krɔn kpehɛ́n ô kɛ̀ ẅɛn Zhezü kɛ̀ tán ɛcüìcüì-bɔ̀

³ Zɛtɛn, anwa-wrɔn bru Zhüda léyi ye bi Iskariɔtɛ̀n nɔn ɛnbɔrɛ mɛ̀n, nɛ́n léyi nɛ̀n dú Zhezü sɛnkɛn-bɔ̀ lɔ ɔtɔn nɔn.

⁴ Zhüda hɔ́n dɔ́ Ɔwɔ-cice-bɔ̀ cüìcüì hɔ̀n mán Ɔwɔ-cice-wɔn-nan-bɔ̀ wrɔn cüìcüì ankà, ô yɔ nyan ɔmu le nɛ lɛ hán ô nɛ̀n ẅɛn Zhezü nɛ̀n tán yɔ nɔn.

⁵ Yɔ cüɛ̀n kɩ yɔ wá Zhüda ɔkùa ɔmùan.

⁶ Zhüda shrì kɩ bukru ke jí ɛyri kɛ̀ ẅɛn Zhezü kɛ̀ tán yɔ, ô fɛcüè ke bɩ́ nyriɛn.

Zhezü hán yɔ yɛ gbrɛ́ Ɛẅɛnwrɔn-bemɛ̀n-cì-nyanmán-bì ci-zî

⁷ Ɛnbì lɔ cɔ̀, hɩ vra léyi yɛ koran abùtùkumɛ́n-kɔ́-nyanmán-bì lɔ nɔn, hɩ ye wri kɔ̀kɔ̀sɛ̀-ẅì hɔ̀n, yɛ gbrɛ́ Ɛẅɛnwrɔn-bemɛ̀n-cì ci-zî nɔn.

⁸ Zhezü wá Piɛrɛ̀n mán Zhan ɔkɔhɔ̀n, kɩ kɛ dɔ́ yɔ le: “Nyɛ́n hɔ̀n nyɛ́n gbrɛ́ bɔ́ Ɛẅɛnwrɔn-bemɛ̀n-cì koran ci-zî lɔ.”

⁹ Yɔ yrɛ Zhezü le: “Tɛyri de e ji le bɔ̀ hɔ̀n gbrɛ́ ɛci lɔ nɛ́n?”

¹⁰ Nɛ dɔ́ yɔ le: “Nyɛ́n die nukùɛ: Ɛnvra léyi nye le bru anmàn nɔn, nyɛ́n lɛ srɔ́n ɔwrɔn tɔ̀n ɛsù, nɛ̀n wɔrɔ ɛnshi sî. Nyɛ́n cɔ́ nɛ̀n nyɛ́n hɔ́n ɛbemɛ̀n, ɛyri léyi ne le bru nɔn,

¹¹ ô nyɛ́n dɔ́ ebɩ́-nɛ́n-zi le: ‘Ankà-yé-wrɔn ke yrɛ mɛ́n le: ɔwɔn léyi mɛ̀n mán m'ɛsɛnkɛn-bɔ̀ mɛhi bɔ́ le zî abutùkumɛ̀n-kɔ́-nyanmán-bì ci-zî lɔ nɔn towá?’

¹² Kɩ ne le yé nyɛ̀n ɔwɔn wú ɔwɔndà cüìcüì léyi ɛci lɔ fɛn sɛkru ɛmɛ̀n nɔn. Nanvrɛn de nyɛ lɛ gbrɛ́ ɛci nɔn.”

¹³ Yɔ hɔ̀n kɩ yɔ cɔ́ ɛci lɔ fɛn krɔn, hán ɔmu le Zhezü dɔ́ yɔ, kɩ yɔ gbrɛ́ Ɛẅɛnwrɔn-bemɛ̀n-cì-nyanmán-bì ci-zî.

Ɛẅɛnwrɔn ci-zî prɔnprɔn

¹⁴ Ɛnvra léyi ɛci-zî vra cɔ̀ nɔn, Zhezü mán n'ɔkɔhɔ̀n-wá-bɔ̀ ci tɛbrɛ̀ wú.

¹⁵ Nɛ dɔ́ yɔ le: “Andɛ̀n ɛbɛ de mɛ̀n wá kpankpan le nyɛ́n mán mɛ̀n mɛhi bɔ̀ zî ɛnyanmán-bì ci-zî ndɔ lɔ yakɛ mɛ̀n kán ɛgbàn nɔn.

¹⁶ Ɔmuhi, mɛ dɔ́ nyɛ̀n le, mɛ́n sɩ̀ vru zî ɛci ndɔ lɔ hàn kɩ kɛ lɛ krɔn ɛnvra léyi n'ɛwú ankà-dɔ̀ kɛ lɛ sá nmù Anhobɩ́ Nɛ̀ncüì-dúyri nɔn.”

¹⁷ Nɛ̀n bɩ́ ɛntán glashɛ̀n, nɛ́n tán Ɔwɔ ɔkùɛn kɩ nɛ dɔ̀ le: “Nyɛ́n bɩ́ ɛntán glashɛ̀n ndɔ lɔ, nyɛ́n dɛ́ ny'edomɛ̀n;

¹⁸ ɔmuhi, mɛ dɔ́ nyɛ̀n le, zɛtɛ̀ lɔ mɛ́n sɩ̀ vru mi ɛntàn wɔnsɛn hàn kɩ Anhobɩ́ Nɛ̀ncüì-dúyri kɛ lɛ và.”

¹⁹ Zɛtɛn nɛ̀n bɩ́ abùtùkumɛ́n, nɛ̀n tán Ɔwɔ ɔkùɛn, nɛ̀n voyan abùtùkumɛ́n lɔ nɛ̀n tán yɔ, kɩ nɛ dɔ̀ le: “Ndɔ lɔ dú m'eduwrú léyi yɛ tán nyɛ̀n. Nyɛ́n hán ndɔ lɔ m'ankà-tro mɛ̀n.”

²⁰ Nɛ̀n tán yɔ ɛntàn glashɛ̀n lɔ ɛci-zî trɔmɛ̀n, kɩ nɛ dɔ̀ le: “Ɛntàn glashɛ̀n ndɔ lɔ dú Ɔwɔ mìrɛ̀n wrù léyi m'ɛnkrɛ̀ lɔ cüe ny'ɛkruhú, ô kè di nyɛ̀n dalɛfuɛ Ɔwɔ zìwú nɔn.

²¹ Tɛ́n nyɛ́n nyan: Ɔwrɔn léyi ke di mɛ̀n owúemɛ̀n nɔn, dú ɛnu lɔ, tɛbrɛ̀ wú, nɛ́n mán mɛ̀n mɛhi.

²² Ankàẅì, ɔwrɔnẅì Ẅì ke le wù, hán ɔmu le Ɔwɔ wá tán nɔn; tɛ́n muzhíe dú tán ɔwrɔn léyi ke le di nɛ̀n owúemɛ̀n nɔn!”

²³ Yɔ bukru yɔ yrɛ y'edomɛ̀n, ɔwrɔn léyi dú yɔ ɛmɛ̀n hɩ ke jí kɛ̀ hán eci ndɔ lɔ nɔn.

Antɔ́n de dú ecüìcüì nɛ́n?

²⁴ Zhezü sɛnkɛn-bɔ̀ bukru kɛ wrɔ́n ecüì ɛshishiemɛ̀n, ô yɔ nyri y'ɛmɛ̀n lɔ ɔwrɔn léyi ke le dú ecüìcüì nɔn.

²⁵ Zhezü kɛ dɔ́ yɔ le: “Ɛnhibù wú anmàn nɛ̀ncüì hɔ̀n ẅɛn ɛyri, kɩ anwrɔn hɔ̀n léyi ẅɛn ɛkɔrɛ̀srɔn y'ɛwú nɔn, kɛ hán yɔ ye bi yɔ ‘Anvrɛn-hán-bɔ̀.’

²⁶ Tɛ́n kè sɩ̀ dù ɔmu lɔ kɛ̀ tàn nyɛ̀n. Tɛ́n ɔwrɔn léyi ẅɛn vɔ̀nshɛ́ ny'ɛmɛ̀n lɔ nɔn, ke ji le nɛ̀n dù kɛ̀ hán sùgban-ẅì hɔ́, ô ɛkɔrɛ̀levri-wrɔn lɔ kè dú eci-bɩtan-wrɔn.

²⁷ Kɛ̂, antɔn de ẅɛn vɔ̀nshɛ́, nɛ́n léyi nɛ̀n yɛ́ tɛbrɛ̀ wúɛ, kale nɛ́n léyi, nɛ̀n dú eci-bɩ̀tan-wrɔn nɛ́n? Ɔwrɔn léyi yɛ́ tɛbrɛ̀ wú nɔn kè sɩ̀ dù hiɛ. Zɛtɛn mɛ tɛn, mɛ̀n dú nyɛ̀n ɛmɛ̀n hán le eci-bɩtan-wrɔn hɔ́!

²⁸ Nyɛ́n dú mɛ̀n ɛtɛsɛ̀n ɛnvra lɔ fɛn m'ɛgbàn-kàn lɔ mɛ̀n;

²⁹ kɩ ɔmu zri léyi Ɔwɔ Zi wá mɛ̀n Anhobɩ́ Nɛ̀ncüì-dúyri antamɛ̀n nɔn, ɔmu zri lɔ, mɛ̀n mán me bɩ mɛ wá nyɛ̀n antamɛ̀n:

³⁰ nye le zî ɛci kɩ nye le mi ɛnshí mɛ́n tɛbrɛ̀ lɔ wú, Anhobɩ́ Nɛ̀ncüì-dúyri, kɩ nyɛ lɛ yɛ́ ɛgbú-tobù wúɛ, ô nyɛ́n ci Izraɛlɛ̀n mɛ̀n kru ɛvà-anhyrɛ̀ lɔ ɛmrɛ̀n.”

Zhezü kɛ dɔ̀ le, Piɛrɛ̀n kɛ lɛ crɔn ɔmuàn n'ɛtɛsɛ̀n

³¹ “Simɔn, Simɔn! E die nukùɛ: anwa-wrɔn sán, ô yɛ jɔ̀kɔ nyɛ̀n kɛ hán ɔmu le yɛ kua saka-ẅì yɛ jrɔ́ ɛci ɛmɛ̀n nɔn.

³² Kɩ mɛ́n sɛ̀n mɛ̀n tán mɛ́n ô ankàẅì-bùtan ke bɩ́ trɔ mɛ́n. Kɩ ɛnvra léyi e le vru ɛ̀ và cɔ́ mɛ̀n nɔn, ɛ̀ tán ɔmuan-ẅì hɔ̀n ecüì.”

³³ Piɛrɛ̀n kɛ dɔ̀ le: “Ɛẅɛnwrɔn, mɛ̀n krɔ́n kpehɛ́n, ô mɛ̀n mán vɛ́n mɛhi bɔ̀ hɔ́n anwɔn-mɛ̀n-wá-wɔn mɛ̀n, ô mɛ̀n mán vɛ́n mɛhi bɔ̀ wù.”

³⁴ Zhezü mrɛ́n nɛ̀n ɔmùan le: “Mɛ dɔ́ mɛ́n annànwɔrɛ mɛ̀n, Piɛrɛ̀n, ɔkɔ̀sɔ̀ cüì ke sɩ̀ di nkù ɛnyɔncì lɔ, kɩ ɛ lɛ crɔn ɔmuàn andɛ̀n anhɔ̀n le, è sɩ̀ nyri mɛ̀n.”

Ɔkùa, kotoku mán anhà-kɔ́n-nyan

³⁵ Zɛtɛn Zhezü kɛ dɔ́ yɔ le: “Ɛnvra léyi mɛ̀n wá nyɛ̀n ɔkɔhɔ̀n hɩ nyɛ́n sɩ̀ bɩ̀ ɔkùa, kotoku mán annanwrú nɔn, ɛci ẅɛn nyɛ̀n ɛmiàn?” Yɛ dɔ̀ le: “Eci zriɛmɛ́n”.

³⁶ Zɛtɛn nɛ dɔ́ yɔ le: “Tɛ́n zɛtɛ̀ lɔ ɔwrɔn léyi kɛ ẅɛn ɔkùa nɔn, ke jí le nɛ̀n bɩ, hɩ zri lɔ de dú tán ɔwrɔn léyi ẅɛn kotoku nɔn; kɩ ɔwrɔn léyi kè sɩ̀ ẅɛ̀n anhà-kɔ́n-nyan nɔn, ke ji le nɛ̀n hɛ́ n'ɛwú ceci, ô nɛ̀n wɔ́ anhà-kɔ́n-nyan tɔ̀n.

³⁷ Ɔmuhi, mɛ dɔ́ nyɛ̀n le, ke jí le ankà léyi Owrú Prɔnprɔn merɛ̀n m'ɛwú nɔn, kɛ sá nmù: ‘Yɛ krɛ́ nɛ̀n yɛ wá eci-gbangbàn-hán-bɔ̀ mɛ̀n.’ Annànwɔrɛ mɛ̀n lɔ ankà léyi ye merɛ́n m'ɛwú nɔn, kɛ lɛ sá nmù.”

³⁸ Ɛsɛ̀nkɛn-bɔ̀ lɔ kɛ dɔ̀ le: “Ɛẅɛnwrɔn, nyàn anhà-kɔ́n-nyan anhyrɛ̀.” Kɩ Zhezü kɛ dɔ̀ le: “Kɛ hán anvrɛn hán!”

Zhezü kɛ sɛ́n Ɔwɔ nkpò tɔ̀n wú, ɛẅì-shi-tɛ̀-tɔ̀n léyi ye bi olivie nɔn n'ankɛ̀tɛ mɛ̀n

³⁹ Zhezü srɔ ɛntrɛ hán ɔmu le dú n'edùci nɔn, kɩ hɔ́n nkpò tɔ̀n wú, ɛẅì-shi-tɛ̀ léyi ye bi olivie nɔn n'ankɛ̀tɛ mɛ̀n. N'ɛsɛnkɛn-bɔ̀ kɛ́n nɛ̀n ɛsɛ̀n yɔ hɔ̀n.

⁴⁰ Ɛnvra léyi nɛ̀n cɔ́ ɛyri ndɔ lɔ nɔn, nɛ dɔ́ yɔ le: “Nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀n-nyan mɛ̀n.”

⁴¹ Zɛtɛn nɛ̀n cɔhɔ́ y'ɛtɛ̀sɛ̀n nɛ́n sɔnba ɔhɔnán, kɩ nɛ̀n shɛ́n annankruemɛ̀n, nɛ sɛ́n Ɔwɔ

⁴² nɛ dɔ̀ le: “Dade, ke dú kɛ ɛ cüɛ̀n hô, ɛ̀ hán ɛgbàn-kàn glashɛ̀n ndɔ lɔ kɛ̀ cɔhɔ́ mɛ̀n ezìwú. Ɛnvra lɔ fɛn ke bɩ́ dú eci léyi mɛ cüɛ̀n nɔn de kɛ̀ hán nɔn, tɛ́n hɩ le e ji nɔn.” [

⁴³ Zɛtɛn anhobɩ́-kuyüre-wrɔn tɔ̀n srɔ ô kɛ̀ tán nɛ̀n ecüì.

⁴⁴ Zhezü dú ejüeziemɛ̀n kɩ nɛ sán sɛ́n Ɔwɔ edùyiemɛ̀n. N'ɛnwrù lɔ srɔ ɛnkrɛ̀ kɛ srá cüe ɛnhibɩ́ɛ.]

⁴⁵ Ɛnvra léyi nɛ̀n sɛ́n Ɔwɔ trɔ nɔn, nɛ̀n tɔhú, nɛ̀n vá n'ɛsɛnkɛn-bɔ̀ ɛtɛ̀sɛ̀n kɩ nɛ̀n cɔ́ yɔ yɔ dú obòto mɛ̀n kɩ ndà wri yɔ.

⁴⁶ Nɛ dɔ́ yɔ le: “Cɛci kruhú kɛ, nyɛ dí ndà? Nyɛ́n tɔhú, nyɛ́n sɛ́n Ɔwɔ, ô nyɛ́n bɩ́ bore ɔwɔɛ̀n-nyan mɛ̀n.”

Zhezü ẅɛn vra

⁴⁷ Nɛ̀n dú ankà-dɔ́ mɛ̀n kɩ fɛcüè srɔ. Zhüda léyi dú Zhezü sɛnkɛn-bɔ̀ lɔ ɔtɔ̀n nɔn, nɛ́n de nɛ̀n dú fɛcüe lɔ ezì; nɛ́n sɔnba Zhezü ɛtɛsɛ̀n ô nɛ̀n wá yi angbà mɛ̀n.

⁴⁸ Tɛ́n Zhezü kɛ dɔ́ nɛ̀n le: “Zhüda, angbàmɛ̀n-wá-mɛ̀n de ɛ hɛ́ ɔwrɔnẅì Ẅì nɛ́n?”

⁴⁹ Ɛnvra léyi Zhezü tɛsɛ̀n-bɔ̀ lɔ kán eci léyi kɛ lɛ wɔɛ̀n nɔn, yɔ yrɛ nɛ̀n le: “Ɛẅɛnnwrɔn, bɔ̀ bɩ́ bɔ́ anhà-kɔ́n-nyan lɔ bɔ̀ kɔ́n anhà hà?”

⁵⁰ Kɩ y'ɛmɛ̀n lɔ ɔtɔ̀n bɩ́ anhà-kɔ́n-nyan, wi ecice-wrɔn cüìcüì ci-bɩtan-wrɔn ezì kɔrɛ̀ nukù.

⁵¹ Tɛ́n Zhezü kɛ dɔ́ le: “Nyɛ́n teze, kɛ hán anvrɛn hán!” Zhezü tɛ́ eci-bɩtan-wrɔn lɔ nukù ɛkɔrɛ̀, kɩ nɛ́n kɔrɛ̀.

⁵² Zɛtɛn Zhezü kɛ dɔ́ ɛci-ce-bɔ̀ wrɔn cüìcüì, Ɔwɔ-cice-wɔn-yrí-nan-bɔ̀ cüìcüì mán ɛcüìcüì-bɔ̀ léyi vá nɛ̀n ɛẅɛn yri nɔn le: “Ke ji le nyɛ́n và, nyɛ́n bɩ́, anhà-kɔ́n-nyan mán antɛ̀ mɛhi, kɛ hán le anwrɔn-wri-wrɔn de dú mɛ̀n nɛ́n?

⁵³ Ɛnvra lɔ fɛn mɛ̀n mán nyɛ́n mɛhi bɔ́ dú ɛcice-wɔn lɔ mɛ̀n, kɩ nyɛ́n sɩ̀ ji mɛ̀n ɛẅɛn yri. Tɛ́n wacɛ̀n ndɔ lɔ dú nyɛ́n mán ɛyri-yɔwɔ korɛ̀-srɔn tɛ́n.”

Piɛrɛ̀n crɔn ɔmùan Zhezü tɛsɛ̀n

⁵⁴ Yɛ ẅɛn Zhezü, ye bɩ́ nɛ̀n yɔ hɔ̀n kɩ ye sɩ́ nɛ̀n ɛcice-wrɔn cüìcüì nanvrɛn ɛbemɛ̀n. Piɛrɛ̀n dú yɔ ɛmɛẅi esù she.

⁵⁵ Yɛ kɛ́n ɛnhyà ebɩ́ wanzi kɩ Piɛrɛ̀n mán bɩ́ ɛyri ɛnhyà tɛ̀sɛ̀n.

⁵⁶ Eci-bɩ̀tan-hi tɔ̀n kán nɛ̀n, nɛ̀n yɛ́ ɛnhyà tɛ̀sɛ̀n; ɛnnyɔnwrɔn lɔ kɛ nyan nɛ̀n kɩ kɛ dɔ̀ le: “Ɔwrɔn ndɔ lɔ mɛhi mán yɔ dù!”

⁵⁷ Tɛ́n Piɛrɛ̀n crɔn ɔmùan kɩ kɛ dɔ́ nɛ̀n le: “Mɛ̀n sɩ̀ nyrí nɛ̀n.”

⁵⁸ Ɛnvra cá vacì, ɔwrɔn nyàntɛn tɔ̀n kán nɛ̀n, kɩ kɛ dɔ̀ le: “Vɛ́n mán è dú anwrɔn hɔ̀n lɔ ɔtɔ̀n!” Kɩ Piɛrɛ̀n mrɛ́n ɔwrɔn ndɔ lɔ ɔmùan le: “Hɔ̂, kè sɩ̀ dù mɛ̀n.”

⁵⁹ Wacɛ̀n zri vacì kɩ ɔwrɔn nyantɛn vru kɛ dɔ́ ankà zri lɔ ecüemɛ̀n: “Annànwɔrɛ mɛ̀n, ɔwrɔn ndɔ lɔ mɛhi yɔ dù, ɔmuhi nɛ̀n dú Galile wrɔn nɔn.”

⁶⁰ Tɛ́n Piɛrɛ̀n mrɛ́n ɔmùan le: “Mɛ́n sɩ́ nyri ankà léyi e ji ɛ̀ dɔ̀ nɔn, vɛ́n ɔwrɔn ndɔ lɔ.” Hɩ vra zri léyi nɛ̀n dú ankà-dɔ́ mɛ̀n nɔn, ɔkɔ̀sɔ̀-cüì tɔ̀n di nkù.

⁶¹ Ɛẅɛnwrɔn crɛ ɛmɛẅi nyan Piɛrɛ̀n esheshiemɛ̀n. Zɛtɛn Piɛrɛ̀n ankà bru, ankà léyi Ɛẅɛnwrɔn dɔ́ nɛ̀n nɔn: “Ɔkɔ̀sɔ̀ ke sɩ̀ di nkù ɛnyɔn-cì lɔ kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.”

⁶² Piɛrɛ̀n srɔ ɛntrɛ kɩ ke wú eyú edomɛ̀n bruemɛ̀n.

Zhezü wora mán n'egorɛ

⁶³ Anwrɔn hɔ̀n léyi kɛ nán Zhezü nɔn kɛ hán nɛ̀n ɛnhyürɛ̀ kɩ ke gorɛ nɛ̀n.

⁶⁴ Yɔ vá nɛ̀n eci ezì kɩ yɔ yrɛ nɛ̀n le: “Antɔn gorɛ̀ mɛ́n hán? Tro!”

⁶⁵ Kɩ yɔ vru yɔ dɔ́ nɛ̀n ɔwora-ankà bobrebe ndɔ hɔ̀n.

Ye sɩ́ Zhezü ankà-dɔ̀-trɔ-bɔ̀ zìwú

⁶⁶ Ɛnvra léyi ɛcɛ̀n cüe nɔn, Zhüifɛ̀n-bɔ̀ cüìcüì hɔ̀n, Ɔwɔ-cice-bɔ̀ cüìcüì mán ɛnyanmàn-gbànvri-ankà-yé-bɔ̀ bɔrɛ y'edomɛ̀n ɛkru. Yɛ hán ye bɩ́ Zhezü yɔ vá ankà-dɔ̀-trɔ-bɔ̀ zìwú,

⁶⁷ kɩ yɔ yrɛ nɛ̀n le: “È dú ebɩ̀die-wrɔn hàn? Ɛ̀ dɔ́ bɔ̀.” Zhezü mrɛ́n yɔ ɔmùan le: “Ke dú kɛ mɛ dɔ́ nyɛ̀n, nyɛ́n sɩ̀ bùtan ankàẅì,

⁶⁸ kɩ ke dú kɛ me yrɛ nyɛ̀n ankà, nyɛ́n sɩ̀ shri mɛ̀n anmùan mɛ̀n.

⁶⁹ Tɛ́n Bukru zɛtɛ̀ lɔ ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ ezì-kɔrɛ kɔrɛ̀a.”

⁷⁰ Yɔ lɔ fɛn yɔ mrɛ́n ɔmùan le: “Zɛtɛn è dú Ɔwɔ ẅìɛ?” Nɛ̀n mrɛ́n yɔ ɔmùan le: “Hɩ de nyɛ́n dɔ̀ nɔn: mɛ̀n dú Ɔwɔ ẅì.”

⁷¹ Zɛtɛn yɔ dɔ̀ le: “Bɔ́ sɩ́ vru ji dalɛfuɛ-di-wrɔn zriɛmɛ́n. Bɔ́ dùku bɔ̀ yá n'anmùanmɛ̀n-ankà-dɔ̀!”