Lükɛ̀n 19 - Ɛmɛẅi ankà ankrànkràn 2003

Zhezü mán Zàshe

¹ Zhezü bru Zheriko kɩ nɛ vɔ́n ci anmàn lɔ.

² Nanvrɛn lɔ, ɔwrɔn tɔ̀n ndù ye bi nɛ̀n Zàshe; nɛ̀n dú anmàn-wɔɛ̀n-yrɛ-bɔ̀ wrɔn cüìcüì kɩ nɛ̀n dí ɛnnɛ̀ncüì.

³ Ne jí ɛyri ô nɛ̀n kán ɔwrɔn léyi dú Zhezü nɔn, tɛ́n ɔmuhi nɛ̀n hán okpò nɔn, nɛ́n sɩ̀ kán yi rɔ́, fɛcüè kruhú.

⁴ Nɛ̀n srɛ́ nɛ̀n hɔ́n ezì, kɩ nɛ̀n ká ɛtɛ̀ léyi ye bi Sikomɔrɛ̀n nɔn, ô nɛ̀n kán Zhezü léyi ke le ci nanvrɛn lɔ nɔn.

⁵ Ɛnvra léyi Zhezü cɔ́ ɛyri léyi Zàshe ká ɛtɛ̀ hɔ́n ɛwú nɔn, nɛ̀n sɩ́ anvɛ̀ ɛwú kɩ nɛ dɔ́ zàshe le: “Kàkɛ kpràkprà zàshe, ɔmuhi ke ji le mɛ̀n ci mɛ́n nɛ̀nnyanmàn ɛnyɔnci lɔ nɔn.”

⁶ Zàshe kakɛ kpràkprà kɩ hɔ́n bɩ́ nɛ̀n pɔpüɛ mɛ̀n.

⁷ Anwrɔn lɔ fɛn léyi kán yɔ nɔn ke bɩ́ ɛmɛ̀nhyì kɩ kɛ dɔ̀ le: “Ɔwrɔn ndɔ lɔ hɔ́n sɔ́n ebɩ́ ɛgbàn-hán-wrɔn nanvrɛn!”

⁸ Zàshe, nyɔn Ɛẅɛnwrɔn ezìwúɛ, kɩ nɛ dɔ́ yi le: “E die nukùɛ Ankà-yé-wrɔn, m'ɛci léyi mɛ́n ẅɛ̀n nɔn, mɛ lɛ bɩ́ ɛcá mɛ̀n tán ɛmian-bɔ̀, kɩ ke dú kɛ mɛ̀n bɩ́ ɔwrɔn ci ɛfrɛ́n mɛ̀n hô, mɛ lɛ wɔrɔ̀ tán nɛ̀n, andɛ̀n anzɔ̀.”

⁹ Zhezü mrɛ́n nɛ̀n ɔmùan le: “Ɛnyɔncì lɔ, ɛnkrukɔrɛ̀ bru ebɩ́ ndɔ lɔ mɛ̀n, ɔmuhi, ɔwrɔn ndɔ lɔ mán dú Abrahamɛ̀n mɛ̀n mɛ̀n-wrɔn nɔn.

¹⁰ Ɔmuhi, ɔwrɔnẅì Ẅì, nvà ô kè ji, ô kè bɩ́, yɔ hɔ̀n léyi zrɛ́n nɔn kè die.”

Ansɩ̀kɛ-kùa-ẅì nyandrɛn mɛ̀n ankà-dɔ̀

¹¹ Zhezü vru kɛ dɔ́ nyandrɛn mɛ̀n ankà tɔ̀n tán anwrɔn hɔ̀n léyi kɛ yá ankà-dɔ̀ ndɔ hɔ̀n lɔ nɔn. Nɛ̀n dú Zherüzalɛmɛ̀n tɛsɛ̀n, kɩ ye bútan le Anhobɩ́ Nɛ̀ncüì-dúyri kɛ lɛ srɔ kpatakpata lɔ.

¹² Nyàn ankà léyi nɛ dɔ̀ nɔn: “Ɔwrɔn tɔ̀n, nɛ̀n dú ɛmɛ̀n anvrɛnvrɛn mɛ̀n wrɔn, kɩ nɛ̀n hɔ́n anmàn nyàntɛn, ɛyri she, ô yɛ srɔ nɛ̀n ɛnnɛ̀ncüì; ô nɛ̀n vru nɛ̀n và.

¹³ Ɛnvra léyi nɛ vá ɛhɔ̀n-yri nɔn, nɛ̀n bi n'eci-bɩtan-bɔ̀ ɛvà lɔ, kɩ nɛ̀n tán ɔwrɔnwrɔn ansɩ̀kɛ-kùa-ẅì zri kɩ nɛ̀n dɔ́ yɔ le: ‘Nyɛ́n bɩ́ ɔkùa lɔ nyɛ́n zhrɛ́ anhàn, hàn kɩ kɛ cɔ́ ɛnvra léyi me le vru ɛmɛẅi mɛ̀n và nɔn.’

¹⁴ Ɔwrɔn ndɔ lɔ, n'anmàn-bɔ̀ ke sɩ́ cüɛ́n nɛ̀n; kɩ yɔ wá anwrɔn ɔkɔ̀hɔ̀n, kɛ̀ hɔ̀n kɛ̀ dɔ́ yɔ anmàn léyi nɛ hɔ̀n nɔn le: ‘Bɔ́ sɩ́ ji ɔwrɔn ndɔ lɔ kè dú bɔ́ ɛnnɛ̀ncüì.’

¹⁵ Ɔwrɔn lɔ srɔ ɛnnɛ̀ncüí kɩ vru vá n'anmàn. Nɛ̀n hán yɔ ye bi n'eci-bɩ̀tan-bɔ̀ léyi nɛ̀n tán ɔkùa nɔn, ô nɛ̀n nyri eci léyi yɔ cɔ́ y'anhàn-zhrɛ̀ lɔ mɛ̀n nɔn.

¹⁶ Ɛnvrakpà-wrɔn lɔ nvà kɩ kɛ dɔ̀ le: ‘Ankà-yé-wrɔn, mɛ̀n cɔ́ ansɩ̀kɛ-kùa-ẅì ɛvà mɛ̀n kɛ́n ndɔ léyi ɛ̀ tán mɛ́n nɔn ɛwú.’

¹⁷ Ɛnnɛ̀ncüì lɔ kɛ dɔ́ nɛ̀n le: ‘Kɛ zrɔ, ɛci-bɩtan-wrɔn ankrànkràn, ɔmuhi, è di ɔmùan-zri ecicɛ mɛ̀n nɔn, mɛ wá mɛ́n anmàn ɛvà govran.’

¹⁸ Anhyrɛmɛ̀n ci-bɩtan-wrɔn nvà kɩ kɛ dɔ̀ le: ‘Ankà-yé-wrɔn, mɛ̀n cɔ́ ansɩ̀kɛ-kùa-ẅì ɛnrì mɛ̀n kɛ́n ndɔ léyi ɛ̀ tán mɛ̀n nɔn ɛwú.’

¹⁹ Ɛnnɛ̀ncüì lɔ kɛ dɔ́ ɔwrɔn ndɔ lɔ le: ‘Vɛ tɛn, mɛ wá mɛ́n anmàn ɛnri govran.’

²⁰ Eci-bɩtan-wrɔn nyàntɛn tɔ̀n nvà kɩ kɛ dɔ̀ le: ‘Ankà-yé-wrɔn, nyàn v'ansɩ̀kɛ-kùa-ẅì lɔ; mɛ̀n bɩ́ nɛ̀n mɛ̀n bán, mɛ̀n kɔra nɛ̀n angsɛ̀n mùan mɛ́n hɛ́n.

²¹ Me sú mɛ́n, ɔmuhi è dú ɔwrɔn léyi ẅɛn ɛnkru shishi nɔn: e bɩ́ eci léyi è sɩ̀ hɛ́n hán nɔn, kɩ ɛ küɛ ɛci léyi è sɩ̀ tɛ̀a nɔn.’

²² Ɛnnɛncüì lɔ kɛ dɔ́ nɛ̀n le: ‘Eci-bɩ̀tan-wrɔn gbangbàn, me le ci mɛ̀n ɛmrɛ̀n v'ɔmùan ankà-dɔ̀ wú. È nyri ɔmu le mɛ̀n dú ɛnkru-shishi-wrɔn, me bɩ́ ɛci ɛyri léyi mɛ̀n sɩ̀ hɛ́n hán nɔn, mɛ küɛ ɛci ɛyri léyi mɛ̀n sɩ̀ tɛ̀a nɔn.

²³ Zɛtɛn, ecitan kruhú kɛ e sɩ́ bɩ́ m'ɔkùa lɔ ɛ hɛ́n ɔwɔn léyi ɔkùa ke bî ɛẅì ɛmɛ̀n nɛ́n? M'evru-vá mɛ̀n lɔ, me le bɩ́ m'ɔkùa mán nɛ́n vɔ̀nshɛ́ mɛhi.’

²⁴ Zɛtɛn nɛ dɔ́ anwrɔn hɔ̀n léyi nyɔn nanvrɛn lɔ nɔn le: ‘Nyɛ́n bɩ́ n'ɔkùa ndɔ lɔ nyɛ́n sɔhɔ́ nɛ̀n antamɛ̀n, ô nyɛ́n bɩ nyɛ́n tán ɔwrɔn léyi yɛ tán ɛvà nɔn.’

²⁵ Yɛ dɔ́ ɛnnɛ̀ncüì lɔ le: ‘Ankà-yé-wrɔn, nɛ́n gɔ̀ ẅɛn ɔkùa-ẅì-ɛvà!’

²⁶ Ɛnnɛ̀ncüì lɔ mrɛ́n ɔmùan le: ‘Mɛ dɔ́ nyɛ̀n annànwɔrɛ mɛ̀n le ɔwrɔn léyi ẅɛ̀n nɔn, ye le vru yɛ tán nɛ̀n kè fɛ ɛwú; tɛ́n ɔwrɔn léyi kè sɩ̀ ẅɛ̀n hàn nɔn, ye le bɩ́ ɛẅiɛ léyi nɛ́n ẅɛ̀n nɔn mán yɛ sɔhɔ́.

²⁷ Tɛ́n m'egbri-bɔ̀ hɔ̀n léyi ke sɩ́ ji le mɛ̀n srɔ y'ɛnnɛ̀ncüì nɔn, nyɛ́n sɩ́ yɔ ɛnu, ô nyɛ́n wri yɔ m'ezìwú.’ ”

Zhezü kɛ hɔ́n Zherüzalɛmɛ̀n anmàn

²⁸ Ɛnvra léyi Zhezü dɔ́ ankà ɔmu lɔ trɔ nɔn, nɛ̀n dú fɛcüè ezì yɔ hɔ́n Zherüzalɛmɛ̀n anmàn.

²⁹ Ɛnvra léyi nɛ̀n bá Bɛtfazhe mán Betani tɛsɛ̀n, ɛyri léyi ye bi “Olivie kpò” nɔn n'ɛtɛ̀sɛ̀n, nɛ̀n wá n'ɛsɛnkɛn-bɔ̀ anhyrɛ̀ ɔkɔhɔ̀n hɛ́ ezì:

³⁰ Nɛ dɔ́ yɔ le: “Nyɛ́n hɔ́n anmàn léyi kɛ́n nyɛ̀n ezì nɔn. Ɛnvra léyi nyɛ lɛ bru nanvrɛn lɔ nɔn, nyɛ lɛ cɔ́ frimú-ẅì cɛ tɔ̀n, yɛ mɔɛn nɛ̀n, ɔwrɔn zriɛmɛ́n kɛ vá yɛ́ nɛ̀n ɛwúɛ. Nyɛ́n srú nɛ̀n, ô nyɛ́n bɩ́ nɛ̀n nyɛ́n vá ɛnu lɔ.

³¹ Kɩ ke dú kɛ ɔwrɔn tɔ̀n ke yrɛ nyɛ̀n le: ‘Cɛci kruhú kɛ nye srú nɛ̀n hàn?’ nyɛ́n dɔ́ nɛ̀n le: ‘Ɛẅɛnwrɔn ke ji frimu lɔ.’ ”

³² Ɔkɔhɔ̀n-wá-bɔ̀ lɔ hɔ̀n kɩ cɔ́ eci lɔ hán ɔmu le Zhezü dɔ́ yɔ nɔn.

³³ Ɛnvra léyi yɔ dù yɔ srú frimu lɔ ɛhɛ́ nɔn, annɔ̀n-nɛ́n-zi hɔ̀n ke yrɛ yɔ le: “Cɛci kruhú kɛ nyɛ srú frimu-ẅì lɔa?”

³⁴ Yɔ mrɛ́n ɔmùan le: “Ɛẅɛnwrɔn ke ji frimu lɔ.”

³⁵ Kɩ yɔ bɩ́ frimu-ẅì lɔ yɔ hɔ́n sɩ́ Zhezü; yɔ bɩ́ y'ɛceci yɔ ku frimu lɔ ɛwú kɩ yɔ hán Zhezü yɛ́ frimu-ẅì lɔ ɛwúɛ.

³⁶ Ɛnvra léyi yɔ nán esù hɔ̀n nɔn, anwrɔn ke bɩ́ y'ɛceci ke cüe ɛnlevriɛ̀.

³⁷ Ɛnvra léyi nɛ bá Zherüzalɛmɛ̀n tɛsɛ̀n, hɩ nɛ̀n bɩ́ ɛnlevri léyi dú “OLivie kpò” wú kɛ kakɛ nɔn, Zhezü sɛnkɛn-bɔ̀ mán fɛcüè lɔ fɛn dú pɔ̀püɛ̀mɛ̀n kɛ mrɛ́n Ɔwɔ esùvá cüìcüìemɛ̀n, ɔmuhi yɔ kán anvɛmɛ̀n-frɛ́n-ci hɔ̀n lɔ fɛn léyi nɛ̀n hán nɔn.

³⁸ Kɩ yɔ dɔ̀ le: “Ɔwɔ kè fú Ɛnnɛ̀ncüì léyi kɛ và nɔn ɛnshi, Ɛẅɛnwrɔn bɩ́mɛ̀n! Anwɔwɔ kè dú anhobɩ́, ô ecizrɔ kè dú Ɔwɔ tɛn!”

³⁹ Ɔwɔ-nyanmàn-sùva-wá-bɔ̀ zrizri léyi dú fɛcüè lɔ ɛmɛ̀n nɔn, kɛ dɔ́ Zhezü le: “Ankà-yé-wrɔn, ɛ̀ wá tán v'ɛsɛ̀nkɛn-bɔ̀ lɔ kɛ kɛ́n ɔmùan kɛ̀ hɛ́n.”

⁴⁰ Zhezü mrɛ́n ɔmùan le: “Mɛ dɔ́ nyɛ̀n le, ke dú kɛ yɔ kɛ́n ɔmùan yɛ hɛ́n hô, ɛbù hɔ̀n ke le di bobo.”

Zhezü ke wú eyú ku Zherüzalɛmɛ̀n anmàn ɛwú

⁴¹ Ɛnvra léyi Zhezü cɔ́ Zherüzalɛmɛ̀n anmàn tɛsɛ̀n nɔn, hɩ nɛ̀n kán anmàn lɔ nɔn, ne wú eyú ku yi ɛwú, kɩ nɛ dɔ̀ le:

⁴² “Ke dú kɛ, ɛnyɔncì lɔ, vɛ́n mán e nyri eci léyi kɛ lɛ tán mɛ́n anwɔwɔ! Tɛ́n zɛtɛ̀ lɔ dú ankà-bán-ankà tán mɛ́n, e sɩ̀ kàn rɔ́!

⁴³ Ɔmuhi, ɛnbì hɔ̀n kɛ lɛ vá v'ɛkruhú, kɩ v'egbri-bɔ̀ ke le bɩ́ anhà-kɔ́n-ci kɛ̀ gbrɛnkɛn mɛ́n ɔmùan, kɛ lɛ wá mɛ́n angán kɩ yɔ lɛ bɔrɛ mɛ́n ɛyri lɔ fɛn.

⁴⁴ Yɛ lɛ gbɔ̀ngbɔ mɛ́n brɛzri, vɛ́n mán v'anwrɔn hɔ̀n mɛhi; yɔ sɩ̀ teze mɛ́n obù zriɛmɛ́n kɛ̀ hɛ́n nɛ́n nyran obù wúɛ, ɔmuhi è sɩ̀ nyrì ɛnvra léyi Ɔwɔ vá sɩ́ mɛ́n n'ɛkɔrɛ̀-wá lɔ nɔn.”

Zhezü dú Ɔwɔ-cice-wɔn mɛ̀n

⁴⁵ Zhezü bru ɛci-ce-wɔn lɔ mɛ̀n kɩ bukru kɛ wrɔ́ ɛci-hɛ́-bɔ̀, nɛ dɔ́ yɔ le:

⁴⁶ “Ɛwrú Prɔnprɔn hɔ̀n kɛ dɔ̀ le: ‘M'ɔwɔn lɔ ke le dú Ɔwɔ-sɛ́n-wɔn.’ Nyɛ tɛn, nyɛ́n bɩ́ nɛ̀n nyɛ́n srɔ ɛci-yerɛ-bɔ̀ kpò-nànmàn.”

⁴⁷ Zhezü ke yé yɔ ankà ɛnbì lɔ fɛn ɛcice-wɔn lɔ mɛ̀n. Ɛcice-bɔ̀ cüìcüì, ɛnyanmàn-gbànvri-ankà-yé-bɔ̀ mán anwrɔn hɔ̀n léyi dú anmàn fɛcüè cüìcüì-bɔ̀ nɔn, ke ji ɛyri kɛ̀ hán nɛ̀n, nɛ̀n wù.

⁴⁸ Tɛ́n yɔ sɩ́ nyri eci léyi yɔ lɛ hán nɔn, ɔmuhi fɛcüè ke die nɛ̀n nukù anvrɛnvrɛn nɔn.