Lükɛ̀n 17 - Ɛmɛẅi ankà ankrànkràn 2003

Ɛgbàn mán ɛgbàn-bɩ-ce

¹ Zhezü kɛ dɔ́ n'ɛsɛnkɛn-bɔ̀ le: “Ɛnvra lɔ fɛn, eci-hán ke le dù ke le di anwrɔn ɛgbàn mɛ̀n. Tɛ́n, muzhie dú tán anwrɔn léyi ke le di ɔwrɔn ɛgbàn mɛ̀n nɔn!

² Zrɔ tán le nɛ tɛn ye bɩ́ obù ye mú nɛ̀n ɔbɔ̀n, ô yɛ kɔ́n nɛ̀n di ecüe, ndɔ lɔ zrɔ vrán hɩ le ye le teze nɛ̀n, ô nɛ̀n di ɛnẅì cɛ zri kpokpo ɛgbàn mɛ̀n.

³ Nyɛ́n wá esùva anvrɛnvrɛn! Ke dú kɛ ɔmuan-ẅì kɛ hán eci gbangbàn, ɛ̀ kran ankà è yé nɛ̀n. Ke dú kɛ nɛ ẅɛn ɛgbàn-bòtò hô, è bɩ ce nɛ̀n.

⁴ Ke dú kɛ nɛ fɔndɔ́n mɛ́n andɛ̀n ɔbɔɛ̀n ɛnbì zri lɔ mɛ̀n, kɩ nɛ vá dɔ́ mɛ́n le: ‘Me boto m'ɛgbàn lɔ’, è bɩ ce nɛ̀n.”

Ankàẅì-bùtan

⁵ Ɔkɔhɔ̀n-wá-bɔ̀ kɛ dɔ́ Ɛẅɛnwrɔn le: “È ku bɔ̀ ankàẅì-bùtan ɛmɛ̀n.”

⁶ Ɛẅɛnwrɔn mrɛ́n ɔmùan le: “Ke dú kɛ nyɛ́n ẅɛn ankàẅì-bùtan sevri hán anjràkàn-ẅì hɔ̂, nyɛ lɛ dɔ́ ɛẅì-shi-tɛ̀ ndɔ lɔ le: ‘Fù v'edomɛ̀n ɛ̀ hɔ̀n ɛ̀ shɛ́n ecüe mɛ̀n’, kɩ eci lɔ kɛ lɛ hán.”

Eci-bɩ̀tan-wrɔn kɔhɔ̀n-hán-kɔhɔ̀n

⁷ “Bɔ̀ tro ankà ndɔ lɔ: ny'ɛmɛ̀n lɔ, ɔwrɔn tɔ̀n ẅɛn eci-bɩtan-wrɔn tɔ̀n kɛ hán ɔkɔ̀hɔ̀n ankɛ̀tɛmɛ̀n, kɩ ɛnvra tɔ̀n nɛ nán annɔ̀n. Ɛnvra léyi nɛ kán yi ke dú ovomɛ̀n kɛ vá ɛbemɛ̀n nɔn, n'ankà-yé-wrɔn kɛ lɛ dɔ̀ nɛ̀n le: ‘Ɛ̀ kpramàn ɛ̀ yɛ́ tɛbrɛ̀ wúɛ nɛ̀n’?

⁸ Hɔ̂, nɛ lɛ gɔ̀ dɔ́ yi le: ‘Gbrɛ̀ ɛci tán mɛ̀n, crɔn ɛceci, ô è kù ɛci ɛ̀ tán mɛ̀n mɛ̀n zî; ɛnvra léyi ndɔ lɔ kɛ trɔ nɔn, yakɛ e le zî ɛci, e le mi ɛnshi.’

⁹ Nɛ̀n sɩ̀ ẅɛ̀n ɔkùɛn hɩ n'á tán n'eci-bɩtan-wrɔn lɔ nɔn, ɔmuhi, dú eci-bɩtan-wrɔn lɔ kɔ̀hɔ̀n-hán-kɔ̀hɔ̀n nɔn; ke sɩ̀ dù hiɛ?

¹⁰ Eci zri lɔ de dú tán nyɛ́n mán nɔn: Ɛnvra léyi nyɛ lɛ hán eci léyi yɛ wá yɛ tán nyɛ̀n nɔn, nyɛ́n dɔ̀ le: ‘Bɔ̀ dú eci-bɩtan-bɔ̀ kora; bɔ̀ hán ɔkɔ̀hɔ̀n léyi dú bɔ́ ɔkɔ̀hɔ̀n-hán-kɔ̀hɔ̀n nɔn.’ ”

Zhezü kɔrɛ kokove-lɔwiɛ-bɔ̀ ɛvà

¹¹ Ɔmuhi Zhezü kɛ nán esù hɔ́n Zherüzalɛmɛ̀n anmàn, nɛ̀n ci Samari mán Galile vɔ̀n.

¹² Nɛ̀n bru anmàn tɔ̀n ɛnvra léyi kokove-lɔwiɛ-bɔ̀ ɛvà hɔ́n nɛ̀n ɛsù. Yɔ nyɔn esù she,

¹³ kɩ yɔ bukru yɔ di bobo yɔ dɔ̀ le: “Zhezü, ankà-yé-wrɔn, è nyri bɔ̀ ɛnhyɔ̀bɔ̀!”

¹⁴ Zhezü kán yɔ kɩ kɛ dɔ́ yɔ le: “Nyɛ́n hɔ̀n nyɛ́n yé ny'edomɛ̀n Ɔwɔ-cice-bɔ̀.” Ɛnvra léyi ye dú ɛnlevri yɔ hɔ̀n nɔn, kɩ yɔ kɔrɛ̀.

¹⁵ Ɛnzri dú ɛmɛ̀n, ɛnvra léyi nɛ̀n kán ɔmu le nɛ́n kɔrɛ̀ nɔn, nɛ̀n vru ɛmɛẅi nɛ́n hɔ̀n nɛ mrɛ́n Ɔwɔ ɔmùan ɛwú sɩ́emɛ̀n.

¹⁶ Nɛ̀n bore Zhezü ɛnan ziwú, nɛ̀n sɩ́ ezì ɛnhi, kɩ nɛ̀n tán yi ɔkùɛn. Ɔwrɔn ndɔ lɔ dú Samari-wrɔn.

¹⁷ Zɛtɛn Zhezü kɛ dɔ̀ le: “Nyɛ́n anwrɔn ɛvà lɔ fɛn nyɛ́n kɔrɛ̀a? Kɛ̂ ɔmrɔ̀ ndɔ hɔ̀n lɔ, tɛyri yɔ dùɛ?

¹⁸ Ɛnzriɛmɛ́n, kɛ sɩ̀ tro Ɔwɔ léyi nɛ lɛ và nɛ̀n tán ɔkuɛ̀n nɔn, ke dú kɛ ke sɩ̀ dù ɛmɛ̀n nyàntɛn mɛ̀n wrɔn ndɔ lɔa?”

¹⁹ Kɩ Zhezü kɛ dɔ́ nɛ̀n le: “Tɔhú hɔ̀n; v'ankàẅì-bùtan lɔ bɩ́ mɛ́n die.”

Anhobɩ́ Nɛ̀ncüì-dúyri vá vra

²⁰ Ɔwɔ-nyanmàn-sùva wá-bɔ̀ ke yrɛ Zhezü ɛnvra léyi Anhobɩ́ Nɛ̀ncüì-dúyri kɛ lɛ và nɔn. Zhezü mrɛ́n yɔ ɔmùan le: “Anhobɩ́ Nɛ̀ncüì-dúyri ke sɩ̀ và kɛ̀ hán tán yɛ kán nɛ̀n.

²¹ Ye sɩ̀ dɔ̀ le: ‘Nyɛ́n nyan nɛ̀n dú ɛnu!’ Ɛnvra tɔ̀n hô: ‘Nɛ̀n dú ezì!’ Ɔmuhi ke ji le nyɛ́n nyrì le, Anhobɩ́ Nɛ̀ncüì-dùyri lɔ dú nyɛ̀n anwanzi nɔn.”

²² Zɛtɛn Zhezü kɛ dɔ́ n'ɛsɛnkɛn-bɔ̀ le: “Ɛnvra kɛ lɛ và, kɩ nyɛ́n le ji le, nyɛ́n kán, ɔwrɔnẅì Ẅì wúvà lɔ n'ɛnbì zri, tɛ́n nyɛ́n sɩ̀ kàn rɔ́.

²³ Yɛ lɛ dɔ́ nyɛ̀n le: ‘Nyɛ́n nyan ɛzìɛhɛ́n!’ Ɛnvra tɔ̀n hô: ‘Nyɛ́n nyan ɛnu!’ Tɛ́n ke sɩ́ ji le nyɛ́n hɔ̀n, ke sɩ́ ji le nyɛ́n srɛ́ mán.

²⁴ Hán ɔmu le ɛwú kɛ kpɛ́n ɛnhyà, hɩ ɛnhi mumù lɔ fɛn kɛ gbrɛ́n, ke dú ɛyri-kán mɛ̀n, ɔmu lɔ de ke le dú ɔwrɔnẅì Ẅì bì zri bì lɔ nɔn.

²⁵ Tɛ́n ke ji le nɛ̀n kán ɛgbàn bobrebe, ô ɛnvra ndɔ lɔ mɛ̀n-bɔ̀ kɛ̀ kɔ́n nɛ̀n ze.

²⁶ Eci zri léyi wɔɛn Noe vra lɔ nɔn, eci zri lɔ de kɛ lɛ wɔɛn ɔwrɔnẅì Ẅì wúvà bì lɔ mɛ̀n nɔn.

²⁷ Anwrɔnẅì ke zî ɛci, ke mi ɛnshi, kɛ koran eyrì-koran, ɛnvra tɔ̀n hô ye yri y'edomɛ̀n hàn kɩ cɔ́ ɛnvra léyi Noe bru Ɔwɔ anhàka vri lɔ mɛ̀n nɔn: zɛtɛn ɛnshi-yɩ́-vra cɔ̀, wri yɔ lɔ fɛn.

²⁸ Ke le dù kɛ lɛ hán Lɔtɛ̀n vra lɔ: anwrɔn ke zî ɛci, ke mi ɛnshi, kɛ wɔ́ ɛci, kɛ hɛ́ ɛci, kɛ tɛ́ ɛci, ke ku anwɔn.

²⁹ Tɛ́n ɛnbì léyi Lɔtɛ̀n cɔhɔ́ Sodɔmɛ̀n anmàn nɔn, ɛnhyà mán ɛnhyà-ẅì dú anhobɩ́ kɛ nàn kɛ hán ɛnshi hɔ́; kɩ hán yɔ lɔ fɛn yɔ wù.

³⁰ Eci zri lɔ de kɛ lɛ wɔɛn ɛnbì léyi ɔwrɔnẅì Ẅì kɛ lɛ srɔ nɔn.

³¹ Hɩ vra lɔ, ɔwrɔn léyi ke le dú ɔwɔn wú, n'ɔwɔn zìwú ke sɩ́ ji le nɛ̀n kàkɛ nɛ̀n hɔ́n anwɔn mɛ̀n nɛ̀n bɩ́ n'ɛci léyi dú nanvrɛn nɔn; ɔmu zri lɔ ɔwrɔn léyi dú ankɛ̀tɛ mɛ̀n nɔn, ke sɩ́ ji le nɛ̀n vru nɛ̀n vá n'ɔwɔn lɔ mɛ̀n.

³² Nyɛ́n tro Lɔtɛ̀n hi ankà!

³³ Ɔwrɔn léyi ke le ji n'ɛwúvà bɩdie-yri nɔn, kɛ lɛ zrɛ́n nɛ̀n; tɛ́n, ɔwrɔn léyi kɛ lɛ zrɛ́n n'ɛwúvà lɔ nɔn, ke le bɩ́ nɛ̀n kè die.

³⁴ Mɛ dɔ́ nyɛ̀n, ɛnnyran ndɔ lɔ mɛ̀n, anwrɔn anhyrɛ̀ ke le dú sofa zri wú: ye le bɩ́ nzri, ye le teze ɔtɔ̀n.

³⁵ Wúyɔ̀ anhyrɛ̀ ke le dú ɛci-sɔ́n mɛ̀n: ye le bɩ́ nzri kɩ ye le teze ɔtɔ̀n. [

³⁶ Anwrɔn anhyrɛ̀ ke le dú ɛkɛ̀tɛ̀ tɔ̀n mɛ̀n: ye le bɩ́ nzri yɛ sɔhɔ́ kɩ ɔtɔ̀n kɛ lɛ yɛ́.]”

³⁷ N'ɛsɛnkɛn-bɔ̀ ke yrɛ nɛ̀n le: “Tɛyri de ɛci hɔ̀n lɔ kɛ lɛ wɔɛ̀n nɛ́n?” Kɩ nɛ̀n mrɛ́n ɔmùan le: “Ɛyri léyi ezhe kɛ lɛ dɛ́ nɔn, nanvrɛn lɔ de ɛmrɛ̀ncì mán ke le dù nɔn.”