Lükɛ̀n 13 - Ɛmɛẅi ankà ankrànkràn 2003

Yɛ sàncrɔn kale yɔ wù

¹ Hɩ vra lɔ, anwrɔn vá dɔ́ Zhezü, Galile-bɔ̀ léyi Pilatɛ̀n hán ye wrì ɛnvra léyi yɔ ce Ɔwɔ eci nɔn.

² Zhezü mrɛ́n yɔ ɔmùan le: “Nye tro le, Galile-bɔ̀ léyi ye wrì nɔn, yɔ de ye dú ɛgbàn-hán-bɔ̀ vri vrán Galile-bɔ̀ ndɔ hɔ̀n lɔ nɛ́n?

³ Hɔ̂, mɛ dɔ́ nyɛ̀n; tɛ́n ke dú kɛ nyɛ́n sɩ̀ crɔ̀n ny'eci-hán-ci, nyɛ́n mán nye le wù kɛ lɛ hán yɔ hɔ́.

⁴ Zɛtɛn, anwrɔn ɛvà-eẅirì léyi, Sɩ̀loe wɔn gbe ku ɛwú nɔn, hɩ mán, nye tro le, yɔ de yɔ dú ɛbgàn-hán-bɔ̀ vrán Zherüzalɛmɛ̀n anmàn-bɔ̀ lɔ fɛn nɛ́n?

⁵ Hɔ̂, mɛ dɔ́ nyɛ̀n; tɛ́n ke dú kɛ nyɛ́n sɩ̀ crɔ̀n ny'eci-hán-ci, nyɛ́n mán nye le wù kɛ lɛ hán yɔ hɔ́.”

Ɛẅì-shi-tɛ̀ tɔ̀n léyi kè sɩ̀ shì ɛẅì nɔn, nɛ́n nyàndrɛn mɛ̀n ankà-dɔ̀

⁶ Zɛtɛn Zhezü kɛ dɔ́ yɔ nyàndrɛn mɛ̀n ankà ndɔ lɔ: “Ɔwrɔn tɔ̀n ẅɛn ɛẅì-shi-tɛ̀ tɔ̀n dú nɛ̀n ankɛ̀tɛ mɛ̀n. Nɛ̀n vá antɛ̀-ẅì ji yri kɩ nɛ̀n sɩ̀ cɔ̀a.

⁷ Nɛ dɔ́ ɛkɛ̀tɛ̀-kɔ̀hɔ̀n-hán-wrɔn lɔ le: ‘Nyan: Ɛnnanwàn anhɔ̀n de me ji antɛ̀-ẅì ɛẅì-shi-tɛ̀ ndɔ lɔ wú kɩ mɛ́n sɩ́ cɔ́a. È wí nɛ̀n è ze! Ecitan kruhú kɛ ne bɩ́ ɛyri krɔa?’

⁸ Tɛ́n ɛkɛ̀tɛ̀-kɔ̀hɔ̀n-hán-wrɔn lɔ kɛ dɔ́ nɛ̀n le: ‘Ankà-yé-wrɔn, è vru ɛ̀ tán nɛ̀n ɛnnanwàn ndɔ lɔ; mɛ lɛ bɔ́ ɛnnànmàn n'edomɛ̀n kɩ me le ku nɛ̀n annɔ̀n-sɔ̀n mɛ̀n nyan kɛ.

⁹ Me tro le, ɛnnanwàn lɔ kɛ và nɔn, ne le shi ɛẅì; kè sɩ̀ dù ɔmu lɔ hô, è wí nɛ̀n è ze.’ ”

Zhezü kɔrɛ ɔkpɔ̀cɔ nyɔnwrɔn tɔ̀n ɛnyanmán-bì lɔ

¹⁰ Ɛnyanmán-bì tɔ̀n de Zhezü ke yé ankà Ɔwɔ-sɛ́n-wɔn tɔ̀n mɛ̀n.

¹¹ Ɛnlɔẅiɛ-hi tɔ̀n nyɔn nanvrɛn lɔ: ɛnnanwàn kru ɛvà eẅirì de, ɛnhɛ́n gbangbàn tɔ̀n kɛ hán nɛ̀n ne vé, kɩ nɛ́n sɩ́ cɔ́ ɛ̀wú-nyɔn-yri.

¹² Ɛnvra léyi Zhezü kán ɛnnyɔnwrɔn ndɔ lɔ nɔn, nɛ̀n bi yi, kɩ nɛ dɔ́ yi le: “V'ɛnlɔẅiɛ lɔ trɔ mɛ́n edomɛ̀n.”

¹³ Nɛ̀n bɩ́ ankɔrɛ̀ nɛ̀n di yi ɛwú, kɩ ɛnvra zri lɔ, ɛnnyɔnwrɔn lɔ wrɔn ɛwú, kɩ bukru kɛ mrɛ́n Ɔwɔ.

¹⁴ Tɛ́n, Ɔwɔ-sɛ́n-wɔn mɛ̀n wrɔn cüìcüì lɔ, kè sɩ̀ cüɛ̀n hàn, ɔmuhi Zhezü kɔrɛ ɔwrɔn ɛnyanmán-bì lɔ nɔn. Nɛ̀n bɩ́ ankà-dɔ̀ kɩ nɛ dɔ́ fɛcüè le: “Yɛ tán nyɛ̀n ɛbi ɛwole, nyɛ́n bɩ̀ nyɛ́n hán ɔkɔhɔ̀n; nyɛ́n vá ɛnbi lɔ, ô yɛ kɔrɛ nyɛ̀n, kè sɩ̀ dù ɛnyanmán-bì lɔ.”

¹⁵ Ɛẅɛnwrɔn mrɛ́n nɛ̀n ɔmùan kɛ dɔ̀ le: “Anmùan-anhyrɛ̀-bɔ̀ léyi dú nyɛ̀n nɔn! Ɛnyanmán-bì lɔ, anwrɔn wrɔn de kɛ srú y'annɔ̀n anhɛ́, kɛ hán yɔ, yɔ hɔ́n mi ɛnshi, ɛyɔ̀n hàn?

¹⁶ Kɩ ɛnnyɔnwrɔn ndɔ léyi, dú Abrahamɛ̀n mɛẅi wrɔn, hɩ anwa-wrɔn kɔra hɛ́n ɛnnanwàn kru ɛvà eẅirì nɔn, kè sɩ̀ zrɔ tán le, yɛ kɔrɛ nɛ̀n ɛnyanmán-bì lɔa?”

¹⁷ Zhezü ankà-dɔ̀ lɔ, tán n'ezì-kɛ́n-bɔ̀ lɔ anvɛvrà, kɩ fɛcüè dú pɔpüɛ̀-brá mɛ̀n, eci hɔ̀n lɔ fɛn léyi Zhezü kɛ hán nɔn kruhú.

Ɛtɛ̀-ẅì léyi ye bi mùtardɛ̀n nɔn nɛ́n nyandrɛn mɛ̀n ankà-dɔ̀

¹⁸ Zhezü kɛ dɔ̀ le: “Ecitan de Anhobɩ́ Nɛ̀ncüì-dúyri lɔ kɛ cá nɛ́n? Ecitan de me le bɩ mɛ̀n wotro nɛ̀n nɛ́n?

¹⁹ Nɛ́n dù nɛ̀n cá ɛtɛ̀-ẅì tɔ̀n léyi ɔwrɔn tɔ̀n bɩ́ wá ɛnhibɩ́ n'ɛkɛ̀tɛ̀ lɔ mɛ̀n: ɛtɛ̀-ẅì lɔ dì, srɔ ɛtɛ̀ vri, kɩ annrɛ́n hɔ̀n ku y'anwɔn n'anda hɔ̀n lɔ wú.”

Eci-fɔ́-ci nyandrɛn mɛ̀n ankà-dɔ̀

²⁰ Zhezü vru kɛ dɔ̀ le: “Ecitan de me le bɩ mɛ̀n wotro Anhobɩ́ Nɛ̀ncüì-dúyri lɔ nɛ́n?

²¹ Nɛ́n dù nɛ̀n cá, eci-fɔ́-ci léyi ɛnnyɔnwrɔn tɔ̀n ke bɩ ke gbro dùdu sɔ́n bɔasɛ ɛnrì mɛ̀n, ô tata lɔ kɛ cɔ́ ɛfɔ́-yri.”

Esù-gbàtà cɛ

²² Zhezü ke ci anmàn cüìcüì hɔ̀n mán anmàn cɛ hɔ̀n kɩ ke yé yɔ ankà hɔ́n Zherüzalɛmɛ̀n anmàn.

²³ Ɔwrɔn tɔ̀n ke yrɛ nɛ̀n le: “Ankà-yé-wrɔn, anwrɔn ẅiɛ tɛ̀kɩ kɛ lɛ cɔ́ ebɩ̀die hɛ̀?” Zhezü mrɛ́n yɔ ɔmùan le:

²⁴ “Nyɛ́n hán kekremɛ̀n ô, nyɛ́n ci angbàtà cɛ lɔ, ɔmuhi, mɛ dɔ́ nyɛ̀n annànwɔrɛ mɛ̀n le, anwrɔn bobrebe ke le ji angbàtà cɛ mɛ̀n cì, kɩ ye sɩ̀ cɔ́ hɩ kɔrɛ̀levri lɔ.

²⁵ Ɛnvra léyi ɔwɔn-nɛ́n-zi ke le tɔhú, hɩ kɛ lɛ sɛ́n esù safɛ̀ mɛ̀n nɔn, nyɛ́n le cüe ɛntrɛa, kɩ nyɛ́n le bukru nyɛ́n gɔ́n esù ɛkɔrɛ̀ ô nyɛ́n dɔ̀ le: ‘Ankà-yé-wrɔn, srú bɔ̀ esù.’ Nɛ lɛ mrɛ́n nyɛ̀n ɔmùan le: ‘Mɛ̀n sɩ̀ nyrì ɛyri léyi nyɛ́n dù nɔn!’

²⁶ Zɛtɛn, nyɛ lɛ dɔ́ nɛ̀n le: ‘Bɔ́ mán vɛ́n mɛhi, bɔ̀ zî ɛci, bɔ̀ mi ɛnshi, è yé ankà bɔ́ anmàn drɛnmɔɛ́n mɛ̀n’

²⁷ Ne le vru nɛ̀n dɔ́ nyɛ̀n le: ‘Mɛ̀n sì nyrì ɛyri léyi nyɛ́n dù nɔn. Nyɛ́n tú cɔhɔ́ mɛ̀n ɛtɛ̀sɛ̀n, nyɛ́n lɔ fɛn léyi nyɛ́n hán eci gbangbàn nɔn!’

²⁸ Nanvrɛn lɔ de, nyɛ lɛ wú eyú, nyɛ lɛ rá ɛnyî, ɛnvra léyi nyɛ lɛ kán Abrahamɛ̀n, Izaakɛ̀n, Zhakɔbɛ̀n mán Ɔwɔ-mùanwú-ankà-dɔ́-bɔ̀ lɔ fɛn Anhobɩ́ Nɛ̀ncüì-dúyri, kɩ zɛtɛn yɛ lɛ kɔ́n nyɛ̀n cüe ɛntrɛà!

²⁹ Anwrɔn ke le dú ezì mán ɛmɛẅi, owú mán ecüe mɛ̀n kɛ lɛ và, ke le bɩ́ ɛyri Anhobɩ́ Nɛ̀ncüì-dúyri tɛbrɛ̀ wú.

³⁰ Kɩ zɛtɛn, anwrɔn janbɔ̀ léyi, zɛtɛ̀ lɔ dú ɛmɛẅi-trɔ-bɔ̀ nɔn, kɛ lɛ srɔ kpàkpà-bɔ̀ kɩ ndɔ hɔ̀n léyi dú kpàkpà-bɔ̀ nɔn, kɛ lɛ srɔ ɛmɛẅítrɔ-bɔ̀.”

Zhezü mán Zherüzalɛmɛ̀n

³¹ Hɩ vra lɔ Ɔwɔ-nyanmàn-sùva-wá-bɔ̀ zri zri sɔnba Zhezü ɛtɛsɛ̀n kɩ kɛ dɔ́ nɛ̀n le: “Cɔhɔ́ ɛnu lɔ, hɔ̀n ɛyri nyantɛn, ɔmuhi Herɔdɛ̀n ke ji mɛ́n ewri-yri nɔn.”

³² Zhezü kɛ dɔ́ yɔ le: “Nyɛ́n hɔ̀n nyɛ́n dɔ́ kpekpe vɛ́n ndɔ lɔ le: ‘Mɛ wrɔ́ anhɛ́n gbàngbàn kɩ mɛ kɔrɛ ɛnlɔẅiɛ-bɔ̀ ɛnyɔncì mán ɛnɛ́n, kɩ̀ ɛbi anhɔn-bì lɔ, mɛ trɔ m'ɔkɔ̀hɔ̀n-hán.

³³ Tɛ́n, ke ji le, mɛ̀n bɩ́ m'ɛnlevri ɛnyɔncì lɔ, ɛnɛ́n, mán ɛnɛ́n mɛẅi, ɔmuhi, ke sɩ̀ zrɔ̀ tàn le, Ɔwɔ-mùanwú-ankà-dɔ́-wrɔn kè wú ɛyri nyantɛn, ke dú kɛ kè sɩ̀ dù Zherüzalɛmɛ̀n anmàn.

³⁴ Zherüzalɛmɛ̀n, Zherüzalɛmɛ̀n, vɛ́n léyi, e dí Ɔwɔ-muànwú-ankà-dɔ́-bɔ̀ owúemɛ̀n kɩ e wri ɛbùemɛ̀n yɔ hɔ̀n léyi, Ɔwɔ ke yüre mɛ́n nɔn! Andɛ̀n ɛbɛ de mɛ̀n ji le mɛ bɔrɛ v'ɛẅì hɔ̀n ɛkru m'ɛtɛsɛ̀n, kɛ hán ɔmu le ɔkɔ̀sɔ̀-nɛ́n-muan kɛ bɔrɛ n'ɛẅì hɔ̀n ɛkru n'ɛtuvà-kɔrɛ̀ krubgɛ̀n, tɛ́n nyɛ́n, nyɛ́n sɩ̀ shrìɛ!

³⁵ Zɛtɛn, ny'ɔwɔn lɔ ye le teze nɛ̀n. Mɛ dɔ́ nyɛ̀n le: nyɛ́n sɩ̀ vru kán mɛ̀n hàn kɩ, kɛ lɛ cɔ́ ɛnvra léyi nyɛ lɛ dɔ̀ le: Ɔwɔ ke fú ɔwrɔn léyi kɛ và nɔn ɛnshi, Ɛẅɛnwrɔn bɩ́mɛ̀n!’ ”