Kpàkpà timote 5 - Ɛmɛẅi ankà ankrànkràn 2003

Eci-hán ɔmùan-zri-di-bɔ̀ tɛ̀sɛ̀n

¹ E bɩ́ dɔ́ ebrè-di ankà ɛ tán nɛ̀ngbànvri-wrɔn, tɛ́n ɛ̀ yɩ́ nɛ̀n edù ankà-dɔ́ mɛ̀n kɛ̀ hán le e zi hɔ́. È hán sùgban-bɔ̀ hɔ̀n eci kɛ̀ hán le ɔmuan-ẅì hɔ̀n hɔ́,

² wúyɔ̀ cüìcüì hɔ̀n kɛ̀ hán le ɔmuan hɔ̀n hɔ́, mán sùgban wúyɔ̀ hɔ̀n kɛ̀ hán le ɔmuan-ẅì hɔ̀n wúyɔ̀ hɔ́, eci-hán fifiemɛ̀n.

³ Ɛ̀ wá ɛngrɔn wúyɔ̀ hɔ̀n esùva ɛwá mɛ̀n, yɔ hɔ̀n léyi annànwɔrɛ mɛ̀n kè sɩ̀ ẅɛn anwrɔn nɔn.

⁴ Tɛ́n ke dú kɛ ɛngrɔn-hi tɔ̀n ẅɛn ɛẅì hɔ̀n mán nɛ́n nán-ẅì hɔ̀n, ke ji le ɛẅì hɔ̀n lɔ kɛ̀ ván y'ankaẅìbùtan ẅɛ̀n hɛ́n kɛ̀ tán yɔ dùku y'ɛmɛ̀n-bɔ̀, kè dú ɛnvrakpà ci-hán, yakɛ yɔ tán yɔ eci léyi dú y'ɛkɔrɛ̀-wá ci nɔn. Nyàn eci léyi kɛ cüɛn Ɔwɔ ɛvɛ̀ nɔn.

⁵ Ɛngrɔn-hi léyi annanwɔrɛ mɛ̀n lɔ, dú nɛ́n zri, kè sɩ̀ ẅɛ̀n ɔwrɔn zriɛmɛ́n hɩ ká wá nɛ̀n esùva nɔn, bɩ́ n'esɛ́ wá Ɔwɔ mɛ̀n; ɛnnyran mán ɛcɛ̀n nɛ sɛ́n Ɔwɔ, ô kɛ̀ wá nɛ̀n ɛkɔrɛ̀.

⁶ Tɛ́n ɛngrɔn-hi léyi n'ankàtro dú ɔkoran wú nɔn, nɛ́n wù kɩ nɛ̀n yɛ́, ke dú kɛ nɛ́n kɔrɛ̀ nɛ̀n yɛ́ mán.

⁷ Nyàn ankà léyi ke ji le è kore yɔ, ô ye bɩ́ cɔ́ eci-gbàngbàn zriɛmɛ́n y'ɔwú.

⁸ Ke dú kɛ ɔwrɔn tɔ̀n, ke sɩ́ wá n'ɛmɛ̀n-wrɔn esùva, annànnàn le nɛ́n dùku n'ɛmɛ̀n-bɔ̀, nɛ frɛ́n n'ankaẅì-bùtan kɩ, nɛ̀n krɛfɔn nɛ̀n vrán ɔwrɔn tɔ̀n léyi kè sɩ̀ ẅɛ̀n ankaẅì-bùtan nɔn.

⁹ Ke dú kɛ ɛngrɔn-hi ke ji kɛ wá n'ebi owrúemɛ̀n, ô kɛ̀ hán Ɔwɔ kɔ̀hɔ̀n, ke ji le ke sɩ̀ zrɔ̀a mán nɛ̀n ẅɛn ɛnnànwàn kru ɛkoẅi anhɔ̀n. Zɛtɛn ke ji le nɛ̀n di ɛngrɔn ɛdɛ̀n zri,

¹⁰ ô ye nyri n'ɛci ankrànkràn hɔ̀n léyi nɛ̀n hán nɔn, mán ɔmu le nɛ̀n hán nɛ̀n wɔrɔ n'ɛẅì hɔ̀n, nɛ̀n nyrì ẅɛn nɛ̀nnyàn-bɔ̀, nɛ̀n jru ankaẅì-bùtan-ẅɛn-bɔ̀ annan, nɛ̀n wá ɛmian bɔ̀ ɛkɔrɛ̀, ô nɛ̀n hán ɛci anvrɛnvrɛn mɛ̀ntɛ mɛ̀ntɛ hɔ̀n.

¹¹ Ɛngrɔn-wúyɔ̀ hɔ̀n léyi dú sùgban wúyɔ̀ nɔn, ke sɩ́ ji le ɛ wá yɔ ebi owrúemɛ̀n; ɔmuhi ɛnvra léyi yɔ wúcɔ̀-yirì ankàtro kɛ vá yɔ ɛnkruemɛ̀n nɔn, yɔ sɩ̀ vru nyan Krisì ezì hɛ̀,

¹² kɩ ɔmu lɔ de yɔ bru ɛgbàn mɛ̀n ɛnvra léyi yɔ teze yɔ kpàkpà mùan-wá Ɔwɔ tɛ̀sɛ̀n nɔn.

¹³ Kɩ ɛnvra léyi yɔ sɩ̀ vrù ẅɛ̀n eci zriɛmɛ́n hán nɔn, yɔ ẅɛn eci-hán wrù kɩ yɔ ci ebɩ́-bɩ́; tɛ́n eci léyi zeze krɛgbàn nɔn, yɔ srɔ ɛdrɛ́ wúyɔ̀ kɩ yɔ dɔ́ ankà lɔ fɛn, yɔ dɔ́ ankà léyi ke sɩ́ crɛ nyan yɔ nɔn.

¹⁴ Hɩ le kruhú de me ji le ɛngrɔn-wúyɔ̀ léyi dú sùgban wúyɔ̀ nɔn, kè vru kè yiri wúcɔ̀, yɔ bî ɛẅì, ô yɔ nyrì ẅɛn y'eyiri-bɩ́, ô yɔ bɩ́ tán bɔ́ ɛgbri-bɔ̀ ɛkɔrɛ̀levri kɛ dɔ́ ankà-gbàn ke kú bɔ̀ ɛwú.

¹⁵ Ɔmuhi ɛngrɔn-wúyɔ̀ janbɔ̀ cɔhɔ́ Ɔwɔ levri ô kɛ kɛ́n Anwa-wrɔn ɛsɛ̀n.

¹⁶ Tɛ́n ke dú kɛ ankaẅìbùtan-hi tɔ̀n ẅɛn ɛngrɔn-wúyɔ̀ dú n'ɛmɛ̀n lɔ mɛ̀n, ke ji le nɛ̀n wá yɔ esùva, ô yɔ bɩ́ srɔ Ɔwɔ-fɛcüè lowru, ô Ɔwɔ-fɛcüè mán kɛ̀ cɔ́ ɛyri kɛ̀ wá ɛngrɔn-wúyɔ̀ hɔ̀n léyi kè sɩ̀ ẅɛ̀n anwrɔn annànwɔrɛ mɛ̀n nɔn, ɛkɔrɛ̀.

¹⁷ Ɛcüìcüì-bɔ̀ léyi kɛ nyrɔn Ɔwɔ-fɛcüè lɔ nɔn, zrɔ tán le y'ɔwɔ̀ɛn-dì lɔ kɛ̀ hɔ́n ɛwú, anannan le yɔ hɔ̀n léyi kɛ dɔ̀, kɩ ke yé Ɔwɔ ankà nɔn.

¹⁸ Annanwɔrɛ mɛ̀n lɔ, Owrú kɛ dɔ̀ le: “Ɛnnànman léyi kɛ hán ɔkɔhɔ̀n ankɛ̀tɛ mɛ̀n nɔn, ye bɩ́ kora nɛ̀n ɔmùan”, kɩ: “Ɔkɔhɔ̀n hán-wrɔn ẅɛn ɔwɔ̀ɛn-di kɔrɛ̀levri.”

¹⁹ E bɩ́ shri ankà-gbàn tɔ̀n léyi yɛ lɛ dɔ̀ ku ecüìcüì-wrɔn tɔ̀n ɛwú, ke dú kɛ ankà lɔ kè sɩ̀ ẅɛ̀n dalɛfuɛdi-bɔ̀ anhyrɛ̀ mán anhɔ̀n.

²⁰ Ke dú kɛ ɔwrɔn tɔ̀n kɛ hán eci-gbàngbàn tɔ̀n, ɛ dɔ́ nɛ̀n ankà anwrɔn mɛ̀n, ô anwrɔn ndɔ lɔ mán kɛ ẅɛn ɛnjansù.

²¹ Mɛ sán mɛ́n eci-hán ndɔ lɔ Ɔwɔ zìwú ɔmùan-ɛwú-sɩ́emɛ̀n, Zhezü Krisì zìwú mán Ɔwɔ-kùyüre-bɔ̀ prɔnprɔn hɔ̀n zìwú: ɛ̀ wá eci-hán ndɔ léyi mɛ́n wá tán mɛ́n nɔn, ɛnyrɔnnan mɛ̀n, e bɩ́ hán eci kɛ vɛ́n ɔwrɔnwrɔn tɛ̀sɛ̀n.

²² E bɩ́ cüi edù, e di ɔwrɔn tɔ̀n ankɔrɛ̀ ɛwú, ô ɛ wá nɛ̀n ecüìcüì, Ɔwɔ-fɛcüè mɛ̀n. E bɩ́ bru anwrɔn nyantɛn hɔ̀n gbàn-hán lɔ mɛ̀n: è dú ɛfifiemɛ̀n.

²³ Ɛ̀ kɛ́n v'ɛnshi zri mì lɔ ɛ̀ hɛ́n, tɛ́n è bɩ́ ɛntàn wɔnsɛn ẅiɛ, ô kɛ̀ wá mɛ́n ɛkɔrɛ̀ ɛcizîemɛ̀n, ɔmuhi ɛnlɔẅiɛ kɛ dá mɛ́n frɛfrɛ nɔn.

²⁴ Anwrɔn janbɔ̀ gbàn, yɛ kán kpetee yakɛ ye ci yɔ ɛmrɛ̀n; tɛ́n anwrɔn nyantɛn hɔ̀n yri tɛn, ɛnvra kɛ vacì yakɛ yɔ kɔnbru.

²⁵ Ɛci ankrankran hán lɔ mán, yɔ mán yɛ kán yɔ kpetee, kɩ yɔ hɔ̀n léyi ye sɩ̀ gɔ̀ kàn mán nɔn, ke sɩ́ dú ɛban mɛ̀n.