Kpàkpà timote 3 - Ɛmɛẅi ankà ankrànkràn 2003

Ɔwɔ-fɛcüè cüìcüì-bɔ̀

¹ Nyàn ankà-dɔ̀ tɔ̀n léyi dú annanwɔrɛ nɔn: ke dú kɛ ɔwrɔn tɔ̀n ke ji kɛ̀ srɔ Ɔwɔ-fɛcüè-wrɔn cüìcüì hô, ne ji ɔkɔ̀hɔ̀n-hán ankrànkràn.

² Ke ji le Ɔwɔ-fɛcüè-wrɔn cüìcüì kè dú ɛnyrɔnnanwrɔn anvrɛnvrɛn, ɛnnyɔnwrɔn zri nɛ́n cüì, nɛ́n bɩ́ dú ɛntàn-kɔ́n-wrɔn, nɛ̀n ẅɛn ɛnkruemɛ̀n mán ɛwá, nɛ̀n nyrì ẅɛn nɛ̀nnyànwrɔn, ô nɛ̀n nyrì yé eci;

³ ke sɩ́ ji le nɛ̀n dú ɛntàn-mi-wrɔn mán eji-kɔ́n-wrɔn, tɛ́n nɛ̀n dú ɛnbɔrɛ-wɔ-wrɔn, ô nɛ̀n hán anwɔwɔ kɔhɔ̀n; ɔkùa ke bɩ́ dú n'ɛvɛ̀-cüɛn-ci;

⁴ nɛ̀n nyrì ẅɛn n'ɛmɛ̀n mɛ̀n bɔ̀, ô n'ɛẅì hɔ̀n kɛ̀ ẅɛn n'ɛwá eci lɔ fɛn mɛ̀n.

⁵ Annànwɔrɛ mɛ̀n lɔ, ke dú kɛ ɔwrɔn tɔ̀n ke sɩ́ nyri ẅɛn n'ɛmɛ̀n mɛ̀n bɔ̀ anvrɛnvrɛn, anhɔntan de nɛ lɛ hán, ô nɛ̀n nyrì ẅɛn Ɔwɔ-fɛcüè nɛ́n?

⁶ Ke sɩ́ ji le nɛ̀n dú ɔwrɔn wrù Ɔwɔ-fɛcüè mɛ̀n; ke dú ɔmu lɔ hô, nɛ lɛ hán tutre ci, kɩ ɔtrɔmɛ̀n lɔ, yɛ lɛ bɔ́ nɛ̀n nwù kɛ lɛ hán anwawrɔn hɔ́.

⁷ Ke vru ke ji le nɛ̀n ẅɛn ɛwá anwrɔn hɔ̀n léyi ke sɩ̀ dù Krisì-sɛnkɛn-bɔ̀ nɔn y'ɛtɛ̀sɛ̀n, ô yɔ bɩ́ ẅɛn n'egbrì, ô nɛ́n bɩ́ bru anwawrɔn tanwrɔn lɔ mɛ̀n.

Ɔwɔ-fɛcüè ci-dɛ́-bɔ̀

⁸ Ke ji le Ɔwɔ-fɛcüè ci-dɛ́-bɔ̀ mán kɛ̀ ẅɛn ɛwá mán ankà annanwɔrɛ dɔ̀; ke sɩ́ ji le yɔ mi ɛntàn kè fɛ ɛwú, ô yɔ ji ɔkùa ɛfrɛ́n mɛ̀n;

⁹ Ankaẅìbùtan annanwɔrɛ léyi dú Krisì mɛ̀n nɔn, yɔ ẅɛn nɛ̀n yɔ hɛ́n wàwúyɛ fifiemɛ̀n.

¹⁰ Ke ji le yɛ wɔɛn yɔ yɛ nyan; zɛtɛn, ke dú kɛ ye sɩ̀ cɔ̀ eci gbàngbàn zriɛmɛ́n y'ɛwú, ɛkɔrɛ̀levri dù yɔ lɛ hán Ɔwɔ-fɛcüè ci-dɛ́-bɔ̀ kɔ̀hɔ̀n.

¹¹ Yɔ wúyɔ̀ mán ke ji le kɛ̀ ẅɛn ɛwá; ô ke bɩ́ hán ankà-sɩ́ kɔ̀hɔ̀n; yɔ bɩ́ zî ɛci cüì, ô eci lɔ fɛn mɛ̀n lɔ yɔ di ɔmùanzri.

¹² Ke ji le Ɔwɔ-fɛcüe ci-dɛ́-wrɔn kè dú ɛnnyɔnwrɔn zri nɛ́n cüì, ô nɛ̀n nyrì ẅɛn n'ɛẅì hɔ̀n mán n'ɛmɛ̀n mɛ̀n bɔ̀ lɔ fɛn.

¹³ Ɔwɔ-fɛcüè ci-dɛ́-bɔ̀ léyi kɛ hán y'ɔkɔ̀hɔ̀n anvrɛnvrɛn nɔn, yɔ ẅɛn ɛmrɛ́n anwrɔn lɔ fɛn zìwú kɩ ɛkɔrɛ̀levri dù, yɔ lɛ dɔ́ ankaẅìbùtan léyi kɛ bɔsɔ́ bɔ́ mán Zhezü Krisì mɛhi nɔn yi ankà, esɛ́ mɛ̀n.

Ankà-bán-ankà vri lɔ

¹⁴ Me merɛ́n mɛ́n owrú ndɔ lɔ, kɩ mɛ̀n ẅɛn esɛ́ le, mɛ lɛ và kán mɛ́n ɛnvra bruemɛ̀n.

¹⁵ Tɛ́n, ke dú kɛ m'ɛvà lɔ kɛ mɔ̀ɛn hô, ɛwrú-ẅì ndɔ hɔ̀n lɔ ke le yé mɛ́n esù léyi ke ji le ɛ̀ nán Ɔwɔ mɛ̀n lɔ mɛ̀n nɔn, hɩ mɛ̀n kɛ dɔ̀ le Wɔ Fɛcüè kɔrɛkɔrɛ léyi dú ɔwɔn-hi-nan-bù, hɩ kɛ ẅɛn ankaẅì annanwɔrɛ hɛ́n nɔn.

¹⁶ Hɛ̀ɛ̀, ye sɩ̀ wrɔ́n anmanta rɔ́, nɛ̀n sevri ankà-bán-ankà léyi b'ankaẅì-bùtan ke yé nɔn! Krisì léyi srɔ, ndù hán ɔwrɔnẅì hɔ́ nɔn, Ɛnhɛ́n Prɔnprɔn yé le, nɛ̀n dú ɛnyrɔnnan-wrɔn kɩ Ɔwɔ-kùyüre-bɔ̀ cüe nɛ̀n ankɔrɛ̀ ezìwúɛ. Yɛ dɔ́ n'ankà ɛnhi wú anmàn hɔ̀n lɔ fɛn, bobrebe bú n'ankà tán ankaẅì ɛnhibù wú, ye sɩ́ nɛ̀n ɛwú anhobɩ́ ci-zrɔ lɔ mɛ̀n.