Ebre-bɔ̀ 7 - Ɛmɛẅi ankà ankrànkràn 2003

Mɛlkisedɛkɛ̀n dú ɛnnɛ̀ncüì mán Ɔwɔ-cice-wrɔn cüìcüì

¹ Mɛlkisedɛkɛ̀n ndɔ lɔ, nɛ̀n dú Salɛmɛ̀n nɛncüì mán Ɔwɔ léyi dú ɛwúhɛ́n nɔn n'ecice-wrɔn. Ɛnvra léyi Abrahamɛ̀n dú anhà-kɔ́n-yri kɛ và, hɩ nɛ́n kɔ̀n ká ɛnnɛ̀ncüì hɔ̀n lɔ nɔn, Mɛlkisedɛkɛ̀n hɔ́n nɛ̀n esù kɩ fú nɛ̀n ɛnshi.

² Anhà mɛ̀n ci hɔ́n lɔ fɛn léyi Abrahamɛ̀n ncɔ̀ nɔn, nɛ̀n tán Mɛlkisedɛkɛ̀n n'ɛvámɛ̀n tɛn lɔ. Mɛlkisedɛkɛ̀n bi lɔ, n'ɛmɛ̀n kɛ dɔ̀ le “Ɛnyrɔnnan-nɛ̀ncüì”; nɛ̀n vru nɛ̀n dú Salɛmɛ̀n nɛ̀ncüì mán, n'ɛmɛ̀n kɛ dɔ̀ le “Anwɔwɔ nɛ̀ncüì”.

³ Ye sɩ̀ nyrì nɛ́n zi, nɛ́n muan, nɛ́n nancüì zriɛmɛ́n; Ɛyri zriɛmɛ́n ye sɩ́ dɔ́ n'ebî mán n'owú ankà. Nɛ́n dù nɛ̀n cá Ɔwɔ Ẅì: nɛ̀n dú Ɔwɔ cice-wrɔn ɛnvra lɔ fɛn mɛ̀n.

⁴ Nyɛ́n nyan ɔmu le nɛ̀n sevri nɔn! Abrahamɛ̀n bɔ́ nancüì tán nɛ̀n n'anhà-kɔ̀nká-ci lɔ, n'ɛvámɛ̀n tɛn.

⁵ Tɛ́n, anwrɔn hɔ̀n léyi dú Levi mɛẅi-bɔ̀ hɩ dú Ɔwɔ cice-bɔ̀ nɔn, ẅɛn ɛkɔrɛ̀levri ɛnyanmàn wú lɔ, yɔ sán Izraɛlɛ̀n fɛcüè lɔ fɛn ɛvámɛ̀n-ci, hɩ mɛ̀n kɛ dɔ̀ le, yɔ dùku yɔ muan-ẅì hɔ̀n léyi yɔ dùku mán yɔ dú Abrahamɛ̀n mɛẅi bɔ̀ nɔn kɛ̀ tán yɔ ɛci.

⁶ Mɛlkisedɛkɛ̀n kè sɩ̀ dù Levi mɛẅi-wrɔn, tɛ́n nɛ̀n cɔ́ Abrahamɛ̀n tamɛ̀n, ɛvámɛ̀n-ci léyi Abrahamɛ̀n ncɔ̀ nɔn; kɩ Mɛlkisedɛkɛ̀n fú ɔwrɔn léyi cɔ́ Ɔwɔ mùan-wá-ci lɔ nɔn ɛnshi.

⁷ Tɛ́n, ɛzɛ̀n bàdà nɛ̀n ɛmɛ̀n, ɔwrɔn léyi ke fú ɛnshi nɔn, nɛ̀n vrán ɔwrɔn léyi cɔ́ ɛnshifù nɔn.

⁸ Levi mɛẅi bɔ̀ hɔ̀n léyi kɛ cɔ́ ɛvámɛ̀n-ci lɔ nɔn, dú owú-bɔ̀; tɛ́n Mɛlkisedɛkɛ̀n wú ankà lɔ, ɛvámɛ̀n-ci ndɔ lɔ srɔ ɔwrɔn tɔ̀n léyi dú ankɔrɛkɔrɛ mɛ̀n nɔn tɛn, hán ɔmu le Owrú kɛ dɔ̀ nɔn.

⁹ Ɔtrɔ mɛ̀n lɔ, yɛ lɛ dɔ́ ankà ndɔ lɔ tɛ̀: ɛnvra léyi Abrahamɛ̀n tán n'ɛvá mɛ̀n ci lɔ nɔn, Levi mán tán, nɛ́n léyi n'ɛmɛẅi-bɔ̀ kɛ cɔ́ ɛvá mɛ̀n ci lɔ fɛn nɔn.

¹⁰ Ɔmuhi yɛ vá bî Levi kɩ nɛ̀n dú ankɔrɛkɔrɛ mɛ̀n, nɛ́n nancüì Abrahamɛ̀n krɛ̀ mɛ̀n, ɛnvra léyi Mɛlkisedɛkɛ̀n hɔ́n Abrahamɛ̀n ɛsù nɔn.

¹¹ Ɔwɔ cice-kɔhɔ̀n léyi dú Levi mɛ̀n mɛ̀n-bɔ̀ tɛn nɔn, dú Izraɛlɛ̀n fɛcüè nyanmàn léyi Ɔwɔ tán nɔn, mɛ̀n. Tɛ́n kè dú kɛ Ɔwɔ-cice-bɔ̀ léyi dú Levi mɛ̀n mɛ̀n-bɔ̀ nɔn, kɛ̀ hán ɔkɔ̀hɔ̀n fifi hô, Ɔwɔ cice-wrɔn nyantɛn ke sɩ̀ srɔ Mɛlkisedɛkɛ̀n dùci-hán lɔ mɛ̀n, kɩ eci zri lɔ ke sɩ̀ dú Arɔn dùci-hán.

¹² Ɔmuhi, ɛnvra léyi Ɔwɔ-cice kɔ̀hɔ̀n lɔ crɔn nɔn, ke ji le yɛ crɔn ɛnyanmàn mán.

¹³ Kɩ bɔ́ Ɛẅɛnwrɔn léyi ankà-dɔ̀ ndɔ hɔ̀n lɔ kɛ zɛ́n ɛnsrì nɔn, dú ɛmɛ̀n nyantɛn mɛ̀n wrɔn léyi n'ɔwrɔn zriɛmɛ́n kɛ vá hán Ɔwɔ-cice kɔ̀hɔ̀n mrìmrì ecice tɛbrɛ̀ wú nɔn.

¹⁴ Ebîemɛ̀n lɔ, ye nyri ɔmu le nɛ̀n dú Zhüda mɛ̀n lɔ mɛ̀n, kɩ Mohizì kè sɩ̀ dɔ̀ ankà zriɛmɛ́n ɛnvra léyi nɛ̀n dɔ́ Ɔwɔ-cice-bɔ̀ ankà nɔn.

Ɔwɔ cice-wrɔn nyantɛn tɔ̀n léyi ndù cá Mɛlkisedɛkɛ̀n nɔn

¹⁵ Nyàn eci-hán tɔ̀n léyi kɛ san yé le, ankà ndɔ lɔ dú annanwɔrɛ nɔn: Ɔwɔ cice-wrɔn nyantɛn léyi srɔ nɔn, ndú cá Mɛlkisedɛkɛ̀n hɔ́.

¹⁶ Nɛ̀n sɩ̀ srɔ Ɔwɔ-cice-wrɔn ɔwrɔnẅì nyanmàn ci-hán lɔ mɛ̀n; nɛ̀n srɔ Ɔwɔ-cice-wrɔn ɛkɔrɛ̀srɔn wúvà léyi kè sɩ̀ ẅɛ̀n ɔtrɔ nɔn mɛ̀n.

¹⁷ Annanwɔrɛ mɛ̀n lɔ, Owrú Prɔnprɔn kɛ dɔ́ ɔmu lɔ: “E le dú Ɔwɔ cice-wrɔn ɛnvra lɔ fɛn Mɛlkisedɛkɛ̀n dùci-hán lɔ mɛ̀n.”

¹⁸ Ɔmu lɔ de, ɛnyànmàn gbanvri lɔ ye gbú nɛ̀n yɛ sɔhɔ́ ɔmuhi ecüì bàda nɛ̀n edomɛ̀n, kɩ nɛ̀n dú eci woro nɔn.

¹⁹ Annanwɔrɛ mɛ̀n lɔ Mohizì nyanmàn kè sɩ̀ sɩ̀ eci wrù zriɛmɛ́n ɛzrɔmɛ̀n. Tɛ́n yɛ tán bɔ̀ esɛ́ ankrànkràn tɔ̀n kɩ, esɛ́ ndɔ lɔ, n'ɛkruhú bɔ́ lɛ sɔ̀nba Ɔwɔ ɛtɛ̀sɛ̀n tɛ̀.

²⁰ Kɩ Ɔwɔ-mùan-wá ndù. Anwrɔn nyantɛn hɔ̀n srɔ Ɔwɔ cice-bɔ̀ kɩ kè sɩ̀ dù ɔmùan-wá ndɔ lɔ mɛ̀n.

²¹ Tɛ́n, Zhezü tɛn, yɛ srɔ nɛ̀n Ɔwɔ cice-wrɔn ɔmùan-wá tɔ̀n mɛ̀n, ɛnvra léyi Ɔwɔ dɔ́ nɛ̀n le: “Ɛẅɛnwrɔn tán ndayì, kɩ nɛ́n sɩ̀ crɔn ɔmùan: ‘È dú Ɔwɔ cice-wrɔn ɛnvra lɔ fɛn.’ ”

²² Ɔmu lɔ de, Zhezü mán dú ɔwrɔn léyi wá bɔ̀ mìrɛ̀n ankrànkràn ɔmùan nɔn.

²³ Eci vɛ́n tɔ̀n fɛ ɛwú dú ɛmɛ̀n: Ɔwɔ cice-bɔ̀ nyantɛn hɔ̀n lɔ yɔ cüɛn, ɔmuhi owù kè sɩ̀ tán yɔ ɛkɔrɛ̀levri yɔ hàn y'ɔkɔ̀hɔ̀n nɔn.

²⁴ Tɛ́n Zhezü dú ɛwúvà mɛ̀n ɛnvra lɔ fɛn, kɩ n'Ɔwɔ-cice kɔ̀hɔ̀n kè sɩ̀ ẅɛ̀n ɛnkrutrɔ.

²⁵ Hɩ le kruhú de anwrɔn hɔ̀n léyi kɛ sɔnbá Ɔwɔ ɛtɛ̀sɛ̀n n'ebɩmɛ̀n nɔn, ne le bɩ́ yɔ tɛ̀ nɛ̀n die brɛzri, ɔmuhi nɛ̀n dú ɛnvra lɔ fɛn ankɔrɛkɔrɛ mɛ̀n, ô nɛ̀n sɛ́n Ɔwɔ nɛ̀n tán yɔ nɔn.

²⁶ Zhezü dú Ɔwɔ cice-wrɔn cüìcüì léyi ke ji le bɔ̀ ẅɛ̀n nɔn. Nɛ̀n dú prɔnprɔn, nɛ̀n sɩ̀ dù ɛnbramɛ̀n, ɛgbàn bàdá nɛ̀n edomɛ̀n; yɛ mrɛ́n nɛ̀n ɛgbàn-hán-bɔ̀ mɛ̀n yɛ sɔhɔ́ kɩ ye sɩ́ nɛ̀n anhobɩ́ ɛwúhɛ́n;

²⁷ Nɛ̀n sɩ̀ dù kɛ̀ hàn Ɔwɔ cice-bɔ̀ cüìcüì hɔ̀n nyantɛn ndɔ hɔ̀n lɔ hɔ́: nɛ̀n sɩ̀ ẅɛ̀n ecice kɔ̀hɔ̀n hán ɛnbì lɔ fɛn, hɩ ká dú nɛ́n dùku n'ɛgbàn mán fɛcüè gbàn kruhú nɔn. Ɛnvra léyi nɛ̀n bɩ́ n'edomɛ̀n nɛ̀n ce eci nɔn, ecice dɛ̀n zri ndɔ lɔ, dú ɛnvra lɔ fɛn cice.

²⁸ Mohizì nyanmàn lɔ kɛ wá ecice-bɔ̀ cüìcüì anwrɔn hɔ̀n léyi kè sɩ̀ krɔ̀n kpehɛ́n nɔn; tɛ́n Ɔwɔ-mùan-wá-ankà-dɔ̀ léyi yɛ dɔ́ ɛnyànmàn mɛẅi nɔn kɛ wá Ɔwɔ-cice-wrɔn cüìcüì, Ɔwɔ Ẅì léyi ye sɩ́ ɛwú ɛzrɔ krutrɔ mɛ̀n ɛnvra lɔ fɛn nɔn.