Ebre-bɔ̀ 2 - Ɛmɛẅi ankà ankrànkràn 2003

Ɛnkrukɔrɛ̀ vri tɔ̀n

¹ Hɩ le kruhú de ke ji le ankà hɔ̀n léyi bɔ̀ yá nɔn, bɔ̀ ẅɛ̀n bɔ̀ hɛ́n ɛshishiemɛ̀n, ô bɔ́ bɩ́ hɔ́n bɔ́ ɛzrɛ́n mɛ̀n.

² Ɛmɛẅi ankà-dɔ̀ léyi bɔ̀ cɔ́ Ɔwɔ kùyüre-bɔ̀ tamɛ̀n ɛnbiɛhɛ́n vra lɔ nɔn, yé bɔ̀ nɛ́n vɔ̀nshɛ́, kɩ ɔwrɔn totɔtɔ̀n léyi kè sɩ̀ bɩ n'ankà, kɩ kè sɩ̀ ẅɛ̀n n'ɛwá nɔn, cɔ́ ɛgbàn wɔ̀ɛn-dì léyi vɛ́n nɛ̀n nɔn.

³ Zɛtɛn, anhɔntan de bɔ́ lɛ hán, ô bɔ́ bɩ́ cɔ́ ɛgbàn wɔ̀ɛn-dì, ke dú kɛ bɔ́ sɩ́ wá ɛnkrukɔrɛ̀ ndɔ lɔ n'ankà ɛnkruemɛ̀n nɛ́n? Ɛẅɛnwrɔn dùku dú ɛnvrakpà wrɔn dɔ́ n'ankà, zɛtɛn anwrɔn hɔ̀n léyi yá Ɛẅɛnwrɔn ɔmùan nɔn, dɔ́ nɛ́n vɔ̀nshɛ́-ẅɛn-ankà.

⁴ Ɛnvra zri lɔ, Ɔwɔ tán yɔ dalɛfuɛ-dì lɔ ecüì, kɩ hán eci woroanci mán anvɛmɛ̀n-frɛ́nci mɛ̀ntɛ mɛ̀ntɛ, ɔmu zri lɔ nɛ̀n dɛ́ Ɛnhɛ́n Prɔnprɔn cice lɔ, hán ɔmu le nɛ́n cüɛ̀n nɔn hɔ́.

Ɔwrɔn léyi kɛ nyrɔn anwrɔnẅì sɩ́ ɛnkrukɔrɛ̀ mɛ̀n nɔn

⁵ Annanwɔrɛ mɛ̀n lɔ, kè sɩ̀ dù Ɔwɔ kùyüre-bɔ̀ tamɛ̀n de Ɔwɔ kɛ̀ wà ɛnhibù wrù léyi kɛ lɛ và, hɩ bɔ́ dɔ́ n'ankà nɔn.

⁶ Tɛ́n Owrú Prɔnprɔn ankà-dɔ̀ lɔ mɛ̀n ɔwrɔn tɔ̀n ndɔ̀ le: “Ô Ɔwɔ, ecitan dú ɔwrɔnẅì, kɛ́ɛ́ ɛ ẅɛn n'ankàtro hɛ̀? Ecitan dú ɔwrɔnẅì, kɛ́ɛ́ ɛ hɔ́n n'ankà mɛ̀n hàn?

⁷ Ɛnvra cá mɛ̀n, ɛ̀ hán nɛ̀n, nɛ̀n dú Ɔwɔ kùyüre-bɔ̀ ɛnhi, ɛ̀ tán nɛ̀n eci-zrɔ mán ɛmrɛ́n,

⁸ è cüe nɛ̀n eci lɔ fɛn annantrɛ̀ mɛ̀n hán.” Ke dú kɛ Ɔwɔ bɩ́ eci lɔ fɛn wá ɔwrɔnẅì kɔrɛ̀levri wú, ndɔ lɔ n'ɛmɛ̀n kɛ dɔ̀ le, nɛ̀n sɩ̀ tezè eci ẅì zriɛmɛ́n léyi ke sɩ̀ dú ɔwrɔnẅì kɔrɛ̀levri wú nɔn. Ɔmu tɛ̀kɩ, bɔ́ sɩ́ kán ɔmu le zɛtɛ̀ lɔ eci lɔ fɛn ke dú ɔwrɔnẅì kɔrɛ̀levri wú nɔn.

⁹ Tɛ́n bɔ́ kán ndɔ lɔ: ɛnvra cá mɛ̀n Zhezü dú Ɔwɔ kùyüre-bɔ̀ ɛnhi, ô Ɔwɔ nboafɔ̀n lɔ mɛ̀n, nɛ̀n wú anwrɔnẅì lɔ fɛn kruhú; kɩ bɔ́ kán nɛ̀n zɛtɛ̀ lɔ eci-zrɔ mán ɛmrɛ́n dú nɛ tɛn, owú-gbàn léyi nɛ́n kàn nɔn hɩ kruhú.

¹⁰ Annanwɔrɛ mɛ̀n lɔ, zrɔ tán le Ɔwɔ léyi hán kɩ ẅɛn eci lɔ fɛn nɔn, kè sɩ́ Zhezü ɛwú, nɛ̀n zrɔ kokrohoo ɛgbànkàn wanzi, ô kɛ̀ hán tán nɛ̀n bɩ́ ɛẅì bobrebe kè dú n'eci-zrɔ lɔ mɛ̀n. Ɔmuhi Zhezü dú ɔwrɔn léyi kɛ nyrɔn yɔ sɩ́ ɛnkrukɔrɛ̀ mɛ̀n nɔn.

¹¹ Tɛ́n, Zhezü léyi ke juru anwrɔnẅì ɛgbàn edomɛ̀n sɔhɔ́ mán anwrɔn hɔ̀n léyi ye fí edomɛ̀n nɔn, yɔ ẅɛn yɔ Zi zri. Hɩ le kruhú de Zhezü anvɛvrà ke sɩ́ ẅɛn hán, ɛnvra léyi ne bi yɔ nɛ́n muan-ẅì hɔ̀n nɔn.

¹² Annanwɔrɛ mɛ̀n lɔ nɛ dɔ̀ le: “Ô Ɔwɔ, me ji mɛ̀n dɔ́ v'ankà mɛ̀n tán nmàn-ẅì hɔ̀n, me ji mɛ̀n zrɔ mɛ́n eci fɛcüè lɔ fɛn zìwú.”

¹³ Nɛ̀n vru nɛ dɔ̀ le: “Me le bɩ́ m'esɛ́, mɛ̀n wá Ɔwɔ mɛ̀n.” Kɩ nɛ̀n vru nɛ dɔ̀ le: “Nyàn mɛ̀n mán ɛẅì hɔ̀n léyi Ɔwɔ tán mɛ̀n nɔn mɛhi.”

¹⁴ Ɔmuhi ɛẅì ndɔ hɔ̀n lɔ fɛn dú anẅia mán ɛnkrɛ̀ ci nɔn, Zhezü dùku mán ndù hán yɔ hɔ́, nɛ́n mán nɛ̀n dú y'ɔwrɔnẅì wúvà lɔ mɛ̀n. Ɔmu lɔ de n'owù lɔ mɛ̀n, anwawrɔn léyi ẅɛn owú kɔrɛ̀srɔn lɔ hɛ́n nɔn, nɛ̀n bɔyɛ yi nɛ̀n wá,

¹⁵ kɩ anwrɔn hɔ̀n léyi owù jansù srɔ anwɔ̀n bɔ̀ y'ɛwúvà lɔ fɛn mɛ̀n nɔn, nɛ̀n bɩ́ yɔ nɛ̀n die.

¹⁶ Annanwɔrɛ mɛ̀n lɔ, kè sɩ̀ dù Ɔwɔ kùyüre-bɔ̀ de nɛ́n wá ɛkɔrɛ̀ nɔn, tɛ́n Abrahamɛ̀n mɛẅi bɔ̀ de nɛ wá ɛkɔrɛ̀ nɔn.

¹⁷ Hɩ le kruhú de ke ji le nɛ̀n dù nɛ̀n cá nɛ́n muan-ẅì hɔ̀n eci lɔ fɛn mɛ̀n, ô nɛ̀n dú y'ecice-wrɔn cüìcüì léyi ɛcüɛ̀n yɩ́ ɛmɛ̀n, ke di ɔmùan zri Ɔwɔ ci-bɩ̀tan kɔ̀hɔ́n mɛ̀n, ô fɛcüè kɛ̀ cɔ́ ɛgbàn-bɩce.

¹⁸ Kɩ zɛtɛ̀ lɔ, anwrɔn hɔ̀n léyi dú ɔwɔ̀ɛn-nyan mɛ̀n nɔn, nɛ lɛ wá yɔ ɛkɔrɛ̀ tɛ̀, ɔmuhi nɛ́n mumù mán, nɛ̀n cí ɔwɔ̀ɛn-nyan mán ɛgbànkan mɛ̀n nɔn.