Ebre-bɔ̀ 13 - Ɛmɛẅi ankà ankrànkràn 2003

Ahɔntan bɔ́ lɛ hán, ô bɔ̀ cüɛn Ɔwɔ ɛvɛ̀

¹ Ɛnvra lɔ fɛn nyɛ́n dú ɛmɛ̀n nyɛ́n cüɛn ny'edomɛ̀n kɛ hán anwrɔn-nɛ́n-muan-ẅì hɔ̀n hɔ́.

² Nyɛ́n nyrì ẅɛn nɛ́nnyan-bɔ̀, esùva ke bɩ́ yru nyɛ̀n n'ɛhán mɛ̀n. Annanwɔrɛ mɛ̀n, eci lɔ n'ɛhán mɛ̀n lɔ, anwrɔn janbɔ̀ bɩ́ Ɔwɔ-kùyüre-bɔ̀ nɛ́nnyan-bɔ̀, kɩ yɔ sɩ̀ cɔ̀ yɔ nyrìɛn.

³ Nyɛ́n tro anwrɔn hɔ̀n léyi dú anwɔn-mɛ̀n-wá-wɔn mɛ̀n nɔn y'ankà, kɛ hán le yɔ mɛhi de nyɛ́n dú anwɔn-mɛ̀n-wá-wɔn mɛ̀n. Nyɛ́n tro anwrɔn hɔ̀n léyi yɛ hán ɛgbàn, ɔmuhɩ nyɛ́n mán ny'edùwru lɔ dú ɛgbànkan ci nɔn.

⁴ Eyirì mùan-wá lɔ, eyiri-bɔ̀ lɔ fɛn kɛ̀ ẅɛn nɛ̀n kɛ̀ hɛ́n, ke ji le eyiri-bɔ̀ kè di ɔmùan zri tán y'edomɛ̀n. Ɔwɔ ke le ci anwrɔn hɔ̀n léyi kɛ ẅɛn ankàtro-gbàngbàn ci-hán mán yɔ hɔ̀n léyi kɛ hán ɛncɔnwrɔn-hi-bi-gbàn nɔn.

⁵ Ny'esunàn ke bɩ́ dú ɔkua cüɛ̀n ci-hán; eci léyi nyɛ́n ẅɛ̀n nɔn, yi kɩ kɛ̀ cüɛn nyɛ̀n ɛvɛ̀, ɔmuhi Ɔwɔ dɔ̀ le: “Mɛ́n sɩ̀ teze mɛ́n, mɛ́n sɩ̀ wrɔ́ mɛ́n mɛ̀n ze mrìmrì.”

⁶ Hɩ le kruhú de bɔ́ lɛ dɔ́ esɛ́ mɛ̀n le: “Ɛẅɛnwrɔn dú ɔwrɔn léyi kɛ và kɛ̀ wá mɛ̀n ɛkɔrɛ̀ nɔn, eci ẅì zriɛmɛ́n ke sɩ̀ ẅɛn mɛ̀n ɛnjansù. Ecitan de anwrɔnẅì kɛ lɛ hán mɛ̀n tɛ̀ nɛ́n?”

⁷ Ɛcüìcüì-bɔ̀ léyi kɛ nyrɔn nyɛ̀n, kɩ dɔ́ nyɛ̀n Ɔwɔ mùan-ankà nɔn, y'ankà kè bru nyɛ̀n. Nyɛ́n tro y'ɛwúvà léyi yɔ ẅɛ̀n kɩ yɔ wù nɔn yi ankà, ô nyɛ́n ván y'ankaẅìbùtan lɔ.

⁸ Zhezü Krisì dú ɔwrɔn léyi dú ɛnɛ́n, ɛnyɔnci mán ɛnvra lɔ fɛn nɔn.

⁹ Nyɛ́n bɩ́ teze ny'edomɛ̀n nyɛ́n tán Ɔwɔ ankà-dɔ̀ mɛ̀ntɛ mɛ̀ntɛ hɔ̀n léyi dú ɛyri nyantɛn nvà nɔn kɛ zrɛ́n nyɛ̀n. Zrɔ tán le bɔ̀ cɔ́ Ɛnhɛ́n mɛ̀n cüì Ɔwɔ nboafɔn mɛ̀n, kɩ kè sɩ̀ dù ɛcizî nyànmàn ci-hán; anwrɔn hɔ́n léyi kɛ ẅɛn ɛcizî nyanmàn ndɔ hɔ̀n lɔ kɛ hɛ́n nɔn, ɛnbì zriɛmɛ́n yɔ vá cɔ́ nɛ́n vɔ̀nshɛ́ tɔ̀n.

¹⁰ Ɔwɔ cice-bɔ̀ léyi kɛ hán ecice kɔ̀hɔ̀n Zhüifɛ̀n-bɔ̀ wɔ-sɛn-yri prɔnprɔn lɔ nɔn, kè sɩ̀ ẅɛ̀n ɛkɔrɛ̀levri ká zî eci léyi ye ce bɔ́ ecice tɛbrɛ̀ lɔ wú nɔn.

¹¹ Zhüifɛ̀n-bɔ̀ Wɔ cice-wrɔn cüicüì ke sɩ́ annɔn krɛ̀ ɛyri prɔnprɔn vri lɔ mɛ̀n, ô nɛ̀n ce eci ke dú ɛgbànbɩce wɔ̀ɛn-dì, tɛ́n annɔ̀n dùwrú hɔ̀n lɔ yɛ biɛ yɔ ɔkɔ̀ mɛẅi.

¹² Hɩ le kruhú de Zhezü mán wú anmàn mɛẅi, ô nɛ̀n fi fɛcüè edomɛ̀n nɛ́n dùku n'ɛnkrɛ̀ lɔ mɛ̀n.

¹³ Bɔ̀ hɔ́n nɛ̀n ɛtɛ̀sɛ̀n anmàn mɛẅi, ô bɔ̀ shrì bɔ̀ bɩ́ egbrì léyi nɛ́n mán nɛ́n bɩ nɔn.

¹⁴ Ɔmuhi ɛnu-hi lɔ bɔ̀ sɩ̀ ẅɛ̀n anmàn cüìcüì léyi ke le dú ɛnvra lɔ fɛn nɔn; bɔ́ ji anmàn cüìcüì léyi dú ezì kɛ lɛ và nɔn.

¹⁵ Zhezü bɩmɛ̀n lɔ, ɛnvra lɔ fɛn bɔ́ yé Ɔwɔ bɔ́ ɛmrɛ́n, ke dù kɛ hán ecice léyi ke dú b'ɔmuanwru wú kɛ mrɛ́n n'ebɩ́ lɔ nɔn.

¹⁶ Anvrɛn hán mán ny'edomɛ̀n ɛkɔrɛ̀wá ke bɩ́ yru nyɛ̀n esùvà, ɔmuhi ɛcice ndɔ hɔ̀n lɔ de kɛ cüɛn Ɔwɔ ɛvɛ̀ nɔn.

¹⁷ Nyɛ́n die ny'ɛnyrɔnnan-bɔ̀ nukùɛ, ô nyɛ́n sɩ́ ny'edomɛ̀n ɛnhi nyɛ́n tán yɔ. Annanwɔrɛ mɛ̀n lɔ, yɔ dú bɔ́ ɛnán mɛ̀n ɛnbì lɔ fɛn, ɔmuhi yɔ ẅɛn eci-krɛ̀ yɔ mán Ɔwɔ mɛhi nɔn. Nyɛ́n hán tán, ô yɔ cɔ́ y'ɔkɔ̀hɔ̀n lɔ n'ɛhán-yri pɔpüɛ̀ mɛ̀n, kɩ ke bɩ́ dú obòto mɛ̀n, eci-hán ndɔ lɔ ke sɩ̀ sɩ́ nyɛ̀n vɔ̀nshɛ́ zriɛmɛ́n.

¹⁸ Nyɛ́n sɛ̀n nyɛ́n tán bɔ̀. Bɔ̀ ẅɛn esɛ́ le, bɔ̀ ẅɛn wàwúyɛ ankrankran, ɔmuhi bɔ́ ji le bɔ̀ nyrɔn bɔ́ edomɛ̀n anvrɛnvrɛn eci lɔ fɛn mɛ̀n nɔn.

¹⁹ Mɛ sán nyɛ̀n ɔwɔ-sɛ̀n kè dú mɛ tɛn, ô Ɔwɔ kè shrì kɛ̀ tán ɛkɔrɛ̀levri, mɛ̀n vru ɛmɛẅi mɛ̀n vá kpràkprà ny'ɛtɛ̀sɛ̀n.

Ɔwɔ-sɛ̀n

²⁰ Ɔwɔ leyi dú anwɔwɔ shi-bɛ, bɩ́ bɔ́ Ɛẅɛnwrɔn Zhezü owú-bɔ̀ mɛ̀n sɩ́ ɔkɔrɛ-bɔ̀ mɛ̀n, Zhezü srɔ kɔ̀kɔ̀sɛ̀ kua-wrɔn, n'ɛnkrɛ̀ cice nboafɔn mɛ̀n, ɛnkrɛ̀ cice léyi kɛ tán Ɔwɔ mìrɛ̀n léyi ke sɩ́ trɔa nɔn ecüi ɛnvra lɔ fɛn nɔn.

²¹ Ɔwɔ ndɔ lɔ kɛ̀ srɔ nyɛ̀n eci-ankrankran-hán-bɔ̀, ô nyɛ́n hán n'ɛkɔrɛ̀-zì ci; nɛ̀n wá bɔ́ ɛnbɔrɛ lɔ mɛ̀n eci léyi nɛ cüɛ̀n nɔn, Zhezü Krisì bɩmɛ̀n, nɛ́n léyi eci-zrɔ dú nɛ tɛn ɛnvra lɔ fɛn! Kè dú ɔmu lɔ.

Ɛmɛẅi trɔ ankà mán ebinyan

²² Anwrɔn-nɛ́n-muanẅi hɔ̀n, mɛ wá tán nyɛ̀n le: nyɛ́n die nukù ɛnbɔrɛ-ẅɛ̀n-hɛ́n mɛ̀n, edùyi ankà-dɔ̀ ndɔ hɔ̀n lɔ mɛ̀n. Ɔmuhi owrú léyi mɛ̀n merɛ́n nyɛ̀n nɔn ke sɩ̀ zeze kɛ̀ gbɔ̀a nɔn.

²³ Mɛ tán nyɛ̀n nyɛ́n nyrì le, bɔ́ muan-wì Timote dú anwɔn-mɛ̀n wá-wɔn mɛ̀n srɔ ɛntrɛ. Ke dú kɛ nɛ gɔ́ và hô, mɛ̀n mán nɛ́n mɛhi bɔ́ lɛ và bɔ̀ nyan nyɛ̀n.

²⁴ Ny'ɛnyrɔn-bɔ̀ lɔ fɛn mán anwrɔn hɔ̀n léyi dú Ɔwɔ-fɛcüè-bɔ̀ nɔn, nyɛ́n tán yɔ ebinyan. Anwrɔn-nɛ́n-muan-ẅì hɔ̀n léyi dú Itali kpɔsɔ wú nɔn, ke bi nyɛ̀n nyan.

²⁵ Ɔwɔ boafɔ̀n kɛ̀ và dú nyɛ lɛ fɛn lɔ ɛmɛ̀n.