Ebre-bɔ̀ 10 - Ɛmɛẅi ankà ankrànkràn 20031 Mohizì nyànmàn lɔ kè sɩ̀ dù eci-hán annanwɔrɛ hɔ̀n lɔ yɔ picɛ̀ cehɛ́n; nɛ̀n dú anvrɛn hɔ̀n léyi dú ezì kɛ và nɔn y'ɔwɔ̀n. Anwrɔn hɔ̀n léyi kɛ sɔnba Ɔwɔ ɛtɛ̀sɛ̀n nɔn, nɛ́n sɩ̀ srɔ yɔ anwrɔn anvrɛnvrɛn rɔ́; anhɔntan de nɛ lɛ hán nɛ̀n srɔ yɔ anwrɔn anvrɛnvrɛn ke dú kɛ nɛ ẅɛn n'ecice ci-hán zri lɔ, ɛnnanwàn ɛnnanwàn lɔ fɛn, kɩ ke sɩ́ kɛ́n hɛ́n hàn nɛ́n? 2 Ke dú kɛ anwrɔn hɔ̀n léyi kɛ hán ɔwɔ-sɛ̀n ɔmu lɔ n'eci nɔn, yɛ gɔ̀ fi y'ɛgbàn edòmɛ̀n brɛzri hô, yɔ sɩ̀ vru ẅɛn ɛgbàn kè dú yɔ edomɛ̀n kɩ ye sɩ̀ vru hán ecice kɔ̀hɔ̀n zriɛmɛ́n. 3 Annanwɔrɛ mɛ̀n lɔ, ɛcice kɔ̀hɔ̀n ndɔ hɔ̀n lɔ mɛ̀n, anwrɔnẅì ke vru ke kro y'ɛgbàn hɔ̀n lɔ y'ankà-sɩ́, ɛnnànwàn ɛnnànwàn. 4 Ɔmuhi ɛnnànman mán ɛbùrì cüì hɔ̀n krɛ̀ ke sɩ̀ gbú ɛgbàn mrìmrì kɛ̀ sɔhɔ́ rɔ́ nɔn. 5 Hɩ le kruhú de, ɛnvra léyi Krisì kɛ vá ɛnhibù wú nɔn, nɛ̀n dɔ́ Ɔwɔ le: “È sɩ̀ ji ecice nyàntɛn zriɛmɛ́n, tɛ́n ɛ̀ tán mɛ̀n edùwru tɔ̀n. 6 E sɩ́ vru cüɛn annɔ̀n hɔ̀n léyi yɛ biɛ ecice tɛbrɛ̀ wú, mán ɛcice léyi ke gbú ɛgbàn sɔhɔ́ nɔn. 7 Zɛtɛn mɛ́n dɔ̀ le: ‘Ô Ɔwɔ, mɛ́n dùku mɛ vá mɛ́n ɛtɛ̀sɛ̀n ô mɛ̀n hán v'ɛkɔrɛ̀-zì ci, hán ɔmu le ye merɛ́n m'ɛwú owru prɔnprɔn lɔ mɛ̀n nɔn.’ ” 8 Nɛ́n gɔ́ dɔ̀ le: “E sɩ́ cüɛn ɛcice nyántɛn zriɛmɛ́n, annɔ̀n hɔ̀n léyi yɛ biɛ ɛcice-tɛbrɛ̀ wú, ɛgbàn-bɩce cice, kɩ ndɔ lɔ fɛn kè sɩ̀ dù v'ɛcüɛn-ci.” ɔmu tɛ̀kɩ ɛcice ndɔ lɔ dú ɛnyanmàn kɔrɛzì-ci-hán. 9 Zɛtɛn nɛ́n dɔ̀ le: “Mɛ́n dùku mɛ và mɛ̀n hán v'ɛkɔrɛ̀zì-ci.” ɔmu lɔ de zɛtɛn nɛ̀n gbú ɛcice gbànvri kɔ̀hɔ̀n-hán nɛ̀n sɔhɔ́ kɩ nɛ̀n srɔ n'edomɛ̀n ecice-ci. 10 Zhezü Krisì hán Ɔwɔ kɔrɛ̀zì-ci; nɛ̀n bɩ́ nɛ́n dùku n'edomɛ̀n nɛ̀n ce ɛdɛ̀n zri brɛzri, kɩ ɔmu lɔ de ye jru bɔ̀ ɛgbàn edomɛ̀n yɛ sɔhɔ́ nɔn. 11 Ɔwɔ-cice-wrɔn totɔtɔ̀n, ɛnbì lɔ fɛn kɛ nyɔn ɛwú, kɛ hán ecice kɔ̀hɔ̀n; nɛ hán frɛfrɛ ecice kɔ̀hɔ̀n zri léyi ke sɩ̀ gbú ɛgbàn kɛ̀ sɔhɔ́ rɔ́a nɔn. 12 Krisì tɛn, ce eci ɛdɛ̀n zri ɛgbàn kruhú, kɩ ndɔ lɔ dú ɛnvra lɔ fɛn, zɛtɛn nɛ̀n yɛ́ Ɔwɔ ezì-kɔrɛ̀a. 13 Zɛtɛ̀ lɔ nanvrɛn de nɛ vrá ô, Ɔwɔ kɛ̀ hán n'egbri-bɔ̀ kɛ̀ srɔ n'annan-wú-hɛ́n-ci. 14 Ɔmu lɔ de ecice dɛ̀n zri mɛ̀n, nɛ̀n srɔ anwrɔnẅì anwrɔn ankrankran, kè dú ɛnvra lɔ fɛn, yɔ léyi nɛ̀n jru yɔ ɛgbàn edomɛ̀n nɛ̀n sɔhɔ́ nɔn. 15 Ɛnhɛ́n Prɔnprɔn mán kɛ dɔ́ bɔ̀ ankà zri lɔ. Annanwɔrɛ mɛ̀n lɔ, nɛ dɔ́ le: 16 “Ɛẅɛnwrɔn kɛ dɔ̀ le, nyàn eci léyi ke le dú mìrɛ̀n léyi mɛ wá mɛ̀n tán yɔ mán mɛ̀n mɛhi, ɛnbì ndɔ hɔ̀n lɔ y'ɛmɛẅi lɔ, Ɛwɛnwrɔn kɛ dɔ̀ le: Me le merɛ́n m'ɛnyanmàn hɔ̀n lɔ mɛ̀n wá y'ɛnbɔrɛ mɛ̀n, kɩ mɛ lɛ wá yɔ ɛnyanmàn hɔ̀n lɔ ɛnkruemɛ̀n.” 17 Zɛtɛn nɛ dɔ̀ le: “Y'ɛci-gbàngbàn mán y'ɛgbàn hɔ̀n lɔ y'ankà ke sɩ̀ vru bru mɛ̀n hàn.” 18 Tɛ́n, ke dú kɛ yɛ cɔ́ ɛgbàn-bɩce hô, kè sɩ̀ zrɔ̀ tàn le ye vru yɛ hán n'ecice ci. Bɔ̀ sɔ̀nba Ɔwɔ ɛtɛ̀sɛ̀n 19 Ɔmu lɔ, anwrɔn-nɛ́n-muanẅì hɔ̀n, bɔ̀ ẅɛn ɛkɔrɛ̀leri bɔ́ le bru ɛyri prɔnprɔn vri lɔ, Zhezü krɛ̀ léyi ce nɔn hɩ kruhú. 20 Nɛ̀n srú ɛnlevri wrù mán ankɔrɛkɔrɛ nɛ́n ze bɔ̀ ɛdrɛ́n-càsa mɛẅi, hɩ mɛ̀n kɛ dɔ̀ le, n'edùwrú-ẅia mɛ̀n. 21 Bɔ̀ ẅɛn Ɔwɔ-cice-wrɔn cüìcüì tɔ̀n dú ecüìcüì Ɔwɔ bɩ́ lɔ mɛ̀n. 22 Zɛtɛn bɔ̀ sɔ̀nba Ɔwɔ ɛtɛ̀sɛ̀n ɛnbɔrɛ zriemɛ̀n mán esɛ́ mɛ̀n; bɔ̀ bɩ́ ɛnbɔrɛ fifi léyi ankàtro gbangbàn cɔhɔ́ ɛmɛ̀n, mán edùwru léyi ye bɩ́ ɛnshi fifi ye jru nɔn. 23 Bɔ̀ ẅɛn esɛ́ léyi bɔ́ gbú n'ɔmùan nɔn ɛshishiemɛ̀n bɔ̀ hɛ́n, ɔmuhi Ɔwɔ ke di ɔmùan-zri n'ɔmùan-wá hɔ̀n lɔ mɛ̀n nɔn. 24 Bɔ̀ wá bɔ́ edòmɛ̀n esùva, bɔ̀ hán ɛcüɛn-ci anvrɛnvrɛn, ô bɔ́ eci-hán kè dú ankrankran. 25 Bɔ́ bɩ́ teze bɔ́ fɛcüè krubɔrɛ hɔ̀n lɔ kɛ hán ɔmu le, anwrɔn ndɔ hɔ̀n dú y'edùci nɔn hɔ́. Tɛ́n, bɔ̀ tán bɔ́ edomɛ̀n edùyì, kɩ ndɔ lɔ kè dú bɔ́ eci-hán, ɔmuhi nyɛ kàn le Ɛẅɛnwrɔn vá bì lɔ kɛ́n eburi nɔn. 26 Ɔmuhi ke dú kɛ bɔ́ kán bìì bɔ́ hán ɛgbàn ɛnvra léyi bɔ́ cɔ́ annanwɔrɛ ankà bɔ́ nyrì nɔn, ecice ci-hán zriɛmɛ́n bàdà ká mrɛ́n bɔ̀ ɛgbàn edòmɛ̀n kɛ sɔhɔ́ nɔn. 27 Wɔrɔ bɔ̀ Ɔwɔ mrɛ̀nci shishi léyi ke ji le bɔ̀ vrá ɛnkrɛ̀ta-kuemɛ̀n, mán ɛnhyà-ẅì léyi kɛ lɛ biɛ n'egbri-bɔ̀ hɔ̀n nɔn. 28 Ɔwrɔn totɔtɔ̀n léyi kɛ fɔndɔ́n Mohizì nyanmàn lɔ nɔn, owù dú nɛ tɛn, ɛnhyɔ̀bɔ̀-nyrì bàda nɛ̀n ɛmɛ̀n, ke dú kɛ dalɛfuɛ-di-bɔ̀ anhyrɛ̀ mán anhɔ̀n ke nyri n'ɛgbàn lɔ. 29 Zɛtɛn, anhɔntan de kɛ lɛ hán kè dù tán ɔwrɔn léyi kɛ ẅɛn Ɔwɔ Ẅì gbrì, kɩ ke bɩ́ nɛ́n mìrɛ̀n-krɛ̀ léyi hɩ ɛmɛ̀n nɛ̀n cɔ́ edòmɛ̀n fí, kɩ kɛ wɔra Ɛnhɛ́n Prɔnprɔn léyi dú boafɔ̀n shibɛ́, hɩ ke bɩ́ nɛ̀n kɛ srɔ eci woro nɛ́n? Nyɛ́n ku anvɛ̀ nyɛ́n nyan ɛgbàn ẅɔ̀ɛn-dì vri shishi léyi ke le dú nɛ tɛn nɔn! 30 Annanwɔrɛ mɛ̀n lɔ, bɔ̀ nyri ɔwrɔn léyi ndɔ̀ le: “Mɛ̀n de mɛ lɛ hán ɔwɔrɛ̀-tán-ci, mɛ̀n de me le di evru-và-wɔ̀ɛn nɔn” kɩ vru dɔ̀ le: “Ɛẅɛnwrɔn ke le ci nɛ́n fɛcüè ɛmrɛ̀n.” 31 Ɛnjansù vri dú nɛ̀n ɛmɛ̀n, dú vɛ́n léyi e le bru Ɔwɔ kɔrɛkɔrɛ lɔ n'antamɛ̀n mɛ̀n nɔn. 32 Kè bru nyɛ̀n ɛci hɔ̀n léyi nyɛ́n gɔ̀ kán ny'ɛwúvà lɔ mɛ̀n nɔn. Ɛnvra ndɔ hɔ̀n lɔ mɛ̀n, ɛnvra léyi nyɛ́n cɔ́ Ɔwɔ yrikàn nɔn, nyɛ́n kán ɛgbàn bobrebe, nyɛ́n kɔ́n anhà shishi. 33 Ny'ɛmɛ̀n lɔ anwrɔn janbɔ̀ yɛ wɔra kɩ ye gorɛ anwrɔn lɔ fɛn zìwú, ɔmu tɛ̀kɩ ndɔ hɔ̀n krɔn kpehɛ́n kɛ̀ wá anwrɔn hɔ̀n léyi yɛ hán ɛgbàn nɔn ɛkɔrɛ̀. 34 Nyɛ́n mán anwɔn-mɛ̀n-wá-bɔ̀ mɛhi nyɛ́n kán ɛgbàn, kɩ ɛnvra léyi ye bɩ́ nyɛ̀n ɛci yɛ sɔhɔ́ nɔn, nyɛ́n shri pɔpüɛ mɛ̀n nyɛ́n tán yɔ, ɔmuhi nyɛ́n nyri ɔmu le nyɛ́n ẅɛn ɛnnɛncüì-di-ci anvrɛnvrɛn léyi dú ɛnvra lɔ fɛn nɔn. 35 Nyɛ́n bɩ́ teze ny'esɛ́ lɔ kɛ zrɛ́n hán: anjakpà vri ndù hɛ́n kɛ vrá nyɛ̀n. 36 Ɛnbɔrɛ-ẅɛn-hɛ́n kè dú ny'eci, ô nyɛ́n hán Ɔwɔ kɔrɛ̀zì-ci, ô ɔmu lɔ nyɛ́n cɔ́ n'ɔmùan-wá-ci lɔ. 37 Annanwɔrɛ mɛ̀n lɔ ye merɛ́n le: “Ɛnvra jan, ɛnvra jan kɩ wɔrɔ, kɩ ɔwrɔn léyi kɛ và nɔn, kɛ lɛ và, nɛ́n sɩ̀ vru mɔ̀ɛn hàn. 38 Tɛ́n Ɔwɔ kɛ dɔ̀ le, ɔwrɔn léyi dú ɛnyrɔnnan mɛ̀n m'ezìwú nɔn, ke le dú ɛwúvà mɛ̀n ankaẅìbùtan mɛ̀n, tɛ́n ke dú kɛ ne vru ɛmɛẅi, mɛ́n sɩ̀ ẅɛn ɛcüɛ̀n n'ɛwú.” 39 Bɔ́ sɩ̀ dù anwrɔn hɔ̀n léyi ke vru ɛmɛẅi, kɩ kɛ hɔ́n y'ɛzrɛ́n mɛ̀n nɔn. Bɔ̀ dú anwrɔn hɔ̀n léyi ẅɛn ankàẅì-bùtan kɩ dú ɛnkrukɔrɛ̀ levri wú nɔn. |
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
Bible Society of Côte d'Ivoire