Ebre-bɔ̀ 1 - Ɛmɛẅi ankà ankrànkràn 2003

Ɔwɔ cí n'Ɛnẅì Zhezü mɛ̀n dɔ́ ankà

¹ Ɛnbiɛhɛ́n vra lɔ Ɔwɔ dɔ́ bɔ́ nancüì hɔ̀n ankà ɛnvra mɛ̀ntɛ mɛ̀ntɛ mɛ̀n, mán ankɔ́nda mɛ̀ntɛ mɛ̀ntɛ mɛ̀n, kɩ nɛ̀n ci Ɔwɔ-muan-wú-ankà-dɔ́-bɔ̀ mɛ̀n,

² tɛ́n zɛtɛ lɔ, ɛnvra trɔ mùan mɛ̀n lɔ, nɛ̀n dɔ́ bɔ̀ ankà n'Ɛnẅì Zhezü mɛ̀n. N'ɛmɛ̀n de Ɔwɔ hán eci lɔ fɛn nɔn, kɩ nɛ́n de Ɔwɔ wá nɛ̀n ɛci hɔ̀n lɔ fɛn, y'ɛẅɛnwrɔn nɔn.

³ Ɛnẅì lɔ ke yé Ɔwɔ vrisì ci-zrɔ lɔ, nɛ́n dù nɛ̀n hán ɔmu le Ɔwɔ dù nɔn, n'ankà-dɔ̀ kɔrɛ̀srɔn mɛ̀n lɔ, nɛ̀n ẅɛn n'ɛkɔrɛ̀-ci lɔ fɛn nɛ̀n hɛ́n. Ɛnvra léyi nɛ̀n juru anwrɔnẅì hɔ̀n ɛgbàn edomɛ̀n trɔ nɔn, nɛ̀n yɛ́ anhobɩ́ ɛkɔrɛ̀srɔn Wɔ zì-kɔrɛ̀-kɔrɛa.

Ɔwɔ Ẅì lɔ sevri vrán Ɔwɔ-kuyüre bɔ̀

⁴ Ɛnẅì lɔ sevri ká Ɔwɔ kuyüre bɔ̀ kɩ Ɔwɔ tán nɛ̀n ebi tɔ̀n léyi sevri vrán yɔ tɛ́n lɔ nɔn.

⁵ Annanwɔrɛ mɛ̀n lɔ, Ɔwɔ kɛ vá dɔ́ n'ɛkùyüre-bɔ̀ lɔ ɔtɔ̀n mrìmrì le: “Vɛ́n de è dú m'Ɛmẅì nɔn, bukru ɛnyɔncì lɔ nɔn, mɛ̀n dú e Zi.” Kɩ Ɔwɔ kùyüre-wrɔn tɔ̀n tɛsɛ̀n, nɛ vá dɔ́ mrìmrì le: “Me le dú nɛ́n Zi tɔ̀n kɩ ne le dú m'Ɛnẅì tɔ̀n.”

⁶ Tɛ́n ɛnvra léyi Ɔwɔ kɛ lɛ wá nɛ́n kpàkpà bî-Ẅì ɔkɔ̀hɔ̀n ɛnhibù wú nɔn, nɛ́n dɔ̀ le: “Ke ji le Ɔwɔ kùyüre-bɔ̀ lɔ fɛn kè cüe nɛ̀n ankɔrɛ̀ ezìwúɛ.”

⁷ Ɔwɔ kùyüre-bɔ̀ tɛn, nɛ́n dɔ̀ le: “Ɔwɔ srɔ n'ɛkùyüre-bɔ̀ ɛndɔ̀nwrɔ̀n, kɩ n'eci-bɩ̀tan-bɔ̀ nɛ̀n srɔ ɛnhyà ẅì.”

⁸ Tɛ́n Ɛnẅì lɔ wú, nɛ́n dɔ̀ le: “V'ɛgbú-tòbù, ô Ɔwɔ, yɛ hán dú ɛnvra lɔ fɛn. Ɛnyrɔnnan mɛ̀n de ɛ̀ ẅɛn ɛyri v'ɛnnɛ̀ncüì-dúyri lɔ nɔn.

⁹ Ɛ cüɛn eci léyi nyrɔn nɔn, e sɩ́ ji eci gbàngbàn, hɩ le kruhú de Ɔwɔ, v'Ɔwɔ, mrɛ́n mɛ́n nbɩ, kɩ nɛ̀n wá mɛ́n ɔkoran zhì ɛnkru, kɩ nɛ̀n mrɛ́n mɛ́n nɛ̀n bɩ́ ɛnyran hɔ̀n wanzi.”

¹⁰ Nɛ̀n vru nɛ́n dɔ̀ le: “Vɛ́n de, Ɛẅɛnwrɔn, ɛnkrubɔmɛ̀n hán hɛ́n, ɛ̀ hán ɛnhi, anhobɩ́ dú v'ɛkɔrɛ̀-ci.

¹¹ Ndɔ lɔ fɛn kɛ lɛ vàcì, tɛ́n vɛ́n, e le dù. Ɛnhi mán anhobɩ́ ke le juru kɛ lɛ hán edòmɛ̀n-ẅɛ̀n-ci gbanvri hɔ́;

¹² e le serɛ yɔ kɛ lɛ hán ɛceci-she hɔ́, kɩ yɔ lɛ crɔ́n yɔ kɛ lɛ hán ɛceci hɔ̀n hɔ́. Tɛ́n vɛ́n è dú eci zri lɔ, kɩ v'ɛwúvà kè sɩ̀ ẅɛ̀n ɔtrɔ.”

¹³ Ɔwɔ kɛ vá dɔ́ n'ɛkùyüre-wrɔn tɔ̀n mrìmrì le: “Và yɛ́ mɛ̀n ezi-kɔrɛ̀-korɛa, me ji mɛ̀n hán v'ɛgbri-bɔ̀ kɛ̀ srɔ v'annantrɛ̀-wú-hɛ́n ci.”

¹⁴ Ɔwɔ kùyüre-bɔ̀ dú anhɛ́n hɔ̀n léyi dú Ɔwɔ ci-bɩtan kɔ̀hɔ́n mɛ̀n nɔn kɩ: nɛ wá yɔ ɔkɔ̀hɔ̀n yɔ bɩ́ ɛkɔrɛ̀-wá yɔ hɔ́n sɩ́ anwrɔn hɔ̀n léyi kɛ lɛ cɔ́ ɛnkrukɔrɛ̀ nɔn.