Galasi anmàn-bɔ̀ 5 - Ɛmɛẅi ankà ankrànkràn 2003

Nyɛ́n bɩ́ zrɛ́n ny'ɔwrɔn kora dù lɔ

¹ Krisì srú bɔ̀ die ô bɔ̀ srɔ anwrɔn kora hɔ̀n annanwɔrɛ mɛ̀n. Nyɛ́n ẅɛn nɛ̀n ɛshishiemɛ̀n, nyɛ́n bɩ́ vru teze ny'edomɛ̀n nyɛ́n hɔ́n anwɔ̀nẅiemɛ̀n.

² Nyɛ́n die nukùɛ! Mɛ̀n, Pɔlɛ̀n, mɛ dɔ́ nyɛ̀n annanwɔrɛ mɛ̀n le: ke dú kɛ nyɛ hán ye wi nyɛ̀n wúcɔ̀-domɛ̀n hô, zɛtɛn Krisì srɔ ny'eci woro.

³ Me vru mɛ dɔ́ annanwɔrɛ mɛ̀n le, ɔwrɔn totɔtɔ̀n léyi kɛ hán ye wi nɛ̀n wúcɔ̀-domɛ̀n nɔn: kɛ wá tán le nɛ̀n wá ɛnyànmàn mumù lɔ fɛn.

⁴ Nyɛ́n léyi nye ji yɛ srɔ nyɛ̀n ɛnyrɔnnan-bɔ̀ Ɔwɔ zìwú ɛnyànmàn kɔrɛ̀levriemɛ̀n nɔn, nyɛ́n mán Krisì mɛhi angranmɛ̀n gbɛ́ nyɛ̀n ɔmùan; nyɛ́n sɩ̀ vrù dù Ɔwɔ bɔafɔ̀n lɔ mɛ̀n.

⁵ Bɔ tɛn tɛ́n, bɔ̀ ẅɛn esɛ́ Ɔwɔ mɛ̀n, nɛ́n léyi nɛ lɛ srɔ bɔ̀ ɛnyrɔnnan-bɔ̀ n'ezìwú nɔn; ndɔ lɔ de bɔ́ vrá Ɛnhɛ́n Prɔnprɔn kɔrɛ̀-srɔn mɛ̀n, nɛ́n léyi nɛ tán bɔ̀ ankaẅì-bùtan nɔn.

⁶ Ɔmuhi Ɔwrɔn léyi dú ɔbɔ̀sɔ mɛ̀n nɛ́n mán Krisì mɛhi, ke dú kɛ ye wi nɛ̀n wúcɔ̀-domɛ̀n mán, kɩ ye sɩ̀ wi nɛ̀n wúcɔ̀-domɛ̀n mán, ndɔ lɔ kè sɩ̀ ẅɛ̀n vɔ̀nshɛ́ zriɛmɛ́n: eci léyi dú ɛnkrugbɔ nɔn, dú ankaẅì-bùtan léyi dú ɛcüɛ̀n mɛ̀n nɔn.

⁷ Nyɛ́n bɩ́ esùnàn ankrankran ɛhɔ́n mɛ̀n lɔ! Antɔnwrɔn de jrɛ́ ny'edùyì sùnàn, ô ke bɩ́ tán nyɛ̀n ankà annanwɔrɛ kɔrɛ̀zì ci-hán-yri nɛ́n?

⁸ Ankà léyi yɛ dɔ́ nyɛ̀n ô nyɛ́n crɔn ɛnkru nɔn kè sɩ̀ dù Ɔwɔ léyi bi nyɛ̀n nɔn n'eyri kɛ̀ và.

⁹ “Eci-fɔ́-ci jan kɩ kɛ hán dùdu sɔ́n, kɛ fɔ́”, ɔmu de yɛ dɔ̀ nɔn.

¹⁰ Tɛ́n, Ɛẅɛnwrɔn kɛ tán mɛ̀n esɛ́ eci léyi kɛ crɛ nyan nyɛ̀n nɔn hɩ wú: mɛ̀n nyri annanwɔrɛmɛ̀n le nyɛ́n mán nyɛ́n sɩ̀ ẅɛn ankà-tro vɛ́n nyantɛn ke dú kɛ kè sɩ̀ dù m'ankà-tro lɔ. Tɛ́n ɔwrɔn léyi kɛ wá nyɛ̀n gbɔ̀gbɔ̀ edomɛ̀n nɔn, eci totɔtɔ̀n léyi dú nɛ̀n nɔn, nɛ lɛ cɔ́ Ɔwɔ nwù-bɔ̀.

¹¹ Mɛ tɛn tɛ́n, anwrɔn-nɛ́n-muan-ẅì hɔ̀n, ke dú kɛ, ke dú annanwɔrɛ le mɛ̀n vru mɛ dɔ́ wúcɔ̀-dɔmɛ̀n-wi ankà, cɛci kruhú kɛ ye vru yɛ kɔ́n mɛ̀n anhàa? Ndɔ lɔ wú, ke dú kɛ yɛ dɔ́ Krisì gbàn-hán-tɛ̀ domɛ̀n gɔ̀n brɛ́ ankà hô, ke sɩ̀ vru dù ɛnkruemɛ̀n-jrɛ́ ankà kɛ̀ tán ɔwrɔn zriɛmɛ́n.

¹² Anwrɔn hɔ̀n léyi kɛ wá nyɛ̀n gbɔ̀gbɔ̀ edòmɛ̀n nɔn, yɔ hɔ́n esù she yɔ gbɔ̀gbɔ̀-kɔ̀hɔ̀n-hán lɔ mɛ̀n: yɔ voyan y'edomɛ̀n annan mán ankɔrɛ̀ annanwɔrɛmɛ̀n!

¹³ Tɛ́n, nyɛ tɛn, anwrɔn-nɛ́n-muan-ẅì hɔ̀n, ye bi nyɛ̀n ô nyɛ́n ẅɛn ny'edomɛ̀n. Tɛ́n nyɛ́n bɩ bɩ́ ny'edomɛ̀n-ẅɛ̀n ndɔ lɔ nyɛ́n srɔ ɛkɔrɛ̀-levri ci, ô nyɛ́n hán ny'ɛnkruemɛ̀n ci léyi ny'ɛwúvà mumù lɔ ke ji nɔn. Tɛ́n nyɛ́n teze ny'edomɛ̀n nyɛ́n tán ɛcüɛ̀n, ô nyɛ́n dú nyɛ́n dùku ny'eci-bɩ̀tan kɔhɔ̀n mɛ̀n.

¹⁴ Ɔmuhi ɛnyànmàn totɔtɔ̀n lɔ fɛn bɔ́sɔ ɛnyànmàn zri ndɔ lɔ mɛ̀n: “Ke ji le ɛ̀ cüɛn ɛnyran-wrɔnẅì kɛ̀ hán vɛ́n mumù hɔ́.”

¹⁵ Tɛ́n ke dú kɛ nyɛ hán eci kɛ hán ovú nɔ̀n hɔ́ hô, nyɛ krá ny'edomɛ̀n ɛnyî, kɩ nye wri ny'edomɛ̀n, nyɛ rá ny'edomɛ̀n, zɛtɛn nyɛ́n wá esùva: nyɛ lɛ trɔ ny'edomɛ̀n jrɛ́.

Ɛnhɛ́n Prɔnprɔn kè dú bɔ́ ɛnyrɔn-wrɔn, kɩ ke bɩ́ dú anwrɔnẅì ankà-tro hɔ̀n lɔ

¹⁶ Nyàn ankà léyi mɛ́n ẅɛ̀n mɛ lɛ dɔ́ nyɛ̀n nɔn: nyɛ́n teze Ɛnhɛ́n Prɔnprɔn kɛ̀ nyrɔn ny'ɛwúvà lɔ kɩ nyɛ́n sɩ̀ vru die nyɛ́n mumù ny'ɛwúvà ankà-tro lɔ nukùɛ.

¹⁷ Ɔmuhi bɔ́ mumù bɔ́ ɛwúvà ankà-tro lɔ kɛ kɛ́n Ɛnhɛ́n Prɔnprɔn tɛn lɔ ezì: kɩ Ɛnhɛ́n ẅɛn ankà-tro hɔ̀n léyi kɛ kɛ́n bɔ́ dùku bɔ́ ɛwúvà tɛn lɔ ezì: yɔ dú y'edomɛ̀n ezì kɛ́n mɛ̀n, kɛ hán tán kɩ nyɛ́n sɩ̀ hán eci léyi nye ji nɔn rɔ́.

¹⁸ Tɛ́n ke dú kɛ Ɛnhɛ́n Prɔnprɔn kɛ nyrɔn nyɛ̀n hô, zɛtɛn nyɛ́n sɩ̀ vrù dù ɛnyànmàn kɔrɛ̀-levri wúɛ.

¹⁹ Ye nyri anvrɛnvrɛn mɛ̀n, ɔmu le bɔ́ mumù bɔ́ ɛwúvà-ci-hán ke yé n'edomɛ̀n nɔn: eci-gbangbàn-hán mɛ̀n, ɛnbrámɛ̀n-ci-hán mɛ̀n, mán ɛwúvà-gbangbàn-ẅɛ̀n mɛ̀n,

²⁰ antɛ̀-buri-wɔ-sɛ̀n mán seke-kɔhɔ̀n-hán mɛ̀n. Anwrɔnẅì ke gbri y'edomɛ̀n, ke sî y'edomɛ̀n ankà kɩ kɛ kɔ́n ecüì-hi, yɔ dú ɛmɛ̀nhyì mán annankran kɔrɛ-levri wú. Yɔ grɔ y'edomɛ̀n ɔkpɔsɔ ɔkpɔsɔ ezì-kɛ́n-mɛ̀n;

²¹ ɛci kɛ cüɛn yɔ ɛvɛ̀, yɔ kɔ́n ɛntàn kɩ yɔ zî ɛci ɛvrivri, kɩ yɔ hán eci nyàntɛn ndɔ hɔ̀n kɛ cá. Me bi dɔ́ nyɛ̀n zɛtɛ̀ lɔ, hán ɔmu le mɛ́n gɔ̀ hán nɔn: anwrɔn hɔ̀n léyi kɛ hán ɔmu lɔ nɔn, ke sɩ̀ cɔ́ ɛyri Anhobɩ́ Nɛ̀ncüì-dúyri.

²² Tɛ́n eci léyi Ɛnhɛ́n Prɔnprɔn kɛ tán nɔn, dú ɛcüɛ̀n, pɔpüɛ̀, anwɔwɔ, ɛnbɔrɛ-ẅɛ̀n-hɛ́n, anvrɛn-ci-hán, ɛnbɔrɛ-wɔ-ci-hán, ɔmùan-zri-dì,

²³ ɛnbɔrɛ-wɔ̀ mán edomɛ̀n-ẅɛ̀n-hɛ́n. Annanwɔrɛ mɛ̀n lɔ, ɛnyànmàn ke sɩ́ kɛ́n eci-hán-ci ndɔ hɔ̀n lɔ ezì!

²⁴ Anwrɔn hɔ̀n léyi dú Zhezü Krisì tɛn nɔn, yɔ hán yɔ mumù y'ɛwúvà ankà-tro mán y'ɛci-gbangbàn-hán lɔ fɛn wú Zhezü gban-hán-tɛ̀ wú.

²⁵ Ɛnhɛ́n Prɔnprɔn tán bɔ̀ ɛwúvà; bɔ̀ teze nɛ̀n, nɛ̀n nyrɔn bɔ́ esùnan lɔ.

²⁶ Bɔ́ bɩ́ ẅɛn ɛgbugbu, bɔ́ bɩ́ hán ɔmùan-gbú-ci, bɔ́ nyran hɔ̀n ci ke bɩ́ cüɛn bɔ̀ ɛvɛ̀.