Galasi anmàn-bɔ̀ 3 - Ɛmɛẅi ankà ankrànkràn 2003

Ɛnyànmàn kale ankaẅì-bùtan

¹ Galasi anmàn-bɔ̀, ɔbrɔ̀sà-bɔ̀! Antɔnwrɔn de wá nyɛ̀n anwa ɛnkruemɛ̀n nɛ́n? Tɛ́n, Zhezü Krisì wù lɔ cehɛ́n de ye yé nyɛ̀n ɛgbàn-hán-tɛ̀ wú nɔn.

² Me ji le, nyɛ́n mrɛ́n ankà-yrɛ zri ndɔ lɔ ɔmùan nyɛ́n tán mɛ̀n: nyɛ́n cɔ́ Ɛnhɛ́n léyi Ɔwɔ yüre nyɛ̀n ɔmuhi eci lɔ fɛn mɛ̀n nyɛ́n wá ɛnyànmàn, kale, ɔmuhi nyɛ́n yá, kɩ nyɛ́n bú Ɛmɛẅi ankà Ankrankran lɔ, n'ankà nyɛ́n tán ankaẅì nɛ́n?

³ Ɔbrɔ̀sà tán de nyɛ́n ẅɛn ɔmu lɔ nɛ́n? Ɔkɔ̀hɔ̀n léyi nyɛ́n bukru Ɔwɔ Hɛ́n kɔrɛ̀levri mɛ̀n, nye ji nyɛ́n trɔ nɛ̀n ɛhán zɛtɛ̀ lɔ nyɛ́n dùku ny'ecüiemɛ̀n hàn?

⁴ Eci-hán ndɔ lɔ nyɛ́n gɔ̀ hán nɛ̀n ankora? Kè sɩ̀ dù ankora de nyɛ́n hán eci ndɔ lɔ nɔn.

⁵ Ɛnvra léyi Ɔwɔ kɛ tán nyɛ̀n n'Ɛnhɛ́n kɩ kɛ hán anvɛmɛ̀n-frɛ́n-ci ny'anwanzi, nɛ hán eci lɔ ɔmuhi nyɛ́n ẅɛn ɛnyànmàn wá kale ɔmuhi nyɛ yá kɩ nye bú Ɛmɛẅi ankà Ankrankran lɔ nyɛ tán ankaẅì nɛ́n?

⁶ Ɔmu lɔ de yɛ dɔ́ Abrahamɛ̀n wú le: “Nɛ̀n ẅɛn esɛ́ Ɔwɔ mɛ̀n, kɩ Ɔwɔ bɩ́ nɛ̀n hán ɛnyrɔnnan-wrɔn n'ankaẅì-bùtan kruhú.”

⁷ Ke ji le nyɛ́n nyri ndɔ lɔ: anwrɔn hɔ̀n léyi dú ankaẅì-bùtan wúvà mɛ̀n nɔn, dú Abrahamɛ̀n mɛẅì-bɔ̀ annanwɔrɛ.

⁸ Owrú Prɔnprɔn wá le Ɔwɔ kɛ lɛ hán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn kɛ̀ srɔ ɛnyrɔnnan-bɔ̀ n'ezìwú y'ankaẅì-bùtan lɔ kruhú. Hɩ le kruhú de nɛ́n gɔ̀ dɔ́ Abrahamɛ̀n ɛmɛẅi ankà ankrankran ndɔ lɔ: “Ɔwɔ ke le fú ɛnhi wú anmàn hɔ̀n lɔ fɛn léyi dú ɛnhi wú nɔn ɛnshi v'ɛkruhú.”

⁹ Abrahamɛ̀n bú tán ankaẅì kɩ ye fú nɛ̀n ɛnshi; ɔmu lɔ de, anwrɔn hɔ̀n lɔ fɛn léyi ke bú tán ankaẅì nɔn, cɔ́ ɛnshi-fù hán nɛ́n hɔ́.

¹⁰ Tɛ́n, anwrɔn hɔ̀n léyi kɛ ẅɛn ɛnyànmàn-wá nɔn, yɔ cɔ́ ɛẅìɛ̀-dà tɔ̀n. Annanwɔrɛ mɛ̀n lɔ, Owrú Prɔnprɔn kɛ dɔ̀ le: “Ɔwrɔn léyi ɛnvra lɔ fɛn ke sɩ́ ẅɛn eci lɔ fɛn léyi ye merɛ́n dú ɛnyànmàn wrú lɔ mɛ̀n kɛ hɛ́n hán nɔn, ɛẅìɛ̀-dà dú nɛ tɛn.”

¹¹ Ke ji le bɔ́ nyri kpete mɛ̀n le, ɔwrɔnẅì zriɛmɛ́n ke sɩ̀ srɔ ɛnyrɔnnan-wrɔn rɔ́ Ɔwɔ zìwú, n'ɛnyànmàn kɔrɛ̀-zì ci-hán mɛ̀n, ɔmuhi ye merɛ́n le: “Ɔwrɔn léyi srɔ ɛnyrɔnnan-wrɔn ankaẅì-bùtan mɛ̀n nɔn, ne le dú ɛwúvà mɛ̀n.”

¹² Tɛ́n, ɛnyànmàn ankà zriɛmɛ́n ké sɩ́ crɛ nyan ankaẅì-bùtan. Tɛ́n hán ɔmu le ye vru ye merɛ́n le: “Ɔwrɔn léyi kɛ ẅɛn ɛnyànmàn hɔ̀n lɔ fɛn kɔrɛ̀-zì-ci kɛ hɛ́n nɔn, kɛ lɛ cɔ́ ɛwúvà y'ɛmɛ̀n.”

¹³ Hɩ le Krisì srɔ ɛẅìɛ̀-dá-ci bɔ́ kruhú nɔn, nɛ̀n mrɛ́n bɔ̀ ɛnyànmàn ẅìɛ̀-dá lɔ mɛ̀n nɛ̀n sɔhɔ́. Owrú Prɔnprɔn kɛ dɔ́ annanwɔrɛ mɛ̀n le: “Ɛẅìɛ̀-dà dú ɔwrɔn totɔtɔn léyi yɛ wá ɛhɛ́ ɔbɔ̀n ɛtɛ̀ domɛ̀n nɔn.”

¹⁴ Ɔmu lɔ de ɛnshi-fù léyi yɛ wá Abrahamɛ̀n ɔmùan nɔn, yɛ tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn mán, Zhezü Krisì kɔrɛ̀-levri mɛ̀n, ɛnshi-fù ndɔ lɔ de bɔ́ lɔ fɛn bɔ́ cɔ́ ankaẅì-bùtan mɛ̀n, Ɛnhɛ́n léyi Ɔwɔ wá ɔmùan nɔn n'ɛmɛ̀n.

Ɛnyànmàn mán ɔmùan-wá

¹⁵ Anwrɔn-nɛ̀n-muan-ẅì hɔ̀n, me le bɩ́ sɛnpò tɔ̀n bɔ́ ɛwúvà lɔ mɛ̀n: ɛnvra léyi ɔwrɔn tɔ̀n kɛ hán n'ànja-di-wrú annanwɔrɛ mɛ̀n, ɔwrɔn zriɛmɛ́n ke sɩ̀ bɩ́ ànja-di-wrú ndɔ lɔ kɛ̀ crɔn rɔ́, kɩ nɛ́n sɩ̀ bɩ́ ankà-dɔ̀ nyantɛn nɛ̀n wá owrú lɔ mɛ̀n.

¹⁶ Zɛtɛn, Ɔwɔ wá Abrahamɛ̀n mán n'ɛmɛẅi-wrɔn ɔmùan. Ɛwrú Prɔnprɔn ke sɩ́ dɔ́ le: “Mán n'ɛmɛẅi-bɔ̀”, kɛ hán tán le anwrɔn bobrebe hɔ̀n ankà de yɛ dɔ̀ nɔn; Ɛwrú kɛ dɔ̀ le: “Mán v'ɛmɛẅi-wrɔn”, ankà-dɔ̀ ndɔ lɔ mɛ̀n, ne yé ɔwrɔn zri kɩ, nɛ́n de nɛ̀n dú Krisì nɔn.

¹⁷ Nyàn ankà léyi me ji mɛ̀n dɔ̀ nɔn: Ɔwɔ hán n'ɔmùan-wá-wrú kɩ wá le nɛ lɛ ẅɛn yi nɛ̀n hɛ́n. Ɛnyànmàn léyi trɔ ɛmɛẅi vá ɛnnànwàn kru ɛkoẅi-ɛnrì d'anzɔ̀ mán ɛẅì ɛẅia-ɛvà granmɛ̀n nɔn, ke sɩ̀ ẅɛn Ɔwɔ mùan-wá-wrú ndɔ lɔ kɛ̀ sɔhɔ́ rɔ́, kɩ ɔmùan léyi Ɔwɔ wá nɔn ke sɩ̀ gbù sɔhɔ́ rɔ́.

¹⁸ Tɛ́n ke dú kɛ anja léyi Ɔwɔ kɛ tán nɔn, yɛ cɔ́ nɛ̀n ɛnyànmàn wú hô, zɛtɛn kè sɩ̀ vru dù ɔmùan-wá kɔrɛ̀-levriemɛ̀n. Tɛ́n, ɔmùan-wá mɛ̀n de Ɔwɔ yé Abrahamɛ̀n n'ɛcüɛ̀n lɔ nɔn.

¹⁹ Ɛnyànmàn ci-hán dú tɛtan? Ye bɩ́ nɛ̀n ye di ɛmɛ̀n, ô ye nyri eci-hán hɔ̀n léyi kɛ kɛ́n Ɔwɔ kɔrɛ̀-zì ci-hán ezì, kɩ ndɔ lɔ, hàn kɩ kɛ̀ krɔn ɛnvra léyi Abrahamɛ̀n mɛẅi-wrɔn léyi n'ɛkruhú Ɔwɔ wá ɔmùan nɔn kɛ̀ và. Ɛnyànmàn ndɔ lɔ Ɔwɔ-kùyüre-bɔ̀ bɩ́ nɛ̀n nvà, kɩ ɔwrɔn tɔ̀n srɔ ɔkɔ̀hɔ̀n-wá-wrɔn.

²⁰ Tɛ́n, ɛnvra léyi ɔwrɔn zri kɛ nyɔn ankà zìɛ nɔn, ɔkɔhɔ̀n-wá-wrɔn kɛ srɔ eci woro, kɩ Ɔwɔ zri kɩ dú ankà kru.

Ɛnyànmàn ci-hán

²¹ Ndɔ lɔ n'ɛmɛ̀n kɛ dɔ̀ le ɛnyànmàn kɛ kɛ́n Ɔwɔ mùan-wá ci-hán ezìɛ? Annanwɔrɛ mɛ̀n lɔ hɔ̂! Ke dú kɛ yɛ wá ɛnyànmàn tɔ̀n, ô kɛ̀ tán anwrɔnẅì annanwɔrɛ wúvà, hɩ lɔ mɛ̀n, ɔwrɔnẅì kɛ lɛ srɔ ɛnyrɔnnan-wrɔn tɛ̀ Ɔwɔ zìwú ɛnyànmàn kɔrɛ̀-levriemɛ̀n.

²² Tɛ́n Owrú Prɔnprɔn ndɔ̀ le ɛnhibù mumù lɔ fɛn dú ɛgbàn kɔrɛ̀-srɔn wú, ô ecice léyi Ɔwɔ wá ɔmùan nɔn kè dú ankaẅì-bùtan-ẅɛn-bɔ̀ tɛn, y'ankaẅì-bùtan léyi yɔ ẅɛn Zhezü Krisì mɛ̀n nɔn hɩ wú.

²³ Ɛnvra léyi ankaẅì-bùtan vra kɛ vá cɔ̀ nɔn, ɛnyànmàn srɔ bɔ̀ n'anwɔ̀n-bɔ̀, kɩ bɔ́ vrá ankaẅì-bùtan ndɔ léyi kɛ lɛ và cɔ́ bɔ̀ nɔn.

²⁴ Ɔmu lɔ de ɛnyànmàn dú bɔ́ ɛnan-wrɔn hàn kɩ cɔ́ Krisì vá vra, ô bɔ̀ srɔ ɛnyrɔnnan-bɔ̀ Ɔwɔ zìwú ankaẅì-bùtan mɛ̀n.

²⁵ Zɛtɛ̀ léyi ankaẅì-bùtan vra cɔ̀ nɔn, bɔ̀ sɩ̀ vrù dù ɛnan-wrɔn ndɔ lɔ n'ɛkɔrɛ̀-levri wúɛ.

²⁶ Ɔmuhi nyɛ lɛ fɛn nyɛ́n dú Ɔwɔ ẅì hɔ̀n ankaẅì-bùtan léyi bɔsɔ́ nyɛ́n mán Zhezü Krisì mɛhi nɔn.

²⁷ Nyɛ lɛ fɛn, annanwɔrɛmɛ̀n lɔ, nyɛ́n dú ɔbɔ̀sɔ mɛ̀n ɛnshikru-wá mɛ̀n nyɛ́n mán Krisì mɛhi kɩ ɔmu lɔ, eci léyi nɛ̀n tán bɔ̀ nɔn, nyɛ́n ẅɛn nɛ̀n edomɛ̀n.

²⁸ Ke dú kɛ bɔ̀ dú Zhüifɛ̀n-wrɔn, kɩ bɔ̀ sɩ̀ dù Zhüifɛ̀n-wrɔn mán, bɔ̀ dú ɔwɔ̀n-wrɔn, kɩ bɔ̀ dú ɔwrɔn kora mán, bɔ̀ dú ɛnconwrɔn, kɩ bɔ̀ dú ɛnnyɔnwrɔn mán, vɔ̀nshɛ́-ci bàda nɛ̀n ɛmɛ̀n; annanwɔrɛ mɛ̀n lɔ, nyɛ lɛ fɛn nyɛ́n dú eci zri, Krisì mɛhi ny'ɔbɔ̀sɔ̀ lɔ mɛ̀n.

²⁹ Ke dú kɛ nyɛ́n dú Krisì tɛn hô, zɛtɛn nyɛ́n dú Abrahamɛ̀n mɛẅi-bɔ̀ kɩ nyɛ lɛ cɔ́ ànja léyi Ɔwɔ wá ɔmùan nɔn.