Efɛzɛ̀n anmàn-bɔ̀ 4 - Ɛmɛẅi ankà ankrànkràn 2003

Edùwrú-ẅia bɔ̀sɔ̀

¹ Mɛ sɛ́n nyɛ̀n, mɛ̀n léyi mɛ̀n dú anwɔn-mɛ̀n-wá-wrɔn ɔmuhi mɛ̀n dú Ɛẅɛnwrɔn ci-bɩ̀tan-wrɔn nɔn: nyɛ́n léyi Ɔwɔ bi nyɛ̀n, ny'esùnàn kè dú ɛnyrɔnnan mɛ̀n kɛ tán ebi ndɔ lɔ.

² Nyɛ́n dú ɛnvra lɔ fɛn edomɛ̀n ɛnhi-sɩemɛ̀n, nyɛ́n ẅɛn ɛnbɔrɛ-wɔ̀ mán ɛnbɔrɛ-ẅɛ̀n-hɛ́n. Nyɛ́n shri ny'edomɛ̀n nyɛ́n bɩ́ ɛcüɛn mɛ̀n.

³ Nyɛ́n hán kèkrèmɛ̀n nyɛ́n ẅɛn ɔbɔ̀sɔ̀ léyi Ɛnhɛ́n Prɔnprɔn tán nyɛ̀n anwɔwɔ mɛ̀n, hɩ kɛ bɔsɔ́ nyɛ̀n eci zriemɛ̀n nɔn.

⁴ Edùwrú-ẅia zri mán Ɛnhɛ́n Prɔnprɔn zri kɩ ndù, ɔmu zri lɔ de esɛ́ léyi Ɔwɔ bi nyɛ̀n n'ɛmɛ̀n nɔn, nɛ́n zri kɩ nɛ́n dù.

⁵ Ɛẅɛnwrɔn zri kɩ ndù, ankaẅì-bùtan zri kɩ dù, ɛnshikru-wá zri kɩ dù;

⁶ Ɔwɔ zri kɩ ndù, anwrɔnẅì lɔ fɛn yɔ Zi, n'ɛyri-ẅɛ̀n dú eci lɔ fɛn wú, nɛ hán eci anwrɔn lɔ fɛn mɛ̀n kɩ nɛ̀n dú anwrɔn lɔ fɛn mɛ̀n.

⁷ Tɛ́n, bɔ́ ɛmɛ̀n lɔ ɔwrɔnwrɔn yɛ tán n'eci, eci tɔ̀n léyi Krisì kɛ tán ankora nɔn.

⁸ Owrú Prɔnprɔn mɛ̀n yɛ dɔ̀ le: “Ɛnvra léyi nɛ́n kà nɛ̀n hɔ́n ɛwú nɔn, nɛ̀n ẅɛn anwɔn-mɛ̀n-wá-bɔ̀; nɛ̀n ce anwrɔnẅì ɛci.”

⁹ Zɛtɛn “Nɛ́n kà nɛ̀n hɔ́n ɛwú” hɩ mɛ̀n kɛ dɔ̀ le anwɔntan? Ndɔ lɔ ke yé tán le nɛ́n kàkɛ ɛnhibɩ́ ɛnvrɛ̀n mɛ̀n.

¹⁰ Ɔwrɔn léyi kakɛ nɔn, nɛ̀n dú ɔwrɔn zri léyi nkà hɔ́n anhobɩ́ ɛwúɛ hɛ́n, ô nɛ̀n yɩ́ ɛnhibù mumù lɔ fɛn.

¹¹ Nɛ́n de nɛ̀n ce ɔwrɔnwrɔn eci: ndɔ hɔ̀n nɛ̀n srɔ ɔkɔhɔ̀n-wá-bɔ̀, ɛnjanbɔ̀ srɔ Ɔwɔ-mùanwú-ankà-dɔ́-bɔ̀, kɩ ndɔ hɔ̀n vru srɔ Ɛmɛẅi ankà Ankrankran dɔ́-bɔ̀, Ɔwɔ-bɔ̀, ankà-yé-bɔ̀.

¹² Ɔmu lɔ de nɛ̀n hán Ɔwɔ-fɛcüè lɔ krɔn kpehɛ́n kè dú n'eci-bɩ̀tan-kɔ̀hɔ́n mɛ̀n, ô kɛ̀ hán Krisì dùwrú-ẅia lɔ kè dú evrisɩemɛ̀n nɔn.

¹³ Ɔmu lɔ de, bɔ́ lɔ fɛn bɔ́ lɛ cɔ́ ankaẅì-bùtan bɔ̀sɔ̀ Ɔwɔ Ẅì nyriemɛ̀n; bɔ́ lɛ srɔ anwrɔn fán hɔ̀n léyi y'ɔsɔ́ mán Krisì tɛn lɔ ke le dú eci zri léyi sɛ́n nmù nɔn.

¹⁴ Zɛtɛn, bɔ́ sɩ̀ vru dú ɛẅì hɔ̀n léyi Ɔwɔ ankà-dɔ̀ nyàntɛn hɔ̀n dɔ̀nwrɔ̀n kɛ kɛ́n sɩ́ ɛzɛnmɛ̀n, kɩ ɛfrɛ́n-bɔ̀ kɛ wán sɩ́ ɛzrɛ́n levri wú nɔn.

¹⁵ Tɛ́n, annanwɔrɛ ankà-dɔ́ mɛ̀n mán ɛcüɛn mɛ̀n, bɔ́ lɛ sɔ́ eci lɔ fɛn mɛ̀n, Krisì léyi dú ɛnkru nɔn n'ɛtɛ̀sɛ̀n hɔ́n mɛ̀n.

¹⁶ N'ɛkɔrɛ̀-levriemɛ̀n de edùwrú-ẅia dú eci léyi edù sɔ́, hɩ dú ɔbɔ̀sɔmɛ̀n anvrɛnvrɛn nɛ́n mán edùwrú mumù lɔ fɛn mɛhi. Ɔmu lɔ de, ɛnvra léyi edùwrú ci-hɔ̀n lɔ fɛn ke dú esùnanmɛ̀n anvrɛnvrɛn kɛ hán ɔmu le ke ji nɔn, edùwrú-ẅia lɔ fɛn ke dú ɛsɔ́ mɛ̀n kɩ kɛ cɔ́ ecüì ɛcüɛn mɛ̀n.

Krisì-sɛ̀nkɛn-bɔ̀ wúvà wrù lɔ

¹⁷ Nyàn eci léyi mɛ sán nyɛ̀n ɛshishiemɛ̀n Ɛẅɛnwrɔn bɩmɛ̀n nɔn: nyɛ́n bɩ́ hán eci kɛ cá anwrɔn hɔ̀n léyi kè sɩ̀ nyrì Ɔwɔ, hɩ y'ankà-tro ke sɩ́ ezrɛ́nmɛ̀n nɔn.

¹⁸ Y'ɛnkruemɛ̀n-ẅɛ̀n dú ɛyri-yɔwɔ mɛ̀n; yɔ sɩ̀ ẅɛ̀n ɛwúvà léyi dú Ɔwɔ yri kɛ và nɔn ɛnzri mán, ɔmuhi y'ɔbrɔ̀sà lɔ sɛ́n nmù, kɩ ɛbɔrɛ sɔ́ yɔ hán obù hɔ́ nɔn.

¹⁹ Yɔ sɩ̀ vrù ẅɛ̀n anvɛvrà ezìwúɛ; yɔ dú eci-gbangbàn-hán mɛ̀n, kɩ yɔ hán ɛnbrá mɛ̀n ci mɛ̀ntɛ mɛ̀ntɛ, yɔ sɩ́ ẅɛn y'edomɛ̀n yɔ hɛ́n rɔ́a.

²⁰ Kè sɩ̀ dù ndɔ lɔ de, kè dù ankà-yé léyi nyɛ́n cɔ́ Krisì wú nɔn!

²¹ Annanwɔrɛ mɛ̀n lɔ, nyɛ́n yá ankà lɔ fɛn léyi dú Krisì tɛn nɔn, kɩ ɔmuhi, nyɛ́n dú Krisì-sɛ̀nkɛn-bɔ̀ nɔn, ye yé nyɛ̀n annanwɔrɛ ankà léyi dú Zhezü mɛ̀n nɔn.

²² Zɛtɛn ke ji le ny'esùnan gbànvri teze lɔ, nyɛ́n tecüe ny'eci-gbànvri-gbàngbàn-hán léyi y'ɛfrɛ́n-ankà-tro hɔ̀n ke sɩ́ ezrɛ́n mɛ̀n nɔn.

²³ Ke ji le nyɛ́n teze ny'edomɛ̀n kokroho yɛ crɔn nyɛ̀n owrù, ɛnbɔrɛ mɛ̀n mán ɛnhɛ́n mɛ̀n.

²⁴ Nyɛ́n cɔ́ ɛwúvà wrù ceci léyi yɛ hán cá Ɔwɔ picɛ̀, hɩ ke yé n'edomɛ̀n ɛnyrɔnnan mán prɔnprɔn wúvà mɛ̀n, ɛwúvà léyi dú annanwɔrɛ ci nɔn.

²⁵ Hɩ kruhú, nyɛ́n kɔ́n ɛyɔ̀n-ankà nyɛ́n cüe! Ke ji le ɔwrɔnwrɔn kɛ̀ dɔ́ nɛ́n nyran ankà annanwɔrɛ, ɔmuhi bɔ́ lɛ fɛn bɔ̀ dú edùwrú zri mɛ̀n-bɔ̀ nɔn.

²⁶ Ke dú kɛ nye bɩ́ ɛmɛ̀nhyì hô, nyɛ́n bɩ́ hán ɛgbàn; ny'ɛmɛ̀nhyì-bɩ̀ lɔ kɛ̀ vá ɛnhi yakɛ́ ɛnbri kè bore.

²⁷ Nyɛ́n bɩ́ tán anwa-wrɔn ɛkɔrɛ̀-levri kɛ ká nyɔn nyɛ̀n ɛwúɛ.

²⁸ Ɔwrɔn léyi ke yerɛ ɛci nɔn, kɛ̀ kɛ́n eci-yerɛ kɛ̀ hɛ́n; ke ji le nɛ̀n bɩ́ n'ɛmàn anhyrɛ̀ lɔ nɛ̀n hán ɔkɔ̀hɔ̀n, ô nɛ̀n cɔ́ ɛci nɛ̀n zî, kɩ ɔmu lɔ de, nɛ lɛ cɔ́ ɛci nɛ̀n wá ɛmian-bɔ̀ ɛkɔrɛ̀ nɔn.

²⁹ Ankà-dɔ̀ gbàngbàn zriɛmɛ́n ke bɩ́ dú ny'ɔmùan lɔ mɛ̀n kɛ srɔa; nyɛ́n dɔ́ ankà ankrànkràn léyi kɛ wá ɛkɔrɛ̀ hɩ ke yɩ́ ɔwrɔn edù, ô ɔmu lɔ anwrɔn hɔ̀n léyi ke die nyɛ̀n nukùɛ nɔn, nyɛ́n hán yɔ anvrɛn.

³⁰ Nyɛ́n bɩ́ hán Ɛnhɛ́n Prɔnprɔn léyi Ɔwɔ tán nyɛ̀n nɔn ɛnhyɔ̀bɔ̀ kɛ cɔ̀a; nɛ̀n dú dalɛfùɛ-di-wrɔn léyi ke yé le ɛnbì kɛ lɛ và, Ɔwɔ kɛ lɛ mrɛ́n nyɛ̀n ɛgbàn mɛ̀n kokroho kɛ̀ sɔhɔ́.

³¹ Nyɛ́n wrɔ́ esù she ny'ɛtɛ̀sɛ̀n, ankà-tro drɔ lɔ fɛn, edòmɛ̀n-wú-ci lɔ fɛn, ɛmɛ̀nhyì-bɩ lɔ fɛn, bobo-dì mán ɔwɔra hɔ̀n lɔ fɛn. Nyɛ́n cɔhɔ́ anbɔrɛ-ci-hán mɛ̀ntɛ mɛ̀ntɛ lɔ fɛn mɛ̀n.

³² Nyɛ́n ẅɛn ɛnbɔrɛ-wɔ̀, ô ny'edomɛ̀n cüɛ̀n kè yɩ́ nyɛ̀n ɛmɛ̀n; nyɛ́n bɩ́ ɛgbàn nyɛ́n ce ny'edomɛ̀n, hán ɔmu le Ɔwɔ bɩ́ ny'ɛgbàn lɔ ce nyɛ̀n Krisì bɩmɛ̀n nɔn.