Efɛzɛ̀n anmàn-bɔ̀ 1 - Ɛmɛẅi ankà ankrànkràn 2003

Ebinyan

¹ Ebinyan ndɔ lɔ dú Pɔlɛ̀n yri kɛ và, nɛ́n léyi Ɔwɔ kɔrɛ̀-levriemɛ̀n, nɛ̀n dú Zhezü Krisì kɔhɔ̀n-wá-wrɔn nɔn. Anwrɔn lɔ fɛn léyi dú Efɛzɛ̀n anmàn, hɩ dú Ɔwɔ-fɛcüè-bɔ̀ mɛ̀n, hɩ ke dí ɔmùan-zri yɔ mán Zhezü Krisì mɛhi y'ɔbɔ̀sɔ̀ lɔ mɛ̀n nɔn:

² Ɔwɔ bɔ́ Zi mán Ɛẅɛnwrɔn Zhezü Krisì kɛ̀ tán nyɛ̀n ɛnshifù mán anwɔwɔ.

Anvrɛn hɔ̀n léyi Ɔwɔ kɛ tán bɔ̀ Krisì bɩmɛ̀n nɔn

³ Bɔ̀ mrɛ́n Ɔwɔ léyi dú bɔ́ Ɛẅɛnwrɔn Zhezü Krisì nɛ́n Zi nɔn! Nɛ̀n fú bɔ̀ ɛnshi bɔ́ mán Krisì mɛhi b'ɔbɔ̀sɔ̀ lɔ mɛ̀n, ɛnvra léyi nɛ̀n tán bɔ̀ ɛnhɛ́n mɛ̀n shifù lɔ fɛn léyi dú anhobɩ́ nɔn.

⁴ Ɛnhibù kɛ vá bukru, Ɔwɔ gɔ́ mrɛ́n bɔ̀ nbɩ̀, ô bɔ́ dú nɛ tɛn Krisì bɩmɛ̀n, ô bɔ́ dú prɔnprɔn mán ɛfifiemɛ̀n n'ezìwú. N'ɛcüɛ̀n lɔ mɛ̀n,

⁵ Ɔwɔ gɔ́ wá tán le nɛ lɛ srɔ bɔ̀ n'ɛẅì hɔ̀n Zhezü Krisì bɩmɛ̀n; n'ɛnhyɔ̀bɔ-nyrì lɔ mɛ̀n, nyàn eci léyi nɛ̀n ji nɔn.

⁶ Bɔ̀ mrɛ́n Ɔwɔ ecice vri léyi nɛ̀n tán bɔ̀ ankora, hɩ dú n'ɛcüɛn Ẅì lɔ nɔn.

⁷ Ɔmuhi, Krisì cice léyi dú nɛ́n dùku nɔn, n'ɛmɛ̀n lɔ bɔ̀ cɔ́ esrúze, kɩ bɔ́ ɛgbàn hɔ̀n lɔ bɩ́ ce bɔ̀. Ɔmu lɔ de Ɔwɔ yé bɔ̀ n'ɛnshifù nɛncüì-dì,

⁸ ɛnshifù léyi nɛ̀n tán bɔ̀ bobrebe ɛnvra léyi nɛ̀n tán bɔ̀ ankà-nyrì mán ɛnkruemɛ̀n-ẅɛ̀n léyi sɛ́n nmù nɔn:

⁹ nɛ̀n hán tán bɔ̀, bɔ́ nyri n'ankɔ́nda ankà-bán-ankà, léyi n'ɛnyhɔ̀bɔ̀-nyrì lɔ mɛ̀n, nɛ́n gɔ̀ wá tán le nɛ lɛ hán Krisì bɩ́mɛ̀n nɔn.

¹⁰ Ankɔ́nda ci-hán ndɔ léyi Ɔwɔ kɛ lɛ tro n'ɛhán ɛnhibù trɔ vra nɔn, dú hɩ le nɛ lɛ borɛ eci lɔ fɛn léyi dú anhobɩ́ mán ɛnhi nɔn ɛkru, ɛfrawrɔn zri tɛ̀sɛ̀n, Krisì.

¹¹ Bɔ́ mán Krisì mɛhi b'ɔbɔ̀sɔ̀ lɔ mɛ̀n, bɔ̀ cɔ́ b'ɔmùan-wá-ci lɔ, ɔmuhi Ɔwɔ gɔ́ mrɛ́n bɔ̀ nbɩ̀, n'ankɔ́nda ankà lɔ mɛ̀n; kɩ Ɔwɔ kɛ hán eci lɔ fɛn hán ɔmu le nɛ wá tán kɩ ne ji nɔn.

¹² Bɔ̀ mrɛ́n Ɔwɔ vrisì lɔ, bɔ́ léyi bɔ̀ dú ɛnvrakpà-bɔ̀, bɔ̀ bɩ́ bɔ́ esɛ́ bɔ̀ wá Krisì mɛ̀n nɔn!

¹³ Nyɛ́n mán ɛnvra léyi nyɛ́n yá annanwɔrɛ Mɛẅi ankà Ankrankran léyi vá sɩ́ nyɛ̀n ɛnkrukɔrɛ̀ nɔn, nyɛ́n bú Krisì ankà nyɛ́n tán ankaẅì; zɛtɛn, Ɔwɔ wá nyɛ̀n n'eci-woroan-ci ɛwú, ɛnvra léyi nɛ̀n tán nyɛ̀n Ɛnhɛ́n Prɔnprɔn léyi nɛ̀n wá ɔmùan nɔn.

¹⁴ Ɛnhɛ́n Prɔnprɔn ke di anvrɛn hɔ̀n léyi Ɔwɔ hɛ́n nɛ́n fɛcüè nɔn dalɛfuɛ; nɛ tán bɔ̀ esɛ́ le bɔ́ lɛ cɔ́ anvrɛn hɔ̀n lɔ ɛnvra léyi bɔ́ ebɩ̀die lɔ kɛ lɛ sɛ́n nmù nɔn. Zɛtɛn bɔ̀ mrɛ́n Ɔwɔ vrisì lɔ!

Pɔlɛ̀n Wɔ-sɛ̀n

¹⁵ Nyàn eci le kruhú, zɛtɛ̀ léyi mɛ̀n yá yɛ dɔ́ ny'ankaẅì-bùtan-ẅɛn ankà Ɛẅɛnwrɔn Zhezü wú mán ɛcüɛ̀n léyi nyɛ́n ẅɛn ankaẅì-bùtan-bɔ̀ lɔ fɛn wú nɔn,

¹⁶ mɛ́n sɩ́ trɔ Ɔwɔ ɔkùɛn tán ny'ɛkruhú. Me tro ny'ankà m'Ɔwɔ-sɛ̀n hɔ̀n lɔ mɛ̀n

¹⁷ kɩ mɛ sán dɔ́ Ɛẅɛnwrɔn Zhezü Krisì Wɔ lɔ, bɔ́ Zi léyi ẅɛn eci-zrɔ nɔn, kɛ̀ tán nyɛ̀n ankà-nyrì Hɛ́n léyi ke le yé nyɛ̀n nɛ́n, ô kɛ̀ hán ye nyri nɛ̀n annanwɔrɛ mɛ̀n.

¹⁸ Nɛ̀n vuru nyɛ̀n anvɛ̀ n'ɛyri-kàn lɔ mɛ̀n, ô nyɛ́n cɔ̀ nyɛ́n nyri esɛ́ léyi, hɩ kruhú, nɛ̀n bi nyɛ̀n, ô nyɛ́n nyri anvrɛn hɔ̀n léyi nɛ̀n tán anwrɔn hɔ̀n léyi dú nɛ tɛn, anvrɛn ndɔ hɔ̀n lɔ, nyɛ́n nyri n'ɛnnɛ̀ncüì-dì mán n'eci-zrɔ,

¹⁹ ô, nyɛ́n nyri ɛkɔrɛ̀-srɔn vri léyi nɛ́n ẅɛ̀n hɩ dú bɔ́ tɛ́n bɔ́ ankàẅì-bùtan-ẅɛn-bɔ̀ lɔ nɔn. Ɛkɔrɛ̀-srɔn ndɔ lɔ, dú ɛkɔrɛ̀-srɔn léyi Ɔwɔ yé n'ecüì kɔrɛ̀levriemɛ̀n nɔn,

²⁰ Ɛnvra léyi nɛ̀n bɩ́ Krisì owú-bɔ̀ mɛ̀n nɛ̀n sɩ́ ɔkɔrɛ-bɔ̀ mɛ̀n kɩ nɛ̀n hán yi yɛ́ nɛ̀n ezì-kɔrɛ̀a anhobɩ́ anmàn nɔn.

²¹ Anhobɩ́ anmàn lɔ, Krisì dú ɛkɔrɛ̀-levri lɔ fɛn wú, ecüì lɔ fɛn wú, ɛkɔrɛ̀-srɔn lɔ fɛn wú, ɛyri-ẅɛ̀n lɔ fɛn wú mán ɛkɔrɛ̀-wú-ci lɔ fɛn léyi yɛ lɛ cɔ́ ɛnhi ndɔ lɔ wú mán hɩ le yɛ lɛ cɔ́ ɛnhi anmàn léyi dú ezì kɛ và nɔn wú.

²² Ɔwɔ hɛ́n eci lɔ fɛn Krisì nán krùgbɛ̀n kɩ bɩ́ nɛ̀n tán Ɔwɔ-fɛcüe-bɔ̀ ô nɛ̀n dú y'ɛfra-wrɔn cüìcüì.

²³ Ɔwɔ-fɛcüè dú Krisi dùwrú; n'ɛmɛ̀n de Krisì dú annanwɔrɛ mɛ̀n, nɛ́n léyi nɛ̀n yɩ́ ɛnhibù mumù lɔ fɛn mɛ̀n nɔn.