Kɔlɔsèn anmàn-bɔ̀ 4 - Ɛmɛẅi ankà ankrànkràn 2003

¹ Ankà-yé-bɔ̀ nyɛ́n ẅɛn ny'anwɔ̀n-bɔ̀ anvrɛnvrɛn mɛ̀n mán ɛnyrɔnnan mɛ̀n. Kè bru nyɛ̀n le, nyɛ́n mán nyɛ́n ẅɛn Ankà-yé-wrɔn tɔ̀n dú anhobɩ́.

Ankà-woroan-yé

² Nyɛ́n sɛ́n Ɔwɔ ɔmùan-zri-diemɛ̀n, ny'ɔwɔ-sɛ́n mɛ̀n lɔ, nyɛ́n nyɔn ɛshishiemɛ̀n mán enyri-kùɛn-tán mɛ̀n.

³ Ɛnvra zri lɔ mɛ̀n, nyɛ́n sɛ̀n nyɛ́n tán bɔ́ mán, ô Ɔwɔ kɛ̀ tán bɔ̀ ɛnvra ankrankran bɔ̀ yé n'ɔmùan-ankà lɔ, bɔ̀ dɔ́ Krisì ankà-bán-ankà lɔ. Annanwɔrɛ mɛ̀n lɔ, hɩ le kruhú de mɛ̀n dú zɛtɛ̀ lɔ anwɔ̀n-mɛ̀n-wá-wɔn mɛ̀n nɔn.

⁴ Nyɛ́n sɛ̀n, ô mɛ̀n cɔ́ ɛyri mɛ̀n dɔ́ ankà-bán-ankà ndɔ lɔ kpete mɛ̀n, mɛ̀n tán yɔ ye nyrì, hán ɔmu le ke ji le mɛ̀n hán nɔn.

⁵ Ny'esùnàn lɔ kè dú ankà-nyriemɛ̀n kɛ̀ tán anwrɔn hɔ̀n léyi ke sɩ̀ dù Krisì-sɛ̀nkɛn-bɔ̀ nɔn, ny'eci totɔtɔ̀n léyi nyɛ lɛ hán nɔn mɛ̀n.

⁶ Ke ji le ny'ɔmùan-ankà-dɔ̀ kɛ̀ zrɔ anwrɔn, ô kɛ̀ ẅɛn vɔ̀nshɛ́; nyɛ́n nyrì mrɛ́n ɔwrɔnwrɔn ɔmùan anvrɛnvrɛn.

Ɔtrɔmɛ̀n binyan

⁷ Tishikɛ̀n, bɔ́ nyran, ɔwrɔn-nɛ́n-muan-ẅì anvrɛnvrɛn ndɔ lɔ mán ɔmùan-zri-di-wrɔn kɔrɛ̀-wá-wrɔn léyi dú Ɛẅɛnwrɔn ci-bɩ̀tan-kɔ̀hɔ̀n lɔ mɛ̀n nɔn, kɛ lɛ dɔ́ nyɛ̀n m'ɛmɛẅi ankà hɔ̀n lɔ fɛn.

⁸ Me yüre nyɛ̀n nɛ́n kɩ, ô nɛ̀n dɔ́ nyɛ̀n bɔ́ edúyri ankà ô, nɛ̀n bi ɛnbɔrɛ nɛ̀n wá nyɛ̀n.

⁹ Onezimɛ̀n dú n'ɛhɔ̀n-sɩ́-wrɔn, ɔwrɔn-nɛ́n-mùan-ẅì anvrɛnvrɛn léyi ke di ɔmùan-zri, hɩ dú ny'ɛmɛ̀n-wrɔn tɔ̀n nɔn. Yɔ lɛ dɔ́ nyɛ̀n eci lɔ fɛn léyi ke ci ɔnu lɔ nɔn yi ankà.

¹⁰ Aristarkɛ̀n léyi nɛ́n mɛhi bɔ́ dú anwɔn-mɛ̀n-wá-wɔn mɛ̀n nɔn, ke bi nyɛ̀n nyan, kɩ Markɛ̀n léyi dú Barnabasɛ̀n nɛ́n muan-ẅì nɔn mán ke bi nyɛ̀n nyan. Nyɛ́n gɔ̀ cɔ́ Markɛ̀n ankà nyɛ́n yá: ke dú kɛ nɛ vá ny'eyri hô, nyɛ́n ẅɛn nɛ̀n anvrɛnvrɛn.

¹¹ Zhezü léyi ye bi Zhüstüsɛ̀n nɔn, mán ke bi nyɛ̀n nyán. Anwrɔn anhɔ̀n ndɔ hɔ̀n lɔ, yɔ kɩ yɔ dú Zhüifɛn-bɔ̀ léyi yɔ mɛhi bɔ́ hán Anhobɩ́ Nɛ̀ncüì-dúyri kɔ̀hɔ̀n; yɔ dú m'ɛnbɔrɛ-bi-wá-bɔ̀ vri.

¹² Epafrasɛ̀n léyi dú nɛ́n mán ny'ɛmɛ̀n-wrɔn tɔ̀n nɔn, ke bi nyɛ̀n nyan; Zhezü Krisì ci-bɩ̀tan-wrɔn ndɔ lɔ dú nyɛ́n Ɔwɔ-sɛ̀n-tán mɛ̀n ɛnvra lɔ fɛn edùyiemɛ̀n, ô nyɛ́n nyɔn ɛshishiemɛ̀n ɛnhɛ́n mɛ̀n mán ɛsɔ́mɛ̀n, nyɛ́n krɔn kpehɛ́n nyɛ́n hán Ɔwɔ kɔrɛ̀-zì-ci.

¹³ Me le di nɛ̀n dalɛfuɛ ndɔ lɔ tɛ̀: nɛ kán ɛgbàn bobrebe ny'ɛkruhú, anwrɔn hɔ̀n léyi dú Laodise mán Hierapolisɛ̀n anmàn nɔn yɔ mán.

¹⁴ Lükɛ̀n, bɔ́ nyran anvrɛn léyi dú anháẅi-hán-wrɔn, mán Démasɛ̀n mɛhi ke bi nyɛ̀n nyan.

¹⁵ Nyɛ́n tán anwrɔn-nɛ́n-muan-ẅì hɔ̀n léyi dú Laodise mán Nɛnfa léyi Ɔwɔ-fɛcüè kɛ borɛkru n'eyri ɛbemɛ̀n nɔn, bɔ́ ebinyan.

¹⁶ Ɛnvra léyi nyɛ krɛ́ owrú ndɔ lɔ nɔn, nyɛ́n hán ô yɛ krɛ́ nɛ̀n yɛ tán Laodise Wɔ-fɛcüè-bɔ̀; nyɛ́n dùku nyɛ́n krɛ́ owrú léyi ye le dú nanvrɛn ye yüre nyɛ̀n nɔn.

¹⁷ Nyɛ́n dɔ́ Arshipɛ̀n ankà ndɔ lɔ: “È bɩ́ ɛnkruemɛ̀n anvrɛnvrɛn ɛ̀ hán ɔkɔ̀hɔ̀n léyi yɛ tán mɛ́n Ɛẅɛnwrɔn ci-bɩ̀tan-kɔhɔ̀n lɔ mɛ̀n nɔn.”

¹⁸ Mɛ́n dùku de mɛ̀n merɛ́n ankà ndɔ hɔ̀n lɔ nɔn: Pɔlɛ̀n binyan. (Kè bru nyɛ̀n le mɛ̀n dú anwɔn-mɛ̀n-wá-wɔn mɛ̀n.) Ɔwɔ shifù kè dú nyɛ̀n ɛmɛ̀n.