Ɔkɔ̀hɔ̀n-wá-bɔ̀ kɔ̀hɔ̀n hán 8 - Ɛmɛẅi ankà ankrànkràn 2003

¹ Kɩ Sɔlɛ̀n cüɛn ɔmu le ye wri Etiɛnɛ̀n. Ɛnbì zri léyi Etiɛnɛ̀n nwù nɔn, ɛgbànkàn vri bukru tán Zherüzalɛmɛ̀n Wɔ fɛcüè-bɔ̀. Ankaẅì-bùtan-ẅɛn-bɔ̀ lɔ fɛn, bonyi y'edomɛ̀n Zhüde mán Samari kpɔsɔ wú, ɔkɔ̀hɔ̀n-wá-bɔ̀ lɔ kɩ badà yɔ ɛmɛ̀n.

Sɔlɛ̀n ke hán Ɔwɔ fɛcüè ɛgbàn

² Ɔwɔ-kɔ̀hɔ̀n-hán-bɔ̀ anvrɛnvrɛn bɩ́ Etiɛnɛ̀n dùwru lɔ wá ɛnhibɩ́ kɩ wú eyú ku Etiɛnɛ̀n wú.

³ Sɔlɛ̀n tɛn, kɛ hán kekremɛ̀n, ô kɛ̀ jrɛ́ Ɔwɔ fɛcüè-bɔ̀ lɔ; ne ci ebɩ́bɩ́, nɛ ẅɛn ankaẅì-bùtan-ẅɛn-bɔ̀ lɔ, wúcɔ̀ mán wúyɔ̀ kɩ ne ku yɔ anwɔn-mɛ̀n-wá-wɔn mɛ̀n.

Filipɛ̀n kɛ dɔ́ ɛmɛẅì ankà ankrankran lɔ Samari kpɔsɔ wú

⁴ Anwrɔn hɔ̀n léyi yɔ bonyì nɔn, ke ci Samari kpɔsɔ wú kɛ dɔ́ Ɛmɛẅi ankà Ankrànkràn lɔ.

⁵ Filipɛ̀n hɔ́n Samari anmàn cüìcüì lɔ kɩ bukru kɛ dɔ́ nanvrɛn anmàn-bɔ̀ lɔ, Ebɩ̀die-wrɔn lɔ ankà.

⁶ Ɛnvra léyi yɔ yá Filipɛ̀n ankà-dɔ̀ lɔ, hɩ yɛ kán anvɛmɛ̀n-frɛ́n-ci léyi nɛ hán nɔn, anmàn fɛcüè lɔ fɛn dú nɛ̀n nukù die mɛ̀n anvrɛnvrɛn.

⁷ Annanwɔrɛ mɛ̀n lɔ, anhɛ́n gbangbàn ke dú ɛnlɔẅiɛ-bɔ̀ bobrebe edomɛ̀n kɛ srɔ ɛntrɛ, kɛ sɔ́n nkù vri tɔ̀n kɩ ɔkpɔ̀cɔ-bɔ̀ mán ɛsɔ̀ze-bɔ̀ bobrebe kɛ cɔ́ ɔkɔrɛ̀.

⁸ Ɔmu lɔ de pɔpüɛ̀-brà ndù sevri anmàn ndɔ lɔ mɛ̀n nɔn.

⁹ Ɔwrɔn tɔ̀n léyi ye bi Simɔn nɔn gɔ́ dú anmàn ndɔ lɔ mɛ̀n. Nɛ hán seke kɔ̀hɔ̀n kɩ nɛ hán anvɛmɛ̀n-frɛ́n-ci ne yé Samari kpɔsɔ wú anmàn-bɔ̀. Ne bú n'edomɛ̀n nɛ hán ɔwrɔn anvrɛnvrɛn,

¹⁰ kɩ yɔ lɛ fɛn lɔ, sugban-bɔ̀ mán ɛcüìcüì hɔ̀n kɛ ẅɛn n'ɔbɔ̀sɔ̀ bobrebe. Yɛ dɔ̀ le: “Ɔwrɔn ndɔ lɔ dú Ɔwɔ kɔrɛ̀-srɔn, ɛkɔrɛ̀-srɔn léyi ye bi ɛkɔrɛ̀-srɔn vri nɔn.”

¹¹ Yɔ ẅɛn n'ɔbɔ̀sɔ̀ bobrebe, ɔmuhi ɛnvra sheshemɛ̀n de nɛ hán anvɛmɛ̀n-frɛ́n-ci seke mɛ̀n ne yé yɔ nɔn.

¹² Tɛ́n ɛnvra léyi yɔ bú Filipɛ̀n mɛẅi ankà ankrankran léyi kɛ dɔ́ anhobɩ́ nɛ̀ncüì-dúyri mán Zhézü Krisì domɛ̀n ankà tán ankaẅì nɔn, yɔ hán yɛ wá yɔ ɛnshi ɛnkru, wúcɔ̀ mán wúyɔ̀.

¹³ Simɔn dùku mán bú tán ankaẅì kɩ yɛ wá nɛ̀n ɛnshi ɛnkru; nɛ̀n yɛ́ Filipɛ̀n ɛtɛ̀sɛ̀n kɩ nɛ̀n dú anvɛmɛ̀n-frɛ́n mɛ̀n, anvɛmɛ̀n-frɛ́n-ci ɛvrivri hɔ̀n mán ɛci-woroan-ci hɔ̀n léyi nɛ kàn yɛ hán nɔn.

¹⁴ Ɔkɔ̀hɔ̀n-wá-bɔ̀ léyi dú Zherüzalɛmɛ̀n anmàn nɔn, ncɔ́ nyrì le Samari kpɔsɔ wú anmàn-bɔ̀ cɔ́ Ɔwɔ mùan-ankà yá; zɛtɛn yɔ hán Piɛrɛ̀n mán Zhan hɔ́n cɔ́ yɔ.

¹⁵ Ɛnvra léyi Piɛrɛ̀n mán Zhan cɔ́ Samari kpɔsɔ wú nɔn, yɔ sɛ̀n yɔ tán ankaẅì-bùtan-ẅɛn-bɔ̀, ô yɔ cɔ́ Ɛnhɛ́n Prɔnprɔn.

¹⁶ Annanwɔrɛmɛ̀n lɔ, Ɛnhɛ́n Prɔnprɔn kɛ vá kakɛ y'ɛmɛ̀n lɔ ɔwrɔnẅì zriɛmɛ́n wúɛ; ɛnshi de yɛ wá yɔ ɛnkru Ɛẅɛnwrɔn Zhezü bɩmɛ̀n.

¹⁷ Zɛtɛn Piɛrɛ̀n mán Zhan di yɔ ankɔrɛ̀ ɛwú kɩ yɔ cɔ́ Ɛnhɛ́n Prɔnprɔn.

¹⁸ Ɛnvra léyi Simɔn kán ɔmu le Ɛnhɛ́n Prɔnprɔn kɛ va cɔ́ ankaẅì-bùtan-ẅɛn-bɔ̀ lɔ, ɛnvra léyi ɔkɔ̀hɔ̀n-wá-bɔ̀ ke di yɔ ankɔrɛ̀ ɛwú nɔn, nɛ̀n tán Piɛrɛ̀n mán Zhan ɔkùa

¹⁹ kɩ nɛ dɔ̀ le: “Mɛ̀n mán nyɛ́n tán mɛ̀n ɛkɔrɛ̀srɔn ndɔ lɔ, ô anwrɔn hɔ̀n léyi me le di ɛkɔrɛ̀ ɛwú nɔn, kɛ̀ cɔ́ Ɛnhɛ́n Prɔnprɔn.”

²⁰ Tɛ́n Piɛrɛ̀n mrɛ́n nɛ̀n ɔmùan le: “Ke ji le v'ɔkùa mán vɛ́n mùmù mɛhi nyɛ́n jrɛ́, ɔmuhi e tro le Ɔwɔ cice lɔ ɔkùa mɛ̀n de yɛ wɔ́ nɛ̀n nɔn!

²¹ È sɩ̀ ẅɛ̀n eci-dɛ́-ci zriɛmɛ́n hɩ ká kɛ́n ɛkɔrɛ-levri zriɛmɛ́n ankà ndɔ lɔ mɛ̀n, ɔmuhi ɛnbɔrɛ kè sɩ̀ nyrɔn mɛ́n Ɔwɔ zìwú nɔn.

²² Ɛ̀ kɔ́n v'ankà-tro gbàngbàn lɔ è ze, ɛ̀ sɛ́n Ɛẅɛnwrɔn, ô ke dú kɛ, ɛkɔrɛ̀levri ke le dù hô, nɛ̀n bɩ́ ankà-tro gbangbàn léyi ɛ ẅɛ̀n nɔn, nɛ̀n ce mɛ́n.

²³ Mɛ kán ɔmu le, eci-gbangbàn drɔ yɩ́ mɛ́n ɛmɛ̀n, kɩ è dú ɛgbàn wɔ̀nwrɔn.”

²⁴ Zɛtɛn Simɔn kɛ dɔ́ Piɛrɛ̀n mán Zhan le: “Nyɛ́n dùku nyɛ́n sɛ́n Ɛẅɛnwrɔn nyɛ́n tán mɛ̀n, ô eci-ẅì zriɛmɛ́n ke bɩ́ hán mɛ̀n ankà léyi nyɛ́n dɔ̀ nɔn hɩ wú.”

²⁵ Ɛnvra léyi yɔ di Ɛẅɛnwrɔn ankà-dɔ̀ lɔ nɛ́n dalɛfuɛ trɔ nɔn, ɔkɔ̀hɔ̀n-wá-bɔ̀ anyhrɛ̀ lɔ vru ɛmɛẅi hɔ́n Zherüzalɛmɛ̀n anmàn. Ɛnlevri dù hɔ́n mɛ̀n lɔ, yɔ dɔ́ Ɛmɛẅi ankà Ankrankran lɔ, Samari kpɔsɔ wú anmàn bobrebe.

Filipɛ̀n mán Etiopi govràn kɔ̀hɔ̀n-hán-wrɔn

²⁶ Ɛẅɛnwrɔn-kùyüre-wrɔn tɔ̀n dɔ́ Filipɛ̀n le: “È bɩ́ ɛnlevri léyi kɛ hɔ́n ecüemɛ̀n, hɩ ke ci Zherüzalɛmɛ̀n kɛ hɔ́n Gaza anmàn nɔn. Ɛnlevri ndɔ lɔ, anwrɔn ke sɩ́ ci nɛ̀n ɛwú.”

²⁷ Ɛnvra zri lɔ Filipɛ̀n hɔ̀n. Kɩ, n'ɛnlevri wú lɔ ɔwrɔn tɔ̀n srɔ: ɔwrɔn ndɔ lɔ nɛ́n dú Etiopi govràn kɔ̀hɔ̀n-hán-wrɔn cüìcüì, kɩ yɛ bɔ́ nɛ̀n ye ze; nɛ́n de yɛ wá nɛ̀n Etiopi nɛ̀ncüì-hi léyi, ye bi Kandasɛ̀n nɔn, nɛ́n nɛ̀ncüì-di-ci lɔ fɛn antamɛ̀n nɔn; nɛ̀n vá Zherüzalɛmɛ̀n anmàn, Ɔwɔ ankɔrɛ̀ ezìwú cue yri

²⁸ kɩ nɛ̀n vru ɛmɛẅi nɛ hɔ́n n'anmàn. Nɛ̀n yɛ́ nɛ́n kpàngɔ-hɛ̀ lɔ mɛ̀n kɩ nɛ krɛ́ Ɔwɔ-mùanwú-ankà-dɔ́-wrɔn Ezahi wrú lɔ.

²⁹ Ɛnhɛ́n Prɔnprɔn kɛ dɔ́ Filipɛ̀n le: “Sɔ̀nba kpàngɔ-hɛ̀ ndɔ lɔ ɛtɛ̀sɛ̀n.”

³⁰ Filipɛ̀n srɛ́ hɔ́n nɛ̀n ɛtɛ̀sɛ̀n kɩ yá Etiopi-wrɔn lɔ ɔmùan kɛ krɛ́ Ɔwɔ-mùanwú-ankà-dɔ́-wrɔn Ezahi wrú lɔ. Ne yrɛ yi le: “Eci léyi ɛ krɛ̀ nɔn ɛ yá n'ɛmɛ̀n hàn?”

³¹ Ɔwrɔn lɔ mrɛ́n ɔmùan le: “Anwɔntan de mɛ lɛ hán mɛ̀n yá n'ɛmɛ̀n, ke dú kɛ ɔwrɔn zriɛmɛ́n kè sɩ̀ yé mɛ̀n nɛ́n?” Kɩ nɛ̀n bi Filipɛ̀n kɛ̀ và bru kpàngɔ-hɛ̀ lɔ mɛ̀n, ô kɛ yɛ́ nɛ̀n ɛtɛ̀sɛ̀n.

³² Owrú Prɔnprɔn ankà-dɔ̀ léyi nɛ krɛ̀ nɔ̀n, dú ankà-dɔ̀ ndɔ lɔ: “Nɛ́n dù nɛ̀n hán kɔ̀kɔ̀sɛ̀ léyi ye sɩ́ owri-yri, (owú-kɔ̀ mɛ̀n) kɔkɔsɛ̀-ẅì léyi ke sɩ́ jɔ̀kɔa ɛnvra léyi yɛ kùa nɛ̀n ɛtù nɔn. Nɛ̀n sɩ̀ dɔ̀ ankà zriɛmɛ́n.

³³ Yɛ trɔ nɛ̀n ezì kɩ nɛ̀n sɩ̀ cɔ́ ɛnyràn ɛmrɛ̀nciemɛ̀n. Antɔn de kɛ lɛ dɔ́ n'ɛmɛẅi-bɔ̀ ankà nɛ́n? Ɔmuhi yɛ trɔ n'ɛnu hibù wú wúvà lɔ nɔn.”

³⁴ Govràn-kɔ̀hɔ̀n-hán-wrɔn lɔ ke yrɛ Filipɛ̀n le: “Mɛ sɛ́n mɛ́n, ɛ̀ dɔ́ mɛ̀n, antɔn ankà de Ɔwɔ-mùanwú-ankà-dɔ́-wrɔn lɔ kɛ dɔ́ ɔmu lɔ nɛ́n? Nɛ́n dùku n'ankà de nɛ dɔ̀ kale ɔwrɔn nyàntɛn tɔ̀n hàn?”

³⁵ Zɛtɛn Filipɛ̀n bɩ́ ankà-dɔ̀ kɩ bukru owrú ankà-dɔ̀ ndɔ lɔ wú kɛ dɔ́ nɛ̀n Zhezü Mɛẅi ankà Ankrankran lɔ.

³⁶ Yɔ dú ɛnlevri yɔ hɔ̀n kɩ yɔ cɔ́ ɛyri tɔ̀n léyi ɛnshi ndù nɔn. Zɛtɛn govràn-kɔ̀hɔ̀n-hán-wrɔn lɔ kɛ dɔ̀ le: “Nyàn ɛnshi; ecitan de kɛ lɛ kɛ́n m'ɛnshi-kru-wá lɔ kɛ̀ hɛ́n nɛ́n?” [

³⁷ Filipɛ̀n kɛ dɔ́ nɛ̀n le: “Ke dú kɛ ankaẅì-bùtan dú v'ɛnbɔrɛ lɔ fɛn mɛ̀n, yɛ lɛ wá mɛ́n ɛnshi ɛnkru tɛ̀.” Kɩ ɔwrɔn lɔ mrɛ́n ɔmùan le: “Me bú tán ankaẅì le Zhezü-Krisì dú Ɔwɔ Ẅì.”]

³⁸ Zɛtɛn nɛ̀n hán kpàngo-hɛ̀ lɔ sannyɔn. Nɛ́n mán Filipɛ̀n mɛhi yɔ kakɛ ɛnshiemɛ̀n kɩ Filipɛ̀n wá nɛ̀n ɛnshi ɛnkru.

³⁹ Ɛnvra léyi yɔ dú ɛnshiemɛ̀n yɔ srɔ ɛntrɛ nɔn, Ɛẅɛnwrɔn Hɛ́n bɩ́ Filipɛ̀n sɔhɔ́. Govran-kɔ̀hɔ̀n-hán-wrɔn lɔ kè sɩ̀ vrù kàn Filipɛ̀n, tɛ́n pɔpüɛ̀-bra mɛ̀n nɛ̀n bɩ́ n'ɛnlevri nɛ hɔ̀n.

⁴⁰ Filipɛ̀n cɔ́ Azɔtɛ̀n anmàn, zɛtɛn ne ci anmàn anmàn nɛ dɔ́ yɔ ɛyri lɔ fɛn Ɛmɛẅi ankà Ankrànkràn lɔ, hàn kɩ cɔ́ ɛnvra léyi nɛ̀n bru Sezare anmàn nɔn.