Ɔkɔ̀hɔ̀n-wá-bɔ̀ kɔ̀hɔ̀n hán 7 - Ɛmɛẅi ankà ankrànkràn 2003

Etiɛnɛ̀n ankà-dɔ̀

¹ Ɔwɔ-cice-wrɔn cüìcüì lɔ ke yrɛ nɛ̀n le: “Ankà léyi yɛ dɔ́ v'ɛwú nɔn dú annànwɔrɛa?”

² Etiɛnɛ̀n mrɛ́n ɔmùan le: “Dade hɔ̀n mán nmàn-ẅì hɔ̀n, nyɛ́n die mɛ̀n nukùɛ. Eci-zrɔ Wɔ bɩ́ n'edomɛ̀n yé bɔ́ nancüì Abrahamɛ̀n, ɛnvra léyi nɛ̀n dú Mezopotami ɛnhi wú, hɩ nɛ vá hɔ̀n nɛ̀n yɛ́ Haran hi-wú nɔn,

³ kɩ nɛ̀n dɔ́ yi le: ‘Cɔ̀hɔ́ v'ɛnhi lɔ wú, hi mán v'ɛmɛ̀n-bɔ̀ mɛhi, ô ɛ̀ hɔ́n ɛnhi léyi me le yé mɛ́n nɔn wú.’

⁴ Zɛtɛn Abrahamɛ̀n cɔhɔ́ Kalde hi wú kɩ hɔ́n yɛ́ Haran hi-wú. Kɩ ɛnvra léyi nɛ́n zi wù nɔn, hɩ mɛẅi lɔ, Ɔwɔ hán nɛ̀n nɛ̀n dú Haran hi-wú nɛ́n và yɛ́ ɛnhi ndɔ léyi nyɛ́n dú ɛwú zɛtɛ̀ lɔ nɔn.

⁵ Nanvrɛn lɔ Ɔwɔ kè sɩ̀ tán nɛ̀n ɛnhi zriɛmɛ̀n, hɩ ká trɛ̀ kɛ̀ hán ɛnan-trɛ̀ hɔ́ nɔn; tɛ́n nɛ̀n wá yi ɔmùan le, nɛ lɛ tán yi ɛnhi lɔ kɩ n'ɛmɛẅi-bɔ̀ kɛ lɛ ẅɛn ɛnhi lɔ, ɛnvra léyi nɛ́n sɩ̀ vru dùɛ nɔn. Tɛ́n hɩ vra lɔ Abrahamɛ̀n kɛ vá bî ɛnẅì.

⁶ Nyàn ankà léyi Ɔwɔ dɔ́ nɛ̀n nɔn: ‘V'ɛmɛẅi-bɔ̀ ke le dú ɛmɛ̀n nyantɛn mɛ̀n hi wú, nanvrɛn lɔ yɛ lɛ srɔ anwɔ̀n-bɔ̀, kɩ nanvrɛn zri lɔ ye le di yɔ ejüe ɛnnànwàn kru ɛkoẅi-ɛẅia.

⁷ Tɛ́n me le ci ɛnhi léyi yɔ dú amwɔ̀n-bɔ̀ ɛwú nɔn, ɛmrɛ̀n. Zɛtɛn, yɔ lɛ cɔhɔ́ nanvrɛn lɔ, kɩ yɔ lɛ cüe mɛ̀n ankɔrɛ̀ ezìwú ɛnhi ndɔ lɔ wú.’

⁸ Zɛtɛn Ɔwɔ wá mìrɛ̀n tɔ̀n nɛ́n mán Abrahamɛ̀n mɛhi y'angranmɛ̀n, mìrɛ̀n léyi n'eci-woroan-ci dú wúcɔ̀ domɛ̀n-wì nɔn. Ɔmu lɔ de Abrahamɛ̀n wí n'ɛnẅì Izaakɛ̀n wúcɔ̀ domɛ̀n, n'ɛbi ɛẅiriemɛ̀n ɛnvra léyi ye bî nɛ̀n nɔn; ɔmu zri lɔ Izaakɛ̀n wí Zhakɔbɛ̀n wúcɔ̀ domɛ̀n, kɩ Zhakɔbɛ̀n wí n'ɛmɛẅi-bɔ léyi ke le dú Izraɛlɛ̀n mɛ̀n kru ɛvá-anhyrɛ̀ lɔ mɛ̀n nɔn, wúcɔ̀ domɛ̀n.

⁹ Zhozɛfɛ̀n nɛ́n muan-ẅì hɔ̀n kɛ kɔ́n nɛ̀n ecüì-hi kɩ ẅɛn nɛ̀n nhɛ̀, ô nɛ̀n srɔ ɔwɔ̀n-wrɔn Ezhiptɛ̀n ɛnhi wú. Tɛ́n Zhozɛfɛ̀n mán Ɔwɔ mɛhi ndù;

¹⁰ Ɔwɔ mrɛ́n nɛ̀n ɛgbànkàn lɔ fɛn mɛ̀n sɔhɔ́. Nɛ̀n tán Zhozɛfɛ̀n ankà-nyrì kɩ nɛ̀n srɔ yi ɔwrɔn anvrɛnvrɛn Ezhiptɛ̀n nɛ̀ncüì Farahɔ́n zìwú. Farahɔ́n wá Zhozɛfɛ̀n govran Ezhiptɛ̀n-hi wú kɩ nɛ̀n wá yi n'ɛnnɛ̀ncüì bɩ́ lɔ antamɛ̀n.

¹¹ Zɛtɛn ebrè kɛ́ ɛyri lɔ fɛn, Ezhiptɛ̀n mán Kanahan hi wú. Ejüe-dì sevri kɩ bɔ́ nancüì hɔ̀n lɔ, ke sɩ́ cɔ́ ɛci ká zî nɔn.

¹² Ɛnvra léyi Zhakɔbɛ̀n yá le ɛci-zî dú Ezhiptɛ̀n hi wú nɔn, nɛ̀n wá n'ɛẅì hɔ̀n léyi dú bɔ́ nancüì hɔ̀n nɔn, ɔkɔhɔ̀n hɔ́n nanvrɛn ɛdɛ̀n-zri.

¹³ Anhyrɛmɛ̀n vra léyi yɔ hɔ́n nanvrɛn nɔn, Zhozɛfɛ̀n hán tán nɛ́n muan-ẅì hɔ̀n lɔ nyri nɛ̀n, kɩ Farahɔ́n ncɔ́ nyri ɔmu le nyàn Zhozɛfɛ̀n mɛ̀n mɛ̀n-bɔ̀.

¹⁴ Zɛtɛn Zhozɛfɛ̀n wá yɔ ɔkɔ̀hɔ̀n yɛ hɔ̀n, ye bɩ́ nɛ́n zi mán n'ɛmɛ̀n-bɔ̀ lɔ fɛn léyi dú anwrɔn ɛkoẅi-anhɔ̀n mán ɛẅì ɛvà-ɛnrì.

¹⁵ Zɛtɛn Zhakɔbɛ̀n hɔ́n Ezhiptɛ̀n hi wú, nanvrɛn de nɛ́n wù nɔn, ɔmu zri lɔ de bɔ́ nancüì hɔ̀n ndɔ hɔ̀n lɔ mán nwù nɔn.

¹⁶ Ye sɩ́ y'edùwru hɔ̀n lɔ Sishɛmɛ̀n anmàn kɩ yɛ wá yɔ ezhe nànmàn léyi Abrahamɛ̀n wɔ́ Hamor ẅì hɔ̀n tamɛ̀n nɔn mɛ̀n.

¹⁷ Ɛnvra léyi, ɛnvra kɛ́n eburi, hɩ Ɔwɔ wá kɛ̀ hán n'ɔmùan-wá-die ci léyi nɛ lɛ tán Abrahamɛ̀n kɛ̀ sá nmù nɔn, bɔ́ fɛcüè lɔ sán kɛ́n ɛwú, cüɛn bobrebe Ezhiptɛ̀n ɛnhi wú.

¹⁸ Zɛtɛn ɛnnɛ̀ncüì wrù tɔ̀n léyi kè sɩ̀ nyrì Zhozɛfɛ̀n nɔn, ẅɛn ɛyri Ezhiptɛ̀n ɛnhi wú.

¹⁹ Ɛnnɛ̀ncüì ndɔ lɔ frɛ́n bɔ́ fɛcüè lɔ, hán bɔ́ nancüì hɔ̀n lɔ kán ɛgbàn, kɩ wá tán yɔ, ô yɔ tecüe y'ɛẅì hɔ̀n kè wù.

²⁰ Hɩ vra lɔ ye bî Mohizì dú ɛnẅì fifi, cüɛn Ɔwɔ ɛvɛ̀. Yɛ tán nɛ̀n ɛci nɛ́n zî, nɛ́n zi nanvrɛn ɛbemɛ̀n ɔkù anhɔ̀n.

²¹ Ɛnvra léyi ye teze nɛ̀n nɔn, Farahɔ̀n ɛnnyɔwrɔn-ẅì bɩ́ nɛ̀n kɩ wá nɛ̀n, hán nɛ́n dùku n'ɛnẅì hɔ́.

²² Ɔmu lɔ de Mohizì cɔ́ Ezhiptɛ̀n hi wú ankà-nyrì lɔ fɛn kɩ srɔ ɔwrɔn vri n'ankà-dɔ́ mɛ̀n mán n'eci-hán mɛ̀n.

²³ Ɛnvra léyi Mohizì ẅɛn ɛnànwàn kru ɛkoẅi-anhyrɛ̀ nɔn, nɛ̀n wá le nɛ hɔ̀n nɛ̀n nyan nɛ́n muan-ẅì hɔ̀n ɛnbrɛ̀-zri-bɔ̀, Izraɛlɛ̀n-bɔ̀.

²⁴ Nɛ̀n kán Ezhiptɛ̀n-wrɔn tɔ̀n ke gorɛ Izraɛlɛ̀n-wrɔn tɔ̀n; nɛ̀n wá ɔwrɔn léyi yɛ hán ɛgbàn nɔn ɛkɔrɛ̀, kɩ nɛ̀n wri Ezhiptɛ̀n-wrɔn lɔ.

²⁵ Nɛ̀n tro le nɛ́n muan-ẅì hɔ̀n Izraɛlɛ̀n-bɔ̀ kɛ lɛ cɔ̀ kè nyrì le Ɔwɔ kɛ lɛ tán yɔ ɔwrɔncüe nɛ́n Mohizì n'ɛkɔrɛ̀-wa mɛ̀n; tɛ́n yɔ sɩ̀ cɔ̀ yɔ nyrìɛn.

²⁶ Ɔsɔworɔ̀ ɛcɛ̀n cüe, Mohizì srɔ́n Izraɛlɛ̀n ẅì hɔ̀n anhyrɛ̀ ɛsù kɛ kɔ́n ejì kɩ ne ji nɛ̀n wɔ yɔ angranmɛ̀n. Nɛ dɔ́ yɔ le: ‘Annyran hɔ̀n, nyɛ́n dú ɔwrɔn-nɛ́n-muan-ẅì hɔ̀n; ecitan kruhú kɛ nyɛ kɔ́n ny'edomɛ̀n ejìɛ?’

²⁷ Tɛ́n nɛ́n léyi n'ɛkɔrɛ̀ ká nɛ́n nyran lɔ nɔn, kɛ́n Mohizì sɩ́ ɛmɛẅi kɩ kɛ dɔ́ nɛ̀n le: ‘Antɔn wá mɛ́n ecüìcüì mán ɛmrɛ̀n-ci-wrɔn b'angranmɛ̀n hàn?

²⁸ E ji è wri mɛ̀n kɛ hán ɔmu le è wri ɛnɛ́n lɔ, Ezhiptɛ̀n-wrɔn lɔ nɛ́n?’

²⁹ Ɛnvra léyi Mohizì yá ankà ndɔ lɔ nɔn, nɛ̀n srɛ́, kɩ nɛ̀n hɔ́n Mandian hi wú anmàn nɛ̀n yɛ́. Nanvrɛn lɔ nɛ̀n bî ɛẅì anhyrɛ̀.

³⁰ Ɛnnànwàn kru ɛkoẅi-anhyrɛ̀ vacì, ɛnnùwì léyi dú Sinahi kpò tɛ̀sɛ̀n nɔn, Ɔwɔ-kùyüre-wrɔn tɔ̀n dú anvà-gbú-yà mɛ̀n srɔ Mohizì zìwú.

³¹ Mohizì dú anvɛmɛ̀n-frɛ́n mɛ̀n ɛnvra léyi nɛ̀n kán eci léyi srɔ nɔn. Tɛ́n ɛnvra léyi nɛ sɔ́n hɔ́n ezì ô nɛ̀n nyan eci lɔ anvrɛnvrɛn nɔn, nɛ̀n yá Ɛẅɛnwrɔn sùva kɛ dɔ̀ le:

³² ‘Mɛ̀n dú ɛnancüì hɔ̀n Wɔ, Abrahamɛ̀n Wɔ, Izaakɛ̀n Wɔ mán Zhakɔbɛ̀n Wɔ.’ Mohizì ɛnjansù bru kɩ ke cüì, nɛ́n sɩ́ vru ji nɛ̀n nyan.

³³ Zɛtɛn Ɛẅɛnwrɔn kɛ dɔ́ nɛ̀n le: ‘Mrɛ́n v'annanwrú lɔ sɔhɔ́, ɔmuhi ɛ̀ nyɔn ɛyri prɔnprɔn wúɛ nɔn.

³⁴ Mɛ̀n kán ɔmu le yɛ hán mɛ́n fɛcüè ɛgbàn Ezhiptɛ̀n hi wú, mɛ̀n yá n'ɔwàn-srɔn, kɩ mɛ và mɛ̀n bɩ́ nɛ̀n mɛ̀n die. Ɛ hɔ́n zɛtɛ̀ lɔ, me ji mɛ̀n wá mɛ́n ɔkɔ̀hɔ̀n Ezhiptɛ̀n hi wú anmàn.’

³⁵ Mohizì zri ndɔ léyi Izraɛlɛ̀n ẅì hɔ̀n krɔ, hɩ dɔ́ nɛ̀n le: ‘Antɔn wá mɛ́n ecüìcüì mán ɛmrɛ̀n-ci-wrɔn hán?’ Ɔwɔ wá nɛ̀n ecüìcüì mán ebɩdie-wrɔn. Ɔwɔ-kùyüre-wrɔn léyi dú anvà-gbú-yà mɛ̀n srɔ nɔn, n'ɛkɔrɛ̀-wá mɛ̀n.

³⁶ Mohizì de hán Izraɛlɛ̀n ẅì hɔ̀n dú Ezhiptɛ̀n hi wú srɔ ɛntrɛ, n'eci-woroan-ci mán n'anvɛmɛ̀n-frɛ́n-ci hán, ɛnhi ndɔ lɔ wú, bukru ecüe wɔnsɛ́n mɛ̀n mán ɛnnùwì, annànwàn kru ɛkoẅi-anhyrɛ̀.

³⁷ Mohizì de vru dɔ́ Izraɛlɛ̀n ẅì hɔ̀n le: ‘Ɛẅɛnwrɔn ke le yüre nyɛ̀n Ɔwɔ-mùanwú-ankà-dɔ́-wrɔn tɔ̀n kɛ lɛ hán mɛ̀n hɔ́, ne le dú nyɛ́n fɛcüè mɛ̀n-wrɔn tɔ̀n.’

³⁸ Zɛtɛn, hɩ vra léyi Izraɛlɛ̀n fɛcüè lɔ borɛkru ɛnnùwì nɔn, nɛ́n de nɛ̀n nyɔn bɔ́ nancüì hɔ̀n mán Ɔwɔ-kùyüre-wrɔn léyi dú Sinahi kpò wú kɛ dɔ́ n'ankà nɔn, angranmɛ̀n; nɛ̀n cɔ́ Ɔwɔ-mùan-kà-dɔ̀ kɔrɛkɔrɛ léyi ne bɩ nɛ̀n và sɩ́ bɔ̀ nɔn.

³⁹ Tɛ́n bɔ́ nancüì hɔ̀n ke sɩ́ ji ke die nɛ̀n nukùɛ. Yɔ sɩ́ ji nɛ̀n, kɩ yɔ ji yɔ vru ɛmɛẅi yɔ hɔ́n Ezhiptɛ̀n hi wú.

⁴⁰ Yɔ dɔ́ Arɔn le: ‘Ɛ̀ hán Anwɔ hɔ̀n léyi kɛ lɛ nán esù bɔ́ ezìwú nɔn ɛ̀ tán bɔ̀, ɔmuhi bɔ̀ sɩ̀ nyrì ɛci léyi hán Mohizì, nɛ́n léyi nɛ̀n hán bɔ̀ bɔ́ dú Ezhiptɛ̀n hi wú bɔ̀ srɔ nɔn.’

⁴¹ Zɛtɛn yɔ hán ansikɛ nànman-ẅì, kɩ yɔ ce nɛ̀n ɛci, yɔ koran yɔ tán y'ɛkorɛ̀-ci léyi yɔ dùku yɔ hán nɔn.

⁴² Tɛ́n Ɔwɔ crɛ ezì sɔhɔ́ y'ɛwú kɩ teze yɔ, yɔ sɛ́n anhobɩ́ kùcankrò hɔ̀n, hán ɔmu le Ɔwɔ-mùanwú-ankà-dɔ́-bɔ̀ wrú merɛ́n nɔn: ‘Izraɛlɛ̀n fɛcüè, mɛ̀n de nye ce mɛ̀n annɔn mán ɛcice-ci nyantɛn hɔ̀n ɛnvra léyi nyɛ́n dú ɛnnùwì annànwàn kru ɛkoẅi-anhyrɛ̀ nɛ́n?

⁴³ Hɔ̂, tɛ́n nyɛ́n wɔrɔ Molɔkɛ̀n léyi nyɛ́n bɩ nyɛ́n srɔ Ɔwɔ nɔn n'ɛcàsa-wɔn, mán ny'ɔkùcankrò wɔ picɛ̀ léyi dú Refan, antɛ̀buri-wɔ ndɔ hɔ̀n léyi nyɛ́n hán ô nyɛ́n sɛ̀n nɔn. Hɩ le kruhú de me le sɩ́ nyɛ̀n Babilɔnɛ̀n anmàn mɛẅi.’

⁴⁴ Ɛnnùwì nanvrɛn lɔ, bɔ́ nancüì hɔ̀n ẅɛn ɛcàsa-wɔn léyi Ɔwɔ mìrɛ̀n wrú dú ɛmɛ̀n nɔn. Yɛ hán nɛ̀n hán ɔmu le Ɔwɔ wá tán Mohizì nɔn; annanwɔrɛ mɛ̀n lɔ nɛ̀n dɔ́ Mohizì kɛ̀ hán eci zri léyi nɛ́n kàn nɔn.

⁴⁵ Ɛcàsa-wɔn ndɔ lɔ ye bɩ́ nɛ̀n yɛ wá esùgbàn léyi kɛ́n bɔ́ nancüì hɔ̀n nɔn antamɛ̀n; yɔ bɩ́ nɛ̀n yɔ hɔ̀n, ɛnvra léyi Zhozüe kɛ kɔ́n anmàn-hi-wú bɔ̀ léyi Ɔwɔ wrɔ́ y'ezìwú ankà. Ɛcàsa-wɔn ndɔ lɔ ndù hàn kɩ cɔ́ Davidɛ̀n vra.

⁴⁶ Davidɛ̀n cɔ́ Ɔwɔ cüɛ̀n kɩ sán nɛ̀n ɛkɔrɛ̀-levri, ô nɛ̀n ku edúyri prɔnprɔn kè dú Zhakɔbɛ̀n mɛẅi-bɔ̀ tɛn.

⁴⁷ Eci-hán mɛ̀n lɔ, Salomɔn de ku n'edúyri nɔn.

⁴⁸ Tɛ́n anhobɩ́ Wɔ ke sɩ́ dú anwrɔnẅì wɔn lɔ ke kù nɔn mɛ̀n. Hán ɔmu le Ɔwɔ-mùanwú-ankà-dɔ́-wrɔn ndɔ̀ nɔn:

⁴⁹ ‘Ɛẅɛnwrɔn kɛ dɔ̀ le, anhobɩ́ dú m'ɛgbútɔbù-yɛ́-yri, kɩ ɛnhibù dú m'annan wú ci-hɛ́n-yri. Kɛ̂, ɔwɔn rolomɛ̀n tán de nye le kù nyɛ́n tán mɛ̀n nɛ́n? Tɛyri de dú m'ɛyɛ́-yri nɛ́n?

⁵⁰ Kɛ̂, ndɔ lɔ fɛn kè sɩ̀ dù m'ɛkɔrɛ̀-ci hɛ́?’

⁵¹ Nyɛ́n, ɛnkru shishi-bɔ̀ léyi, ɛnborɛ mán nukù nsɩ́ Ɔwɔ ankà-yá mɛ̀n, nyɛ kɛ́n ɛnvra lɔ fɛn Ɛnhɛ́n-Prɔnprɔn ezì! Nyɛ́n dù nyɛ́n hán nyɛ́n nancüì hɔ̀n hɔ́!

⁵² Ɔwɔ-mùanwú-ankà-dɔ́-wrɔn tán de nyɛ́n nancüì hɔ̀n ke sɩ̀ hán ɛgbàn nɛ́n? Yɔ wri anwrɔn hɔ̀n léyi dɔ́ ɛnyrɔnnan-wrɔn zri lɔ n'ɛvá ankà nɔn; kɩ zɛtɛ̀ lɔ, nɛ́n de nyɛ́n hɛ́ nɛ̀n kɩ nyɛ́n wri nɛ̀n nɔn.

⁵³ Nyɛ́n léyi nyɛ́n cɔ́ Ɔwɔ nyànmàn, Ɔwɔ-kùyüre-bɔ̀ tamɛ̀n, nyɛ́n sɩ̀ dìe ɛnyànmàn ndɔ lɔ nukùɛ!”

Etiɛnɛ̀n wú vra

⁵⁴ Ankà-dɔ̀-trɔ mrɛ̀nci-bɔ̀ lɔ bɩ́ ɛmɛ̀nhyì ɛnvra léyi yɔ yá ankà ndɔ hɔ̀n lɔ kɩ yɔ rá ɛmɛ̀nhyì nyî ku Etiɛnɛ̀n ɛwú.

⁵⁵ Tɛ́n nɛ́n, Ɛnhɛ́n Prɔnprɔn yɩ́ nɛ̀n ɛmɛ̀n kɩ nɛ nyan anhobɩ́; nɛ̀n kán Ɔwɔ ci-zrɔ mán Zhezü léyi nyɔn Ɔwɔ zì-kɔrɛ̀a nɔn.

⁵⁶ Nɛ dɔ̀ le: “Nyɛ́n die nukùɛ, mɛ kán anhobɩ́ gbɛ́ ɔmùan kɩ ɔwrɔnẅì Ẅì nyɔn Ɔwɔ zì-kɔrɛ̀a.”

⁵⁷ Zɛtɛn, yɔ sɔ́n nkù ɛvrivri kɩ yɔ sɩ́ yɔ nukù hɔ̀n lɔ. Yɔ lɔ fɛn yɔ srɛ́ ku nɛ̀n ɛwú,

⁵⁸ yɔ wán nɛ̀n sɩ́ anmàn-kru kɩ yɔ bukru yɔ soran nɛ̀n ɛbù, ô yɔ wri nɛ̀n. Dalɛfùɛ-di-bɔ̀ bɩ́ y'ɛceci hɔ̀n lɔ wá sùgban ẅì tɔ̀n léyi ye bi Sɔlɛ̀n nɔn antamɛ̀n.

⁵⁹ Tɛ́n yɔ dú nɛ̀n ɛbù soran mɛ̀n, kɩ Etiɛnɛ̀n kɛ sɛ́n Ɔwɔ kɛ dɔ̀ le: “Ɛẅɛnwrɔn Zhezü è bɩ́ m'ɛnhɛ́n lɔ!”

⁶⁰ Zɛtɛn nɛ̀n bore annankruemɛ̀n kɩ nɛ̀n di bobo ecüiemɛ̀n le: “Ɛẅɛnwrɔn e bɩ́ srɔ yɔ ɛgbàn ndɔ lɔ, n'ɛhán-bɔ̀.” Ɛnvra léyi nɛ̀n dɔ́ ankà ndɔ hɔ̀n lɔ trɔ nɔn, kɩ nɛ́n wù.