Ɔkɔ̀hɔ̀n-wá-bɔ̀ kɔ̀hɔ̀n hán 28 - Ɛmɛẅi ankà ankrànkràn 2003

Pɔlɛ̀n dú Maltɛ̀n shi vúta wú

¹ Ɛnvra léyi bɔ́ lɛ fɛn bɔ́ kakɛ nɔn, bɔ̀ yá le ɛnshi vúta lɔ ye bi nɛ̀n Maltɛ̀n.

² Nanvrɛn anmàn-bɔ̀ lɔ ẅɛn bɔ̀ anvrɛnvrɛn: ɔmuhi ɛnshi bukru kɛ nàn, kɩ ɔwrɔ̀ mán ke cüe nɔn, yɔ kɛ́n ɛnhyà vri tɔ̀n kɩ bɔ́ gbrɛnkɛn ɛnhyà lɔ ɔmùan.

³ Pɔlɛ̀n bɩ́ antɛ̀-dá ku ɛnhyà, tɛ́n ɛnlɛbrì tɔ̀n dú ɛmɛ̀n srɔ, ɔmuhi ɛnhyà kɛ ẅɛn nɛ̀n nɔn, kɩ nɛ̀n brɛ́ Pɔlɛ̀n ɛmàn mɛ̀n.

⁴ Ɛnvra léyi ɛnshi wú vúta anmàn-bɔ̀ lɔ kán ɛnlɛbri léyi brɛ́ Pɔlɛ̀n ɛmàn mɛ̀n nɔn, yɔ dɔ́ y'edomɛ̀n le: “Ɔwrɔn ndɔ lɔ ke le dú ɔwrɔn-wri-wrɔn tɔ̀n, ɔmuhi Ɔwɔ nyrɔnnan-mrɛ̀ncì ke sɩ́ ji le nɛ̀n kɔrɛ̀, ke dú kɛ nɛ̀n vɔ́n ecüe nɛ́n kakɛ mán.”

⁵ Tɛ́n Pɔlɛ̀n kɔ́n ɛnlɛbrì di ɛnhyà kɩ eci zriɛmɛ́n kè sɩ̀ hàn nɛ̀n;

⁶ anwrɔn ndɔ hɔ̀n ke tro le nɛ lɛ fɔ́, kɩ ne le bore nɛ̀n wú kpata kpata lɔ. Tɛ́n yɔ vrá nmɔ̀ɛn, kɩ eci zriɛmɛ́n kè sɩ̀ hán Pɔlɛ̀n; Zɛtɛn yɔ crɔn ɔmùan kɩ yɔ dɔ̀ le, yi dú ɔwɔ tɔ̀n.

⁷ Nanvrɛn ɛtɛ̀sɛ̀n lɔ, yɛ cɔ́ anmàn kpamàn-wrɔn cüìcüì bɩ́, ɔwrɔn tɔ̀n léyi ye bi Püblihüsɛ̀n nɔn. Ɔwrɔn ndɔ lɔ ẅɛn bɔ̀ anvrɛnvrɛn kɩ nɛ̀n tán bɔ̀ ɛyri bɔ̀ dɛ́ ɛbi anhɔ̀n.

⁸ Püblihüsɛ̀n nɛ́n zi dɛ́ sɔfa wú, ɔwrɔ̀ dú nɛ̀n edomɛ̀n kɩ nɛ jüɛn ɛnkrɛ̀. Pɔlɛ̀n hɔ́n nyan nɛ̀n, sɛ́n Ɔwɔ, di nɛ̀n ɛkɔrɛ̀ ɛwú kɩ korɛ nɛ̀n.

⁹ Ndɔ lɔ vacì, kɩ ɛnlɔẅiɛ-bɔ̀ ndɔ hɔ̀n léyi dú ɛnshi vúta lɔ wú nɔn, ji Pɔlɛ̀n nvà kɩ yɔ mán yɔ kɔrɛ̀.

¹⁰ Yɔ yé bɔ̀ anhyɛ-yì mɛ̀ntɛ mɛ̀ntɛ kɩ, ɛnvra léyi bɔ́ vá ɛhɔ́n-yri nɔn, yɔ tán bɔ̀ ɛci hɔ̀n lɔ fɛn léyi dú bɔ́ ɛyri-hɔ́n-ci nɔn.

Pɔlɛ̀n cɔ́ Rɔmɛ̀n anmàn

¹¹ Okù anhɔ̀n vacì, bɔ̀ bɩ́ ɛnhyàbri-hɛ̀ tɔ̀n léyi dú Alɛksandri nvà, hɩ ye bi “Diɔskürɛ̀n”, kɩ ɛshɛ̀ mumù lɔ fɛn nɛ̀n dú ɛnshi vúta ndɔ lɔ, n'ɛnhyàbri-hɛ̀ nɛ́nbàdù tɔ̀n shi mùan.

¹² Bɔ̀ cɔ́ Siraküsɛ̀n, kɩ nanvrɛn lɔ bɔ̀ yɛ́ ɛbi anhɔ̀n.

¹³ Bɔ̀ ci nanvrɛn vudù kɩ bɔ̀ cɔ́ Rezhio. Ɛcɛ̀n cüe kɩ ecüemɛ̀n dɔnwrɔn bukru kɛ cüɛ̀n kɩ bɔ̀ cɔ́ Puzolɛsɛ̀n ɛbi anhyrɛ̀ granmɛ̀n.

¹⁴ Nanvrɛn anmàn lɔ, bɔ̀ cɔ́ anwrɔn-nɛ́n-muan-ẅì hɔ̀n ẅɛn bɔ̀ hɛ́n ɛnbifɔn kru zri. Ɔmu lɔ de bɔ̀ hán bɔ̀ hɔ́n Rɔmɛ̀n anmàn nɔn.

¹⁵ Anwrɔn-nɛ́n-muan-ẅì hɔ̀n léyi dú Rɔmɛ̀n nɔn, yá bɔ́ ɛvá ankà, kɩ vá bɔ̀ ɛsù Apihüsɛ̀n dúgbetrɛ mán nɛ̀nyàn-bɔ̀-wɔn anhɔ̀n tɛ̀sɛ̀n. Ɛnvra lɔ tɛ̀ léyi Pɔlɛ̀n kán yɔ nɔn, nɛ̀n tán Ɔwɔ ɔkùɛn kɩ edùyì vá nɛ̀n edomɛ̀n.

¹⁶ Ɛnvra léyi bɔ̀ bru Rɔmɛ̀n nɔn, yɛ tán Pɔlɛ̀n ɛkɔrɛ̀-levri kè dú ɛyri nyantɛn nɛ́n mán gɔliɛ-wrɔn tɔ̀n léyi kɛ nán nɛ̀n nɔn mɛhi.

Pɔlɛ̀n kɛ dɔ́ Ɔwɔ ankà Rɔmɛ̀n anmàn

¹⁷ Ɛbi anhɔ̀n vacì, Pɔlɛ̀n bi Zhüifɛ̀n-bɔ̀ cüìcüì hɔ̀n léyi dú Rɔmɛ̀n anmàn nɔn. Ɛnvra léyi yɔ borɛkru trɔ nɔn, nɛ dɔ́ yɔ le: “Anwrɔn-nɛ́n-muan-ẅì hɔ̀n, mɛ̀n sɩ̀ hàn bɔ́ fɛcüè lɔ eci gbàngbàn zriɛmɛ́n, kɩ bɔ́ nancüì hɔ̀n nyànmàn lɔ mán mɛ̀n sɩ̀ fɔndɔ̀n hàn, tɛ́n yɛ ẅɛn mɛ̀n Zherüzalɛmɛ̀n anmàn kɩ ye bɩ́ mɛ̀n yɛ tán Romɛ́n ɛnhi wú bɔ̀.

¹⁸ Ɛnvra léyi yɔ yrɛ mɛ̀n ankà trɔ nɔn, yɔ ji ye teze mɛ̀n, ɔmuhi yɔ sɩ̀ cɔ̀ m'ɛwú lɔ eci léyi ke le di mɛ̀n owúemɛ̀n nɔn.

¹⁹ Tɛ́n Zhüifɛ̀n-bɔ̀ ke sɩ́ shrìɛ, kɩ kekremɛ̀n lɔ mɛ̀n wá le ye sɩ́ mɛ̀n Rɔmɛ̀n ɛnhi wú Nɛ̀ncüì cüìcüì zìwú, kɩ mɛ̀n sɩ̀ troɛ le me ku m'anmàn ɛnhi wú ankà ɛwú.

²⁰ Nyàn eci le kruhú me ji mɛ̀n kán nyɛ̀n, ô mɛ̀n dɔ́ nyɛ̀n ankà nɔn. Annanwɔrɛ mɛ̀n lɔ gbràka dú mɛ̀n ankɔrɛ̀, nɛ́n léyi Izraɛlɛ̀n fɛcüè ẅɛn esɛ́ n'ɛwú nɔn n'ɛkruhú.”

²¹ Yɔ mrɛ́n nɛ̀n ɔmùan le: “Bɔ̀ sɩ̀ cɔ́ owrú zriɛmɛ́n kè dù Zhüde kpɔsɔ wú kɛ̀ và v'ɛkruhú, kɩ bɔ́ muan-ẅì hɔ̀n lɔ nzriɛmɛ́n kè sɩ̀ dù nanvrɛn kɛ và dɔ́ bɔ̀ v'eci-gbàngbàn-hán ankà.

²² Tɛ́n bɔ́ ji bɔ̀ yá ɛ̀ dɔ́ ankà léyi e tro nɔn, ɔmuhi bɔ́ nyrì le ɛyri lɔ fɛn yɛ kɛ́n Ɔwɔ-fɛcüè ndɔ léyi è dú ɛmɛ̀n nɔn ezì.”

²³ Yɔ tán Pɔlɛ̀n ɛnbì, kɩ ɛnvra léyi ɛnbi lɔ cɔ̀ nɔn, yɔ vá bobrebe ɛyri léyi nɛ́n dù nɔn. Bukru ɛsɔ̀wrɔ̀ hàn kɩ cɔ́ ɔwɔɛmɛ̀n nɔn, Pɔlɛ̀n ke fi yɔ ankà léyi nɛ́n ẅɛ̀n nɔn: nɛ dɔ́ yɔ Anhobɩ́ Nɛ̀ncüì-dúyri ankà kɩ ne ji ɛyri nɛ̀n hán yɔ bɩ́ Zhezü ankà, kɩ nɛ dɔ́ Mohizɛ̀n nyànmàn mán Ɔwɔ-mùanwú-ankà-dɔ́-bɔ̀ wrú lɔ ankà.

²⁴ Anwrɔn ndɔ hɔ̀n ke bɩ́ ankà hɔ̀n léyi nɛ dɔ̀ nɔn, tɛ́n ɛnjanbɔ̀ ke sɩ̀ ji ke bú tán ankaẅì.

²⁵ Zɛtɛn yɔ hɔ̀n, kɩ ɔmùan-krɔn ke sɩ́ dú yɔ ɛmɛ̀n, kɩ Pɔlɛ̀n kɛ dɔ́ yɔ ankà ndɔ lɔ: “Ɛnhɛ́n Prɔnprɔn ankà zrɔ ɛnvra léyi nɛ̀n ci Ɔwɔ-mùanwú-ankà-dɔ́-wrɔn Ezahi mùanwú nɛ dɔ́ nyɛ́n nancüì hɔ̀n ankà nɔn!

²⁶ Annànwɔrɛ mɛ̀n lɔ nɛ dɔ́ yɔ le: ‘Ɛ̀ hɔ̀n dɔ́ fɛcüè ndɔ lɔ le: Nyɛ lɛ yá anvrɛnvrɛn, tɛ́n nyɛ́n sɩ̀ nyrì; nyɛ lɛ nyan anvrɛnvrɛn, tɛ́n nyɛ́n sɩ̀ kàn.

²⁷ Ɔmuhi fɛcüè ndɔ lɔ srɔ ɛnkru-shishi-bɔ̀; yɔ sî yɔ nukù hɔ̀n lɔ, ô yɔ bɩ́ yá ankà, yɔ nyî y'anvɛ̀ lɔ, ô yɔ bɩ́ kan ɛyri, ô, ke bɩ́ tán yɔ ɛnkruemɛ̀n-ẅɛ̀n yɔ nyriɛn, kɩ ɔmu lɔ yɔ sɩ̀ vru và cɔ́ mɛ̀n, ô mɛ̀n kɔrɛ yɔ, ɔmu lɔ de Ɔwɔ kɛ dɔ̀ nɔn.’

²⁸ Pɔlɛ̀n vru kɛ dɔ́ yɔ le, zɛtɛn nyɛ́n nyrì le, Ɔwɔ yüre anwrɔn hɔ̀n léyi ke sì dù Zhüifɛ̀n-bɔ̀ nɔn, n'ɛnkrukɔrɛ̀ mɛẅi ankà, kɩ yɔ tɛn, yɔ lɛ die nɛ̀n nukùɛ!” [

²⁹ Pɔlɛ̀n ankà-dɔ̀ ndɔ lɔ, wá Zhüifɛ̀n-bɔ̀ ecüiwrɔn shishi angranmɛ̀n, kɩ yɔ nán hɔ̀n.]

³⁰ Pɔlɛ̀n yɛ́ ɛnnànwàn kru anhyrɛ ɔwɔn léyi nɛ́n bɩ nɔn mɛ̀n. Nanvrɛn lɔ de anwrɔn hɔ̀n lɔ fɛn léyi kɛ vá nyan nɛ̀n nɔn, yɔ mɛhi yɔ srɔ́n ɛsù.

³¹ Nɛ dɔ́ Anhobɩ́ Nɛ̀ncüì-dúyri ankà kɩ ne yé yɔ Ɛẅɛnwrɔn Zhezü Krisi domɛ̀n ankà, esɛ́ mɛ̀n kɩ ye sɩ́ wá nɛ̀n ejüe.