Ɔkɔ̀hɔ̀n-wá-bɔ̀ kɔ̀hɔ̀n hán 26 - Ɛmɛẅi ankà ankrànkràn 2003

Pɔlɛ̀n kɛ dɔ́ ankà tán n'edomɛ̀n Agripa zìwú

¹ Agripa kɛ dɔ́ Pɔlɛ̀n le: “Ɛkɔrɛ̀-levri dú tán mɛ́n ɛ lɛ dɔ́ ankà ɛ̀ tán v'edomɛ̀n.” Zɛtɛn Pɔlɛ̀n sɩ́ ɛkɔrɛ̀ ezì, kɩ kɛ dɔ̀ le:

² “Ɛnnɛ̀ncüì Agripa, pɔpüɛ̀ kɛ brá mɛ̀n ɛnyɔncì bì lɔ, ɔmuhi mɛ̀n nyɔn mɛ́n ezìwúɛ, ô mɛ̀n dɔ́ ankà mɛ̀n tán m'edomɛ̀n, ɛyɔ̀n ankà hɔ̀n lɔ fɛn léyi Zhüifɛ̀n-bɔ̀ kɛ dɔ́ ku m'ɛwú nɔn,

³ kɩ ndɔ lɔ mán, è vru è nyri Zhüifɛ̀n-bɔ̀ nyànmàn mán y'ecüìwrɔn ankà. Mɛ sɛ́n mɛ́n zɛtɛn è die mɛ̀n nukù ɛnbɔrɛ ẅɛ̀n-hɛ́n mɛ̀n.

⁴ Zhüifɛ̀n-bɔ̀ lɔ fɛn nyri eci léyi dú m'ɛwúvà m'ɛcɛmɛ̀n hàn hɛ́n; yɔ nyri ɛnkrubɔmɛ̀n ɔmu le m'ɛwúvà hán dù, mɛ́n fɛcüè wanzi mán Zherüzalɛmɛ̀n anmàn nɔn.

⁵ Yɔ nyri mɛ̀n ɛnvra sheshe, kɩ hɩ wú lɔ, yɔ le di mɛ̀n dalɛfuɛ ke dú kɛ yɔ ji, le mɛ̀n dú bɔ́ fɛcüè Wɔ-wɔn lɔ, ɔwrɔn léyi kɛ ẅɛn n'ankà ɛshieshiemɛ̀n, Ɔwɔ-nyànmàn-sùva-wá-bɔ̀ hɔ̀n mɛ̀n nɔn.

⁶ Kɩ zɛtɛ lɔ, yɔ hɛ́n mɛ̀n ɛmrɛ̀ncì wanzi ɔmuhi mɛ̀n ẅɛn esɛ́ ɔmùan-wá léyi Ɔwɔ tán bɔ́ nancüì hɔ̀n nɔn wú.

⁷ Bɔ́ fɛcüè mɛ̀n kru ɛvà-anhyrɛ̀ lɔ ẅɛn esɛ́ le, ɔmùan-wá ndɔ lɔ yɔ lɛ kán nɛ́n nmùsà, ke dú kɛ yɔ dú Ɔwɔ-ci-bɩtan-bɔ̀ edùyiemɛ̀n ɛnnyran mán ɛcɛ̀n. Kɩ, esɛ́ ndɔ lɔ n'ɛkruhú Ɛnnɛ̀ncüì Agripa, de Zhüifɛ̀n-bɔ̀ ke ku mɛ̀n ankà ɛwú nɔn!

⁸ Cɛci kruhú kɛ nyɛ́n Zhüifɛ̀n-bɔ̀ nyɛ́n sɩ́ bú tán ankaẅì le Ɔwɔ kɛ lɛ hán owú-bɔ̀ kɛ̀ vá ɔkɔrɛ-bɔ̀ mɛ̀n hàn?

⁹ Mɛ́n dùku mán, mɛ̀n tro le dú eci ankrankran, ke dú kɛ mɛ kɔ́n Nazarɛtɛ̀n Zhezü anhà.

¹⁰ Eci ndɔ lɔ de mɛ̀n hán Zherüzalɛmɛ̀n anmàn nɔn. Ɔwɔ-cice-bɔ̀ cüìcüì hɔ̀n tán mɛ̀n ɛkɔrɛ̀-levri vɛ́n tɔ̀n, kɩ mɛ̀n ẅɛn ankaẅì-bùtan-ẅɛn-bɔ̀ bobrebe mɛ̀n ku anwɔn-mɛ̀n; kɩ ɛnvra léyi yɛ hán yɔ ɛgbàn nɔn, mɛ cüɛ̀n.

¹¹ Ɛnvra zrizri léyi me ci Ɔwɔ-sɛ́n-wɔn hɔ̀n lɔ mɛ̀n nɔn, mɛ hán yɛ hán yɔ ɛgbàn, kɩ me ji mɛ̀n ẅɛn yɔ kekremɛ̀n, ô yɔ teze y'ankaẅì-bùtan lɔ. M'ɛgbàn-dì lɔ, kɛ hán tán kɩ mɛ hɔ́n anmàn nyantɛn mɛ kɔ́n yɔ anhà.”

Pɔlɛ̀n kɛ dɔ́ n'ɛnkru-crɔn ankà

¹² “Ɔmu lɔ de, ɛkɔrɛ̀-levri léyi mɛ̀n cɔ́ Ɔwɔ-cice-bɔ̀ tamɛ̀n nɔn, mɛ̀n hɔ́n Damasɛ̀n anmàn.

¹³ Mɛ̀n dú ɛnlevri, ɛnbri shɛ́n, Ɛnnɛ̀ncüì Agripa, ɛnvra léyi mɛ̀n kán ɛyri-kàn tɔ̀n dú anhobɩ́ nvà, kɛ gbrɛ́n vrán ɛnbri, gbrɛnkɛ́n mɛ̀n mán annyran hɔ̀n mɛhi ɔmùan.

¹⁴ Bɔ lɔ fɛn bɔ̀ bore ɛnhibɩɛ kɩ mɛ̀n yá esùva tɔ̀n ci aramehɛ́n mɛ̀n kɛ dɔ́ mɛ̀n le: ‘Solɛ̀n, Solɛ̀n, cɛci kruhú kɛ, ɛ kɔ́n mɛ̀n anhà? Ankora de ɛ̀ ẅɛn kèkrè kɛ hán ɔnɔ̀n léyi nɛ́n zi kɛ kɔ́n eji ɛtɛ̀ mɛ̀n nɔn.’

¹⁵ Mɛ̀n yrɛ le: ‘Antɔn dú mɛ́n Ɛẅɛnwrɔn?’ Kɩ Ɛẅɛnwrɔn mrɛ́n mɛ̀n ɔmùan le: ‘Mɛ̀n dú Zhezü léyi ɛ kɔ́n anhà nɔn.

¹⁶ Tɛ́n, sɩ̀ ezì ɛwú, tɔhú nyɔn. Mɛ̀n hán tán ɛ̀ kán mɛ̀n, ô ɛ̀ srɔ m'eci-bɩ̀tan-wrɔn; e le dú mɛ́n dalɛfuɛ-di-wrɔn ô ɛ̀ dɔ́ ɔmu le ɛ̀ hán ɛ̀ kán mɛ̀n ɛnyɔncì lɔ, ô ɛ̀ dɔ́ ankà léyi mɛ lɛ hán tán mɛ́n è vru è nyrì nɔn.

¹⁷ Zhüifɛ̀n-bɔ̀ mán fɛcüè nyantɛn zìwú léyi mɛ lɛ wá mɛ́n ɔkɔ̀hɔ̀n nɔn, me le dú v'esùva wá mɛ̀n.

¹⁸ Mɛ wá mɛ́n ɔkɔ̀hɔ̀n, ô è gbá y'anvɛ̀ hɔ̀n lɔ, ô è bɩ́ yɔ ɛ̀ sɔhɔ́ ɛyri yɔwɔ mɛ̀n, ô ɛ̀ sɩ́ yɔ ɛyri-kan mɛ̀n, kɩ anwa-wrɔn kɔrɛ̀srɔn wú léyi yɔ dù nɔn, è sɩ́ yɔ Ɔwɔ yri. Ke dú kɛ yɔ bú m'ankà yɔ tán ankaẅì hô, yɔ lɛ cɔ́ ɛgbàn-bɩ-ce, mán ɛyri léyi Ɔwɔ wá ɔmùan tán anwrɔn hɔ̀n léyi dú nɛ tɛn nɔn.’ ”

Pɔlɛ̀n kɛ dɔ́ n'ɔkɔ̀hɔ̀n-hán ankà

¹⁹ “Kɩ ɔmu lɔ, Ɛnnɛ̀ncüì Agripa, mɛ́n sɩ̀ fɔndɔn Ɔwɔ-mɛ̀n-yri-kàn léyi dú anhobɩ́ vá cɔ́ mɛ̀n nɔn.

²⁰ Tɛ́n mɛ̀n bukru mɛ̀n dɔ́ Damasɛ̀n mán Zherüzalɛmɛ̀n anmàn-bɔ̀ Ɔwɔ ankà, zɛtɛn kɛ́n yɔ hɔ̀n léyi dú Zhüde kpɔsɔ wú mán ɛnhibù anmàn wú nyantɛn mɛ̀n bɔ̀; mɛ̀n bi yɔ, ô yɔ crɔn yɔ eci-hán-ci, yɔ crɛ ezì yɔ kɛ́n Ɔwɔ, ô yɔ yé tán y'eci-hán mɛ̀n le, annanwɔrɛ mɛ̀n lɔ, yɔ crɔn ɛnkruɛ.

²¹ Ankà ndɔ lɔ kruhú de Zhüifɛ̀n-bɔ̀ ẅɛn mɛ̀n ɛnvra léyi mɛ̀n dú Ɔwɔ-cice-wɔn lɔ mɛ̀n, kɩ yɔ ji ɛyri ô yɔ wri mɛ̀n.

²² Tɛ́n Ɔwɔ tán mɛ̀n n'ɛkɔrɛ-wá hàn kɩ cɔ́ ɛnyɔncì lɔ kɩ mɛ̀n vru mɛ́n dù, ô mɛ̀n di nɛ̀n dalɛfuɛ nyɛ lɛ fɛn lɔ nyézìwì, ɛcüìcüì mán ɛcɛ. Mɛ́n sɩ́ dɔ́ ankà zriɛmɛ́n kɛ vrán hɩ le Ɔwɔ-mùanwú-ankà-dɔ́-bɔ̀ mán Mohizɛ̀n ndɔ̀ le kɛ lɛ hán nɔn:

²³ le Ebɩdie-wrɔn lɔ kɛ lɛ kán ɛgbàn, ne le dú ɛnvrakpà-wrɔn léyi ke le dú owúemɛ̀n kɛ̀ frɔ́ kɩ nɛ lɛ dɔ́ ɛyri-kàn krukɔrɛ̀ ankà nɛ̀n tán bɔ́ fɛcüè mán ɛnhibù anmàn wú nyantɛn bɔ̀.”

Pɔlɛ̀n kɛ dɔ́ Agripa ke bú tán ankaẅì

²⁴ Zɛtɛn Pɔlɛ̀n ndù kɛ dɔ́ ankà tán n'edomɛ̀n, kɩ Fɛtüsɛ̀n sɩ́ ɔmùan ɛwú kɛ dɔ̀ le: “Nmù kɛ hán mɛ́n hán, Pɔlɛ̀n! Ɛ̀ kán owrú hàn mán kɛ hán mɛ́n nmù!”

²⁵ Pɔlɛ̀n mrɛ́n nɛ̀n ɔmùan le: “Nmù ke sɩ́ hán mɛ̀n, Ɛẅɛnwrɔn. Ankà-dɔ̀ hɔ̀n léyi mɛ dɔ̀ nɔn dú annanwɔrɛ kɩ dú ankà-nyri-ankà.

²⁶ Ɛnnɛ̀ncüì Agripa nyri ankà ndɔ hɔ̀n lɔ, kɩ mɛ lɛ dɔ́ yɔ n'ezìwú tɛ̀. Mɛ̀n nyri ɔmu le, nzriɛmɛ́n kè sɩ̀ dù ankà-bán-ankà n'ezìwú, ɔmuhi eci lɔ kè sɩ̀ hán ɛbán mɛ̀n ɛci granmɛ̀n nɔn.

²⁷ Ɛnnɛ̀ncüì agripa, ankà hɔ̀n léyi Ɔwɔ-mùanwú-ankà-dɔ́-bɔ̀ ndɔ̀ nɔn, e bú tán ankaẅìɛ? Mɛ̀n nyri ɔmu le e bú tán!”

²⁸ Agripa kɛ dɔ́ Pɔlɛ̀n le: “E tro le ɛ lɛ srɔ mɛ̀n Krisi-sɛ̀nkɛn-wrɔn ɛnvra bruemɛ̀n hàn?”

²⁹ Pɔlɛ̀n mrɛ́n ɔmùan le: “Ɛnvra bruemɛ̀n hô, ɛnvra sheshe mɛ̀n hô, mɛ sɛ́n Ɔwɔ le ke bɩ́ dú vɛ́n zri, tɛ́n nyɛ́n lɔ fɛn léyi nye die mɛ̀n nukù ɛnyɔncì lɔ nɔn, nyɛ́n dù kɛ̀ hán mɛ̀n hɔ́, gbràka ndɔ léyi dú mɛ̀n ankɔrɛ̀ nɔn, kɩ bàdà ɛmɛ̀n!”

³⁰ Ɛnnɛ̀ncüì lɔ, govran, Berenisɛ̀n mán anwrɔn hɔ̀n léyi dú nanvrɛn lɔ nɔn tɔhú kɩ zɛtɛn,

³¹ y'ɛhɔ́n mɛ̀n lɔ, yɔ dɔ́ y'edomɛ̀n le: “Ɔwrɔn ndɔ lɔ kè sɩ̀ hàn eci zriɛmɛ́n hɩ ká hán nɛ̀n, nɛ̀n bru owúemɛ̀n mán anwɔn-mɛ̀n-wá-wɔn mɛ̀n nɔn.”

³² Kɩ Agripa kɛ dɔ́ Fɛtüsɛ̀n le: “Ɔwrɔn ndɔ lɔ zrɔ tán le, ye teze nɛ̀n nɛ̀n hɔ̀n, ke dú kɛ nɛ̀n wá le nɛ hɔ́n Rɔmɛ̀n ɛnhi wú Nɛ̀ncüì zìwú.”