Ɔkɔ̀hɔ̀n-wá-bɔ̀ kɔ̀hɔ̀n hán 25 - Ɛmɛẅi ankà ankrànkràn 2003

Pɔlɛ̀n ke ji Rɔmɛ̀n ɛnhi wú Nɛ̀ncüì ke ci nɛ̀n ɛmrɛ̀n

¹ Ɛbi-anhɔ̀n vacì kɩ Fɛtüsɛ̀n léyi bɩ́ Feliksɛ̀n ɛyri nɔn, dú Sezare hɔ́n Zherüzalɛmɛ̀n anmàn.

² Ɔwɔ-cice-bɔ̀ cüìcüì hɔ̀n mán Zhüifɛ̀n-kpaman-bɔ̀ vá vrá anẅiɛ̀ tán Pɔlɛ̀n. Yɔ sán

³ nɛ̀n ɛkɔrɛ̀levri ô ye vru Pɔlɛ̀n ɛmɛẅi kɛ vá Zherüzalɛmɛ̀n; ɔmuhi yɔ ẅɛn ɔmùan-krɔn n'ɛwú, kɩ yɔ ji yɔ wri nɛ̀n, ɛnlevri.

⁴ Tɛ́n Festüsɛ̀n mrɛ́n ɔmùan le Pɔlɛ̀n dú Sezare anwɔn-mɛ̀n-wá-wɔn mɛ̀n kɩ nɛ́n dùku mán ne le vru nɛ̀n hɔ́n Sezare anmàn ɛnvra buremɛ̀n.

⁵ Kɩ nɛ́n dɔ̀ le: “Ke ji le ny'anwrɔn cüìcüì hɔ̀n kɛ̀ hɔ̀n sɩ́ mɛ̀n Sezare, ô yɔ vrá anẅiɛ̀ yɔ tán ɔwrɔn ndɔ lɔ, ke dú kɛ nɛ̀n hán eci gbàngbàn.”

⁶ Fɛtüsɛ̀n yɛ́ ɛbi ɛẅrì kɛ hɔ́n ɛvà y'anmàn lɔ, zɛtɛn vru ɛmɛẅi vá Sezare. Ɛcɛ̀n cüe, nɛ̀n bɩ́ ɛyri ɛmrɛ̀nci-wɔn mɛ̀n kɩ nɛ̀n wá tán ye bɩ́ Pɔlɛ̀n yɛ và.

⁷ Ɛnvra léyi ye sɩ́ Pɔlɛ̀n nɔn, Zhüifɛ̀n-bɔ̀ léyi dú Zherüzalɛmɛ̀n anmàn nvà nɔn, gbrɛnkɛn nɛ̀n ɔmùan, kɩ vrá anẅiɛ̀ bobrebe, dɔ́ ɛyɔ̀n ankà vri léyi yɔ duku mán yɔ sɩ̀ cɔ́ n'ɛdɔ́-yri rɔ́ nɔn, ku nɛ̀n ɛwú.

⁸ Tɛ́n Pɔlɛ̀n dɔ́ ankà tán n'edomɛ̀n kɩ nɛ́n dɔ̀ le: “Mɛ̀n sɩ̀ hàn eci gbàngbàn zriɛmɛ́n, hɩ ká dú Zhüifɛ̀n-bɔ̀ nyanmàn wú, kè dú Ɔwɔ-cice-wɔn lɔ wú, ô kè vru kè dú ɛnhi wú govran cüìcüì wú.”

⁹ Fɛtüsɛ̀n léyi ke ji kɛ̀ hán tán Zhüifɛ̀n-bɔ̀ kɛ cüɛn nɛ̀n nɔn, ke yrɛ Pɔlɛ̀n le: “E ji ɛ̀ hɔ́n Zherüzalɛmɛ̀n anmàn, ô ye ci mɛ́n ɛmrɛ̀n m'ezìwú ankà ndɔ lɔ wúɛ?”

¹⁰ Pɔlɛ̀n mrɛ́n ɔmùan le: “Mɛ̀n nyɔn Rɔmɛ̀n ɛnhi wú Nɛ̀ncüì mrɛ̀nci zìwú, kɩ ɛnu lɔ de, me ji ye ci mɛ̀n ɛmrɛ̀n nɔn. Mɛ̀n sɩ̀ hàn Zhüifɛ̀n-bɔ̀ eci gbàngbàn zriɛmɛ́n, hán ɔmu le vɛ́n dùku mán e nyrì nɔn.

¹¹ Ke dú kɛ yɛ bɔ́ mɛ̀n nwù, kɩ mɛ̀n hán eci léyi krɔn m'owúemɛ̀n-dì nɔn, mɛ́n sɩ́ krɔ owú léyi dú mɛ tɛn nɔn. Tɛ́n ke dú kɛ, annanwɔrɛ zriɛmɛ́n bàdà ankà hɔ̀n léyi anwrɔn ndɔ hɔ̀n lɔ kɛ dɔ́ ku mɛ̀n ɛwú nɔn, ɔwrɔnẅì zriɛmɛ́n ke sɩ̀ ẅɛ̀n ɛkɔrɛ̀levri ká bɩ́ mɛ̀n kɛ̀ tán yɔ nɔn. Me bɩ́ m'ankà lɔ mɛ wá ɛnhi wú Nɛ̀ncüì antamɛ̀n.”

¹² Zɛtɛn Fɛtüsɛ̀n, mán n'ankà-woroan-yé-bɔ̀ dɔ́ ankà trɔ, kɩ mrɛ́n ɔmùan le: “E ji ɛ̀ kán ɛnhi wú Nɛ̀ncüì, ɛ lɛ hɔ́n ɛnhi wú Nɛ̀ncüì zìwú.”

Pɔlɛ̀n nyɔn Agripa mrɛ̀ncì zìwú

¹³ Ɛnbì jan vacì, Ɛnnɛ̀ncüì Agripa mán nɛ́n muan-ẅì ɛnnyɔnwrɔnẅì Berenisɛ̀n, vá Sezare Fɛtüsɛ̀n ebinyan yri.

¹⁴ Ɔmuhi yɔ le dú nanvrɛn ɛnbì bobrebe nɔn, Fɛtüsɛ̀n bɩ́ Pɔlɛ̀n ankà lɔ die Ɛnnɛ̀ncüì lɔ ezìwúɛ, kɩ nɛ dɔ́ yi le: “Ɛnu lɔ, ɔwrɔn tɔ̀n ndù, Feliksɛ̀n tɛhɛ́n nɛ̀n anwɔn-mɛ̀n-wá-wɔn mɛ̀n.

¹⁵ Ɛnvra léyi mɛ̀n hɔ́n Zherüzalɛmɛ̀n anmàn nɔn, Ɔwɔ-cice-bɔ̀ cüìcüì hɔ̀n mán Zhüifɛ̀n-bɔ̀ cüìcüì hɔ̀n vrá anẅiɛ̀ tán nɛ̀n, kɩ yɔ ji le mɛ̀n di nɛ̀n owúemɛ̀n.

¹⁶ Mɛ̀n mrɛ́n y'ɔmùan le, Rɔmɛ̀n anmàn-bɔ̀ kè sɩ̀ ẅɛ̀n edùcí kɛ hán ye ci ɔwrɔn ɛmrɛ̀n, ke dú kɛ nɛ́n mán n'egbri-bɔ̀ mɛhi yɔ sɩ̀ kɛ̀n y'edomɛ̀n ezì, ô ɔwrɔnwrɔn kɛ dɔ́ n'ɔmùanwú ankà.

¹⁷ Zɛtɛn, yɔ vá cɔ́ mɛ̀n ɛnu. Ɛnvra léyi ɛcɛ̀n cüe nɔn, ɛnvra zri lɔ, mɛ̀n yɛ́ ɛmrɛ̀ncì zìwú kɩ mɛ̀n wá tán ye bɩ́ anwɔn-mɛ̀n-wá-wrɔn ndɔ lɔ yɛ và.

¹⁸ N'egbri-bɔ̀ nvà, tɛ́n yɔ sɩ̀ cɔ̀ ankà shishi zriɛmɛ́n yɔ ku nɛ̀n ɛwú hán hɩ le mɛ̀n tro nɔn hɔ́.

¹⁹ Yɔ dùku, y'Ɔwɔ-wɔn ankà mán ɔwrɔn tɔ̀n léyi ye bi Zhezü, hɩ nwù, kɩ Pɔlɛ̀n kɛ dɔ̀ le yi dú ɔkɔrɛ mɛ̀n, hɩ cüìwrɔn de dú y'angranmɛ̀n nɔn.

²⁰ Mɛ tɛn, mɛ́n sɩ́ kán ɔmu le mɛ lɛ hán mɛ̀n dɔ́ ankà ndɔ lɔ, hɩ le kruhú de mɛ̀n dɔ́ Pɔlɛ̀n, ke dú kɛ ne le shrì nɛ̀n hɔ́n Zherüzalɛmɛ̀n anmàn, ô ye ci nɛ̀n ɛmrɛ̀n ankà ndɔ lɔ wú.

²¹ Tɛ́n Pɔlɛ̀n bi ɛmrɛ̀ncì nyantɛn: Nɛ̀n sán, ô n'ankà lɔ ke ci Rɔmɛ̀n ɛnhi wú Nɛ̀ncüì zìwú. Mɛ̀n wá tán le yɛ hɛ́n nɛ̀n anwɔn-mɛ̀n-wá-wɔn mɛ̀n hàn kɩ kɛ krɔn ɛnvra léyi mɛ lɛ hán nɛ̀n nɛ̀n hɔ́n Ɛnnɛ̀ncüì lɔ zìwú nɔn.”

²² Agripa kɛ dɔ́ Fɛtüsɛ̀n le: “Me ji mɛ́n dùku mɛ̀n yá ɔwrɔn ndɔ lɔ n'ɔmùan wú ankà.” Fɛtüsɛ̀n mrɛ́n ɔmùan le: “Ɛnɛ̀n lɔ, ɛ lɛ yá n'ɔmùan wú ankà.”

²³ Ɛcɛ̀n cüe kɩ, Agripa mán Berenisɛ̀n dú anhà-kɔ́n-bɔ̀ mán anmàn-kpaman-bɔ̀ fɛcüè wanzi, ɛkɔrɛ̀-levriemɛ̀n bru ɛmrɛ̀ncì-wɔn lɔ mɛ̀n. Fɛtüsɛ̀n kɔrɛ̀-levriemɛ̀n ye bɩ́ Pɔlɛ̀n yɛ và.

²⁴ Zɛtɛn Fɛtüsɛ̀n mrɛ́n ɔmùan le: “Ɛnnɛ̀ncüì Agripa mán nyɛ́n lɔ fɛn léyi nyɛ́n mɛhi bɔ́ dú ɛnu lɔ nɔn, nyɛ kán ɔwrɔn ndɔ lɔ: Zhüifɛ̀n anmàn bɔ̀ lɔ fɛn nvà, ô kè ku nɛ̀n ankà ɛwú m'ezìwú, Zherüzalɛmɛ̀n anmàn mán ɛnu, kɩ yɔ di bobo yɔ dɔ̀ le, ɔwrɔn ndɔ lɔ kè sɩ̀ vrù ẅɛ̀n ɛkɔrɛ-levri ká dú ɔkɔrɛ mɛ̀n hàn nɔn.

²⁵ Mɛ tɛn, mɛ kàn le, nɛ̀n sɩ̀ hàn eci gbàngbàn zriɛmɛ́n hɩ ná bɩ́ owù nɛ̀n di ɔwɔ̀ɛn nɔn. Tɛ́n nɛ́n dùku, nɛ̀n bi Ɛnnɛ̀ncüì mrɛ̀ncì; mɛ̀n wá le nɛ lɛ srɔ Ɛnnɛ̀ncüì zìwú.

²⁶ Tɛ́n, mɛ́n sɩ́ nyri ankà léyi me le merɛ́n owrú, ô mɛ̀n dɔ́ Ɛnnɛ̀ncüì lɔ nɔn, hɩ le kruhú de mɛ̀n hán nɛ̀n nɛ̀n srɔ ny'ezìwú, annannan le v'ezìwú, Ɛnnɛ̀ncüì Agripa, ô ankà-yrɛ mɛ̀n lɔ, mɛ̀n cɔ́ ankà mɛ̀n merɛ́n owrú.

²⁷ Ndɔ lɔ dú ɔbrɔ̀sà ankà, ke dú kɛ yɛ hán anwɔn-mɛ̀n-wá-wrɔn kɛ hɔ́n Rɔmɛ̀n anmàn ɛnhi wú, kɩ ye sɩ̀ dɔ̀ eci léyi nɛ̀n hán nɔn yi ankà.”