Ɔkɔ̀hɔ̀n-wá-bɔ̀ kɔ̀hɔ̀n hán 23 - Ɛmɛẅi ankà ankrànkràn 2003

¹ Pɔlɛ̀n crɛ anvɛ̀ kɛ́n anwrɔn hɔ̀n léyi kɛ vá nɛ̀n ɛmrɛ̀nci yri nɔn kɩ kɛ dɔ̀ le: “Anwrɔn-nɛ́n-mùan-ẅì hɔ̀n, ɛnborɛ zriemɛ̀n de mɛ̀n dú Ɛẅɛnwrɔn ci-bɩ̀tan-wrɔn hàn kɩ cɔ́ zɛtɛ̀ lɔ nɔn.”

² Ɔwɔ-cice-wrɔn cüìcüì Ananiasɛ̀n, wá tán anwrɔn hɔ̀n léyi nyɔn Pɔlɛ̀n ɛtɛ̀sɛ̀n nɔn kè di nɛ̀n ɛkɔrɛ̀ ɔmùan wú.

³ Zɛtɛn Pɔlɛ̀n kɛ dɔ́ nɛ̀n le: “Ɔwɔ de ke le gorɛ mɛ́n nɔn, ɔwɔn-hi nan bù wosu! Ɛ và è ci mɛ̀n ɛmrɛ̀n ɛnyànmàn wú, kɩ ɛ hán ɛnyànmàn ta-mɛẅi-ci, ɛ wá tán ye gorɛ mɛ̀n!”

⁴ Anwrɔn hɔ̀n léyi nyɔn Pɔlɛ̀n ɛtɛ̀sɛ̀n nɔn, kɛ dɔ́ nɛ̀n le: “Ɛ wora Ɔwɔ-cice-wrɔn cüìcüì!”

⁵ Pɔlɛ̀n mrɛ́n ɔmùan le: “Anwrɔn-nɛ́n-muan-ẅì hɔ̀n, mɛ̀n sɩ̀ nyrì ɔmu le nɛ̀n dú Ɔwɔ-cice-wrɔn cüìcüì. Annanwɔrɛ mɛ̀n, Owrú Prɔnprɔn kɛ dɔ̀ le: ‘E bɩ́ dɔ́ ankà gbàn ɛ tán vɛ́n fɛcüè-wrɔn cüìcüì!’ ”

⁶ Pɔlɛ̀n nyri ɔmu le ɛmrɛ̀nci-bɔ̀ lɔ, anwrɔn cá dú anwrɔn hɔ̀n léyi ke sɩ́ bú owúemɛ̀n-dú-frɔ́ ankà kɛ tán ankaẅì, kɩ ɛcá dú Ɔwɔ-nyànmàn-sùva-wa-bɔ̀; hɩ le kruhú de nɛ̀n sɩ́ ɔmùan ɛwú y'ezìwú nɛ dɔ̀ le: “Anwrɔn-nɛ́n-muan-ẅì hɔ̀n, mɛ́n dú Ɔwɔ-nyànmàn-sùva-wa-wrɔn, Ɔwɔ-nyànmàn-sùva-wa-wrɔn ẅì. Ɔmuhi me bú owúemɛ̀n-dú-frɔ́ ankà mɛ tán ankaẅì, hɩ kruhú de mɛ̀n dú ɛmrɛ̀nciemɛ̀n nɔn.”

⁷ Ɛnvra léyi nɛ̀n dɔ́ ankà ndɔ lɔ trɔ nɔn, Ɔwɔ-nyànmàn-sùva-wa-bɔ̀ mán anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankaẅì nɔn, bukru kɛ wrɔ́n ecüì, kɩ fɛcüè vɔ́n n'edomɛ̀n.

⁸ Anwrɔn hɔ̀n léyi ke sɩ́ bú owúemɛ̀n-dù-frɔ́ ankà kɛ tán ankaẅì nɔn kɛ dɔ̀ le, owúemɛ̀n-dù-frɔ́ bàdà, Ɔwɔ-kùyüre-bɔ̀ mán bàdà, yakɛ anhɛ́n hɔ̀n mán bàdà, tɛ́n Ɔwɔ-nyànmàn-sùva-wa-bɔ̀ ke bú ndɔ lɔ fɛn kɛ tán ankàẅì.

⁹ Yɛ sán di bobo, kɩ ɛnyànmàn-gbànvri-ankà-yé-bɔ̀ zrizri hɔ̀n léyi dú ɛmrɛ̀mci-bɔ̀ lɔ mɛ̀n nɔn tɔhú kɩ bɩ́ ezì kɛ́n ankà kɛ dɔ̀ le: “Bɔ sɩ́ cɔ́ ɛgbàn zriɛmɛ́n ɔwrɔn ndɔ lɔ edomɛ̀n. Bɔ́ bú tán le, Ɛnhɛ́n tɔ̀n mán Ɔwɔ-kùyüre-wrɔn tɔ̀n, yɔ d'anhyrɛ̀ lɔ ɔtɔ̀n dɔ́ nɛ̀n ankà!”

¹⁰ Ecüìwrɔn lɔ ke sevri mán và, kɩ gɔliɛ-bɔ̀ wrɔn cüìcüì lɔ ɛnjansù bru, tro le yɔ lɛ bɔyɛ Pɔlɛ̀n wá. Hɩ le kruhú de nɛ̀n wá tán nɛ́n gɔliɛ-bɔ̀ kɛ̀ kakɛ fɛcüè lɔ mɛ̀n, ô kè bɩ́ Pɔlɛ̀n kɛ̀ sɔhɔ́ y'antamɛ̀n, kɛ và hɛ́n anwɔn-mɛ̀n-wa-wɔn lɔ mɛ̀n.

¹¹ Ɛnnyran léyi kɛ̀n nɔn, Ɛẅɛnwrɔn bɩ́ n'edomɛ̀n yé Pɔlɛ̀n kɩ kɛ dɔ́ nɛ̀n le: “Bɩ edùyì! E di mɛ̀n dalɛfuɛ ɛnu, Zherüzalɛmɛ̀n anmàn, kɩ ke ji le ɛ̀ hán eci zri lɔ Rɔmɛ̀n ɛnhi wú anmàn mán.”

Pɔlɛ̀n wúemɛ̀n-dì mùan-krɔn

¹² Ɛnvra léyi ɛcɛ̀n cüe, Zhüifɛ̀n janbɔ̀ ẅɛn ɔmùankrɔn: Yɔ wá ɔmùan le, yɔ sɩ̀ zî ɛci, yɔ sɩ̀ mi ɛnshi ke dú kɛ yɔ sɩ̀ wrì Pɔlɛ̀n.

¹³ Anwrɔn hɔ̀n léyi ẅɛn ɔmùan-krɔn ndɔ lɔ nɔn, yɔ vrán anwrɔn ɛkoẅi-anhyrɛ̀.

¹⁴ Yɔ hɔ́n cɔ́ Ɔwɔ-cice-bɔ̀ cüìcüì hɔ̀n mán ɛcüicüì-bɔ̀, kɩ yɔ dɔ́ yɔ le: “Bɔ̀ wá ɔmùan le, bɔ́ sɩ̀ zî ɛci ke dú kɛ bɔ̀ sɩ̀ wrì Pɔlɛ̀n.

¹⁵ Nyɛ tɛn, nyɛ́n mán ankà-dɔ̀-trɔ-bɔ̀ mɛhi, ɔmùan kè dú nyɛ̀n nzri, ô nyɛ́n sán gɔliɛ-bɔ̀ wrɔn cüìcüì lɔ zɛtɛ̀ lɔ kè bɩ́ Pɔlɛ̀n kɛ̀ vá ɛmrɛ̀n mɛ̀n, kɛ̀ hán le nye ji nyɛ́n dɔ́ n'ankà lɔ kɛ̀ trɔ. Bɔ tɛn, bɔ́ lɛ krɔn kpehɛ́n bɔ́ hán nɛ̀n nɛ̀n wù yakɛ nɛ lɛ cɔ́ ɛnu lɔ.”

¹⁶ Tɛ́n Pɔlɛ̀n n'ɛnkɔ̀crɛ̀ tɔ̀n, nɛ́n muan-ẅì ɛnyɔnwrɔn-ẅì ẅì, yá ɔmùan-krɔn ndɔ lɔ ankà. Nɛ̀n hɔ́n anwɔn-mɛ̀n-wá-wɔn mɛ̀n, nɛ̀n dɔ́ Pɔlɛ̀n ankà lɔ.

¹⁷ Zɛtɛn Pɔlɛ̀n bi gɔliɛ-bɔ̀ lɔ ɔtɔ̀n kɩ kɛ dɔ́ nɛ̀n le: “Ɛ̀ hɔ̀n sɩ́ sùgban-ẅì ndɔ lɔ gɔliɛ-wrɔn cüìcüì lɔ yri, ɔmuhi nɛ̀n ẅɛn ankà ne ji nɛ̀n dɔ́ yi nɔn.”

¹⁸ Gɔliɛ-wrɔn lɔ bɩ́ nɛ̀n hɔ̀n, kɩ hɔ́n sɩ́ nɛ̀n gɔliɛ-bɔ̀ wrɔn cüìcüì lɔ, kɩ nɛ dɔ̀ le: “Anwɔn-mɛ̀n-wá-wrɔn Pɔlɛ̀n bi mɛ̀n, kɩ dɔ́ mɛ̀n, mɛ̀n bɩ́ Sùgban-ẅì ndɔ lɔ, hɩ ẅɛn ankà ke ji kɛ̀ dɔ̀ nɔn, mɛ̀n và sɩ́ mɛ́n.”

¹⁹ Gɔliɛ-bɔ̀ wrɔn cüìcüì lɔ ẅɛn sùgban-ẅì lɔ ɛkɔrɛ̀, bɩ́ nɛ̀n hɔ́n ɔhɔ́nan kɩ ke yrɛ nɛ̀n le: “Ankà tán ɛ ẅɛ̀n e ji ɛ̀ dɔ́ mɛ̀n nɛ́n?”

²⁰ Nɛ̀n mrɛ́n ɔmùan le: “Zhüifɛ̀n-bɔ̀ hɔ̀n ɔmùan-krɔn ô kɛ̀ dɔ́ mɛ́n è bɩ́ Pɔlɛ̀n ɛnɛ́n, ɛ̀ vá ankà-dɔ̀-trɔ-bɔ̀ hɔ̀n zìwú, ô kɛ̀ hán tán le ye ji yɛ dɔ́ n'ankà lɔ kɛ̀ trɔ.

²¹ Tɛ́n e bɩ́ ẅɛn yɔ esɛ́! Ɔmuhi y'ɛmɛ̀n lɔ, anwrɔn ɛkoẅi-anhyrɛ̀ kɛ lɛ krɔn nɛ̀n antanwrɔn. Yɔ wá ɔmùan le, yɔ sɩ̀ zî ɛci, yɔ sɩ̀ mî ɛnshi, ke dú kɛ yɔ sɩ̀ wrì Pɔlɛ̀n. Yɔ krɔn kpehɛ́n yɔ vrá ankà léyi ɛ lɛ dɔ̀ nɔn.”

²² Ɛnvra léyi nɛ̀n wá tán sùgban-ẅì lɔ ke bɩ́ dɔ́ ɔwrɔn zriɛmɛ́n ankà léyi yi vá dɔ́ nɛ̀n nɔn, gɔliɛ-bɔ̀ wrɔn cüìcüì lɔ, hán nɛ̀n nɛ́n hɔ̀n.

Ye bɩ́ Pɔlɛ̀n yɛ hɔ́n sɩ́ govràn Feliksɛ̀n

²³ Zɛtɛn gɔliɛ-bɔ̀ wrɔn cüìcüì lɔ bi n'ezìwú-bɔ̀ anhyrɛ̀ kɩ dɔ́ yɔ le: “Nyɛ́n borɛ, gɔliɛ-bɔ̀ ɛkoẅi-ɛvà, kpàngɔ-wú-yɛ́-bɔ̀ ɛkoẅi-anhɔ̀n mán ɛẅì ɛvà mán ebisɛ́n-kɔ́n-bɔ̀ ɛkoẅi ɛvà, ɛkru, ô nyɛ́n krɔn kpehɛ́n nyɛ́n bɩ́ Sezare levri ɔwɔɛ wacɛ̀n ɔmɔ̀rɔ̀.

²⁴ Nyɛ́n wá kpangɔ esùva, ô nyɛ́n bɩ́ Pɔlɛ̀n nyɛ́n hɔ̀n sɩ́ govràn Feliksɛ̀n ankɔrɛ-kɔrɛ mɛ̀n mán anwɔwɔ mɛ̀n.”

²⁵ Zɛtɛn nɛ̀n merɛ́n owrú ndɔ lɔ:

²⁶ “Klodɛ̀n Liziasɛ̀n ke yüre n'ɛẅɛnwrɔn, govràn Feliksɛ̀n n'ebinyan.

²⁷ Zhüifɛ̀n-bɔ̀ ẅɛn ɔwrɔn léyi me yüre mɛ́n nɔn, kɩ yɔ ji yɔ wri nɛ̀n, ɛnvra léyi mɛ̀n yá le nɛ̀n dú rɔmɛ̀n anmàn ɛnhi wú ẅì nɔn: zɛtɛn mɛ̀n hán mɛ́n gɔliɛ-bɔ̀ bɩ́ nɛ̀n die.

²⁸ Ɔmuhi me ji mɛ̀n nyri eci le kruhú Zhüifɛ̀n-bɔ̀ kɛ kɛ́n nɛ̀n ankà nɔn, mɛ̀n sɩ́ nɛ̀n y'ankà-dɔ̀-trɔ-bɔ̀ zìwú.

²⁹ Mɛ́n cɔ̀ mɛ̀n nyri ɔmu le, y'anmàn nyànmàn ankà wú de yɔ cɔ́ nɛ̀n ankà nɔn, tɛ́n nɛ̀n sɩ̀ hàn eci gbàngbàn zriɛmɛ́n hɩ ká sí nɛ̀n owúemɛ̀n mán anwɔn-mɛ̀n-wa-wɔn mɛ̀n nɔn.

³⁰ Zɛtɛn yɛ dɔ́ mɛ̀n le Zhüifɛ̀n-bɔ̀ kɛ ẅɛn ɔmùan-krɔn tɔ̀n n'ɛwú; ɛnvra zri lɔ, mɛ̀n wá le me bɩ́ nɛ̀n mɛ̀n yüre mɛ́n, kɩ mɛ̀n dɔ́ n'egbri-bɔ̀ kɛ̀ vrá anẅìɛ̀ kɛ̀ tán nɛ̀n v'ezì wú.”

³¹ Gɔliɛ-bɔ̀ lɔ hán ɛnyànmàn-ci léyi yɛ wá tán yɔ nɔn: yɔ bɩ́ Pɔlɛ̀n ɛnnyran lɔ, kɩ yɔ sɩ́ nɛ̀n Antipatrisɛ̀n anmàn.

³² Ɛcɛ̀n cüe, gɔliɛ-bɔ̀ léyi nán esù annantrɛ mɛ̀n nɔn, vru ɛmɛẅi vá anwɔn-mɛ̀n-wa-wɔn mɛ̀n kɩ teze kpàngɔ-wú-yɛ́-bɔ̀ lɔ mán Pɔlɛ̀n mɛhi ɛnlevri kɛ hɔ̀n.

³³ Ɛnvra lɔ tɛ̀ léyi yɔ bru Sezare anmàn nɔn, kpàngɔ-wú-yɛ́-bɔ̀ bɩ́ owrú wá govran ɛmàn mɛ̀n kɩ bɩ́ Pɔlɛ̀n yé nɛ̀n.

³⁴ Govran krɛ́ owrú lɔ kɩ ke yrɛ Pɔlɛ̀n ɔkpɔsɔ wú léyi nɛ́n dù nɔn. Ɛnvra léyi nɛ́n nyrì le yi dú Silisi kpɔsɔ wú nɔn,

³⁵ nɛ dɔ́ yi le: “Me le yrɛ mɛ́n ankà ɛnvra léyi v'egbri-bɔ̀ kɛ lɛ và nɔn.” Kɩ nɛ̀n wá tán yɛ hɛ́n Pɔlɛ̀n Herɔdɛ̀n bɩ́ lɔ mɛ̀n.