Ɔkɔ̀hɔ̀n-wá-bɔ̀ kɔ̀hɔ̀n hán 20 - Ɛmɛẅi ankà ankrànkràn 2003

Pɔlɛ̀n yri-hɔ̀n Maseduhanɛ̀n mán Grɛsɛ̀n anmàn

¹ Ɛnvra léyi anhà-drɛ̀ trɔ nɔn, Pɔlɛ̀n borɛ ankaẅì-bùtan-ẅɛn-bɔ̀ ɛkru, nɛ̀n yɩ́ yɔ edù, nɛ̀n tán yɔ ɛyri hɔ̀n bi-nyan, kɩ nɛ̀n bɩ́ Maseduhanɛ̀n anmàn levri nɛ́n hɔ̀n.

² Nɛ̀n ci nanvrɛn anmàn kpɔsɔ lɔ wú kɩ ne yɩ́ ɔmùan-zri-di-bɔ̀ edù n'ankà bobrebe dɔ́ mɛ̀n yɔ mɛhi. Zɛtɛn nɛ̀n vru nɛ̀n hɔ́n Grɛsɛ̀n anmàn,

³ nanvrɛn lɔ, nɛ̀n yɛ́ ɔkù anhɔ̀n. Nɛ vá anhɛ́ mɛ̀n bru yri nɛ̀n hɔ́n Siri kpɔsɔ wú kɩ nɛ̀n yá le Zhüifɛ̀n-bɔ̀ ke ji nɛ̀n ɛyri. Zɛtɛn nɛ̀n wá le ne le cí Maseduhanɛ̀n anmàn nɛ̀n vru ɛmɛẅi nɛ̀n hɔ̀n.

⁴ Pirüsɛ̀n ẅì, ye bi Sopatɛrɛ̀n, nɛ̀n dú Bere anmàn-wrɔn, hɔ́n sɩ́ nɛ̀n, nɛ́n mán nɛ́n nyran hɔ̀n léyi dú: Aristarkɛ̀n mán Sekɛndüsɛ̀n, yɔ dú Tesalonikɛ̀n-bɔ̀, Gahiüsɛ̀n dú Derbɛ̀n anmàn-wrɔn, Timote, Tishikɛ̀n mán Trofimɛ̀n, yɔ dú Azi kpɔsɔ wú bɔ̀, yɔ lɔ fɛn yɔ hɔ́n sɩ́ nɛ̀n.

⁵ Yɔ ndɔ hɔ̀n lɔ, yɔ hɛ́ bɔ̀ ezì kɩ yɔ vrá bɔ̀ Troasɛ̀n anmàn.

⁶ Bɔ tɛn, bɔ̀ ku anhɛ́ mɛ̀n Filipɛ̀n anmàn, ɛnvra léyi abutùkumɛ́n-kɔ́ koran bì lɔ trɔ nɔn, ɛbi-ɛnrì vacì, bɔ̀ cɔ́ yɔ Troasɛ̀n anmàn, nanvrɛn lɔ, bɔ̀ di ɛnbifɔn-kru zri.

Pɔlɛ̀n mɛẅi-trɔ yri-hɔ̀n Troasɛ̀n anmàn

⁷ Ɛnyanbì-cɛ ɔwɔɛ, bɔ̀ borɛkru, ô bɔ̀ zî ɔbɔ̀sɔ̀ ci-zî kɩ Pɔlɛ̀n kɛ dɔ́ fɛcüè ankà. Ɔmuhi ɛcɛ̀n ke cüe hô, nɛ lɛ hɔ̀n nɔn, kɩ nɛ̀n dɔ́ ankà hàn kɩ cɔ́ ɛnyran wanzi.

⁸ Kɛniɛn bobrebe dú ɔwɔn léyi bɔ̀ borɛkru ɛmɛ̀n nɔn, n'ɛwú.

⁹ Sugban-ẅì tɔ̀n ye bi Etishe yɛ́ ɔwɔn gbàtà cɛ mùan. Ɛndà zeze wri nɛ̀n ɛnvra léyi Pɔlɛ̀n kɛ dɔ́ n'ankà sheshe lɔ; ɛndà mɛ̀n lɔ, nɛ̀n dú ɔwɔn gbàtà cɛ wú nɛ̀n bore ɛnhibɩ́. Yɛ ẅɛn nɛ̀n yɛ yɛrɛ, tɛ́n nɛ́n wùɛ.

¹⁰ Pɔlɛ̀n kakɛ, vé nyɔn nɛ̀n ɛwúɛ, ẅɛn nɛ̀n sɔ́n ɔwàn kɩ kɛ dɔ̀ le: “Ɛnkrɛ̀ta ke bɩ́ kú nyɛ̀n: nɛ̀n dú ankorɛ korɛ mɛ̀n!”

¹¹ Zɛtɛn, nɛ̀n vru nɛ̀n hɔ́n anwɔn mɛ̀n, nɛ̀n vɔ́n abùtùkumɛ́n lɔ nɛ̀n rá. Ɛnvra léyi nɛ̀n vru nɛ̀n dɔ́ ankà sheshe hàn kɩ ɛnbri kɛ̀n nɔn, kɩ nɛ́n hɔ̀n.

¹² Ye bɩ́ sugban-ẅì lɔ ankorɛ korɛ mɛ̀n yɛ và, kɩ dú ɛnbɔrɛ-bi-wá vri tán anwrɔn lɔ fɛn.

Pɔlɛ̀n dú Troasɛ̀n kɛ hɔ́n Milɛ anmàn

¹³ Bɔ̀ hɛ́ ezì, ô bɔ̀ bɩ́ ɛnhyàbri-hɛ̀ bɔ̀ hɔ́n Asɔsɛ̀n, nanvrɛn lɔ de Pɔlɛ̀n ke le bru anhɛ́ mɛ̀n nɔn. Ɔmu lɔ de Pɔlɛ̀n wá tán nɔn, ɔmuhi ne ji nɛ̀n ci ɛnhi nɛ̀n hɔ́n Asɔsɛ̀n nɔn.

¹⁴ Ɛnvra léyi nɛ̀n cɔ́ bɔ̀ Asɔsɛ̀n anmàn nɔn, bɔ̀ bɩ́ nɛ̀n anhɛ́ mɛ̀n bɔ̀ hɔ́n Mitilɛnɛ̀n anmàn.

¹⁵ Bɔ̀ dú nanvrɛn lɔ bɔ́ hɔ̀n, kɩ bɔ̀ cɔ́ Shio zìwú ɔsɔwrɔ̀ ɛcɛ̀n cüe. Ɛcɛ̀n vru cüe kɩ bɔ̀ bru Samɔsɛ̀n, kɩ ɛnbì léyi kɛ́n nɛ̀n nɔn, ɛhɛ̀ zé Milɛ anmàn.

¹⁶ Annànwɔrɛ mɛ̀n lɔ Pɔlɛ̀n wá le ne le ci Efɛzɛ̀n zìwú, kɩ nɛ̀n sɩ̀ sannyɔn nanvrɛn, ô nɛ́n bɩ́ jrɛ́ ɛnvra Azì kpɔsɔ wú. Nɛ kpramàn, ô nɛ̀n bru Zherüzalɛmɛ̀n yakɛ kɛ̀ cɔ́ Pantekɔtɛ̀n bì lɔ.

Pɔlɛ̀n kɛ dɔ́ ɛcüìcüì-bɔ̀ léyi dú Efɛzɛ̀n nɔn ankà

¹⁷ Pɔlɛ̀n dú Milɛ anmàn yüre Efɛzɛ̀n anmàn Wɔ-wɔn-cüìcüì-bɔ̀ ɛkù kɛ vá Milɛ anmàn.

¹⁸ Ɛnvra léyi yɔ vá nɛ̀n ɛtɛ̀sɛ̀n nɔn, nɛ dɔ́ yɔ le: “Nyɛ́n nyri eci léyi mɛ hán ny'ɛtɛ̀sɛ̀n ɛnbì lɔ fɛn, ɛnvra léyi mɛ́n và dú nyɛ̀n ɛmɛ̀n bukru ɛnbì zri bì lɔ, ɛnu Azi kpɔsɔ lɔ wú.

¹⁹ Mɛ̀n dú Ɛẅɛnwrɔn ci-bɩ̀tan-kɔ̀hɔ̀n-hán mɛ̀n m'edomɛ̀n ɛnhisiemɛ̀n, mɛ̀n di ejüe, mɛ̀n kán ɛgbàn Zhüifɛ̀n-bɔ̀ léyi ke ji m'ɛyri nɔn, y'antamɛ̀n.

²⁰ Nyɛ́n nyri ɔmu le, eci léyi dú ny'esùva-wá-ci nɔn, mɛ̀n sɩ̀ bán nyɛ̀n nzriɛmɛ́n: mɛ̀n dɔ́ nyɛ̀n kɩ mɛ̀n yé nyɛ̀n fɛn lɔ anwrɔn zìwú mán ny'ɛbemɛ̀n.

²¹ Mɛ̀n bi Zhüifɛ̀n-bɔ̀, mán yɔ léyi yɔ sɩ̀ dù Zhüifɛ̀n-bɔ̀ nɔn, yɔ crɔn ɛnkru, ô yɔ bú Ɛẅɛnwrɔn Zhezü ankà yɔ tán ankaẅì.

²² Kɩ zɛtɛ̀ lɔ, mɛ hɔ́n Zherüzalɛmɛ̀n, hán ɔmu le Ɛnhɛ́n Prɔnprɔn wá tán mɛ̀n nɔn, kɩ mɛ̀n sɩ̀ nyrì ankà léyi kɛ lɛ srɔ́n mɛ̀n ɛsù nɔn.

²³ Mɛ̀n nyri ɔmu le, anmàn lɔ fɛn, Ɛnhɛ́n Prɔnprɔn kɛ dɔ́ mɛ̀n le anwɔn-mɛ̀n-wá mán ɛgbànkàn kɛ vrá mɛ̀n.

²⁴ Tɛ́n mɛ́n dùku m'ɛwúvà, kè sɩ̀ dù eci zriɛmɛ́n m'ezìwú; hɩ le dú ɛshishi nɔn, dú hɩ le, ke ji le mɛ̀n hɔ̀n mɛ̀n cɔ́ m'ɔkɔ̀hɔ̀n lɔ n'ɛnkrutrɔ, ô mɛ̀n trɔ ɔkɔ̀hɔ̀n léyi Ɛẅɛnwrɔn Zhezü tán mɛ̀n nɔn n'ɛhán: Ɔwɔ boafɔ̀n lɔ, n'Ɛmɛẅi ankà Ankrankran lɔ, mɛ̀n dɔ́ nɛ̀n.

²⁵ Mɛ̀n ci ny'ɛmɛ̀n kɩ mɛ dɔ́ Anhobɩ́ Nɛ̀ncüì-dúyri ankà, tɛ́n zɛtɛ̀ lɔ, mɛ̀n nyri ɔmu le, ny'ɛmɛ̀n lɔ, ɔwrɔn zriɛmɛ́n ke sɩ̀ vru kán mɛ̀n hàn.

²⁶ Hɩ le kruhú de, ɛnyɔncì lɔ mɛ dɔ́ nyɛ̀n: ke dú kɛ ny'ɛmɛ̀n lɔ, ɛnzri kɛ zrɛ́n, ke sɩ́ vru crɛ nyan mɛ̀n hàn.

²⁷ Ɔmuhi mɛ̀n dɔ́ nyɛ̀n Ɔwɔ ankɔnda ci-hán ankà lɔ fɛn, nzriɛmɛ́n kè sɩ̀ bàn nyɛ̀n.

²⁸ Nyɛ́n nán ny'edomɛ̀n mán anwrɔn kà léyi Ɛnhɛ́n Prɔnprɔn wá ny'antamɛ̀n nɔn. Ɔwɔ-fɛcüè léyi Ɔwɔ bɩ́ n'ɛnẅì wù, wɔ́ tán nyɛ̀n nɔn, nyɛ́n wá nɛ̀n esùva.

²⁹ Mɛ́n nyri ɔmu le, m'ɛhɔ́n lɔ, kɛ lɛ tán anwrɔnẅì-vú-lɛtù hɔ̀n ɛkɔrɛlevri ke le ku nyɛ̀n ɛmɛ̀n, kɩ ke sɩ̀ tán annɔ̀nkà lɔ ɔwrɔncüe.

³⁰ Kɩ nyɛ́n dùku ny'ɛmɛ̀n lɔ, anwrɔn ndɔ hɔ̀n ke le bukru kɛ dɔ́ ɛyɔ̀n ankà ô kɛ̀ hán ankaẅì-bùtan-ẅɛn-bɔ̀ kè dú yɔ ɛmɛẅi.

³¹ Nyɛ́n kpri ɛvɛ̀, ô kè bru nyɛ̀n le, ɛnnànwàn kru anhɔ̀n, ɛnnyran mán ɛcɛ̀n, de mɛ̀n dú nyɛ̀n ankà krosi mɛ̀n, m'anvɛ-shi cüe mɛ̀n.

³² Kɩ zɛtɛ̀ lɔ, me bɩ́ nyɛ̀n mɛ wá Ɔwɔ mán nɛ́n boafɔn ankà-dɔ̀ tamɛ̀n. Nɛ̀n ẅɛn ɛkorɛ̀srɔn léyi kɛ lɛ hán ny'ankaẅì-bùtan lɔ kɛ̀ hɔ́n ezì kɩ nɛ lɛ tán nyɛ̀n ɛci hɔ̀n léyi nɛ̀n wá ɔmùan nɛ̀n hɛ́n anwrɔn hɔ̀n léyi dú nɛ tɛn nɔn.

³³ Ɔwrɔn ci: ɔkùa hô, ansɩ̀kɛ hô, edùku-ci hô, nzriɛmɛ́n kè sɩ̀ cüɛn mɛ̀n ɛvɛ̀.

³⁴ Nyɛ́n dùku nyɛ́n nyri ɔmu le m'ankɔrɛ̀ anhyrɛ̀ kɔ̀hɔ̀n-ci lɔ de srɛ́n mɛ̀n, mɛ̀n mán annyran hɔ̀n mɛhi.

³⁵ Mɛ̀n yé nyɛ̀n eci lɔ fɛn mɛ̀n le, ke ji le yɛ hán ɔkɔ̀hɔ̀n ô, yɛ wá ɛmian-bɔ̀ ɛkɔrɛ̀, kɩ ke ji le Ɛẅɛnwrɔn Zhezü dùku ankà léyi ndɔ nɔn ke bru nyɛ̀n le: ‘Eci tán ẅɛn ɛnborɛ-bru vrán eci cɔ̀!’ ”

³⁶ Ankà-dɔ̀ trɔ mɛ̀n lɔ, Pɔlɛ̀n mán yɔ mɛhi, yɔ shɛ́n annankruemɛ̀n kɩ yɔ sɛ́n Ɔwɔ.

³⁷ Yɔ lɔ fɛn yɔ dú eyú wúemɛ̀n kɩ yɔ brɛ́ nɛ̀n nmù, ô yɔ tán nɛ̀n ɛmɛẅi-trɔ binyan.

³⁸ Yɔ zeze yɔ dú oboto mɛ̀n, ɔmuhi Pɔlɛ̀n dɔ́ yɔ le, yɔ sɩ̀ vru kán nɛ̀n hàn. Zɛtɛn, yɔ hɔ́n sɩ́ nɛ̀n ɛnhyàbri-hɛ̀ tɛ̀sɛ̀n.