Ɔkɔ̀hɔ̀n-wá-bɔ̀ kɔ̀hɔ̀n hán 13 - Ɛmɛẅi ankà ankrànkràn 2003

Yɔ mrɛ́n Barnabasɛ̀n mán Sɔlɛ̀n hɔ́n Ɔwɔ-kɔ̀hɔ̀n-hán mɛ̀n

¹ Antiɔshɛ̀n anmàn Wɔ-fɛcüè-bɔ̀ mɛ̀n lɔ, Ɔwɔ-mùanwú-ankà-dɔ́-bɔ̀ mán ankà-yé-bɔ̀ ndù: Barnabasɛ̀n, Simeɔn léyi ye bi Ɔwrɔn yɔwɔ nɔn, Lüsiüsɛ̀n (Sirɛnɛ̀n anmàn-wrɔn) Manaɛ́n léyi nɛ́n mán Herɔdɛ̀n mɛhi yɛ wá yɔ ɛcɛmɛ̀n, kɩ Herɔdɛ̀n ẅɛn ɛyri Galile kpɔsɔ wú, mán Sɔlɛ̀n.

² Ɛnbi tɔ̀n, ɛnvra léyi yɔ dú Ɔwɔ-cice-kɔhɔ̀n-hán mɛ̀n mán kishe bɩ́ mɛ̀n nɔn, Ɛnhɛ́n-Prɔnprɔn dɔ́ yɔ le: “Nyɛ́n mrɛ́n Barnabasɛ̀n mán Sɔlɛ̀n nyɛ́n hɛ́n ɔhɔnán, ô yɔ hán ɔkɔ̀hɔ̀n léyi hɩ kruhú mɛ̀n bi yɔ nɔn.”

³ Zɛtɛn, ɛnvra léyi yɔ bɩ́ kishe kɩ yɔ sɛ́n Ɔwɔ trɔ nɔn, yɔ di Barnabasɛ̀n mán Sɔlɛ̀n ankɔrɛ̀ ɛwú kɩ yɔ teze yɔ, yɔ hɔ̀n.

Barnabasɛ̀n mán Sɔlɛ̀n hɔ́n Shiprɛ̀n anmàn

⁴ Barnabasɛ̀n mán Sɔlɛ̀n léyi hɔ́n Ɔwɔ-kɔhɔ̀n-hán mɛ̀n Ɛnhɛ́n Prɔnprɔn cüiemɛ̀n, nɔn bru Selesi anmàn, nanvrɛn lɔ yɔ bɩ́ ɛnhyàbri-hɛ̀ yɔ hɔ́n Shiprɛ̀n anmàn vúta wú.

⁵ Ɛnvra leyi yɔ cɔ́ Salaminɛ̀n anmàn nɔn, yɔ bukru yɔ dɔ́ Ɔwɔ ankà Zhüifɛ̀n-bɔ̀ Wɔ-sɛ́n-wɔn lɔ mɛ̀n. Zhan-Markɛ̀n dú yɔ ɛtɛ̀sɛ̀n kɛ wá yɔ ɛkɔrɛ̀.

⁶ Yɔ ci Shiprɛ̀n vúta mùmù lɔ fɛn wú, hàn mán yɔ cɔ́ Pafɔsɛ̀n anmàn. Nanvrɛn lɔ, yɔ cɔ́ seke-wrɔn tɔ̀n ye bi Bar-Zhezü, Zhüifɛ̀n-wrɔn tɔ̀n léyi ke bɩ́ n'edomɛ̀n kɛ hán Ɔwɔ-mùanwú-ankà-dɔ́-wrɔn nɔn.

⁷ Bar-Zhezü yɛ́ Serzhiüsɛ̀n Pahülüsɛ̀n tɛ̀sɛ̀n, nɛ́n léyi nɛ̀n dú ɛnshi vúta wú anmàn govràn, kɩ nɛ̀n dú ɔwrɔn tɔ̀n léyi ẅɛn ɛnkruemɛ̀n nɔn. Govràn Serzhiüsɛ̀n Pahülüsɛ̀n hán ye bi Barnabasɛ̀n mán Sɔlɛ̀n, ɔmuhi ne ji nɛ̀n yá Ɔwɔ-mùan-ankà nɔn.

⁸ Tɛ́n seke-wrɔn Elimasɛ̀n (ɔmu lɔ de ye bi nɛ̀n grɛkɛ̀n mɛ̀n nɔn) kɛ kɛ́n yɔ ezì, kɩ ke ji kɛ zrɛ́n govran-wrɔn ankaẅì-bùtan lɔ.

⁹ Zɛtɛn Sɔlɛ̀n léyi ye vru ye bi Pɔlɛ̀n nɔn, Ɛnhɛ́n Prɔnprɔn yɩ́ edomɛ̀n kɩ crɛ ezì kɛ́n seke-wrɔn lɔ

¹⁰ kɩ kɛ dɔ́ nɛ̀n le: “Ɛfrɛ́n-wrɔn mán anbɔrɛ-wrɔn, anwa-wrɔn ẅì, ɛci anvrɛnvrɛn lɔ fɛn y'egbri-wrɔn! Vɛ́n eci-jrɛ́ kɔ̀hɔ̀n léyi ɛ hán Ɛẅɛnwrɔn kɔrɛ̀-ci wú nɔn, è sɩ̀ teze mrìmrì hɛ̀n?

¹¹ Zɛtɛ̀ lɔ, è die nukùɛ: Ɛẅɛnwrɔn kɛ lɛ gɔ́n mɛ́n, anvɛ̀ kɛ le nyi mɛ́n, e sɩ̀ kán ɛnbri ɛnvra cá mɛ̀n.” Ɛnvra zri lɔ mɛ̀n Elimasɛ̀n anvɛ̀ nyì kɩ dú ɛnyran yri-yɔwɔ mɛ̀n: nɛ crɛ n'edomɛ̀n ɛyri lɔ fɛn, ne ji ɔwrɔn kɛ̀ ẅɛn nɛ̀n ɛkɔrɛ̀ kɛ̀ hɔ̀n sɩ́ nɛ̀n.

¹² Ɛnvra léyi govràn kán eci léyi wɔɛ̀n nɔn, nɛ̀n srɔ ankaẅì-bùtan-ẅɛn-wrɔn; Ɛẅɛnwrɔn ankà-yé lɔ bru n'ɛnbɔrɛ lɔ mɛ̀n anvrɛnvrɛn.

Pɔlɛ̀n mán Barnabasɛ̀n hɔ́n Antiɔshɛ̀n anmàn Pisidi kpɔsɔ wú

¹³ Pɔlɛ̀n mán nɛ́n nyran hɔ̀n bɩ́ ɛhɛ̀ Pafɔsɛ̀n anmàn kɩ hɔ́n Perzhe anmàn, Panfili Kpɔsɔ wú. Zhan-Markɛ̀n teze yɔ nanvrɛn anmàn kɩ vru ɛmɛẅi hɔ́n Zherüzalɛmɛ̀n anmàn.

¹⁴ Pɔlɛ̀n mán Barnabasɛ̀n dú Perzhe anmàn kɩ hɔ́n Antiɔshɛ̀n anmàn Pisidi kpɔsɔ wú. Ɛnyanman-bì lɔ, yɔ bru Ɔwɔ-sɛ́n-wɔn lɔ mɛ̀n kɩ yɔ yɛ́.

¹⁵ Ɛnvra léyi yɛ krɛ́ Ɔwɔ-nyanmàn mán Ɔwɔ-mùanwú-ankà-dɔ́-bɔ̀ wrú hɔ̀n lɔ trɔ nɔn, Ɔwɔ-sɛ́n-wɔn-cüìcüì-bɔ̀ wá anwrɔn ɔkɔ̀hɔ̀n kɛ̀ dɔ́ yɔ le: “Anwrɔn-nɛ́n-muan-ẅì hɔ̀n ke dú kɛ nyɛ́n ẅɛn edùyi-ankà nyɛ lɛ dɔ́ fɛcüè hô, zɛtɛn nyɛ́n dɔ̀.”

¹⁶ Pɔlɛ̀n tɔhú, hán ɛkɔrɛ̀ kɩ kɛ dɔ̀ le: “Izraɛlɛ̀n-bɔ̀ mán nyɛ́n léyi nyɛ́n vá Ɔwɔ-cice kɔ̀hɔ̀n hán yri nɔn, nyɛ́n die mɛ̀n nukùɛ!

¹⁷ Izraɛlɛ̀n fɛcüè Wɔ lɔ, mrɛ́n bɔ́ nancüì hɔ̀n nbɩ. Nɛ̀n hán fɛcüè ndɔ lɔ sevri ɛnvra léyi nɛ́n dú ɛnloku, Ezhiptɛ̀n hi wú nɔn, zɛtɛn nɛ̀n hán fɛcüè ndɔ lɔ dú Ezhiptɛ̀n hi wú srɔ ɛntrɛ n'ɛkɔrɛ̀-srɔn mɛ̀n.

¹⁸ Ɔwɔ wá fɛcüè ndɔ lɔ ɛkɔrɛ̀ ɛnnànwàn kru ɛkoẅi-anhyrɛ̀, ɛnvra léyi yɔ dú ɛnnùwì nɔn.

¹⁹ Zɛtɛn nɛ̀n jrɛ́ ɛnhi wú anmàn ɔbɔ̀ɛn Kanahan hi wú kɩ nɛ̀n bɩ́ y'ɛnhi lɔ nɛ̀n tán nɛ́n fɛcüè-bɔ̀ kè dú y'eci-ẅɛn-ci hàn kɩ kɛ̀

²⁰ cɔ́ ɛnnànwàn kru ɛkoẅi-ɛẅia-anhyrɛ̀ mán ɛẅì ɛvà. Ankà ndɔ lɔ n'ɛmɛẅi lɔ, nɛ̀n tán bɔ́ nancüì hɔ̀n ɛmrɛ̀n-ci-bɔ̀ hàn kɩ cɔ́ Ɔwɔ-mùanwú-ankà-dɔ́-wrɔn Samüɛlɛ̀n vra.

²¹ Zɛtɛn, bɔ́ nancüì hɔ̀n sán Ɔwɔ ɛnnɛ̀ncüì tɔ̀n, kɩ nɛ̀n tán yɔ Saülɛ̀n, Kisɛ̀n ẅì, Bɛnzhamɛn mɛ̀n mɛ̀n-wrɔn, kɩ Saülɛ̀n ẅɛn ɛyri ɛnnànwàn kru ɛkoẅi-anhyrɛ̀.

²² Ɛnvra léyi yɔ teze Saülɛ̀n nɔn, Ɔwɔ tán yɔ Davidɛ̀n kè dú y'ɛnnɛ̀ncüì. Nyàn ankà léyi nɛ̀n dɔ́ Davidɛ̀n wú nɔn: ‘Mɛ̀n cɔ́ Davidɛ̀n, Zhese ẅì: Ɔwrɔn ndɔ lɔ de m'ɛnbɔrɛ kɛ cüɛ̀n nɔn, nɛ lɛ hán eci lɔ fɛn léyi me ji nɔn.’

²³ Davidɛ̀n mɛẅi-bɔ̀ lɔ ɔtɔ̀n de dú Zhezü léyi Ɔwɔ wá Izraɛlɛ̀n fɛcüè Bɩ̀die-wrɔn, hán ɔmu léyi nɛ̀n wá ɔmùan nɔn.

²⁴ Zhezü kɛ vá và, Zhan dɔ́ Izraɛlɛ̀n fɛcüè lɔ fɛn Ɔwɔ ankà kɩ bi yɔ, yɔ crɔn y'eci-hán-ci, ô yɛ wá yɔ ɛnshi ɛnkru.

²⁵ Ɛnvra léyi Zhan kɔ̀hɔ̀n lɔ kɛ hɔ́n ɔtrɔmɛ̀n nɔn, nɛ́n dɔ̀ le: ‘Antɔnwrɔn de nye bú mɛ̀n nyɛ hán nɛ́n? Mɛ̀n sɩ̀ dù ɔwrɔn léyi nyɛ vrá nɔn. Tɛ́n nyɛ́n die nukùɛ: nɛ̀n dú mɛ̀n ɛmɛẅi nɛ và kɩ mɛ̀n sɩ̀ zeze mɛ̀n zrɔa hɩ m'á sɩ́ m'edomɛ̀n ɛnhi, ô mɛ̀n gbrɔ n'annanwrú hɛ́ lɔ nɔn.’

²⁶ Anwrɔn-nɛ́n-mùan-ẅì hɔ̀n, nyɛ́n léyi nyɛ́n dú Abrahamɛ̀n mɛẅi-bɔ̀ mán nyɛ́n léyi nyɛ́n dú ɛnu, Ɔwɔ ankɔrɛ̀ ezìwú cüemɛ̀n nɔn: bɔ́ de ɛnkrukɔrɛ̀ mɛẅi ankà lɔ, kɛ zɛ́n bɔ̀ ɛnsrì nɔn.

²⁷ Annanwɔrɛmɛ̀n lɔ, Zherüzalɛmɛ̀n anmàn-bɔ̀ mán y'anwrɔn cüìcüì hɔ̀n kè sɩ̀ nyrì ɔwrɔn léyi dú Zhezü nɔn, kɩ yɔ sɩ́ yá Ɔwɔ-mùanwú-ankà-dɔ́-bɔ̀ ankà-dɔ̀ léyi yɛ krɛ́ ɛnyanman-bì lɔ fɛn nɔn. Tɛ́n yɔ hán ankà-dɔ̀ ndɔ lɔ sá nmù, ɛnvra léyi yɔ di Zhezü owúemɛ̀n nɔn;

²⁸ kɩ, ɔmuhi yɔ sɩ́ cɔ́ nɛ̀n nwùbɔ yri nɔn, yɔ dɔ́ Pilatɛ̀n kè di nɛ̀n owúemɛ̀n.

²⁹ Ɛnvra léyi yɔ hán eci lɔ fɛn léyi Owrú Prɔnprɔn dɔ́ n'ɛwú nɔn, yɔ mrɛ́n nɛ̀n ɛgbàn-hán-tɛ̀ wú yɔ sɩ́ nɛ̀n ɛnhi kɩ yɔ wá nɛ̀n ezhe nànmàn tɔ̀n mɛ̀n.

³⁰ Tɛ́n Ɔwɔ hán nɛ̀n nɛ̀n dú owú-bɔ̀ mɛ̀n nɛ̀n vá ɔkɔrɛ-bɔ̀ mɛ̀n.

³¹ Ɛnvra bobrebe, Zhezü bɩ́ n'edomɛ̀n yé anwrɔn hɔ̀n léyi dú Galile kpɔsɔ wú hɔ́n sɩ́ nɛ̀n Zherüzalɛmɛ̀n anmàn, hɩ zɛtɛn dú nɛ́n dalɛfuɛ-di-bɔ̀ Izraɛlɛ̀n fɛcüè zìwú nɔn.

³² Bɔ́ mùmù, bɔ́ và bɔ̀ sɩ́ nyɛ̀n Ɛmɛẅi ankà Ankrànkràn ndɔ lɔ: ɔmùan léyi Ɔwɔ wá bɔ́ nancüì hɔ̀n nɔn,

³³ zɛtɛ̀ lɔ nɛ̀n hán yi sá nmù, dú bɔ́ léyi bɔ̀ dú y'ɛmɛẅi-bɔ̀ nɔn tɛn, kɩ nɛ̀n hán Zhezü dú owú-bɔ̀ mɛ̀n vá ɔkɔrɛ-bɔ̀ mɛ̀n. Annanwɔrɛ mɛ̀n lɔ Ɔwɔ-mrɛ́n-wrú, anhyrɛmɛ̀n tɛ́n lɔ mɛ̀n, ye merɛ́n le: ‘Vɛ́n de è dú m'ɛnẅì nɔn, bukru ɛnyɔcì lɔ, mɛ̀n dú e Zi.’

³⁴ Ɔwɔ dɔ̀ le nɛ lɛ hán Zhezü kè dú owú-bɔ̀ mɛ̀n kɛ vá ɔkɔrɛ-bɔ̀ mɛ̀n, ô nɛ́n bɩ́ vru hɔ́n ɛnhi-wɔ̀n mɛ̀n. Hɩ wú lɔ nɛ́n dɔ̀ le: ‘Mɛ lɛ tán nyɛ̀n ɛnshi-fù prɔnprɔn mán annanwɔrɛ léyi mɛ̀n wá Davidɛ̀n ɔmùan nɔn.’

³⁵ Hɩ le kruhu nɛ̀n vru nɛ̀n dɔ́ Owrú nyantɛn mɛ̀n le: ‘E sɩ̀ teze v'ɔmùan-zri-di-wrɔn kɛ̀ srɔ ɛnhi-wɔ̀n ɛnnanmàn mɛ̀n.’

³⁶ Davidɛ̀n tɛn, nɛ́n vra lɔ mɛ̀n, hán eci léyi Ɔwɔ ke ji nɔn; zɛtɛn nɛ̀n wù, ye bɩ́ nɛ̀n nɛ́n nancüì hɔ̀n tɛ̀sɛ̀n, kɩ nɛ̀n srɔ ɛnhi-wɔ̀n.

³⁷ Tɛ́n ɔwrɔn léyi Ɔwɔ vru sɩ́ ɔkɔrɛ-bɔ̀ mɛ̀n nɔn, nɛ̀n sɩ̀ nyrì ɛnhi-wɔ̀n.

^38-39 Anwrɔn-nɛ́n-muan-ẅì hɔ̀n, ke ji le nyɛ́n yrì le: Zhezü bɩmɛ̀n de yɛ dɔ́ bɔ̀ ɛgbàn-bɩ̀-ce ankà nɔn; Zhezü bɩ́mɛ̀n de ɔwrɔn totɔtɔ̀n léyi ẅɛn ankaẅì-bùtan nɔn kɛ cɔ́ ɛgbàn-bɩ̀-ce léyi Mohizì nyanmàn lɔ ke sɩ̀ tán nyɛ̀n rɔ́ nɔn.

⁴⁰ Nyɛ́n wá esùva zɛtɛn, ô ankà léyi Ɔwɔ-mùanwú-ankà-dɔ́-bɔ̀ merɛ́n nɔn, ke bɩ́ ẅɛn nyɛ̀n nmù:

⁴¹ ‘Nyɛ́n nyan, nyɛ́n léyi egbrì yɩ́ nyɛ̀n ɛnbɔrɛ mɛ̀n, ankà kɛ̀ frɛ́n nyɛ̀n anvɛmɛ̀n, ô nyɛ́n srɛ́ zrɛ́n! Ɔmuhi ny'ɛwúvà kɔrɛ̀ lɔ mɛ̀n, mɛ lɛ hán eci tɔ̀n léyi nyɛ́n sɩ̀ bù tán ankaẅì rɔ́ ke dú kɛ ɔwrɔn tɔ̀n kɛ dɔ́ nyɛ̀n ankà lɔ!’ ”

⁴² Ɛnvra léyi Pɔlɛ̀n mán Barnabasɛ̀n dú Ɔwɔ-sɛ́n-wɔn lɔ mɛ̀n srɔ ɛntrɛ nɔn, yɛ dɔ́ yɔ le ye vru yɔ vá ɛnyanmán-bì léyi kɛ và nɔn, ô yɔ dɔ́ ankà zri lɔ.

⁴³ Ɛnvra léyi ɛkruborɛ trɔ nɔn, Zhüifɛ̀n-bɔ̀ bobrebe mán anwrɔn hɔ̀n léyi kɛ sɛ́n Zhüifɛ̀n-bɔ̀ Wɔ lɔ nɔn, dú Pɔlɛ̀n mán Barnabasɛ̀n ɛmɛẅi. Pɔlɛ̀n mán Barnabasɛ̀n kɛ dɔ́ yɔ ankà kɩ ke yɩ́ yɔ edù, ô yɔ di ɔmùan zri Ɔwɔ boafɔ̀n lɔ mɛ̀n.

⁴⁴ Ɛnyanmán-bì léyi kɛ̀n nɔn, anmàn-bɔ̀ lɔ fɛn borɛkru ô kɛ̀ yá Ɛẅɛnwrɔn ankà-dɔ̀.

⁴⁵ Ɛnvra léyi Zhüifɛ̀n-bɔ̀ kán fɛcüè ndɔ lɔ nɔn, yɔ dú ɛcüìhi-kɔ́n mɛ̀n; Yɔ kɛ́n ankà wá Pɔlɛ̀n kɩ yɔ wora nɛ̀n.

⁴⁶ Zɛtɛn Pɔlɛ̀n mán Barnabasɛ̀n kɛ dɔ́ yɔ esɛ́ mɛ̀n le: “Ke ji le Ɔwɔ mùan ankà lɔ, nyɛ́n gɔ̀ cɔ́ nɛ̀n nyɛ́n yá. Tɛ́n ɔmuhi nyɛ́n sɩ́ ji nyɛ́n bɩ́ Ɔwɔ ankà lɔ nɔn, hɩ nye yé le nyɛ́n sɩ́ ji ɛwúvà léyi ke sɩ́ trɔa nɔn, kɛ zrɔ, zɛtɛn bɔ́ lɛ crɛ ezì bɔ̀ kɛ́n anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn.

⁴⁷ Nyàn eci léyi Ɛẅɛnwrɔn wá tán bɔ̀ nɔn: ‘Mɛ̀n wá mɛ́n e dù ɛ̀ hán, ɛnhi wú anmàn hɔ̀n yrikàn, ô è bɩ́ ɛwúvà-kɔrɛ̀ ɛ̀ hɔ̀n, hàn mán ɛ̀ cɔ́ ɛnhibù kru trɔ!’ ”

⁴⁸ Ɛnvra léyi anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn yá ankà ndɔ lɔ nɔn, yɔ dú pɔpüɛ̀ mɛ̀n kɩ yɔ mrɛ́n Ɛẅɛnwrɔn ankà-dɔ̀ lɔ. Anwrɔn lɔ fɛn léyi, yɛ wá ɛwúvà léyi ke sɩ́ trɔa ɔmùan nɔn, srɔ ankaẅì-bùtan-ẅɛn-bɔ̀.

⁴⁹ Ɛẅɛnwrɔn ankà-dɔ̀ bonyi ɔkpɔsɔ ndɔ lɔ fɛn wú.

⁵⁰ Tɛ́n Zhüifɛ̀n-bɔ̀ kɛ wá anmàn wúyɔ̀ hɔ̀n léyi ẅɛn ɛwúvà ankrankran, hɩ kɛ sɛ́n Ɔwɔ nɔn ankà, yɔ mán anmàn kpàmán-bɔ̀ mɛhi; yɔ hán Pɔlɛ̀n mán Barnabasɛ̀n ejüezì mán ɛgbànkán-ci, kɩ yɔ wrɔ́ yɔ y'ɛnhi-nan lɔ wú.

⁵¹ Anwrɔn anhyrɛ̀ lɔ korɛ y'annan hi-wɔ̀n lɔ cüe yɔ, kɩ hɔ́n Ikoniɔmɛ̀n anmàn.

⁵² Ɛsɛ̀nkɛn-bɔ̀ léyi dú Antiɔshɛ̀n anmàn nɔn, yɔ tɛn, pɔpüɛ̀-brà mán Ɛnhɛ́n Prɔnprɔn yɩ́ yɔ edomɛ̀n.