2 Piɛrɛ̀n 2 - Ɛmɛẅi ankà ankrànkràn 2003

Ɛyɔ̀n ankà-yé-bɔ̀

¹ Ɛyɔ̀n wɔ-mùan-wú-ankà-dɔ́-bɔ̀ srɔ ɛnbiɛhɛ́n vra Izraɛlɛ̀n fɛcüè mɛ̀n; ɔmu zri lɔ de, ɛyɔ̀n ankà-yé-bɔ̀ kɛ lɛ srɔ nyɛ̀n ɛmɛ̀n. Yɔ le sɩ́ ɛyɔ̀n wɔ ankà léyi ẅɛn ɛnjansù kɩ yɔ le teze Ankà-yé-wrɔn léyi bɩ́ yɔ die nɔn; ɔmu lɔ de yɔ lɛ sɩ́ ɛjrɛ́ kpràkprà yɔ tán y'edomɛ̀n.

² Bobrebe kɛ lɛ kɛ́n yɔ ɛsɛ̀n y'ɛwúvà ẅɛ̀n gbàngbàn lɔ mɛ̀n kɩ, y'ɛkruhú, yɛ lɛ dɔ́ ankà gbàngbàn ku annanwɔrɛ levri wú.

³ Ɔkua cüɛ̀n kruhú ɛyɔ̀n ankà-yé-bɔ̀ ndɔ hɔ̀n lɔ kɛ lɛ frɛ́n nyɛ̀n y'ɛyɔ̀n ankà dɔ́ mɛ̀n. Tɛ́n ɛnvra sheshe mɛ̀n de yɔ nwù-bɔ̀ krɔn kpehɛ́n hɛ́n, kɩ y'ɛjrɛ́ mán ke sɩ̀ mɔ̀ɛn!

⁴ Annanwɔrɛ mɛ̀n lɔ, Ɔwɔ ke sɩ̀ mrɛ̀n ɛkùyüre-wrɔn gbàngbàn zriɛmɛ́n ke teze hɛ̀, tɛ́n nɛ̀n kɔ́n yɔ lɛ fɛn nɛ̀n ku ɛnhyà vriemɛ̀n, nanvrɛn de yɛ tɔ́n yɔ gbràka mɛ̀n, ɛyri yɔwɔ mɛ̀n, yɔ vrá ɛmrɛ̀nci bì lɔ.

⁵ Nɛ̀n sɩ̀ mrɛ̀n ɛnhibù gbànvri mán nɛ̀n teze hɛ̀, tɛ́n nɛ̀n hán ɛnshi yɩ́ bɩ́ ɛnhibù ndɔ léyi ɛci gbàngbàn-hán-bɔ̀ yɩ́ ɛmɛ̀n nɔn; Noe léyi kɛ dɔ́ ɛnyrɔnnan ankà, mán anwrɔn ɔbɔ̀ɛn nyantɛn, kɩ nɛ́n bɩ die.

⁶ Ɔwɔ bɔ́ Sodɔmɛ̀n mán Gomɔrɛ̀n anmàn nwù kɩ nɛ̀n jrɛ́ yɔ ɛnhyà mɛ̀n, ɔmu lɔ de nɛ̀n tán sɛnpò tɔ̀n léyi ke le dú ɛgbàn-hán-bɔ̀ lɔ fɛn tɛn nɔn.

⁷ Ɔtrɔmɛ̀n lɔ, nɛ̀n bɩ́ Lɔtɛ̀n léyi dú ɛnyrɔnnan-wrɔn nɔn nɛ̀n die, nɛ́n léyi nɛ́n nyran hɔ̀n ɛnkru-gbangbàn-ẅɛn-bɔ̀ lɔ, kɛ nán esù gbàngbàn yé nɔn.

⁸ Ɔmuhi ɛnyrɔnnan-wrɔn ndɔ léyi dú yɔ anwanzi nɔn, kɛ kàn kɩ kɛ yá eci lɔ fɛn léyi yɔ hán ɛnbì ɛnbì; y'ɛnkru-fe wúvà lɔ, kɛ jɔkɔ n'annanwɔrɛ-dì bɔrɛ lɔ.

⁹ Ɔmu lɔ de Ɛẅɛnwrɔn nyri eci léyi nɛ lɛ hán, ô nɛ̀n bɩ́ anwrɔn hɔ̀n léyi brɛ́ nɛ̀n ɛtɛ̀sɛ̀n yɛ́ nɔn nɛ̀n die, mán ɔmu le nɛ lɛ kɛ́n ɛgbàn hán-bɔ̀ nɛ̀n hɛ́n, ô nɛ̀n hán yɔ ɛgbàn ɛmrɛ̀nci bì lɔ nɔn;

¹⁰ anwrɔn hɔ̀n léyi kɛ kɛ́n yɔ dùku y'ɛnbrá mɛ̀n ankàtro ɛsɛ̀n kɩ ke gbri Ɔwɔ kɔrɛ̀levri ci nɔn, nɛ lɛ hán yɔ ɛgbàn. Ɛyɔ̀n ankà-yé-bɔ̀ ndɔ hɔ̀n lɔ ẅɛn tùtre mán ɛgbugbu, yɔ sɩ̀ ẅɛ̀n ɔwá zriɛmɛ́n kè dù eci-zrɔ hɛ́n hɔ̀n léyi dú anhobɩ́ nɔn tɛn, tɛ́n yɔ wora anhɛ́n hɔ̀n lɔ.

¹¹ Ɔwɔ kùyüre-bɔ̀ dùku léyi ẅɛn ecüì mán ɛkɔrɛ̀srɔn nɔn, ke sɩ́ dɔ́ ɔwora ankà kɛ tán yɔ Ɛẅɛnwrɔn zìwú.

¹² Tɛ́n anwrɔn ndɔ hɔ̀n lɔ kɛ hán eci ɛnkru mù mɛ̀n kɛ cá ovú nɔ̀n hɔ̀n léyi ye bî kɩ yɛ ẅɛ̀n ye wrì nɔn; yɔ wora eci léyi yɔ sɩ̀ nyriɛn nɔn. Ye le wri yɔ kɛ lɛ hán annɔ̀n hɔ́;

¹³ ɔmu lɔ de yɔ lɛ cɔ́ ɔwɔ̀ɛn-dì y'ɛgbàn hɔ̀n lɔ fɛn léyi yɔ hán nɔn hɩ wú. Yɔ cɔ́ yɔ pɔpüɛ̀-brà y'ankàtro gbàngbàn ci-hán mɛ̀n, ɛcɛ̀n pupu mɛ̀n; y'anwrɔn mɛ̀n dù ẅɛn anvɛvrà mán ɛnkruemɛ́n jrɛ́ ɛnvra léyi yɔ dú ɛcizîemɛ̀n yɔ mán nyɛ́n mɛhi kɩ yɔ brá ɛfrɛ́n pɔpüɛ̀.

¹⁴ Ɛncɔnwrɔn-hi-bi-gbàn yɩ́ y'anvɛ̀ lɔ mɛ̀n; ɛgbàn hán ke sɩ́ fɔ́n yɔ. Ɛjɛ-bɔ̀ ke bru y'antanwrɔn lɔ mɛ̀n. Ɔkùa cɔ́ ankà, wá ɛnhyà y'ɛnbɔrɛ lɔ mɛ̀n. Ɔwɔ ẅiɛ̀-dà dú yɔ ɛwú!

¹⁵ Ɛnvra léyi yɔ cɔhɔ́ ɛnlevri léyi nyrɔn nɔn wú nɔn, yɔ zrɛ́n y'edomɛ̀n kɩ yɔ bɩ́ ɛnlevri zri léyi Bosɔr ẅì, Balaamɛ̀n nbɩ nɔn. Ɔwrɔn ndɔ lɔ cüɛn ɔkùa léyi yɛ tán nɛ̀n, ne bɩ nɛ̀n hán ɛgbàn nɔn,

¹⁶ tɛ́n nɛ̀n cɔ́ ebrèdì nɛ́n wawa hán lɔ wú. Annanwɔrɛ mɛ̀n lɔ, frimu sɛ̀n tɔ̀n léyi ɔmùan nmù nɔn, bɩ́ ɔwrɔnẅì sùva dɔ́ ankà, kɩ kɛ́n ɔbrɔ̀sà wɔ mùan-wú-ankà-dɔ́-wrɔn lɔ ankà gbàngbàn anmùan mɛ̀n hɛ́n.

¹⁷ Anwrɔn ndɔ hɔ̀n lɔ dù cá ɛnshi-bɛ́ hɔ̀n léyi wrú, mán ɛnwì-gbú hɔ̀n léyi ɔwràn dɔnwrɔ̀n kɛ kɛ́n sɩ́; Ɔwɔ hán ɛyri hɛ́n yɔ ɛnnyran yri yɔwɔ vri mɛ̀n.

¹⁸ Yɔ dɔ́ ankà woro hɔ̀n ke sevri, kɩ ke sɩ́ ẅɛn ɛnkru, yɔ bɩ́ y'anvɛvrà ankàtro hɔ̀n lɔ yɔ krɔ́n antanwrɔn ô yɔ ẅɛn anwrɔn hɔ̀n léyi ɛnvra bruemɛ̀n srɛ́ di fɛcüè ci-gbàngbàn-hán-bɔ̀ léyi dú ɛzɛ́n mɛ̀n nɔn anta.

¹⁹ Yɔ wá yɔ ɔmùan le yɔ lɛ srɔ yɔ anwrɔn kora hɔ̀n, tɛ́n yɔ dùku mán yɔ dú anwɔ̀n-bɔ̀ léyi y'edù-ci kɛ jrɛ́ eci nɔn, ɔmuhi ɔwrɔnwrɔn dú eci léyi sevri ká nɛ̀n nɔn n'ɔwɔ̀n-wrɔn.

²⁰ Annanwɔrɛ mɛ̀n lɔ, yɛ cɔ́ anwrɔn hɔ̀n léyi srɛ́ di ɛnhibù wú ci-hán gbàngbàn lɔ anta, bɔ́ Ɛẅɛnwrɔn mán Ebɩdie-wrɔn Zhezü Krisì nyrì lɔ mɛ̀n; tɛ́n ke dú kɛ yɔ teze y'edomɛ̀n ye vru yɔ ẅɛn yɔ kɩ y'ecüì kɛ ká yɔ hô, ye le dú eci-hán-gbangbàn tɔ̀n mɛ̀n kɛ lɛ vrán kpàkpà tɛ́n lɔ.

²¹ Zrɔ tán ɔmu le yɔ tɛn, ye bɩ́ nyri ɛnyrɔnnan levrí lɔ, kɩ yɔ nyri nɛ̀n, ô yɔ vru yɔ crɛ ejüi yɔ sɔ́n ɛnyanmàn prɔnprɔn léyi yɛ tán yɔ nɔn.

²² Yɔ cɔ́ eci léyi nyandrɛn mɛ̀n yɛ dɔ̀ le: “Ɛnlɛtù ke vru ke zî ɛci léyi nɛ́n vɛ̀ nɛ̀n cüe nɔn” kɩ ye vru yɛ dɔ̀ le: “Gbrokò léyi ye jru edomɛ̀n zɛtɛ̀ lɔ nɔn, vru kɛ wá antà edomɛ̀n.”