2 Korɛntɛ̀n anmàn-bɔ̀ 7 - Ɛmɛẅi ankà ankrànkràn 2003

¹ Ɔmùan-wá ndɔ hɔ̀n lɔ fɛn zrɔ tán bɔ̀, annyran-anvrɛn hɔ̀n. Hɩ le kruhú de, ke ji le bɔ́ fi edomɛ̀n bɔ̀ tán edùwrú mán wàwúyɛ, ô bɔ̀ cɔhɔ́ ɛnbrá-ci hɔ̀n lɔ fɛn tɛ̀sɛ̀n, ô bɔ̀ hán kèkrèmɛ̀n bɔ̀ srɔ prɔnprɔn kokroho, Ɔwɔ wá mɛ̀n, bɔ́ ɛwúvà ẅɛn mɛ̀n.

Pɔlɛ̀n pɔ̀püɛ̀-brà

² Nyɛ́n tán bɔ̀ ɛyri tɔ̀n ny'ɛnbɔrɛ lɔ mɛ̀n! Bɔ́ sɩ̀ hàn ɔwrɔn zriɛmɛ́n ɛgbàn, bɔ́ sɩ̀ jrɛ̀ ɔwrɔn zriɛmɛ́n eci, bɔ́ sɩ̀ frɛ̀n ɔwrɔn zriɛmɛ́n.

³ Mɛ́n sɩ́ dɔ́ ɔmu lɔ, ô mɛ̀n bó nyɛ̀n nwù. Annanwɔrɛ mɛ̀n lɔ, hán ɔmu le mɛ́n gɔ̀ dɔ́ nyɛ̀n nɔn hɔ́, nyɛ́n dú bɔ́ ɛvɛ̀-cüɛn-bɔ̀, hán tán kɩ bɔ̀ dú ɔbɔ̀sɔ mɛ̀n, ɛwúvà mɛ̀n mán owúemɛ̀n.

⁴ Mɛ̀n ẅɛn ny'esɛ́ vri, me gbú ɔmùan ny'ɛwú. B'obòtò hɔ̀n lɔ fɛn mɛ̀n, mɛ̀n dú edúyiemɛ̀n kɩ pɔ̀püɛ̀-brà yɩ́ m'ɛnbɔrɛ lɔ.

⁵ Ɔmu lɔ mán, ɛnvra léyi bɔ̀ cɔ́ Maseduanɛ̀n kpɔsɔ wú nɔn, bɔ̀ sɩ̀ cɔ̀ ɔwrɔncüe ẅiɛ mán. Bɔ̀ srɔ́n ejüedì mɛ̀ntɛ mɛ̀ntɛ ɛsù: annannkran gbrɛ́nkɛn bɔ̀ ɔmùan, ɛnjansù dú bɔ̀ ɛnbɔrɛ mɛ̀n.

⁶ Tɛ́n Ɔwɔ léyi ke sɩ́ edùka-bɔ̀ dùyì lɔ ɛwú nɔn, tán bɔ̀ ecüì Titɛ̀n và lɔ mɛ̀n.

⁷ Kɩ kè sɩ̀ dù n'ɛvà lɔ tɛ̀kɩ de kɛ̀ tán bɔ̀ ecüì ndɔ lɔ nɔn, tɛ́n vru dú ɔmu le nyɛ́n hán nyɛ́n tán nɛ́n dùku ɛnbɔrɛ-bi-wá nɔn. Nɛ́n dɔ́ bɔ̀ ɛkàn léyi nyɛ́n vru nye ji nyɛ́n kán mɛ̀n, ny'obòto ankà, ny'edùyì léyi nyɛ́n ẅɛn m'ankà-dɔ̀ tán ci-hán mɛ̀n nɔn yi ankà. Kɩ nyàn eci le kruhú léyi mɛ́n pɔpüɛ̀-brà vru dú evrisiemɛ̀n nɔn.

⁸ Annanwɔrɛ mɛ̀n lɔ, ke dú kɛ owrú léyi mɛ̀n merɛ́n nyɛ̀n nɔn, kɛ tán nyɛ̀n obòto hô, mɛ̀n sɩ̀ ẅɛ̀n n'obòtò zɛtɛ̀ lɔ. Mɛ̀n ẅɛn n'obòtò ɛnvra léyi mɛ́n cɔ̀, mɛ̀n nyri ɔmu le owrú ndɔ lɔ tán nyɛ̀n obòtò ɛnvra bruemɛ̀n tɛ̀kɩ.

⁹ Tɛ́n zɛtɛ̀ lɔ mɛ brá pɔpüɛ̀ kɩ kè sɩ̀ dù hɩ le mɛ̀n wá nyɛ̀n obòtò ɛmɛ̀n nɔn, tɛ́n ny'obòtò lɔ hán nyɛ̀n nyɛ́n crɔn ny'eci-hán-ci. Obòtò ndɔ lɔ ndù hán hɩ le Ɔwɔ ke ji nɔn, hán tán kɩ bɔ̀ sɩ̀ vrù hán nyɛ̀n ɛgbàn zriɛmɛ́n.

¹⁰ Ɔmuhi, obòtò léyi ke ci Ɔwɔ ankɔ̀nda ci-hán mɛ̀n nɔn, kɛ tán ɛnkru-crɔn ci-hán tɔ̀n léyi ke sɩ́ ɛwúvà-kɔrɛ̀ mɛ̀n, kɩ ye sɩ́ vru boto nɛ̀n hàn. Tɛ́n obòtò léyi ɛnhibù ankà-tro hɔ̀n kɛ tán nɔn, ke sɩ́ owù.

¹¹ Nyɛ́n nyan zɛtɛ̀ lɔ ny'obòtò lɔ nɛ́n vɔ̀nshɛ́ hɔ̀n, hán ɔmu le Ɔwɔ kɛ ji nɔn: ny'eci ɛnbɔrɛ-anvrɛnvrɛn hán mɛ̀n, ny'edomɛ̀n ankà-dɔ̀ tán ɛkpranmàn ci-hán mɛ̀n! Ny'ɔkrɔ ci-hán mɛ̀n, ny'ɛnjansù ci-hán mɛ̀n, ɛcüɛ̀n léyi nyɛ́n ẅɛn m'ɛwú, kɩ nye ji nyɛ́n kán mɛ̀n, ny'edùyì, ny'ecüì léyi nyɛ́n ẅɛn ɛgbàn-kɔrɛ̀ ci-hàn mɛ̀n nɔn! Nyɛ́n yé tán eci lɔ fɛn mɛ̀n le edòmɛ̀n fi nyɛ̀n ankà ndɔ lɔ mɛ̀n.

¹² Ke dú kɛ mɛ̀n merɛ́n nyɛ̀n owrú hô, kè sɩ̀ dù ɔwrɔn léyi hán ɛgbàn mán nɛ́n léyi yɛ hán nɛ̀n ɛgbàn nɔn kruhú. Tɛ́n, nyɛ́n cɔ̀ nyɛ́n nyri kpete mɛ̀n Ɔwɔ zìwú le nyɛ́n hán edùyi-ci bɔ́ ɛkruhú.

¹³ Hɩ le kruhú de ny'ankà-tro ci-hán tán bɔ̀ ɛnbɔrɛ-bi-wá nɔn. Bɔ́ sɩ̀ cɔ̀ ɛnbɔrɛ-bi-wá tɛ̀kɩ; bɔ̀ cɔ́ pɔpüɛ̀-brà vru sevri ɛnvra léyi bɔ̀ kán Titɛ̀n dú ɛnbɔrɛ-bruemɛ̀n, ɔmu le nyɛ lɛ fɛn nyɛ́n hán nyɛ́n tán nɛ̀n esɛ́ nɔn.

¹⁴ Ke dú kɛ mɛ̀n gbú ɔmùan ẅiɛ jan ny'ɛwú, n'ɛtɛ̀sɛ̀n hô, nyɛ́n sɩ̀ tán mɛ̀n anvɛvrà. Tɛ́n, ɔmu zri léyi bɔ́ dɔ́ nyɛ̀n ankà annanwɔrɛ nɔn, ɔmu zri lɔ ɛmrɛ́n léyi bɔ̀ tán nyɛ̀n Titɛ̀n tɛsɛ̀n nɔn, ɛmrɛ́n lɔ dú ɛnyrɔnnan mɛ̀n.

¹⁵ Kɩ ɔmu lɔ, ɛcüɛ̀n léyi nɛ̀n ẅɛn ny'ɛwú vru sevri, ɛnvra léyi ke bru nɛ̀n le, nyɛ lɛ fɛn nyɛ́n ẅɛn n'ɔwá mán ɔmu le nyɛ́n hán nyɛ́n bɩ́ nɛ̀n edòmɛ̀n ɛnhisɩemɛ̀n, mán ɔwá mɛ̀n mɛhi.

¹⁶ Mɛ̀n dú pɔ̀püɛ̀-brá mɛ̀n, ɔmuhi ɛnvra lɔ fɛn, mɛ̀n ẅɛn esɛ́ ny'ɛwú eci lɔ fɛn mɛ̀n nɔn.