2 Korɛntɛ̀n anmàn-bɔ̀ 6 - Ɛmɛẅi ankà ankrànkràn 2003

¹ Ɔmu lɔ, ɔmuhi bɔ́ mán Ɔwɔ mɛhi bɔ̀ dú eci-zri-hán mɛ̀n nɔn, bɔ́ sɛ́n nyɛ̀n: nboafɔ̀n léyi Ɔwɔ tán nyɛ̀n nɔn, nyɛ́n bɩ́ wú edù n'ɛwú.

² Annanwɔrɛ mɛ̀n lɔ, Ɔwɔ kɛ dɔ̀ le: “Ɛnvra léyi mɛ̀n yé m'ɛcüɛ̀n lɔ nɔn, mɛ̀n die mɛ́n nukùɛ, ɛnkrukɔrɛ bì lɔ, mɛ́n và srɛ́n mɛ́n.” Zɛtɛn zɛtɛ lɔ, nyàn ɛnvra léyi ke ji le ye shri Ɔwɔ anvrɛn-hán lɔ ye bɩ; nyàn ɛnkrukɔrɛ̀ bì lɔ.

³ Ke sɩ́ ji le yɛ hán b'ɔkɔ̀hɔ̀n lɔ ɛnhyürɛ̀, hɩ le kruhú de bɔ́ sɩ́ ji bɔ̀ jrɛ́ ɔwrɔn zriɛmɛ́n ɛnkruemɛ̀n eci totɔtɔ̀n hán mɛ̀n nɔn.

⁴ Tɛ́n, bɔ́ ji eci lɔ fɛn mɛ̀n bɔ́ yé bɔ́ edomɛ̀n kɛ̀ hán le bɔ̀ dú Ɔwɔ-ci-bɩ̀tan-bɔ̀ annanwɔrɛ: bɔ́ ẅɛn ɛnbɔrɛ bobrebe hɛ́n ɛgbànkan mɛ̀n, obòtò mán ankà-tro mɛ̀n.

⁵ Yɛ kɔ́n bɔ̀ ejì kɩ yɛ wá bɔ̀ anwɔn-mɛ̀n-wá-wɔn mɛ̀n, ye sɩ́ fɛcüè ɛwú kɛ kɛ́n bɔ̀ ezì; bɔ̀ hán ɔkɔ̀hɔ̀n shishi, bɔ̀ sɩ̀ cɔ̀ ndà mán ɛci-zî.

⁶ Bɔ́ yé bɔ́ edomɛ̀n Ɔwɔ ci-bìtan-bɔ̀ fifi hɔ̀n, bɔ́ enyri-cùɛn-tan mɛ̀n, bɔ́ ɛnbɔrɛ-ẅɛ̀n-hɛ́n mán bɔ́ ɛnbɔrɛ-wɔwɔ mɛ̀n, Ɛnhɛ́n Prɔnprɔn cüìemɛ̀n, bɔ́ ɛcüɛn-bɔrɛ annanwɔrɛ mɛ̀n,

⁷ bɔ́ annanwɔrɛ ankà-dɔ́ mɛ̀n mán Ɔwɔ kɔrɛ̀-srɔn mɛ̀n. B'anhà-kɔ́n-ci mán bɔ́ edùvra-ci dú hɩ le, ke ji le yɛ hán eci léyi nyrɔn Ɔwɔ zìwú nɔn.

⁸ Yɛ mrɛ́n bɔ̀, kɩ ɛnvra tɔ̀n yɛ ẅɛn bɔ́ egbrì; yɛ wora bɔ̀ kɩ ɛnvra tɔ̀n yɛ wá bɔ̀, yɛ nyan bɔ̀ kɛ hán anhyɔ̀n-bɔ̀ hɔ́, tɛ́n bɔ́ dɔ́ ankà annanwɔrɛ,

⁹ yɛ nyan bɔ̀ kɛ hán anwrɔn hɔ̀n léyi ye sɩ̀ nyrìɛn nɔn, tɛ́n ye nyri bɔ̀ anvrɛnvrɛn, yɛ nyan bɔ̀ kɛ hán owú-bɔ̀ hɔ́, tɛ́n bɔ́ dú ankɔrɛkɔrɛmɛ̀n. Yɛ hán bɔ̀ ɛgbàn, kɩ ye sɩ́ wri bɔ̀;

¹⁰ Yɛ wá bɔ̀ gbɔ̀gbɔ̀ edù, ɔmu tɛ̀kɩ bɔ́ dú ɛnvra lɔ fɛn pɔpüɛ̀-brá mɛ̀n; bɔ̀ dú ɛmian-bɔ̀, tɛ́n bɔ́ wá anwrɔn bobrebe ɛnnɛ̀ncüì; bɔ́ yé bɔ́ edomɛ̀n kɛ hán anwrɔn hɔ̀n léyi kè sɩ̀ ẅɛ̀n eci zriɛmɛ́n nɔn, bɔ́ léyi annanwɔrɛ mɛ̀n lɔ, bɔ̀ ẅɛn eci lɔ fɛn nɔn.

¹¹ Bɔ̀ dɔ́ nyɛ̀n ankà annanwɔrɛ mɛ̀n, bɔ́ nyran anvrɛn hɔ̀n Korɛntɛ̀n anmàn-bɔ̀, bɔ̀ vuru, bɔ́ ɛnbɔrɛ lɔ ecüìcüì bɔ̀ tán nyɛ̀n.

¹² Bɔ́ sɩ̀ krɔ nyɛ̀n bɔ́ ɛcüɛn-bɔrɛ lɔ, tɛ́n nyɛ́n de nyɛ́n sɛ́n ny'ɛnbɔrɛ lɔ esù nɔn.

¹³ Zɛtɛn, mɛ dɔ́ nyɛ̀n ankà kɛ hán m'ɛẅì hɔ̀n hɔ́: nyɛ́n shri bɔ́ ɛcüɛn-bɔrɛ lɔ nyɛ́n bɩ, nyɛ́n vuru ny'ɛnbɔrɛ lɔ ecüìcüì nyɛ́n tán bɔ̀!

Esùva-wá léyi ke ji le yɛ ẅɛn anwrɔn hɔ̀n léyi kè sɩ̀ nyrì Ɔwɔ nɔn y'ɛtɛ̀sɛ̀n

¹⁴ Nyɛ́n bɩ́ hɔ́n nyɛ́n cɔ́ anwrɔn hɔ̀n léyi kè sɩ̀ ẅɛ̀n ankaẅì-bùtan nɔn, yɔ mɛhi nyɛ́n nyɔ́n ɛgbànkàn lowrú zri tɛ̀sɛ̀n, ɔbrɔ̀sà mɛ̀n. Annanwɔrɛ mɛ̀n lɔ, anwɔntan de, eci léyi nyrɔn mán eci gbàngbàn ke le dú ɔbɔ̀sɔ mɛ̀n nɛ́n? Anwɔntan de ɛyri-kàn mán ɛyri-yɔwɔ ke le dú ɔbɔ̀sɔ mɛ̀n nɛ́n?

¹⁵ Anwɔntan de Krisì mán Anwa-wrɔn ke le dú ɔmùan-krɔn mɛ̀n nɛ́n? Kale, ecitan de ankaẅì-bùtan-ẅɛn-wrɔn mán ɔwrɔn léyi kè sɩ̀ ẅɛ̀n ankaẅì-bùtan nɔn kɛ lɛ ẅɛ̀n kè dú eci zri nɛ́n?

¹⁶ Ɔmùan-krɔn tán de ke le dú Ɔwɔ-cice-wɔn mán antɛ̀-buri-Wɔ wɔn angranmɛ̀n nɛ́n? Ɔmuhi bɔ́ dùku bɔ̀ dú Ɔwɔ kɔrɛkɔrɛ lɔ n'ecice-wɔn, hán ɔmu le Ɔwɔ dùku dɔ̀ nɔn: “Me le dú yɔ ɛmɛ̀n, kɩ yɔ mɛhi bɔ́ lɛ nán esù, me le dú y'Ɔwɔ kɩ yɔ le dú mɛ́n fɛcüè.”

¹⁷ Hɩ le kruhú de, Ɛẅɛnwrɔn kɛ dɔ̀ le: “Ke ji le nyɛ́n teze yɔ, ô nyɛ́n cɔhɔ́ y'anwanzi. Nyɛ́n bɩ́ tɛ́ ɛnbrá mɛ̀n ci zriɛmɛ́n ɛkɔrɛ̀, kɩ mɛ̀n, me le bɩ́ nyɛ̀n.

¹⁸ Me le dú nyɛ́n Zi tɔ̀n kɩ nye le dú m'ɛẅì hɔ̀n wúcɔ̀ mán wúyɔ̀, ɔmu lɔ de Ɛẅɛnwrɔn, ɛkɔrɛ̀-srɔn-wrɔn kɛ dɔ̀ nɔn.”